Слер билереер бе?

Филипптиҥ јарлаган эфиоп эр кижиде кандый абра болгон?

«ЈАҤЫ ТЕЛЕКЕЙ» деп кӧчӱрмеде «абра» деп грек сӧслӧ башка-башка абраларды айткан болор (Ап. ижи 8:28, 29, 38). Эфиоп јериниҥ јамылу эр кижизиниҥ абразы јуучыл абранаҥ ла спортивный абранаҥ јаан болгон болор. Бис нениҥ учун мындый шӱӱлтеге келгенис?

Эфиоп кижи ыраак јолго јӱрген јамылу эр кижи болгон. Ол эфиоп јериниҥ каан ӱй кижизиниҥ акча-јӧӧжӧзи учун каруулу болгон (Ап. ижи 8:27, сноска). Јебрен Эфиопияга эмдиги ӧйдиҥ Судан ла Египеттиҥ тӱштӱк јаны кирген. Эфиоп эр кижи јӱк ле абралу јорыктап јӱрбеген болор. Анайда ок ол кийим-тудумын ла курсак-тамагын кожо алып јӱрген болор. Бистиҥ эраныҥ баштапкы чагында улус кӧп сабада тӧрт кӧлӧсӧлӱ, јабынчыкту абралу јӱретен. «Андый абрага кӧп неме салатан ла ыраак јол-јорыкка јӱрерге эптӱ болотон» — деп, Апостолдордыҥ ижи деп бичикке учурлалган бичикте айдылганa.

Филипп јӱгӱрип келерде, эфиоп эр кижи кычырып јаткан болгон. Агару Бичикте айдылганыла, Филипп абраныҥ јанына јӱгӱрип келерде эфиоп кижи Исайяныҥ судурын кычырып јаткан болгон (Ап. ижи 8:30). Бу абраныҥ јорыгы арай болгон. Оныҥ учун эфиоп кижи кычырынып отурды, а Филипп ол абраны јаба једип алган.

Эфиоп эр кижи «Филиппти абрага чыгып, кожо отурзын деп сурады» (Ап. ижи 8:31). Маргаандарга тузаланатан абрага кижи јӱк ле турар аргалу болгон. Је јоруктап јӱретен абралар јалбак болгон. Оныҥ учун эфиоп кижи ле Филипп абрага кожо отурып алгандар.

Калганчы ӧйлӧрдӧ бис Апостолдордыҥ ижи деп бичиктиҥ 8-чи бажалыгын ла тӱӱкини ајаруга алып, эфиоп эр кижиниҥ абразын ӧскӧ эдип јурап баштаганыс: нениҥ учун дезе оныҥ абразы јуучыл эмезе спортивный абрага кӧрӧ јаан болгон.