Кычыраачылардыҥ сурактары

Кайраканныҥ Ажы баштапкы катап ӧткӱрилген тушта, Иисустыҥ 70 ӱренчиги кайда болгон? Олор Иисусты артыргызып салган болгон бо?

Иисустыҥ 70 ӱренчиги баштапкы катап ӧткӱрилген Кайраканныҥ Ажында болбогон. Бу дезе Иисус олорды јаратпай барганын ол эмезе олор Иисусты артыргызала, јӱре бергенин кӧргӱспей јат. Је ол Эҥирде Иисус јӱк ле 12 апостолыла кожо болорго кӱӱнзеген.

12 апостол до, 70 ӱренчик те Иисуска чындык болгон. Озо баштап Иисус ӱренчиктериниҥ тоозынаҥ 12 эр кижини талдап, олорды апостолдор деп адаган (Лука 6:12—16). Иисус «он экини кычырып», олорды «Кудайдыҥ Каандыгы керегинде јарлазын, оору улусты јассын деп» ийип турарда, Галилей јеринде болгон (Лука 9:1—6). Кийнинде Иудеяда «Кайракан база 70 ӱренчик талдап... олорды Бойынаҥ озо экидеҥ ий[ген]» (Лука 9:51; 10:1). Анайып Иисуста башка-башка јерлердеҥ ӱренчиктер табылган, а олор Иисус керегинде јарлап туратандар.

Иисустыҥ ӱренчиктери болуп калган еврейлер Пасханы бойыныҥ билезиле ӧткӱрип туратан болор (Чыг. 12:6—11, 17—20). Качан Иисустыҥ божоор ӧйи јууктап келерде, ол апостолдорло кожо Иерусалимдӧӧн келген. Је ол ондо Иудеядагы, Галилеядагы ла Переядагы ӱренчиктердиҥ ончозы јаан байрамга келзин деп айтпаган. Иисус, байла, бу Эҥирди јӱк ле бойыныҥ апостолдорыла ӧткӱрерге кӱӱнзеген болор. Иисус олорго мынайда айткан: «Кыйналарымнаҥ озо бу пасханы слерле кожо јиирге тыҥ кӱӱнзеген эдим!» (Лука 22:15).

Мынайып эдерге Иисуста јаан шылтак болгон. Не дезе, удабас ол «телекейдиҥ улузыныҥ кинчегин кедери алып јаткан Кудайдыҥ Курааны» эдип, јӱрӱмин берер учурлу болгон (Иоанн 1:29). Бу тайылга Иерусалимде эдилер керек, нениҥ учун дезе Кудайдыҥ ишчилери канча јӱс јылдардыҥ туркунына тайылгаларды анда эдип туратан. Пасханыҥ ӧйинде израильтяндардыҥ јиген курааны — Иегова олорды Египеттиҥ кулданыжынаҥ јайымдаганын эске алындырган. Је Иисустыҥ тайылгазыныҥ учуры канча киреге јаан болгон — ол бастыра улусты кинчектеҥ ле ӧлӱмнеҥ јайымдаган (1 Кор. 5:7, 8). Оныҥ тайылгазы апостолдорго христиан јуунныҥ тӧзи болотон арга ачкан (Эф. 2:20—22). Јилбилӱ немези дезе, агару Иерусалим «каланыҥ стенези он эки тӧстӱ» болгон, «олордо Кураанныҥ он эки апостолыныҥ ады-јолдоры бичилген» (Ачыл. 21:10—14). Айдарда, апостолдорго Кудайдыҥ амадузын бӱдӱреринде јаан учурлу иш берилген. Оныҥ да учун калганчы Пасханы ла Кайраканныҥ Ажын Иисус чындык апостолдорыла кожо ӧткӱрерге сананган.

Эйе, Иисустыҥ ӧткӱрген Кайраканныҥ Ажында 70 кижи де, Иисустыҥ ӧскӧ ӱренчиктери де болбогон. Је бу Эҥирдиҥ тузазы олорго до јеткен. Олор чындык артып калган болзо, агару тынла майладып, Иисустыҥ апостолдорыла кожо тургускан Каандык керегинде јӧптӧжӱге кирген болор (Лука 22:29, 30).