Јер ӱстиниҥ килемкей Јаргычызына бӱдӱгер!

1. Иегова Авраамды канайып токунаткан?

ОЗО-ОЗО чактарда Иегова Авраамга ангел ажыра Содом ло Гоморра деп калаларды јоголторго турганын айткан. Авраамныҥ Кудайга бӱдӱмјизи бек болгон до болзо, ого мыны оҥдоорго кӱч болгон. Ол Кудайдаҥ сураган: «Сен акту кижини кинчектӱ кижиле кожо јоголтып саларыҥ ба? [...] Бастыра јер ӱстиниҥ Јаргычызы јастыра јӧп чыгарбай јат». Иегова бойыныҥ кару најызын угуп, ого мындый немени оҥдоп аларга болушкан. Кудай чындык улусты качан да јоголтпос (Баш. 18:23—33, ЈТ). Бу сӧстӧр бӱгӱнги кӱнде бисти де токунадып јат.

2. Иегова јаргы чыгарып јатса, улусты килеп турган ла качан да јастыра јаргылабай турган деп, бис нениҥ учун алаҥзыбас аргалу?

² Бис Иегованыҥ јаргыларын кезикте база оҥдобой јадыс. Апостол Павел Иегова керегинде мынайда бичиген: «Оныҥ шӱӱлтелерин шиҥдеер... арга јок» (Рим. 11:33). Је бис Иегованыҥ јалакайына ла јаргыларын јаантайын чын эдип турганына алаҥзыбас аргалу. Нениҥ учун дезе биске кӧрӧ ол «кажы ла кижиниҥ јӱрегин» билер (1 Каан. 8:39; 1 Сам. 16:7; 1 Лет. 28:9). Бис мыныҥ да учун Иеговага алаҥзыбай турган эмейис.

3, 4. Бисте кандый сурактар болордоҥ айабас? Бу јӧрмӧлдӧ нени шӱӱжерис? (Иоанн 5:28, 29).

³ Је андый да болзо, бисте Авраамда ошкош сурактар болордоҥ айабас. Бис мынайып сананып турган болорыс: «Иегованыҥ јоголтып салган улузында тирилетен ижемји бар ба? Темдектезе, „акту эместер... тирилер“ ӧйдӧ Содом ло Гоморраныҥ улузынаҥ кем-кем тирилер бе?» (Ап. ижи 24:15).

⁴ Эмди дезе тирилиш керегинде нени билеристи кӧрӱп ийектер. Бу јуукта бис Иоанныҥ Сӱӱнчилӱ јарындагы бичилген эки бӧлӱк тирилетен улус керегинде тереҥжиде оҥдоп баштаганыс. Ол бӧлӱктиҥ бирӱзи — ӱргӱлји јӱрӱм аларга, а экинчизи јаргыныҥ алдына турарга тирилерa. (Иоанн 5:28, 29, ЈТ кычырыгар.) Мынайып оҥдоп алганыстаҥ улам, Иегованыҥ чындык јаргыларын ӧскӧ эдип јартаарга келишкен. Оныҥ учун бу јӧрмӧлдӧ лӧ келер јӧрмӧлдӧ бу шӱӱлте кӧрӱлер. Је озо баштап бис нени билбезисти кӧрӱп ийерис, оныҥ кийнинде нени билеристи кӧрӧрис.

БИС НЕНИ БИЛБЕЗИС

5. Содом ло Гоморрада јоголтылган улус керегинде алдындагы бичиктерде не айдылган?

⁵ Алдында бистиҥ бичиктерде Иегованыҥ јоголтып салган улузы, темдектезе Содом ло Гоморраныҥ улузы, тирилбес деп јарталган. Је тереҥ шиҥдеп, мӱргӱген кийнинеҥ бис ӧскӧ шӱӱлтеге келгенис. Нениҥ учун?

6. а) Чындык эмес улусты Иегованыҥ јоголтконы керегинде ӧскӧ дӧ учуралдар куучындап беригер. б) Иегова олорды тиргиспес деп айдып болорыс па?

⁶ Агару Бичикте чындык эмес улустыҥ јоголтылганы керегинде ӧскӧ дӧ учуралдар бар. Темдектезе, Иегова чайыктыҥ ӧйинде Ной ло оныҥ билезинеҥ ӧскӧ улусты јоголтып салган. Ол эмезе Кудай бойыныҥ албатызын Ханаан јердӧӧн кийдирердеҥ озо, ондогы јети албатыны јоголтып салзын деп јакару берген. А база бир учуралда бир ле тӱнде ангел ассириецтердиҥ 185 000 јуучылын јоголтып салган (Баш. 7:23; Јаҥ. т. 7:1—3; Иса. 37:36, 37). Айдарда, бис бу улусты јажын-чакка јоголтылган ла тирилбес деп айдарыс па? Јок. Нениҥ учун?

7. Чайыктыҥ ӧйинде ле Ханаан јерде јоголтылып калган улус керегинде бис нени билбезис? (Кадарындагы јурукты кӧрӱгер.)

⁷ Ӧрӧги айдылган улус јоголтылып калган да болзо, Кудай олорго кажызына ла кандый јаргы чыгарганын билбезис. Анайда ок олордо Иегова керегинде билгирлер алып, кинчегин алынатан арга болгон бо деп бис база билбезис. Агару Бичикте Ной «чындыктыҥ јарчызы» болгон деп айдылат (2 Пётр 2:5, ЈТ). Је ондо Ной коркышту јаан ковчег тудуп турала, чайык болотоны керегине кажы ла кижиге куучындаган деп айдылбаган. Анайып ла Ханаанныҥ калју улузында Иегова керегинде билгирлер алып, солынатан арга болгон бо деп бис база билбезис.

8. Содом ло Гоморраныҥ улузы керегинде бис нени билбезис?

⁸ Содом ло Гоморрада јаткан улус керегинде нени айдарга јараар? Олордыҥ ортозында чындык Лот јаткан. Је Лот кажы ла кижиге јарлаган ба? Јок. Содом ло Гоморрада јаткан улус чыннаҥ ла коркышту јаман керектер эткен. Олор бойлорыныҥ јаман керектер эдип турганын оҥдогон бо? Олордыҥ чыдаган-ӧскӧн айалгазын сананза, јок ошкош. Эске алып ийектер: Содомныҥ ал-камык эр улузы Лотко келген айылчыларды албадаарга сананганын. Агару Бичикте айдылганыла болзо, «Содомныҥ ончо эрлери, јаанду-јаштузы» Лоттыҥ айылыныҥ јанына јуулыжып келген (Баш. 19:4; 2 Пётр 2:7). Иегова ла Авраамныҥ куучындашканыла болзо, ол каланыҥ улузыныҥ кӧп сабазы чындык эмес болтыр (Баш. 18:32). Айдарда, олор бойлорыныҥ кинчеги учун справедливый јаргы алган. Је «акту эместер... тирилер» тушта ол каланыҥ бир де кижизи турбас па? Иегова Кудайыстыҥ килеҥкейин ајаруга алзаас, бу сурактыҥ каруузын айдып болбозыс.

9. Соломон керегинде нени билбезис?

⁹ Агару Бичикте озо баштап Кудайга чындык болгон, је оноҥ акту эмес болуп калган улус керегинде база айдылат. Темдектезе, Соломон каан Иегованы ла ого канайып иштеери керегинде сӱреен јакшы билер болгон. А Кудай дезе оны алкаган. Је соҥында ол тӧгӱн Кудайларга бажырып баштаган. Кудай бого коркышту тыҥ чугулданган. Мынаҥ улам израильтяндар канча чактардыҥ туркунына шыралгалу јӱрӱм јӱрген (1 Каан. 11:5—9; 2 Каан. 23:13). Агару Бичикте айдылганыла болзо, Соломон «божоп каларда, оны јууп салган» (1 Каан. 11:43). «Божоп калган» деген сӧсти јебрен еврей тилдеҥ сӧстӧҥ сӧскӧ кӧчӱрзе, «ада-ӧбӧкӧлӧриниҥ јанына јадып алган» деп кӧчӱрилет. Андый ла неме Кудайдыҥ чындык ишчилери керегинде, темдектезе, Давид каан керегинде айдылат. (1 Каан. 2:10 тӱҥдештиригер, сноска.) Је бу сӧстӧр Соломон тирилер деп кӧргӱзет пе? Агару Бичик бу керегинде неме айтпай јат. Андый болзо, «божоп калган кижи кинчектеҥ јайымдалып калат» деген сӧстӧрди канайып оҥдоор? (Рим. 6:7, ЈТ). Бу сӧстӧр божоп калган улустыҥ ончозы ойто јӱрӱм јӱрерге тирилер деп база кӧргӱспей јат. Тирилиш — сӱӱштӱ Кудайыстыҥ сыйы. Иегова оны ӱргӱлјиге јӱрзин деп кӱӱнзеп турган улузына берер (Иов 14:13, 14; Иоанн 6:44). Андый сый Соломонго берилер бе? Бу сурактыҥ каруузын Иегова билер, а бис билбезис. Је андый да болзо билерис, Иегова — килеҥкей ле справедливый Кудай.

БИС НЕНИ БИЛЕРИС

10. Иегова јаргы чыгарган тушта нени сезет? (Иезекииль 33:11). (Јурукты база кӧрӱгер.)

¹⁰ Иезекииль 33:11 кычырыгар. Бу ӱлгерде Иегова јаргы чыгарган тушта нени сезип турганын айдат. Апостол Пётр агару тынга башкартып, судурчы Иезекиильдиҥ сӧстӧрине тӱҥей сӧстӧр айткан: Иегова «кемди де ӧлӱп калбазын... деп кӱӱнзейт» (2 Пётр 3:9). Бу ӱлгер бисти токунадып јат. Нениҥ учун дезе бис билерис, Иегова јаан шылтак јогынаҥ кижиниҥ јӱрӱмин јажын-чакка ӱспей јат. Карын ол — килеҥкей Кудай. Иегова бу кылык-јаҥын керек тушта кӧргӱзип јат.

11. Кемдер тирилбес? Мыны бис кайдаҥ билерис?

¹¹ Кем тирилбезин бис билерис пе? Агару Бичикте кезик ле улус тирилбес деп айдылып калганb. Иисус Христос Иуда Искариот тирилбес деп јарт айткан (Марк 14:21; Иоанн 17:12 база кӧрӱгерc). Нениҥ учун дезе ол Иегова ла Иисуска биле тура удура барган. (Марк 3:29 ла «Агару Бичиктиҥ ӱренетен чыгармазында» бу ӱлгердиҥ јартамалын кӧрӱгер.) Анайда ок Иисус ого удурлашкан кудай-јаҥныҥ кезик башчылары качан да тирилбес деп айткан (Матф. 23:33). Апостол Павел јана баскандар бурузын алынбаза, база тирилбес деп бичиген (Евр. 6:4—8; 10:29).

12. Иегованыҥ килемјизи керегинде нени билерис? Темдер куучындап беригер.

¹² А Иегованыҥ килемкейи керегинде бис нени билерис? Ол «кемди де ӧлӱп калбазын» деп кӱӱнзеп турганын канайып кӧргӱскен? Кезик улусты Кудай килеген. Олордыҥ бирӱзи — Давид каан. Ол бир канча уур кинчектер эткен. Ӧскӧ кижиниҥ ӱйиле конгон, анайда ок кижи ӧлтӱрген. Је Давид кинчегин алынарда, Иегова ого буурзап, кинчегин таштаган (2 Сам. 12:1—13). Манассия каан јӱрӱминде коркышту јаман кинчектер эткен. Је Иегова мындый да кижи бурузын алынарда, кинчегин таштаган (2 Лет. 33:9—16). Бу темдер эске алындырып јат, улустыҥ кинчегин таштайтан тӧзӧлгӧ бар болзо, Иегова јаманды таштап салат. Ол мындый улусты тиргизер, нениҥ учун дезе олор кинчектериниҥ уурын оҥдоп, јастыразын алынган.

13. а) Нениҥ учун Иегова Ниневияныҥ улузын килеген? б) Иисус олор керегинде нени айткан?

¹³ Иегова килемјизин Ниневияныҥ улузына база кӧргӱскен. Кудай Ионага: «Мен олордыҥ калју керектерин билерим» — деп айткан. Је олор кинчегин алынып турарда, Иегова олорды килеп, кинчегин таштап салган. Иегованыҥ килемјизи Ионаныҥ килемјизинеҥ артык болгон. Керек дезе Иеговага ачынып кородоп калган Ионага Ниневияныҥ улузы «јакшыны јаманнаҥ ылгаштырбай турган» деп эске алындырарга келишкен (Иона 1:1, 2; 3:10; 4:9—11). Соҥында Иисус бу учуралды Иегованыҥ килемјизин ле справедливый болгонын кӧргӱзерге тузаланган. Иисус кинчегин алынган ниневитяндарды «јаргыныҥ ӧйинде» тирилер деп айткан (Матф. 12:41, ЈТ).

14. Ниневияныҥ тирилген улузыла «јаргыныҥ алдына тура[тан]» ӧйдӧ не болор?

¹⁴ Ниневияныҥ улузы кандый јаргыныҥ ӧйинде тирилер? Иисустыҥ ӱреткениле, келер ӧйдӧ «јаргыныҥ алдына тура[тан]» улус болор (Иоанн 5:29, ЈТ). Иисус мында бир муҥ јылга башкаратан ӧйин айткан. А ол ӧйдӧ «актулар да, акту эместер де тирилер» (Ап. ижи 24:15). Акту эместер «јаргыныҥ алдына турар». Бу дезе Иегова ла Иисустыҥ олорды алган билгирлерин тузаланып турган ба, јок по деп кӧрӧрин темдектейт. Оныҥ учун тирилген ниневитян кижи Иеговага бажырбаска турза, Иегова оны јоголтып салар (Иса. 65:20). Ару бажырышка јӧмӧжӧргӧ турган улустыҥ ончозына Иегова јажын-чакка јӱретен арга сыйлаар! (Дан. 12:2).

15. а) Содом ло Гоморрада јоголтылган улустыҥ кемизи де тирилбес деп нениҥ учун сананбас керек? б) Иуда 7-деги сӧстӧрди канайып оҥдоор? («Иуданыҥ сӧстӧрин канайып оҥдоор?» деген рамканы кӧрӱгер.)

¹⁵ Агару Бичикте айдылган «Јаргы болор кӱнде» Содом ло Гоморраныҥ улузына, Иисусты ла оныҥ ӱредӱлерин јуутпаган улуска кӧрӧ, јеҥил болор деп айдылган сӧстӧр бар (Матф. 10:14, 15; 11:23, 24; Лука 10:12). Иисус бу сӧстӧрлӧ нени айдарга сананган? Ол бу сӧстӧрди, байла, оныҥ ӧйинде јаткан улус, Содом ло Гоморраныҥ улузына кӧрӧ, јаман керектер эткен деп айдарга сананаган ба? Јок. Андый эмес ошкош. Не дезе Иисус Ниневияныҥ улузын «јаргыныҥ ӧйинде» тирилер деп айдарда, олордыҥ чын ла тирилерин айткан. Ол мында гипербола тузаланбаган. Оныҥ учун ол Содом ло Гоморраныҥ улузы керегинде айдарда, олорды база тирилер деп айткан ошкош. Иисус «Јаргы болор кӱнде» ле «јаргыныҥ ӧйинде» деген сӧстӧрлӧ бир ле ӧй керегинде айткан деп алаҥзыбайдыс. Содом ло Гоморраныҥ улузы ниневитяндар ла чылап коркышту јаман керектер эткен. Је ниневитяндарда, Содом ло Гоморраныҥ улузына кӧрӧ, јастыразын алынатан арга болгон. Анайда ок тирилген кийнинде «јаргыныҥ алдына туратан» улус керегинде айткан сӧстӧрди эске алынып ийектер. Бу улус кемдер болот? Олор дезе «јаман эдип јӱргендер» (Иоанн 5:29). Оныҥ учун Содом ло Гоморраныҥ улузы тирилер деп иженетен арга бар ошкош. Байла, олордыҥ кезиги де болзо, тирилер. Бис олорго Иегова ла Иисус керегинде чындыктар аларга болужарыс.

16. Иегованыҥ кемди тиргизери керегинде нени билерис? (Иеремия 17:10).

¹⁶ Иеремия 17:10 кычырыгар. Бу ӱлгер биске нени билеристи такып кӧрӱп ийерге болужат: Иегова јӱректи ле јажытту санааларды јаантайын шиҥдеп кӧрӧт. Ол кемди тиргизетенин сананып јатса, «кажы ла кижиниҥ јӱрген јолдорына... келиштире берер». Иегова керек болзо, справедливый болор, арга бар болзо, килеҥкей болор. Оныҥ учун бис Агару Бичикте чике айдылбаган болзо, кемниҥ тирилерин-тирилбезин айдып болбозыс.

«ЈЕР ӰСТИНИҤ ЈАРГЫЧЫЗЫ» КАЧАН ДА ЈАСТЫРБАЙ ЈАТ

17. Божоп калган улусты келер ӧйдӧ не сакыйт?

¹⁷ Сатананыҥ, Адам ла Еваныҥ Иеговага удура барганынаҥ бери канча миллиард улус божогон. Ӧлӱм — ӧштӱ, коркышту кӧп улустыҥ јӱрӱмин ал соккон (1 Кор. 15:26). Бу улустыҥ ончозын не сакыйт? Иисустыҥ майлаткан чындык ишчилери — 144 000 — теҥериде качан да ӧлбӧйтӧн јӱрӱмге тирилер (Ачыл. 14:1). А Иегованыҥ коркышту кӧп чындык ишчилери јерде тирилер. Бу дезе Христостыҥ бир муҥ јылга башкаратан ӧйинде «актулар... тирил[зе]» болор. Олор калганчы ченелтени ӧдӱп, Иеговага чындык артып калза, јерде ӱргӱлјиге јӱрер (Дан. 12:13; Евр. 12:1). Анайда ок бу ӧйдӧ «акту эместер» — Иеговага качан да иштебеген, керек дезе, јаман керектер эткен улус тирилер. Бу улуска солынатан ла Иегованыҥ ишчилери болотон арга берилер (Лука 23:42, 43). А Иеговага ӧнӧтийин удура барган улус тиргизилбес (Лука 12:4, 5).

18, 19. а) Божогон улус аайынча Иегова чын јаргы эдер деп, бис нениҥ учун алаҥзыбас аргалу? (Исайя 55:8, 9). б) Келер јӧрмӧлдӧ нени шӱӱжерис?

¹⁸ Бис Иегова јаргыны јаантайын чын эдет деп алаҥзыбас аргалу ба? Эйе! Алаҥзыбас аргалу. Авраам Иегованы толо кемдӱ, сӱрекей ойгор, килемкей «јер ӱстиниҥ Јаргычызы» деп билип алган. Иегова бойыныҥ Уулын ӱредип, ого јаргылайтан јаҥды ӱзе берип салган (Иоанн 5:22). Кажы ла кижиниҥ јӱрегинде не барын Адазы да, Уулы да билер (Матф. 9:4). Оныҥ учун Иегова ла Иисус кажы ла кижиге справедливый јаргы чыгарар деп алаҥзыбай јадыс.

¹⁹ Иеговага ла оныҥ чыгарып турган јӧптӧрине бир де алаҥзыбай јадыс! Нениҥ учун дезе јаргыны бис ол чылап чыгарып болбозыс. (Исайя 55:8, 9 кычырыгар.) Мынаҥ улам ончо јаргыны Иегованыҥ ла оныҥ Уулыныҥ, Адазыныҥ справедливыйын ла килемкейин толо кеминде кӧргӱзип турган Каанныҥ, колына берип јадыс (Иса. 11:3, 4). А олор улу тӱбектиҥ ӧйинде јаргыны канайып эдер? Бис мыныла колбой нени билерис, нени билбезис? Бу сурактардыҥ карууларын келер јӧрмӧлдӧҥ билип аларыс.