Бис кӧрӱп турганысла эмес, је бӱдӱп турганысла јӱредис

1. Нениҥ учун апостол Павел јӱрӱмин тегиндӱ јӱрбегенине сӱӱнген?

АПОСТОЛ Павел удабас ӧлтӱртип саларын билетен болгон. Ол јӱрген јӱрӱмин эске алып, тегиндӱ јӱрбегенин оҥдоп, мынайда айткан: «Јакшы тартыштым, јарышты тӱгестим, бӱдӱп јӱретенин чеберлеп алдым» (2 Тим. 4:6—8). Павел ӧйин ойгор тузаланган, нениҥ учун дезе јӱрӱмин Иеговага иштеерине учурлаган. Ол мынайып јӱргенин Кудай јарадып турган деп билер болгон. Бис те Павел чилеп чын јӧптӧр чыгарарга ла Кудайдыҥ јарадузын аларга кӱӱнзеп јадыс. Мында биске не болужар?

2. Бӱдӱмјизиле јӱрери ол не дегени?

² Апостол Павел бойы ла ӧскӧ дӧ чындык христиандар керегинде мынайып айткан: «Бис бӱдӱп турганысла јӱрӱп јадыбыс ине, кӧрӱп турганысла эмес» (2 Кор. 5:7). Бу не дегени? Кудайга бӱтпей турган улус јӧптӧрин нени кӧргӧнине, нени укканына ла сезимдерине тайанып чыгарат. Је Кудайга бӱдӱп турган улус јӧптӧрин Иегованыҥ кӧрӱми аайынча чыгарат. Анайып олор Кудайга бӱдӱп турганын ла оныҥ јӧптӧриле јӱрерге турганын кӧргӱзет (Сар. 119:66; Евр. 11:6).

3. Бӱдӱмјиле јӱрген улус кандый кайрал алар? (2 Коринфтегилерге 4:18).

³ Кезик јӧптӧр чыгарар тушта, биске нени кӧрӱп, нени угуп, нени сезип турганысты ајаруга алып турар керек. Је јаан учурлу сурактарда јӱк ле сезимдерисле башкарынзаас, кӱчтер болордоҥ айабас. Нениҥ учун дезе бистиҥ сезимдерис тӧгӱнчи болгонынаҥ улам бис ого јаан иженбезис. Эҥ ле чочыдылу болуп турганы — бис нени кӧрӱп турганысла башкарынып турзаас, качан бирде Иегова Кудайысты тыҥ ачындырарыс (Эккл. 11:9; Матф. 24:37—39). Је бӱдӱмјибисле јӱрзеес, «Кудайга не јарап турганын» эдерис (Эф. 5:10). Кудайыска сӧсуккур болзоос, ырысту болорыс ла јӱрегисте чыннаҥ ла амыр болор (Сар. 16:8, 9; Иса. 48:17, 18). Анайда ок бӱдӱмјибисле јӱрзеес, келер ӧйдӧ ӱргӱлји јӱрӱм аларыс. (2 Коринфтегилерге 4:18, ЈТ кычырыгар.)

4. Бис бӱдӱмјиле эмезе нени кӧрӱп турганысла јӱредис пе деп, канайып билип аларыс?

⁴ Бис кажыбыс ла бойыстаҥ мынайда сураар аргалу: «Мен јӧптӧрди канайып чыгарадым? Мен кӧрӱп турганыма иженедим бе ол эмезе Иеговага иженип, оныҥ јӧптӧриле јӱредим бе?» Бис бӱдӱмјибисле јӱрӱп турганысты мындый айалгаларда кӧргӱзер аргалу: 1) иш талдап турзаас, 2) эш-нӧкӧр бедиреп турзаас, 3) организациянаҥ башкартулар алзаас. Анайда ок јакшы јӧп чыгарарга нени ајаруга алар керек деп шӱӱжип ийерис.

ИШ БЕДИРЕП ТУРЗААС

5. Иш бедиреп турзаас, неге ајару эдер керек?

⁵ Кажы ла кижи бойында да, јуук улузында да јӱрӱмге керектӱ ончо неме болзын деп кӱӱнзеп јат (Эккл. 7:12; 1 Тим. 5:8). Кезик иштерде јакшы тӧлӧп турган болот. Оныҥ учун јӱк ле кажы ла кӱнге керектӱ не-немелерди алаларга эмес, је јууп та аларга келижет. Је кезик иштерде ас тӧлӧп турганынаҥ улам акча ас-мас ла немеге једет. Эйе, иш бедиреп турзаас, ишјалы канча кире болор деп кӧрӱп јадыс. Је бис јӱк акчазын кӧрӱп турган болзоос, кӧрӱп турганысла јӱредис деп айдарга јараар.

6. Иш талдап јатсаас, бӱдӱмјибисле јӱрӱп турганыс деп, канайып кӧргӱзерис? (Еврейлерге 13:5).

⁶ Бис бӱдӱмјибисле јӱрӱп турган болзоос, ижис Иеговала колбуларыска каршузын јетирбес пе деп сананып турарыс. Бойыстаҥ мынайып сураарга јараар: «Меге бу иште Иеговага јарабай турган неме эдер керек болбос по?» (Укаа 6:16—19); «Бу иш меге јарлаар ишке туружарга, јуундарга јӱрерге ле Агару Бичикти ӱренерге чаптыгын јетирбес пе?»; «Меге бу иштеҥ улам билемге ӧй артпай калбас па?» (Флп. 1:10). Бу сурактардыҥ бирӱзи де болзо келишпезе, иш табарга јеҥил эмес те болзо, андый ишке кирбес керек. Бис бӱдӱмјибисле јӱрӱп јадыс, оныҥ учун бистиҥ чыгарган јӧбистеҥ Иеговага алаҥзыбай турганыс кӧрӱнип турар учурлу (Матф. 6:33; Еврейлерге 13:5, кычырыгар).

7, 8. Тӱштӱк Америкада јадып турган бир карындаш бӱдӱмјизиле јӱрӱп турганын канайып кӧргӱскен? (Јурукты база кӧрӱгер.)

⁷ Тӱштӱк Америкада јадып турган Хавье́рa деп карындаштыҥ учуралын кӧрӱп ийектер. Ол куучындайт: «Мени ижимде бийиктедип јаткан болгон, мынаҥ улам ишјалым эки катапка кӧптӧй берер эди. Анайда ок меге сӱреен тыҥ јарап турган иш эдер эдим». Је Хавьер пионердиҥ ижин баштаарга турган болгон. Ол оноҥ ары куучындайт: «Мен собеседованиенеҥ озо баштап мӱргӱп алгам, нениҥ учун дезе Иегова меге не јакшы болорын менеҥ артык билер эмей. Мен профессиональный јанынаҥ ӧзӧргӧ кӱӱнзеген де болзом, је мениҥ ижим кӧгӱс керектерге буудак болбозын деп кӱӱнзегем».

⁸ Хавьер оноҥ ары айдат: «Иштиҥ начальниги меге амыраар кӱндерде ле эҥирлер сайын иштеерге келижер деп айткан. Је мен эҥирлер сайын христиан керектер эдип тургам деп јартап бергем». Оныҥ учун Хавьер бу ишке јӧпсинбеген. Оныҥ ордына ол эки неделенеҥ пионердиҥ ижин баштаган, кийнинде ол ло јылда јарым кӱн иштейтен иш табып алган. Ол айдат: «Иегова мениҥ мӱргӱӱлимди угуп, пионердиҥ ижин бӱдӱретен иш таап берген. Мен чыннаҥ ла ырысту кижи, нениҥ учун дезе эмди мен Иеговага ла јуунга оноҥ кӧпти эдер аргалу».

9. Теоныҥ учуралынаҥ бис неге ӱренедис?

⁹ Эмдиги бар ижеер Иеговала колбулараарды ӱреп турган болзо канайдар? Слерге не болужар? Конгодо јадып турган Тео деп аканыҥ учуралын кӧрӱп ийектер. Ол куучындайт: «Мен коркыш јакшы иш табып алган болгом. Ишјалым озогы ижимнеҥ ӱч катапка кӧп болгон, улус та мени бастыразы тооп турган болгон». Је Тео ӧткӱре кӧп иштеп турганынаҥ улам јуунныҥ туштажуларын божодып баштаган. Бого коштой ол фирманыҥ улузы кандый бир тӧгӱн керегин Теоны кемге де айтпазын деп сурап тургандар. Оныҥ учун Тео мындый иштеҥ чыгарга сананган, је иш јок артарынаҥ коркып турган болгон. Ого не болушкан? Ол айдат: «Меге Аввакум 3:17—19 болушкан. Мен иш јок артсам да, Иегова меге болужатан арганы тӱҥей ле табып ийер деп оҥдоп ийгем. Оныҥ учун ол иштеҥ чыгып калгам». Тео оноҥ ары айдат: «Иштиҥ јаандарыныҥ санаазыла, кижи кӧп акчага болуп, ӱзе немени, ол тоодо билезин де, Кудайга бажыратанын да туура јылдырып ийер. Карын мен Кудайымла да, јууктарымла да колбуларымды ӱребегем. Бир јылдаҥ Кудайым меге јакшы иш табып берген. Ишјалы кӧп эмес, је керектӱ немеге једип јат. Је эҥ ле керектӱзи — эмди менде Иеговага иштеер ӧй бар. Иегованы баштапкы јерге тургуссаҥ да, сенде тӱҥей ле акча-манат јанынаҥ кӱчтер болор. Је кӱчтер болуп турганы Иегова сени артыргызып койгон деп кӧргӱспей јат». Айдарда, бистиҥ чыгарган јӧптӧристеҥ бис Иегованыҥ берген сӧзине бӱдӱп, берген јӧптӧрин бӱдӱрип турганыс деп кӧрӱнип турзын. А ол бисти алкыш јок артыргыспас.

ЭШ-НӦКӦР ТАЛДАП ТУРЗААС

10. Эш-нӧкӧр талдап тура, неге ајару эдер керек, је нени ундыбас керек?

¹⁰ Айыл-јуртту болоры — Кудайдыҥ сыйы. Бис билелӱ болор кӱӱндӱ болуп јайалганыс. Бир сыйынгаb кандый бир ака јарай берген болзо, ол оныҥ кылык-јаҥына, тыш-бӱдӱмине ле улус оны кандый кижи деп кӧрӱп турганына ајару эдер. Анайда ок, ол акчаны канайып тудунып турганына ла бойыныҥ јуук улузына канайып баштанып турганына ајару эдер. База бир неме, сыйын оныҥ јанында болзо, бойын ырысту деп сезип турган ба деп сананар. Бу ончо неме сӱреен керектӱ. Је сыйын јӱк ле бу немелерге ајару этсе, ол кӧрӱп турганыла јӱрет деп айдарга јараар.

11. Эш-нӧкӧр талдап турзаас, бӱдӱмјибисле јӱредис деп, канайып кӧргӱзерис? (1 Коринфтегилерге 7:39).

¹¹ Иегова ака-карындаштарды ла эје-сыйындарды кӧрӱп, оморкоп јат! Нениҥ учун дезе олор эш-нӧкӧр талдап тура, оныҥ јӧптӧрин тузаланат. Темдектезе, олор эрте биле тӧзӧӧрдиҥ ордына, сексуальный кӱӱн тыҥ келип турган ӧйдиҥ ӧдӧрин сакып јат (1 Кор. 7:36). Анайда ок олорго јарап турган кылык-јаҥдарга эмес, је Иеговага кандый кылык-јаҥдар јарап турганына ајару эдет (Укаа 31:10—13, 26—28; Эф. 5:33; 1 Тим. 5:8). Бого ло коштой олорго Иегованыҥ Керечизи эмес кижи ајару эдип турза, олор андый кижини јуутпай јат. Нениҥ учун дезе 1 Коринфтегилерге 7:39-та бичилген сӧстӧрлӧ болзо, христиан кижиниҥ эш-нӧкӧри «Кайракандыйы болор учурлу» (кычырыгар). Бу ака-эјелерди бӱдӱмјизиле јӱрӱп турган деп айдарга јараар, нениҥ учун дезе олордыҥ јӱрӱминеҥ Иегова олорды эмоциональный јанынаҥ сӱреен јакшы кичеер деп алаҥзыбай турганы кӧрӱнет (Сар. 55:22).

12. Слер Розаныҥ теминеҥ неге ӱренедеер?

¹² Колумбияда јадып турган текши пионер болуп турган Роза деп сыйынныҥ учуралын кӧрӱп ийектер. Ол онлайн уроктор ӧткӱрип турган болгон. Бу ижиле колбой ого Керечи эмес бир кижиле јаантайын куучындажар керек болгон. Байагы уул бистиҥ сыйынды јарадып баштаган, Розага да ол јарай берген. Сыйын куучындайт: «Меге ол уул јакшы кижи деп билдирген. Не дезе бастыра ла улуска болужар, ару јӱрӱм јӱрӱп турган кижи болгон. Меге де канай баштанып турганы јарап туратан. Мениҥ санаамла болзо, эр кижи шак ла андый болор учурлу. Је јаҥыс ол Иегованыҥ Керечизи болбогон. Мен кижиге барар кӱӱндӱ болгом, је јуунда меге јарагадый ака табылбай турган болгон. Мен јаҥысканзырап турганымнаҥ улам, ол уулга јок деп айдарга коркышту кӱч болгон». Је бистиҥ Роза сыйныс јӱк ле кӧрӱп турганыла јӱрбей, Иеговала колбуларын сананган. Оныҥ учун байа уулла кӧрӱшпей, куучындашпай барды. Оныҥ ордына Иеговага кӧптӧдӧ иштеп баштаган. Јаан удабай сыйынды Каандыктыҥ јарчыларыныҥ сургалына кычырган. Эмди ол специальный пионер болуп иштейт. Роза айдат: «Иегова меге сӱреен кӧп сыйлар эткен. Ол мениҥ јӱрегимди сӱӱнчиле толтырган». Кезикте биске кандый бир јӧп чыгарарга јеҥил эмес болот. Анчада ла бойыска јарап турганын эмес, је Иегованы талдаарга келишсе. Је бис бӱдӱмјибисле јӱрзеес, «нениҥ учун анайып эттим не» деп качан да сананбазыс!

ОРГАНИЗАЦИЯНАҤ БАШКАРТУЛАР АЛЗААС

13. Акалардыҥ берген башкартуларын бис канайып кӧрӧрдӧҥ айабазыс?

¹³ Кезикте јербойыныҥ аксагалдары, аймак кӧрӧӧчилер, филиал ла Башкару јӧп биске агару иш јанынаҥ башкартулар берет. Је олордыҥ берген кандый бир башкартуларын оҥдобой турган болзоос, не болордоҥ айабас? Бу башкартулар биске эби јок деп билдирер эмезе толо кемдӱ эмес акалардыҥ јастыраларына кӧрӱп баштаарыс.

14. Иегованыҥ организациязыныҥ башкартуларына сӧсуккур болорго биске не болужар? (Еврейлерге 13:17).

¹⁴ Иегова бойыныҥ организациязын башкарып турган ла ол бистиҥ айалгаларысты јакшы билер деп бӱдӱп јадыс. Оныҥ учун организациянаҥ кандый бир башкартулар алзаас, оны акту-кӱӱнистеҥ тӱрген ле бӱдӱрерге албаданадыс. (Еврейлерге 13:17, ЈТ кычырыгар.) Анайда ок бистиҥ сӧсуккур болгоныс јуунга бирлик болорго болужат деп оҥдоп јадыс (Эф. 4:2, 3). Је бисти башкарып турган акаларыс толо кеминде эмес. Андый да болзо, бис олордыҥ сӧзин угуп турзаас, Иегованаҥ алкыш аларыс (1 Сам. 15:22). Је акалардыҥ башкартузында јастыралар чын ла бар болзо, Иегова оныҥ аайына бойыныҥ ӧйинде чыгып салар (Мих. 7:7).

15, 16. Бир ака башкартуларга озо баштап алаҥзып турарда, ого сӧсуккур болорго не болушкан? (Јурукты база кӧрӱгер.)

¹⁵ Перуда болгон учуралды кӧрӱп ийектер. Бу учуралдаҥ Иегованыҥ организациязыныҥ башкартуларына бӱткенис ле сӧсуккур болгоныс јаан туза экелет деп кӧрӱнет. Бу ороондо испанский тилдеҥ ӧскӧ, улус ӧскӧ дӧ тилдерге куучындажат, темдектезе кечуа тилге. Кӧп јылдардыҥ туркунына ака-эјелер кечуа тилге куучындажып турган улусты јуунныҥ јарлайтан бастыра јерлеринеҥ бедиреген. Је оноҥ ороонныҥ јаҥы чыккан јасагын буспаска, олорго јарлайтан эп-арганы солыырга келишкен (Рим. 13:1). Мынаҥ улам кезик ака-эјелер јарлаар иш туруп калар деп санааркаган. Је качан олор бу башкартуларды бӱдӱрерде, Иегова олорды алкаган.

¹⁶ Кечуа тилге куучындап турган јуундардыҥ Ке́вин деп аксагалы јаҥы башкартуларга база алаҥзыган. Кевин айдат: «Мен санангам: „Эмди бис кечуа тилге куучындап турган улусты канайып табарыс?“». Кевин нени эткен? «Ол ӧйдӧ Укаа сӧс 3:5-ти эске алып, Моисейди санангам. Иегова ого Израильдиҥ албатызын Египеттеҥ чыгарып, Кызыл талайга апарзын деп јакару берген. Кандый да ӧйдӧ Моисей албаты ӧштӱлердиҥ колына јеп-јеҥил кире берер деп сананган болор. Андый да болзо, Моисей Кудайдыҥ сӧзин угарда, Иегова оны алкап, кайкал эткен» (Чыг. 14:1, 2, 9—11, 21, 22). Мыны шӱӱп сананала, Кевин бойыныҥ кӧрӱмин солып, јарлап баштаган. Мынаҥ кандый туза болгон? Ол оноҥ ары айдат: «Иегованыҥ биске берген алкыжын сананзаҥ, чек кайкаарыҥ! Алдында ӧйдӧ бис кӧп базып, бир эки ле кижиге туштап туратаныс. Је эмди дезе бис кӧп сабада кечуа тилге куучындап турган јерлерде јарлап турарыста, кӧп улусла куучындажып баштаганыс, кӧп улуска такып барып јадыс, анайда ок Агару Бичикле ӱредӱлер де кӧптӧгӧн. Јуундардыҥ туштажуларына да кӧп улус келип баштаган». Айдарда, бис бӱдӱмјибисле јӱрзеес, Иегова бисти алкыш јок артыргыспас.

17. Бу јӧрмӧл слерди неге ӱретти?

¹⁷ Бис иш бедиреп јатсаас, эш-нӧкӧр талдап турзаас эмезе организациянаҥ башкартулар алзаас, бӱдӱмјиле јӱрери ол не дегенин кӧрдис. Је биске јӱк ле бу айалгаларда эмес, је јӱрӱмистиҥ кажы ла јанында Иегованыҥ кӧрӱмин ајаруга алар керек. Темдектезе, кандый кино кӧрӧрин, канайып амыраарын, кандый ӱредӱ аларын ла балдарды канайып таскадарын сананып турзаас. Кандый да талдаш эдип јатсаас, биске јӱк ле нени кӧргӧнисле башкарынбас керек. Анайда ок, Иегованыҥ сезимдерин, оныҥ јӧптӧрин ле бисти кичеер деп берген сӧзин ундыбас керек. Ол тушта Иегова Кудайыска јажын-чакка иштеер аргалу болорыс! (Мих. 4:5).