Слерге Иисустыҥ кийнинеҥ барарга кандый да буудак болбозын!

1, 2. Бир социолог нени айткан? Бу јӧрмӧлдӧ бис нени шӱӱжерис?

БӰГӰНГИ кӱнде канча миллион улус: «Бис Иисуска бӱдедис» — деп айдат, је оныҥ ӱредӱлерин бӱдӱрбей јат (2 Тим. 4:3, 4). Бир социологтыҥ айтканыла: «Эмди „јаҥы“ Иисус келип, алдында јаткан Иисустыҥ ӱредӱлерин улуска ӱреткен болзо, улус оны угар беди? Эки муҥ јыл кайра чылап, оны база ла кем де укпас эмес пе?»

² Баштапкы чакта кӧп улус Иисустыҥ эткен кайкамчылу керектерин кӧргӧн дӧ болзо, је ого тӱҥей ле бӱтпеген. Нениҥ учун бӱтпегениниҥ ӧткӧн јӧрмӧлдӧ тӧрт шылтагын кӧргӧнис. Бу јӧрмӧлдӧ база тӧртӱзин кӧрӱп ийерис. Анайда ок нениҥ учун улус бӱгӱнги кӱнде Иисустыҥ ӱренчиктерин укпай турганын билип аларыс. Оноҥ бис бӱткенисти канайып тыҥыдар аргалу деп кӧрӱп ийерис.

1. ИИСУС УЛУСТЫ ТАЛДАБАГАН

3. Нениҥ учун кӧп улус Иисуска бӱтпеген?

³ Иисус јерде болордо, башка-башка улусла куучындажып туратан: арга-чакту, атту-чулу да улуста айылдаган, јокту-јойу да улусла најылашкан. Керек дезе ол, улустыҥ јаман кӧрӱп турган «кинчектӱлерле» де куучындашкан. Оныҥ учун бийиркек улуска Иисуска бӱдерге кӱч болгон. Олордыҥ: «Слер каланчыларла, кинчектӱлерле кожо не керек ичип-јип јадыгар?» — деген Иисустыҥ ӱренчиктерине берген сурагына Иисус мындый каруу берген: «Эмчини кадык улус эмес, оору улус керексиир. Мен Кудайга баштанзын деп, актуларды эмес, кинчектӱлерди кычырарга келгем» (Лука 5:29—32).

4. Исаияныҥ судурынаҥ еврейлер Мессия керегинде нени билген болор?

⁴ Агару Бичик нени айдат? Исаияныҥ судурында улус Мессияны јуутпас деп айдылган. Иисустыҥ јерге келеринеҥ кӧп јылдар озо ол мынайып айткан: «Улус оны јаман кӧрӱп, оны јуутпай туратан... Оныҥ јӱзин кӧрбӧскӧ кӧстӧристи туура алатаныс. Бис оны јаман кӧрӱп, кижи кире бодобогоныс» (Иса. 53:3). Баштапкы чакта јаткан еврейлер улус Мессияны јаман кӧрӧр деп билер болгон. Оныҥ учун олорго, улус Иисусты Мессия деп бӱтпей турганына кайкабас керек болгон.

5. Кӧп улус Иегованыҥ ишчилерине канайып кӧрӧт?

⁵ Бӱгӱнги кӱнде айалга кандый? Бӱгӱнги кӱнде кудай јаҥныҥ башчыларына, анчада ла арга-чакту, атту-чулу, јамызы, ӱредӱзи бийик улусты кудай јаҥына кийдирерге јарап јат. Је бу улус Кудайдыҥ бийик нормаларыла јӱрбей јат. Олорго кӧрӧ Иегованыҥ нормаларын акту јӱректеҥ бӱдӱрип турган улусты кудай јаҥныҥ башчылары кӧрӧр кӱӱни јок. Нениҥ учун дезе олор Кудайдыҥ ишчилерин не де киреге бодобой јат. Је Павелдиҥ айтканыла, Иегова телекейде јабыс кӧрдӱрип турган улусты талдап алат (1 Кор. 1:26—29). Улус бисти канай да јаман кӧрзӧ, је Иегова бойыныҥ ишчилерин сӱреен тыҥ баалайт.

6. Матфей 11:25, 26 биске Иисустыҥ кийнинеҥ барарга канайып болужат?

⁶ Бӱткенисти тыҥыдарга нени эдер керек? (Матфей 11:25, 26 кычырыгар.) Бу телекей Иегованыҥ ишчилерин јаман кӧрӧт. Је биске олордыҥ кӧрӱмин алынбас керек. Ундыбагар, Иегова бойыныҥ ижин јӱк ле јобош улуска берип јат (Сар. 138:6). Иегова телекейдиҥ кӧрӱмиле ойгор до эмес, санаалу да эмес улустыҥ болужыла сӱреен кӧп иш эдет.

2. ИИСУС УЛУСТЫҤ ЈАСТЫРА КӦРӰМИН ИЛЕЗИНЕ ЧЫГАРГАН

7. Нениҥ учун Иисус фарисейлерди эки јӱстӱлер деп адаган? Олор Иисустыҥ сӧстӧрин угуп, канайып турдылар?

⁷ Иисус улустыҥ сананып тапкан чӱм-јаҥдарыныҥ јастыразын олордыҥ кӧзине ле ачыгынча айдып беретен. Темдектезе, фарисейлерге колдорын јунатан чӱм-јаҥ ада-энезин кичейтенинеҥ артык болгон (Матф. 15:1—11). Ӱренчиктер Иисустыҥ сӧстӧрин кайкап, мынайып сурадылар: «Бу сӧсти угала, фарисейлер тарынып, кӧксине алынбаганын билериҥ бе?» Је Иисус олорго мындый каруу јандырды: «Теҥеридеги Адам тарыбаган кандый ла ӧзӱм тазылы-сула кодорылар... Олорго тийбегер, олор — сокорлордыҥ сокор башчылары. Сокорды сокор јединзе, экилези орого тӱжер» (Матф. 15:12—14) Фарисейлер Иисустыҥ айткан сӧстӧрине коркышту тыҥ ачынгылап та турган болзо, је Иисус оноҥ ло ары јарлаган.

8. Иегова кезик ӱредӱлерди јаратпай турган деп, Иисус канайып јартады?

⁸ Анайда ок Иисус тӧгӱн ӱредӱлердиҥ јастыразын кӧргӱзип туратан. Иегова кудай јаҥдардыҥ ончо ӱредӱлерин јарадып турган деп, Иисус качан да айтпаган. Карын ӧлӱмге апарып јаткан јол элбек деп айткан, је јӱрӱмге апарып јаткан јол чичке деп айткан (Матф. 7:13, 14). Кӧп улус Кудайга бажырып турганыс деп айдып јат, је чынынча болзо, олор Кудайдыҥ нормаларын бӱдӱрбей јат деп, Иисус јарт айткан: «Тӧгӱн јарлыкчылардаҥ чеберленигер. Олор слерге кой терезин јабынган келгилейт, ичин кӧрзӧ, казыр бӧрӱлер. Олорды бӱткен јиилегинеҥ таныырыгар» (Матф. 7:15—20).

9. Иисус кандый ӱредӱлердиҥ јастыразын кӧргӱскен?

⁹ Агару Бичик нени айдат? Бир судурда Мессия керегинде мынайып айдылган: «Сениҥ айлыҥ учун ичим кӱйӱп, мени јалбыш чылап јиир» (Сар. 69:9; Иоанн 2:14—17). Мынаҥ улам Иисус тӧгӱн ӱредӱлердиҥ ле чӱм-јаҥдардыҥ јастыразын кӧргӱскен. Темдектезе, фарисейлердиҥ ӱреткениле, кижи божозо, сӱнези оноҥ ло ары тирӱ јӱрет. А Иисустыҥ ӱреткениле, божогон кижиниҥ јӱрӱми токтоп калат (Иоанн 11:11). Саддукейлер дезе, тирилиш јок деп ӱреткен, је Иисус Лазарь најызын тиргизип ийген (Иоанн 11:43, 44; Ап. ижи 23:8). Анайда ок фарисейлер, Кудай кажы ла кижиге салым берип койгон деп бӱткен, је Иисус дезе, Кудайга иштеер бе, јок по деп кажы ла кижи бойы талдаар аргалу деп ӱреткен (Матф. 11:28).

10. Нениҥ учун кӧп улус бисти јуутпайдылар?

¹⁰ Бӱгӱнги ӧйдӧ айалга кандый? Кӧп улус бисти укпай јат, нениҥ учун дезе бис база Агару Бичиктиҥ болужыла кудай јаҥдардыҥ ӱредӱлериниҥ тӧгӱнин иле чыгарадыс. Темдектезе, кудай јаҥдардыҥ башчылары Кудай отту таамыда јаман улусты кыйнап турган деп ӱреткениле, улусты коркыдып јат. Је бис, Иегованыҥ ишчилери, Кудай улусты сӱӱп турган деп ӱредедис. Кудай јаҥныҥ башчылары кижиниҥ сӱнези бар деп ӱредип јат. Је бис дезе, сӱне керегинде ӱредӱ языческий ӱредӱлерге тайанган деп јарт кӧргӱзедис. Не дезе, бу ӱредӱ чын болгон болзо, тирилиш керек те јок болор эди. Анайда ок кудай јаҥдардыҥ башчылары Кудай кажы ла кижиге салым берип койгон деп ӱредет. Је олорго кӧрӧ Кудай улуска салым эмес, јайым берген деп ӱредедис. Кажы ла кижи Кудайга иштеер бе, јок по деп бойы талдаар аргалу. Кудай јаҥныҥ башчылары мыны ӱзе угуп, тыҥ атыйланып јат.

11. Иоанн 8:45—47-деги Иисустыҥ сӧстӧриле болзо, Иегова бойыныҥ ишчилеринеҥ нени некейт?

¹¹ Бӱткенисти тыҥыдарга нени эдер керек? Бис чындыкты сӱӱзеес, Иегованыҥ сӧзине бӱдерис ле ого сӧсуккур болорыс. (Иоанн 8:45—47 кычырыгар.) Сатанага кӧрӧ бис чындыкта бек туруп, Иегованыҥ ӱредӱлерине келишпей турган керектерди этпейдис (Иоанн 8:44). Иегова ишчилеринеҥ: «Јаманды кӧрӧр кӱӱнигер јок болзын, јакшыдаҥ тудуныгар» — деп некейт (Рим. 12:9). Иисус шак ла мынайып јӱрген (Евр. 1:9).

3. ИИСУСТЫ ИСТЕГИЛЕГЕН

12. Иисустыҥ столмого божогонына кӧп еврейлер нениҥ учун бӱдӱрилген?

¹² Еврейлер Иисусты Мессия деп, база нениҥ учун бӱтпеген? Павелдиҥ айтканыла: «Бис дезе кере тартылган Христосты јарлыктайдыс. Ол — иудейлерге бӱдӱрилтер таш» (1 Кор. 1:23). Кӧп еврейлер Иисусты столмого божогоны учун јуутпаган. Нениҥ учун дезе олордыҥ санаазыла, Иисус Мессия болгон болзо, ол кинчек эткен кижи чилеп божобос эди (Јаҥ. т. 21:22, 23).

13. Иисусты Мессия деп алынбаган еврейлер неге бӱдер кӱӱндери јок болгон?

¹³ Иисусты Мессия деп алынбаган еврейлер, Иисустыҥ бурулу эмес болгонына, оны актуга ла бурулап салганына, анайда ок несправедливо јаргылатканына бӱдер кӱӱндери јок болгон. Иудейлердиҥ ӱстиги јаргызы, юридический нормаларды бузуп, Иисусты тӱнде меҥдей-шиҥдей јаргылаган (Лука 22:54; Иоанн 18:24). Јаргычылар Иисустыҥ керегиниҥ аайын јазап угардыҥ ордына, «Иисусты ӧлӱмге берип ийерге, Ого удура тӧгӱн кере бедиредилер». Чек неме келишпей турарда, јаргычылар Иисус бойын бойы јабарлап салзын деп, сӱмелӱ сурактар берип турдылар (Матф. 26:59; Марк 14:55—64). Керек дезе еврейлер Иисустыҥ сӧӧгин каруулдаган Римниҥ јуучылдарына, Иисустыҥ сӧӧги аайынча тӧгӱндеп ийзин деп, «арбынду акча» бергилеген (Матф. 28:11—15).

14. Агару Бичикте Мессияныҥ ӧлӱми керегинде кандый судур бичилген?

¹⁴ Агару Бичик нени айдат? Кӧп иудейлер Мессия божоор учурлу деп сананбаган. Је бир судурда мынайып айдылган: «Ол бойыныҥ јӱрӱмин берген, оны јаман керектер эдип турган улустыҥ тоозына кошкылаган, улустыҥ кинчегин бойына алынып, олордыҥ адаанын алып туратан» (Иса. 53:12). Оныҥ учун Иисусты јаман керектер эткен кижи деп, ӧлтӱрип салган да болзо, иудейлерде Иисус Мессия эмес деп бӱтпейтен шылтак болбогон.

15. Иегованыҥ Керечилерине улус нениҥ учун бӱтпей турган?

¹⁵ Бӱгӱнги кӱнде айалга кандый? Канайып алдында иудейлер Иисусты актуга ла бурулап, јаргылап салгылаган, анайып ла бистиҥ ӧйдӧ Иегованыҥ Керечилерин база ла актуга ла бурулап, истежип јадылар. Тоолу темдер кӧрӱп ийектер. 1930—40 јылдарда США-да Иегованыҥ Керечилерине Кудайына јайым бажырарга кӧп јаргылар ӧдӧргӧ келишкен. Анайда ок Квебекте, Канадада, католический серкпе ле ороонныҥ јаҥы биригип, Иегованыҥ Керечилерин јарлаар ижи учун истешкен. Кийнинде, нацистский Германияда, бистиҥ кӧп јиит карындаштарды ӧлтӱрип салган. Калганчы јылдарда Россияда, Иегованыҥ Керечилерин актуга ла бурулап, тӱрмелеп јат. Олорды улусла Агару Бичик керегинде куучындажып турганы учун, экстремисттер деп јаргылап јат. Керек дезе, «Јаҥы телекейдиҥ кӧчӱрмезин» анда Иегова деп ат ла бар учун экстремистский материалдардыҥ тоозына кожуп салган.

16. 1 Иоанн 4:1-ле болзо, биске Иегованыҥ Керечилери керегинде тӧгӱнге нениҥ учун бӱтпес керек?

¹⁶ Бӱткенисти тыҥыдарга нени эдер керек? Айалганы ээлбеде кӧрӱгер. Иисустыҥ ӱренчиктери керегинде улус кӧк-тӧгӱн неме айдар деп, Иисус судурлаган болгон (Матф. 5:11). Андый тӧгӱнди Сатана јайат. Шак ла Сатана улусты бисти бурулап, јамандазын деп кӱӱнзедип јат (Ачыл. 12:9, 10). Оныҥ учун бу тӧгӱнге бир де бӱтпегер. Калак, коркып баштайла, бӱдеригер уйадап калбазын. (1 Иоанн 4:1 кычырыгар.)

4. ИИСУСТЫ САДЫП, ТАШТАП ИЙГЕНДЕР

17. Иисустыҥ божоор алдында болгон учуралдарды кӧрӱп, кезик улус нени сананган болор?

¹⁷ Иисустыҥ божоор алдында 12 апостолыныҥ бирӱзи оны садып ийген. База бирӱзи Иисустаҥ ӱч катап јана тӱшкен. Учында апостолдордыҥ ончозы Иисусты артыргызып, качкылай бергилеген (Матф. 26:14—16, 47, 56, 75). Је Иисус бого бир де кайкабаган. Андый болор деп ол судурлаган да болгон (Иоанн 6:64; 13:21, 26, 38; 16:32). Бу учурал та кемге де бӱдӱрилетен таш болгон болор. Мынаҥ улам кемге де: «Иисустыҥ апостолдоры Иисусты таштап, не ле болгылап турарда, мен олорго канайып бӱдетем?!» — деп санаалар келген болор.

18. Иисустыҥ божоорынаҥ озо кандый судурлар бӱткен?

¹⁸ Агару Бичик нени айдат? Иисустыҥ божоорынаҥ канча јӱс јылдар озо Иегова бойыныҥ Сӧзинде Мессия «одус мӧҥӱн акчага» садылар деп судурлап салган (Зах. 11:12, 13). База бир судурла болзо, Иисусты оныҥ јуук најызы садып ийер (Сар. 41:9). Анайда ок Захарияныҥ судурында мынайып айдылган: «Кӱдӱчини ӧлтӱрип ийзеҥ, ӱӱрдиҥ койлоры тозо берер» (Зах. 13:7). Иисустыҥ мынайып божогонын кӧргӧн улустыҥ јӱреги ачык болгон болзо, олор бого бӱдӱрилбес эди. Карын, судурлар бӱдӱп јаткан деп кӧрӱп, бӱдери тыҥыыр эди.

19. Ачык јӱректӱ улус нени оҥдогылайт?

¹⁹ Бӱгӱнги кӱнде айалга кандый? Бӱгӱнги де кӱнде Иегованыҥ кезик јарлу ишчилери чындыктаҥ јана базып, кезик улусты да туура тартарга албаданат. Олор СМИ ле интернет ажыра Иегованыҥ организациязын јамандап јат эмезе тӧгӱнди-чынды булгаштырала, кӧк-тӧгӱн јетирӱлер јайат. Је ачык јӱректӱ улус мындый тӧгӱнге кирбейдилер. Карын олор мынайып судурлардыҥ бӱдӱп турганын кӧргӱлейт (Матф. 24:24; 2 Петр 2:18—22).

20. Чындыктаҥ јана баскан улустыҥ тӧгӱнине кирбеске биске не болужар? (2 Тимофейге 4:4, 5).

²⁰ Бӱткенисти тыҥыдарга нени эдер керек? Јаантайын Агару Бичикти ӱренигер, мӱргӱгер, Кудайдыҥ берген ижин бӱдӱригер. (2 Тимофейге 4:4, 5 кычырыгар.) Анайда ок бӱдерис бек болзо, бис Иегованыҥ Керечилери керегинде јаман јетирӱлердеҥ коркыбазыс (Иса. 28:16). Јана баскан улустыҥ тӧгӱнине кирбеске Иегованы, оныҥ Сӧзин, анайда ок ака-эјелерди сӱӱгер.

21. Кӧп саба улус бистиҥ јарды укпай турган да болзо, бис неде алаҥзыбайдыс?

²¹ Баштапкы чакта кӧп саба улус Иисуска бӱтпеген де болзо, је бӱткен де улустыҥ тоозы ас эмес. Олордыҥ тоозында Синедрионныҥ, ас ла салза, бир кижизи болгон болор. Анайда ок «абыстардаҥ да сӱрекей кӧп улус» Иисуска бӱткен болор (Ап. ижи 6:7; Матф. 27:57—60; Марк 15:43). Бӱгӱнги кӱнде дезе Иисуска канча миллион улус бӱдет. Нениҥ учун дезе олор Кудайдыҥ Сӧзиндеги чындыкты билер, бу чындыкты сӱӱп јадылар. Агару Бичикте айдылганыла: «Сениҥ јасагыҥды сӱӱп турган улус амыр-энчӱ јӱрет, олор кандый да ташка бӱдӱрилбей јат» (Сар. 119:165).