Агару Бичиктеҥ оныҥ Чӱмдеечизи керегинде нени билип аладыс?

1. Слер нениҥ учун Кудайдыҥ Сӧзин баалап јадаар?

БИС Иеговага Агару Бичик учун јаан-јаан быйаныс айдадыс! Бу бичиктиҥ ойгор јӧптӧри кӱнӱҥ сайынгы кӱчтерди ӧдӧргӧ болужат, келер ӧйгӧ ижемји берет, је эҥ керектӱзи — бу бичик Иегова керегинде кӧп билгирлер ачат. Иегова Кудайыстыҥ сӱреен јараш кылык-јаҥын шӱӱп сананзаас, бистиҥ јӱрегис томулып, оныла колбуларысты тыҥыдып, ого јуук болор кӱӱнис келет (Сар. 25:14).

2. Иегова улуска бойын канайып ачкан?

² Иегова бойын улуска ачарга кӱӱнзейт. Озогы ӧйлӧрдӧ Кудай бойын тӱштер, кӧрӱлтелер ле ангелдер ажыра ачкан (Тоол. 12:6; Ап. ижи 10:3, 4). Је ол мыны бичидип салбаган болзо, бистерге туза болор беди? Оныҥ да учун бисте Кудайдыҥ Сӧзи бар (Иер. 30:2). Бис «чындык Кудайдыҥ јолы јик јок» деп билерис (Сар. 18:30). Оныҥ учун Иегова бисле эҥ ле јакшы аргала куучындажып турган деп, бир де алаҥзыбайдыс.

3. Иегова бойыныҥ Сӧзин бӱгӱнги кӱнге јетире канайып кичееген? (Исайя 40:8).

³ Исайя 40:8 кычырыгар. Чындык эр ле ӱй улус Агару Бичиктиҥ ойгорыла канча муҥ јылдардыҥ туркунына башкарынып јат. Је Агару Бичик канча-канча чактар кайра бортык материалдарга бичилген, оныҥ учун эҥ ле баштапкы колбичимелдердиҥ бирӱзи де бистиҥ ӧйгӧ јетире кичеелбеген. Андый болордо, Агару Бичик канайып эмдигенче ле тузалу болуп турган? Нениҥ учун дезе Иегова Кудай бу бичиктиҥ кӧп-кӧп копияларын бичиткен. Бу копияларды кӧчӱре бичиген улус толо кеминде эмес те болгон болзо, јастыралар эш кийдирбеске коркышту тыҥ албадангылаган. Темдектезе, Еврей Бичимелдер керегинде бир учёный мындый сӧстӧр айткан: «Јердиҥ ӱстинде јебрен бичиктердиҥ бирӱзи де мынайып чын кӧчӱре бичилбеген». Айдарда, Агару Бичик канча муҥ јылдар кайра бортык материалдарга бичилген де болзо, оны толо кеминде эмес улус кӧчӱре бичиген де болзо, бис бӱгӱнги кӱнде Агару Бичиктеҥ Иегованыҥ бир де солынбаган шӱӱлтелерин кычырадыс деп алаҥзыбас аргалу.

4. Бис бу јӧрмӧлдӧ нени шӱӱжерис?

⁴ «Кандый ла јакшы сыйды» Иегова Кудай берет (Иак. 1:17). Оныҥ сыйларыныҥ бирӱзи — Агару Бичик. Канайып кижиниҥ сыйынаҥ бисти канча киреге јакшы билери кӧрӱнет, анайып ла Агару Бичик керегинде айдарга јараар. Бу сыйла таныжып тура, бис Иегова керегинде кӧп неме билип аладыс. Темдектезе, ол бисти јакшы билер ле биске не керектӱ болуп турганын билип јат деп. Бу јӧрмӧлдӧ бис Кудайдыҥ ӱч кылык-јаҥын кӧрӧрис: ойгорын, справедливый болгонын ла сӱӱжин. Озо баштап, Агару Бичик Кудайдыҥ ойгоры керегинде нени айдып турганын шӱӱжип ийектер.

АГАРУ БИЧИК КУДАЙДЫҤ ОЙГОРЫН АЧАТ

5. Агару Бичикте Кудайдыҥ ойгоры бар деп недеҥ кӧрӱнет?

⁵ Иегова улуска ойгор јӧптӧр керек деп билер, оныҥ учун Агару Бичикте Кудайдыҥ сӱреен јаан ойгоры бичилген. Кудайдыҥ Сӧзи сӱреен тузалу, улустыҥ јӱрӱмин де солыйт. Агару Бичиктиҥ баштапкы бичиктери бичилип каларда, Моисей израильтяндарга мынайып айткан: «Бу слерге куру сӧстӧр эмес, нениҥ учун дезе слердиҥ јӱрӱмеер бу сӧстӧрдӧҥ камаанду» (Јаҥ. т. 32:47). Агару Бичиктиҥ сӧстӧрин бӱдӱрген улустыҥ јӱрӱми једимдӱ де, ырысту да болгон (Сар. 1:2, 3). Ол јебрен бичик те болзо, улустыҥ јӱрӱмине эмдигенче тузазын јетирет. Бистиҥ jw.org сайтта «Агару Бичик улустыҥ јӱрӱмин солыйт» деген рубрикада ака-эјелердиҥ 50-неҥ кӧп биографиялары бар. Олордыҥ темин кӧрзӧӧс, Кудайдыҥ Сӧзи бӱгӱнги де кӱнде «бӱдӱп турган бойыгарда, ижин эдет» (1 Фес. 2:13).

6. Агару Бичикке тӱҥей кандый да бичик јок деп, нениҥ учун айдарга јараар?

⁶ Јердиҥ ӱстинде Агару Бичикке тӱҥей бир де бичик јок. Нениҥ учун мынайып айдарга јараар? Нениҥ учун дезе Агару Бичиктиҥ Чӱмдеечизи Иегова — Кӱчтӱдеҥ Кӱчтӱ, Ӱргӱлји, эҥ ле ойгор Кудай. Кезик бичиктер бойыныҥ чӱмдеечилеринеҥ канча киреге узак «јӱрет». Је бу бичиктердиҥ ойгоры эскирип калат. Агару Бичиктиҥ ойгоры дезе качан да эскирбей јат. Оныҥ ойгоры јажын-чакка тузалу болор. Оны кычырып, шӱӱп сананып турзаас, оныҥ Чӱмдеечизи агару тыныныҥ болужыла ойгор јӧптӧрди канайып тузаланатанын кӧрӱп ийерге болужат (Сар. 119:27; Мал. 3:16; Евр. 4:12). Айдарда, Агару Бичиктиҥ Чӱмдеечизи — бистерге јаантайын болужарга турган тирӱ Кудай! Оныҥ учун Агару Бичикти јаантайын кычырар керек.

7. Агару Бичик Кудайдыҥ озогы ишчилерин канайып бирлик эткен?

⁷ Агару Бичикте Кудайыҥ ойгоры база канайып кӧрӱнет? Кудайдыҥ Сӧзи улусты бириктирип турганынаҥ кӧрӱнет. Израильдиҥ албатызы Ханаан јерге једип келеле, башка-башка јерлерде јуртай берген. Олордыҥ кезиги балыкчылар болгон, кемизи де кыраачылар болгон, је кезиги мал-аш кабырган. Озо баштап јаҥыс јерде јаткан албаты эмди дезе мындый јаан јерге келеле, бой-бойынаҥ ыраак јатканынаҥ улам, бой-бойын ундып салардаҥ айабас болгон. Иегова мыны озодоҥ кӧрӧлӧ, албатызын Кудайдыҥ Сӧзи кычырылатан ла јарталатан кӱндерде јуулышсын деген (Јаҥ. т. 31:10—13; Неем. 8:2, 8, 18). Бӱдӱн ороонноҥ Иерусалимге јуулып келген Кудайдыҥ канча миллион чындык ишчилерин кӧргӧн кижи нени сескен болор деп сананып ийзеер де! Анайып Иегова бойыныҥ албатызына бирлигин кичеерге болушкан. Соҥында, христиан јуун тӧзӧлӧрдӧ, анда башка-башка тилдерге куучындап турган эр де, ӱй де улус болгон: олордыҥ ортозында јарлу да, бай да, јокту да улус. Је Кудайдыҥ Сӧзин сӱӱп турганынаҥ улам олор Кудайга бирлик иштеген. Бу христиан јуунга кожулып турган улус Кудайдыҥ Сӧзин јӱк ле ака-эјелердиҥ ле туштажулардыҥ болужыла оҥдоор аргалу болгон (Ап. ижи 2:42; 8:30, 31).

8. Агару Бичик Иегованыҥ албатызын бӱгӱнги кӱнде канайып бирлик эдет?

⁸ Ойгор Кудайыс бисти оноҥ ло ары ӱредип, бирлик албаты эдип јууп јат. Агару Бичиктеҥ Иегова керегинде чындыктарды билерге биске сӱреен јарап турган. Анайда ок бис јуунныҥ туштажуларына ла курултайларга барадыс, анда Агару Бичик кычырылып јарталат. Айдарда, Агару Бичиктиҥ ле болужыла Иеговага «теҥ-тай» иштейдис (Соф. 3:9).

9. Агару Бичикти оҥдоорго кандый кылык-јаҥ керек? (Лука 10:21).

⁹ Иегованыҥ ойгоры база недеҥ кӧрӱнет? Агару Бичиктиҥ кезик јерлери јӱк ле јобош кижи оҥдоор эдип бичилген. (Лука 10:21 кычырыгар.) Бу бичик бастыра јердиҥ ӱстинде јарлу. Бир учёный мынайып айткан: «Агару Бичик јӱк ле эҥ ле кӧп кычырылып турган бичик эмес, је јердиҥ ӱстинде бу бичиктеҥ ӧскӧ база кандый да бичик мынайып ширтелбей турган». Андый да болзо, Агару Бичикти јӱк ле јобош кижи чын оҥдоор ло билип алганын јӱрӱминде тузаланар аргалу (2 Кор. 3:15, 16).

10. Иегованыҥ ойгорын база недеҥ кӧрӧдис?

¹⁰ Агару Бичиктеҥ Иегованыҥ ойгоры база канайып кӧрӱнет? Иегова Агару Бичикти јӱк ле бӱдӱн албатызын ӱредерге эмес, је кажы ла ишчизин таҥынаҥ ӱредип токунадарга тузаланат. Айдарда, Иегованыҥ кажы ла ишчизи оныҥ Сӧзин кычырып тура, Иегованыҥ ајарузын сезер аргалу (Иса. 30:21). Темдектезе, слер кӱч айалгада болуп калала, Агару Бичикти кычырып тура, чек ле слерге айдылган ӱлгер таап алган учурал болгон бо? Мындый учуралдар јаҥыс катап болбогон болор. Агару Бичик миллиондор тоолу улуска бичилген болордо, ондогы јетирӱлер канайып чек ле слерге бичилген болотон? Мындый неме болор аргалу, нениҥ учун дезе Агару Бичиктиҥ Чӱмдеечизи — Иегова Кудай — јер-телекейдиҥ ӱстинде эҥ ле ойгор болот (2 Тим. 3:16, 17).

АГАРУ БИЧИК КУДАЙДЫҤ СПРАВЕДЛИВЫЙ БОЛГОНЫН АЧАТ

11. Иегова улусты ылгабай турган деп, Агару Бичиктиҥ бичилгенинеҥ канайып кӧрӱнет?

¹¹ Иегованыҥ база бир кылык-јаҥы — справедливый болгоны (Јаҥ. т. 32:4). Справедливый кижи улустыҥ чырай-бӱдӱжин ылгабай јат. Иегова Кудайыс база андый (Ап. ижи 10:34, 35; Рим. 2:11). Мыны бис Агару Бичиктиҥ башка-башка тилдерге кӧчӱрилгенинеҥ кӧрӱп јадыс. Агару Бичиктиҥ баштапкы 39 бичиги кӧп сабада еврей тилге бичилген. Нениҥ учун дезе ол ӧйдӧ Иегованыҥ ишчилери бу тилди јакшы оҥдоп туратан. Је арткан 27 бичиги грек тилге бичилген. Нениҥ учун дезе баштапкы чакта кӧп саба улус бу тилди билетен болгон. Иегова бойыныҥ Сӧзин јӱк ле бир тилге болор учурлу деп некебей јат. Бӱгӱнги кӱнде јердиҥ ӱстинде улустыҥ тоозы 8 миллиард кире болуп калган. Башка-башка тилдӱ бу ал-камык улус Иегова керегинде канайып билип алар аргалу?

12. Даниил 12:4-тӧги судур бистиҥ ӧйдӧ канайып бӱдӱп јат?

¹² Иегова судурчы Даниил ажыра калганчы кӱндерде «чындык оноҥ јарт ачылар» деген. (Даниил 12:4 кычырыгар.) Бу дезе оны кӧп улус оҥдооры дегени. Бу чындык оноҥ јарт канайып ачылат? Агару Бичик ле бистиҥ ӧскӧ дӧ бичиктер кӧчӱрилип, кепке базылып, таркадылып јат. Јердиҥ ӱстинде Агару Бичиктеҥ ӧскӧ кандый да бичик мынайып кӧчӱрилип, мынайып таркадылбай турган. Је коммерческий предприятиелердиҥ кӧчӱрмелери коркышту баалу садылып јат. А Иегованыҥ Керечилери дезе Агару Бичикти бӱдӱнге эмезе бӧлӱктей 240-нӧҥ ажык тилдерге кӧчӱрген. Оны кажы ла кижи акча тӧлӧбӧй алар аргалу. Мынайып, кандый ла албаты «Каандык керегинде сӱӱнчилӱ јарды» чак тӱгенердеҥ озо угар аргалу (Матф. 24:14). Кемди де талдабай турган Иегова Кудайыс Агару Бичикти кажы ла кижи кычырып, Кудайла јууктада танышсын деп кӱӱнзейт. Ол мындый арганы бисти тыҥ сӱӱп турганынаҥ улам берет.

АГАРУ БИЧИК КУДАЙДЫҤ СӰӰЖИН АЧАТ

13. Агару Бичиктиҥ бичилгенинеҥ Иегованыҥ сӱӱжи кӧрӱнет деп нениҥ учун айдарга јараар? (Иоанн 21:25).

¹³ Агару Бичиктиҥ Чӱмдеечизиниҥ эҥ улу кылык-јаҥы — сӱӱш (1 Иоанн 4:8). Агару Бичикте Кудай нени бичидип салган, нени бичитпеген деп сананып ийзеер де. Ол бойыныҥ Сӧзинде биске оныҥ најызы болорго, бӱгӱнги кӱнде ырысту болорго ло келер ӧйдӧ јажын-чакка јӱрерге канча кире билгирлер керек, ончо ло кире бичидип салган. Иегова улу сӱӱжинеҥ улам Агару Бичикте ӧткӱре кӧп јетирӱлер бичитпеген. (Иоанн 21:25 кычырыгар.)

14. Иегова бисти сӱӱп турган деп, Агару Бичик база канайып кӧргӱзет?

¹⁴ Иегованыҥ сӱӱжин бистиҥ сезимдеристи ајаруга алып турганынаҥ база кӧрӧдис. Иегова Агару Бичикте бистиҥ кажы ла алтамысты ширтеп кӧрӧр ээжилер тургуспаган. Карын ол бисти шӱӱп сананарга ӱрензин деп кӱӱнзейт. Оныҥ да учун Агару Бичикте јӱрӱмде болгон учуралдар, тузалу јӧптӧр лӧ кандый ла судурлар бичилген. Анайып, Агару Бичик бистерди Иегова Кудайысты сӱӱрге ле ого акту јӱректеҥ сӧсуккур болорго кӱӱнзедет.

15. а) Иегова Агару Бичиктиҥ кычыраачыларын јакшы оҥдоп јат деп недеҥ кӧрӱнет? б) Јурукты кӧрӱгер. Кызычак ла јиит ака, анайда ок јаан јашту эје библиялык кандый учуралдарды шӱӱп сананат? (Баш. 39:1, 10—12; 2 Каан. 5:1—3; Лука 2:25—38).

¹⁵ Агару Бичиктеҥ Иегова бисти сӱреен јакшы оҥдоп јат деп кӧрӱнет. Нениҥ учун дезе анда улустыҥ сезимдери бичилген учуралдар сӱреен кӧп. Бис бу улустыҥ учуралдарын кычырала, олордыҥ сезимдерин оҥдойдыс. Нениҥ учун дезе олор «бистий ле» улус болгон (Иак. 5:17). Је эҥ учурлузы, бис бу учуралдардаҥ Иегованыҥ «килеҥкейин ле сӱӱжин» (ЈТ) оноҥ јарт кӧрӧдис (Иак. 5:11).

16. Агару Бичиктеҥ јастыралар эдип туратан улус керегинде кычырзаас, Иегова керегинде нени билип аладыс? (Исайя 55:7).

¹⁶ Агару Бичиктеҥ Иегова бисти сӱӱп турган деп база канайып кӧрӱнет? Бис јастырып та ийзеес, Иегова бисти таштабас деп, Агару Бичик бӱдӱмјилейт. Темдектезе, израильтяндар Иеговага удура катап-катап кинчек эдетен. Је качан олор кинчегин акту јӱрегинеҥ алынза, Иегова олордыҥ кинчегин таштап салатан. (Исайя 55:7 кычырыгар.) Анайда ок баштапкы чактыҥ христиандары да Иегова олорды сӱӱп турган деп билген. Апостол Павел ака-эјелерди агару тынга башкартып, уур кинчек эдип јӱрген, је кийнинде јастыразын алынган кижиниҥ кинчегин «акту јӱрегинеҥ таштап, оны токунатсын» деп кӱӱнзеткен (2 Кор. 2:6, 7; 1 Кор. 5:1—5). Иегова ишчилерин, олор јастырып та турза, таштабай турганы керегинде кычырарга кандый јакшы! Карын мындый айалгада Иегова ишчилерине болужып, олорды тӱзедип, оныла ойто најылар болзын деп кычырган. Бӱгӱнги кӱнде Иегова анайып ла эдет (Иак. 4:8—10).

КУДАЙДЫҤ ТОЛО КЕМДӰ СЫЙЫН — АГАРУ БИЧИКТИ — БААЛАГАР

17. Агару Бичикти нениҥ учун аҥылу сый деп айдарга јараар?

¹⁷ Агару Бичик — Иегованыҥ бистерге берген аҥылу сыйы. Бу сыйды нениҥ учун аҥылу деп айдарга јараар? Нениҥ учун дезе бу сый, ӧрӧги айдылганыла, бистерге Кудайдыҥ ойгорын, справедливый болгонын ла сӱӱжин ачып јат. Агару Бичиктеҥ Иегованыҥ бистерди оны билип алзын ла ого најы болзын деп кӱӱнзеп турганы кӧрӱнет.

18. Бис Агару Бичик учун Иеговага быйанысты канайып кӧргӱзер аргалу?

¹⁸ Агару Бичик теҥеридеги Адабыстыҥ толо кемдӱ сыйы деп ундыбай јӱректер (Иак. 1:17). Бис бу сый учун быйанысты канайып кӧргӱзер аргалу? Бу бичиктиҥ агару сӧстӧрин кычырып, шӱӱп сананып турзаас, кӧргӱзерис. Мынайып эдерге албаданзаас, Агару Бичиктиҥ улу Чӱмдеечизиниҥ алкыжын аларыс ла «Кудай керегинде билгирди» таап аларыс (Укаа 2:5).