Кычыраачылардыҥ сурактары

2020 јылдыҥ кичӱ изӱ айыныҥ «Каруулчы шибеезинде» «Адыҥ Сениҥ агарулалзын» деген јӧрмӧлдӧ, Иегованыҥ адын агарулаары ла оныҥ башкарар јаҥы аайынча тема шӱӱжилген. Ол јӧрмӧлдӧ не чокумдалып јарталган?

Бу јӧрмӧлдӧ айдылганыла, ангелдердиҥ ле улустыҥ алдында эҥ ле јаан учурлу сурак ачык турат — Кудайдыҥ адын агарулаары. Је Кудайдыҥ башкарузы эҥ ле јакшы ба деп, анайда ок улус Кудайга чындык артар ба деген сурактар бу суракла колбулу болот.

Бис нениҥ учун Иегованыҥ адынаҥ ла оныҥ адын агарулаарынаҥ јаан неме јок деп айдадыс? Ӱч шылтак кӧрӱп ийектер.

Баштапкызында, Эдем садта Сатана Иегованыҥ адын, ол эмезе репутациязын, јамандап салган. Бу јаман ангел, Иегова Адам ла Евага бӱдӱрип болбойтон некелтелер берип турган ла олорго јайым болорго бербей турган деп, санаа берген. Сатананыҥ айтканыла болзо, Иегова тӧгӱнчи Кудай. Анайып ол Иегованыҥ адын јамандап, Дьявол болуп калган, ол эмезе «јабарлаачы» (Иоанн 8:44). Ева бу кӧк тӧгӱнге бӱде бергенинеҥ улам Кудайды укпай барган, анайып ол оныҥ јаҥыҥа удура барган (Баш. 3:1—6). Бӱгӱнги кӱнге јетире Сатана Кудайдыҥ адын јамандап јат. Бу тӧгӱнге бӱдӱп турган кижи Кудайды укпастаҥ айабас, оныҥ учун Кудайдыҥ ишчилери Иегованыҥ адын јамандаганын коркышту јаан кинчек деп кӧрӧт. Мынаҥ улам бастыра јердиҥ ӱстинде кыйын-шыра болуп јат.

Экинчизинде, Иегова јайаандарына јакшы болзын деп, бойыныҥ адын јабардаҥ арутап, корулап алар. Бу дезе — Иегованыҥ эҥ ле јаан амадузы. Оныҥ да учун ол мынайда айткан: «Улу адымды агарулаарым» (Иез. 36:23). Иисус та: «Адыҥ Сениҥ агарулалзын» — деп айдып, Иегованыҥ чындык ишчилери мӱргӱӱлинде эҥ ле озо не керегинде мӱргӱӱр керек деп, јарт кӧргӱзип берген (Матф. 6:9). Агару Бичикте де Иегованыҥ адын агарулаары јаан учурлу деп, кӧп катап айдылат. Темдектезе, «Иегованыҥ адын мактагар» (1 Лет. 16:29; Сар. 96:8). «Оныҥ улу адын кожоҥло мактагар» (Сар. 66:2). «Сениҥ адыҥды јажын-чакка мактап јӱрерим» (Сар. 86:12). Бир катап Иерусалимниҥ ӧргӧӧзинде мындый учурал болгон. Иисус Адазын мынайда сураган: «Ада, адыҥды макта» (ЈТ). Иегова теҥеридеҥ ого мындый каруу берген: «Мактаттым, база да мактадарым» (Иоанн 12:28)a.

Ӱчинчизинде, Иегованыҥ ады, ол эмезе репутациязы, оныҥ амадузыла јуук колбулу. Эмди дезе сананып ийектер: Иисус Христостыҥ бир муҥ јылга башкарар ӧйи ӧдӱп калза ла калганчы ченелте ӧдӧ берзе, не болор? Ол ӧйдӧ бастыра ангелдер ле улус Иегованыҥ адына канайып баштанар? Каруузын билип аларга, улус Иеговага чындык болор бо ло Кудайдыҥ башкарузы эҥ ле јакшы болор бо деп сурактарды эске алып ийектер. Ол тушта биске Иеговага чындык болгонысты кӧргӱзери керек болор бо? Јок. Нениҥ учун дезе ол ӧйдӧ улус толо кемдӱ болуп калар ла калганчы ченелтени ӧдӱп койгон болор. Олордо ӱргӱлји јӱрӱм башталар. Анайда ок Иегованыҥ башкарузы эҥ ле јакшы деп кӧргӱзери керек болор бо? База ла јок. Нениҥ учун дезе теҥеридеги де, јердеги де јайаандар бирлик болор ло Иегованыҥ јаҥына акту јӱрегинеҥ багынар. А Иегованыҥ адыла не болор?

Ол ӧйдӧ Кудайдыҥ ады јабардаҥ аруталып калган болор. Је андый да болзо, Кудайдыҥ ончо чындык ишчилери теҥеридези де, јердези де оныҥ адын оноҥ ло ары тооп јӱрер. Нениҥ учун дезе Иегова кайкамчылу керектерди оноҥ ло ары эдер. Анайда ок Иисус Адазына ончо јаҥды берип ийзе, «бастыразына Кудай ончозы болор» (1 Кор. 15:28). Мыныҥ кийнинде јерде улус «Кудайдыҥ балдарыныҥ јайымын» алар (Рим. 8:21). Мынайып, Иегова теҥеридеги ле јердеги балдарын бир биле эдип бириктирип салар (Эф. 1:10).

Бу ӱзе неме ӧдӧ берзе, Иегованыҥ билезинде кандый сезимдер болор? Бисте ончобыста Кудайдыҥ адын мактаар кӱӱнис там ла тыҥыыр. Давид агару тынга башкартып бу керегинде мындый сӧстӧр бичиген: «Иегова Кудайыс макталзын... Оныҥ јарлу ады јажын-чакка макталзын» (Сар. 72:18, 19). Иегова кайкамчылу керектерин оноҥ ло ары эдер, оныҥ учун бисте Кудайды јаантайын мактайтан шылтактар сӱреен кӧп болор.

Кудайдыҥ адын сананып турзаас, озо ло баштап оныҥ сӱӱжин эске алып турган болорыс (1 Иоанн 4:8). Бис оныҥ коркышту јаан сӱӱжин качан да ундыбазыс, ол бисти јайаган, бис учун толынты тайылга берген ле оныҥ башкарузы эҥ ле артык деп кӧргӱскен. Кудай биске сӱӱжин оноҥ ло ары кӧргӱзер. Бис Иегова Адабыска там ла там јууктаарыс ла оныҥ јарлу адын јажын-чакка мактап јӱрерис (Сар. 73:28).