Бой-бойоорды акту јӱрегердеҥ сӱӱгер

1, 2. Бой-бойысты акту јӱректеҥ, ол эмезе чындык сӱӱшле сӱӱйтен кандый ӱч шылтак бар?

БИСТЕ бой-бойысты акту јӱректеҥ, ол эмезе чындык сӱӱшле сӱӱйтен кӧп шылтактар бар. Темдектезе, Укаа сӧстӧрдӧ мынайып бичилген: «Чындык сӱӱшти ле чындык болорын артыргыспа. ...Ол тушта сен Кудайдаҥ ла улустаҥ јараду аларыҥ»; «Олордыҥ алдына јакшы адыҥ чыгар»; «Јалакай кижи [«чындык сӱӱшле сӱӱп турган», сноска] бойыныҥ ла јалакайынаҥ туза алат»; «Чындык болорго ло акту јӱрегинеҥ сӱӱрге албаданган кижи јӱрӱм ле мак алар» (Укаа 3:3, 4; 11:17; 21:21).

² Бу укаа сӧстӧрдӧ биске бой-бойысты нениҥ учун акту јӱректеҥ сӱӱр керек деп айдылган. Баштапкызында, Иегова андый кылык-јаҥду улусты сӱреен баалап јат. Экинчизинде, андый кылык-јаҥнаҥ биске бойыска ла туза болот. Темдектезе, бис ака-эјелерге јакшы најы болор аргалу. Ӱчинчизинде, Иегованы ла улусты акту јӱрегинеҥ сӱӱп турган кижи келер ӧйдӧ кайрал алар. Ол тоодо ӱргӱлји јӱрӱм алар. Оныҥ учун ака-эјелерди акту јӱректеҥ сӱӱбейтен шылтак јок дезеер? (1 Сам. 20:14).

3. Бу јӧрмӧлдӧ бис кандый сурактар шӱӱжерис?

³ Бу јӧрмӧлдӧ бис тӧрт сурак шӱӱжип ийерис: бис кемди акту јӱрегистеҥ сӱӱр учурлу? Руфь деп бичик чындык сӱӱш керегинде бисти неге ӱредет? чындык сӱӱшти керектерле канайып кӧргӱзерис? Иегованы ла ака-эјелерди акту јӱректеҥ сӱӱп турган кижиге кандый кайрал берилер?

БИС КЕМДИ АКТУ ЈӰРЕКТЕҤ СӰӰР УЧУРЛУ?

4. Иегова кемди акту јӱрегинеҥ сӱӱйт? Бис оноҥ кандый тем аларыс? (Марк 10:29, 30).

⁴ Ӧткӧн јӧрмӧлдӧ Иегова бойыныҥ улузын канайып акту јӱрегинеҥ сӱӱп турганын шӱӱшкенис. Иегова бу изӱ сӱӱжиле јӱк ле оны сӱӱп турган ла ого иштеп турган улусты сӱӱп јат (Дан. 9:4). Канайып ада-энезиниҥ сӱӱжин кӧрӱп ӧскӧн бала, адазыныҥ теминеҥ улусты сӱӱрге ӱренип алат. Анайып ла бис Иегова Адабыстаҥ улусты сӱӱрге ӱренедис (Еф. 5:1). Оныҥ учун бис ака-эјелерди акту јӱрегистеҥ сӱӱп, олорго чындык најы болорго кӱӱнзейдис. (Марк 10:29, 30 кычырыгар.)

5, 6. Бу темде айдылган кижини ижин акту јӱрегинеҥ сӱӱп турган деп, айдып болорыс па?

⁵ Акту јӱрегинеҥ сӱӱри дегенин канча ла кире јакшы билзеес, ончо ло кире ака-эјелерди тыҥ сӱӱрис. Оныҥ учун бир темниҥ болужыла, бу сӱӱш керегинде тереҥжиде кӧрӱп ийектер.

⁶ Темдектезе, бир кижи узак јылдардыҥ туркунына бир ле компанияда иштеп јат. Ол бойыныҥ ижин ӱзе јакшы эдип турган болор, је ол кижини бойыныҥ компаниязын, директорлорын акту јӱрегинеҥ сӱӱп турган деп, айдып болорыс па? Кӧп сабада јок болбой. Нениҥ учун дезе ол бойыныҥ директорлорын бир де кӧрбӧгӧн дӧ болор. Ол эмезе компанияныҥ бир кезик башкартуларыла јӧпсинбей де турган болор. Айдарда, бу кижи компанияныҥ иш-јалы јакшы ла болгонынаҥ улам ондо иштеп турган. Ол бу ижине мынаҥ јакшы иш келишпезе, пенсияга да јетире иштеер.

7, 8. а) Кижи нениҥ учун акту јӱрегинеҥ сӱӱп јат? б) Руфь деген бичиктеҥ бис неге ӱренер аргалу?

⁷ Бу темде кӧргӧн кижи сӱӱжин акту јӱрегинеҥ кӧргӱзип турган кижинеҥ незиле башка? Кӱӱн-санаазыла. Сӱӱжин акту јӱрегинеҥ кӧргӱзип турган кижи, та нени де аларга ла болуп сӱӱп турган эмес. Иегованыҥ азыйдагы ишчилери бой-бойын недеҥ улам акту јӱрегинеҥ сӱӱген? Давидтиҥ учуралын кӧрӱп ийектер. Ол Ионафанныҥ јуук најызы болгон. Давид Ионафанды акту јӱрегинеҥ сӱӱген. Мыны бис Ионафанныҥ адазы, Саул, Давидти ӧлтӱрерге де турарда, ол најызын таштабаганынаҥ кӧрӱп јадыс. Керек дезе Ионафанныҥ божогонынаҥ канча јылдар ӧдӱп те каларда, ол оныҥ Мефивошет уулына карузып болушкан (1 Сам. 20:9, 14, 15; 2 Сам. 4:4; 8:15; 9:1, 6, 7).

⁸ Анайда ок Кудайдыҥ ишчилери бой-бойын акту јӱрегинеҥ канайып сӱӱгени керегинде Руфь деген бичиктеҥ билип аларга јараар. Мындагы улустыҥ темдеринеҥ бис ака-эјелерди акту јӱректеҥ сӱӱрге ӱренип аларысb.

РУФЬ ДЕГЕН БИЧИКТЕҤ АКТУ ЈӰРЕКТЕҤ СӰӰРИ КЕРЕГИНДЕ НЕНИ БИЛИП АЛДЫС?

9. Ноеминь нениҥ учун Иегованы бурулаган?

⁹ Руфь деген бичикте, Ноеминь, оныҥ келди Руфь ла Боаз керегинде бичилген. Боаз Ноеминьниҥ ӧбӧӧниниҥ тӧрӧӧн кижизи. Ол Кудайга чындык кижи болгон. Израильде торо ӧй башталарда, Ноеминь ӧбӧӧниле, эки уулыла кожо Моав јерине кӧчӱп барган. Ондо Ноеминьниҥ эш-нӧкӧри божоп калган. Соҥында эки уулы кижи алган, је олор до божоп калгылаган (Руфь 1:3—5; 2:1). Мынаҥ улам Ноеминь ачу-коронго бастыртып, Иегованы бурулаган. Оныҥ андый сезимдери бу сӧстӧринеҥ кӧрӱнет: «Иегова меге ачу-корон ийген»; «Кӱчтӱдеҥ Кӱчтӱ јӱрӱмимди коркышту кӱч эдип салган»; «Иеговага керек јок болуп калдым» (Руфь 1:13, 20, 21).

10. Иегова Ноеминьниҥ ачу сӧстӧрине ачынган ба?

¹⁰ Иегова Ноеминьниҥ ачу сӧстӧрине бир де ачынбаган. Карын ол Ноеминьниҥ сезимдерин оҥдоп, ого кӱч болуп турганын кӧрӱп, килеген. Нениҥ учун дезе Иегова «ойгор кижи кӱч айалганаҥ улам коркышту јаман керектер эдердеҥ айабас» деп, сӱреен јакшы айлап турган болгон (Эккл. 7:7). Оныҥ да учун Иегова Ноеминьди токунадарга, Руфь ажыра болужып јат (1 Сам. 2:8). А Руфь бойыныҥ кайын энезин акту јӱрегинеҥ сӱӱп турган болгон. Мынайып Руфь Ноеминьге кӧгӱс јанынаҥ болужып, кӱӱнин кӧдӱрип салган. Руфьтиҥ теминеҥ бис неге ӱренер аргалу?

11. Кунугып калган ака-эјелерге бис нениҥ учун болужадыс?

¹¹ Сӱӱжис акту јӱректеҥ болзо, кунугып турган ака-эјелерге болужарга кӱӱнзеерис. Руфь Ноеминьди артыргыспаган. Анайып ла бис кунугып турган ака-эјелерди артыргыспай јадыс. Нениҥ учун дезе бис олорды сӱӱйдис, канча кире аргабыс бар олорго болужарга албаданадыс (Укаа 12:25; 24:10). Апостол Павел мынайып айткан: «Чинези јокты кӧкӱдигер, јӱдектерди јӧмӧгӧр, ончо улуска узакка чыдамкай болыгар» (1 Фес. 5:14).

12. Кунуккан кижиге кӧп лӧ сабада кандый болуш керек болот?

¹² Кунугып калган ака-эјеге болужарга, оны јазап угар керек, ого сӱӱжисти кӧргӱзер керек. Мынайып Иегованыҥ баалу койына болушканыс Кудайдыҥ кӧзинеҥ туура калбас (Сар. 41:1). Нениҥ учун дезе Укаа сӧстӧр 19:17-де айдылганыла: «Јоктуга јакшыны эткен кижи Иеговага тӧлӱге берет. Ол андый кижиге кайрал берер».

13. Руфь ла Орфаныҥ нези башка? Руфьтиҥ кайын энезин акту јӱрегинеҥ сӱӱгени недеҥ кӧрӱнет? (Кадарындагы јурукты кӧрӱгер.)

¹³ Чындык сӱӱштиҥ јаражын кӧрӧргӧ, Ноеминьниҥ учуралын оноҥ ары кӧрӱп ийектер. Ноеминь «Иегова албатызына ајару эдип, ого калаш бергенин» угуп ийеле, Израильдӧӧн кайра јанарга сананып јат. Эки келди оныла кожо барган (Руфь 1:6). Је јолой Ноеминь олорды Моавтӧӧн кайра јангылазын деп, ӱч катап сурады. Оныҥ учун «Орфа кайын энезин окшоп ийеле, јана берди. Је Руфь артып калды» (Руфь 1:7—14). Руфь та Орфа чылап, Моавтӧӧн кайра јанар аргалу болгон, је кайын энезин акту јӱрегинеҥ сӱӱгенинеҥ улам оныла кожо арткан (Руфь 1:16, 17). Руфьтиҥ теминеҥ бис неге ӱренедис?

14. а) Бӱгӱнги кӱнде ака-эјелер Руфьтаҥ кандый тем алат? б) Еврейлерге 13:16-ла болзо, бис нени этсеес, Иегованы сӱӱндирип јадыс?

¹⁴ Ака-эјелерди акту јӱректеҥ сӱӱп турган болзоос, олорго артыгынча болужып турарыс. Бӱгӱнги де кӱнде кӧп ака-эјелер бой-бойын акту јӱрегинеҥ сӱӱп јат. Олор таныш эмес те ака-эјелерге болужат. Темдектезе, ар-бӱткенниҥ тӱбеги тӱшкен улуска болужып јадылар эмезе јуунда кемге-кемге болуш керек боло берзе, олорды сурагалакта ла, олор ака-эјеге барып, болужып јат. Мынайып олор баштапкы чактыҥ Македонияныҥ ака-эјелерине тӱҥей. Олор бойлоры да јокту јаткан болзо, је олордоҥ кӱч айалгада болгон ака-эјелерге акту јӱрегинеҥ артыгынча болужарга белен болгон (2 Кор. 8:3). Ака-эјелердиҥ бой-бойын мынайып акту јӱрегинеҥ сӱӱп турганын кӧрӱп, Иегова тыҥ сӱӱнип јат. (Еврейлерге 13:16 кычырыгар.)

АКТУ ЈӰРЕКТЕҤ СӰӰРИ КАНДЫЙ КЕРЕКТЕРДЕҤ КӦРӰНЕТ?

15, 16. Руфьтиҥ албадаҥкайы недеҥ кӧрӱнген?

¹⁵ Руфьтиҥ Ноеминьге болушканынаҥ бис кӧп немеге ӱренип алар аргалу. Неге? Олордыҥ кезигин кӧрӱп ийектер.

¹⁶ Кижи слердиҥ болужыгарды албай да турза, оноҥ ло ары болужарга албаданыгар. Руфь Ноеминьге болужарга турарда, Ноеминь чек болбой турды. Је андый да болзо, Руфь кайра јӱре бербеген. Ол оноҥ ло ары болужарга албаданган. Оныҥ учун «Ноеминь Руфьтиҥ оныла кожо барарга бек шӱӱп алганын кӧрӱп, оны јанзын деп сурабай барган» (Руфь 1:15—18).

17. Кижи болуш аларга кӱӱнзебей де турза, бис нениҥ учун оноҥ ло ары ого болужарга албаданарыс?

¹⁷ Бис неге ӱренедис? Кунугып калган кижиге болужарга, чыдамкай болор керек. Кижи болужыгарды албай да турза, ого тӱҥей ле болужарга албаданар керек. Темдектезе, кандый бир эјеc кӱч айалгага кирип калган болзын. Слер ого болужарга турараарда, ол болбой турган болор. Је акту јӱрегинеҥ сӱӱп турган кижи најызын таштабай јат (Гал. 6:2). Оныҥ учун эје слердиҥ болужыгарды аларга јӧпсинереер болор деп иженип, слер ого оноҥ ло ары болужарга албаданадаар.

18. Руфь Ноеминьге недеҥ улам ачынар аргалу болгон?

¹⁸ Ачынбагар. Ноеминь Вифлеемге јанып келеле, јанында јаткан улуска мынайда айткан: «Јӱрӱп јадарымда менде ӱзе болгон, је Иегова мени не де јок јандырып экелди» (Руфь 1:21). Канай сананып тураар, Руфька мындый сӧстӧр угарга кандый болды не? Руфь Ноеминьге болуп, бойыныҥ јерин артыргыскан, оны токунадарга кожо ыйлаган, оныла кожо ыраак јердеҥ келген. А Ноеминь Руфьтиҥ ле кӧзинче: «Иегова мени не де јок јандырып экелди» — деп айдып јат. Руфька кандый ачынчылу болды не, мындый сӧстӧрди угарга! Руфьтиҥ канча кире болужын Ноеминь кӧрбӧй турган деп билдирген болор. Је андый да болзо, Руфь Ноеминьди таштабаган.

19. Кижиниҥ ачу сӧстӧрине ачынбаска биске не болужар?

¹⁹ Бис неге ӱренедис? Слер кандый бир эјеге кӧп болушкан болороор. А ол слерге, изӱ тарый, кандый бир ачу сӧстӧр айдып ийердеҥ айабас. Андый сӧстӧрди бойоорго алынбагар, ачынбагар, эјени таштабагар. Карын ол эјеге канай болужатанын оҥдоп ийерге, Иегованаҥ болуш сурагар (Укаа 17:17).

20. Руфька Ноеминьди оноҥ ары кичеерге не болушкан?

²⁰ Ака-эјелерге болужатан арганы ычкынбагар. Руфь Ноеминьди акту јӱрегинеҥ сӱӱген. Оныҥ учун ол ого бастыра ийде-кӱчинеҥ болушкан. Је ого бойына да болуш керек болгон. Оныҥ учун Иегова Руфьти Боаз ажыра мынайып токунадып јат: «Иегова сени јакшы керектериҥ учун алкап салзын. Израильдиҥ Иегова Кудайынаҥ сеге арбынду кайрал берилзин. Сен оныҥ канаттарыныҥ алдына коруланарга келдиҥ». Руфька мындый сӧстӧр угарга сӱреен керектӱ болгон. Мынаҥ улам оныҥ кӱӱни кӧдӱрилгени оныҥ сӧстӧринеҥ кӧрӱнет: «Сен мени, бойыҥныҥ кулыҥды, токунадып салдыҥ» (Руфь 2:12, 13). Боазтыҥ јазап сананып айткан јылу сӧстӧри Руфька Ноеминьди оноҥ ло ары кичеерге ийде-кӱч берген.

21. Исайя 32:1, 2-ле болзо, аксагалдарга кандый болор керек?

²¹ Бис неге ӱренедис? Улуска акту јӱрегинеҥ болужып турган ака-эјелерге бойлорына да болуш керек болот. Темдектезе, Боазтыҥ јылу сӧстӧри Руфьтиҥ кӱӱн-санаазын кӧдӱрип салган. Аксагалдар Боазтаҥ тем алып, ака-эјелерди јакшы керектери учун мактап јат. Олордыҥ јазап сананып айткан јылу сӧстӧри ака-эјелердиҥ кӱӱнин кӧдӱрип салат. Мындый сӧстӧр ака-эјелерге улусты оноҥ ло ары акту јӱрегинеҥ кичеерге ийде-кӱч берет. (Исайя 32:1, 2 кычырыгар.)

АКА-ЭЈЕЛЕРДИ АКТУ-ЈӰРЕКТЕҤ СӰӰГЕН КИЖИ КАНДЫЙ КАЙРАЛ АЛАР?

22, 23. Ноеминьниҥ кӱӱн-санаазы канайып солынган? Нениҥ учун? (Сарын 136:23, 26).

²² Бир эмеш ӧйдӧҥ Боаз Ноеминьге ле Руфька кӧп аш берген (Руфь 2:14—18). Ноеминь мындый сыйды алала, мынайып айткан: «Тирӱ јӱргендерди де, божоп калгандарды да, акту јӱрегинеҥ сӱӱп турган Иегова оны алкап салзын» (Руфь 2:20а). Ајардаар ба, Ноеминьниҥ кӱӱн-санаазы канай солына бергенин? Мынаҥ ла озо ол кӧзиниҥ јажын арчып: «Иеговага керек јок болуп калдым» — деп айдып турган кижи,— «Тирӱ јӱргендерди... акту јӱрегинеҥ сӱӱп турган Иегова» — деп айдып јат. Бу сӧстӧрдӧҥ оныҥ сӱӱнип турганы кӧрӱнет. Ноеминьниҥ кӱӱн-санаазы нениҥ учун солынып калган?

²³ Ноеминь Иегова оны бир де артыргыспаган деп оҥдоп ийген. Моав јеринеҥ Иудеядӧӧн јанып келедерде, Иегова оны Руфь ажыра кичееген (Руфь 1:16). Анайда ок Иегова Боаз та ажыра, «тӧрӧӧнин садып алар јаҥду»d кижи ажыра, олор экӱге сӱӱжин кӧргӱскен (Руфь 2:19, 20б). Ноеминь мынай сананган болор: «Бот, эмди мен оҥдоп јадым. Иегова мени бир де артыргыспаган, јаантайын јанымда болгон эмтир!» (Сарын 136:23, 26 кычырыгар.) Мынаҥ улам Ноеминьниҥ кӱӱн-санаазы јарыган. Ол ӧйдӧ бу ӱчӱ не аайлу сӱӱнген болор!

24. Биске ака-эјелерди нениҥ учун акту јӱректеҥ сӱӱр керек?

²⁴ Руфь деген бичиктеҥ бис неге ӱренип алдыс? Ака-эјелерди акту јӱрегинеҥ сӱӱп турган кижи олорды таштабай, олорго артыгынча болужарга белен болуп јат. Аксагалдар акту јӱрегинеҥ болужып турган ака-эјелерди јылу сӧстӧриле мактап јат. Анайда ок, бис ака-эјелерди акту јӱректеҥ сӱӱзеес, олорго ийде-кӱч бередис. Болушканыстаҥ бойыс та сӱӱнчи аладыс (Ап. ижи 20:35). Је ака-эјелерди акту јӱрегистеҥ сӱӱп турганыстыҥ эҥ јаан шылтагы — бис Иегованаҥ тем аларга ла оныҥ јарадузын аларга кӱӱнзеп јадыс! А Иегова бисти акту јӱректеҥ сӱӱп турган Кудай (Сар. 103:8; 33:22).