Иегованыҥ колы кыска эмес

1. Моисей Израиль албатыны Египеттеҥ чыгарып јадарда, Иеговага бӱткенин канайып кӧргӱскен?

ЕВРЕЙЛЕРГЕ бичиген самарада бӱдӱмјизи бек Кудайдыҥ ишчилери керегинде айдылат. Олордыҥ бирӱзи — Моисей (Евр. 3:2—5; 11:23—25). Ол Израиль албатыны Египеттеҥ чыгарып турарда, Иегова болужар деп бир де алаҥзыбаган. Темдектезе, Моисей фараонныҥ коркышту кӱчтӱ черӱзинеҥ коркыбаган. Анайда ок албатыны Кызыл талай ажыра чӧл јерге баштап апарды (Евр. 11:27—29). Бу ӧйдӧ Израиль албатыныҥ кӧп сабазы Иегованыҥ болужына алаҥзып баштаган. Је Моисей бойыныҥ Кудайына бӱткен болордо, Иегова Кудайы оны артыргыспаган. Кудай албатызын куру чӧлдӧ аштап, суузап ӧлӱп калбазын деп, керектӱ немеле јеткилдеген (Чыг. 15:22—25; Сар. 78:23—25)a.

2. Кудай Моисейдеҥ «Иегованыҥ колы кыска эмеш пе?» деп, нениҥ учун сураган? (Тоолор 11:21—23).

² Израиль албатыныҥ Египеттеҥ чыкканынаҥ бир јыл кире ӧдӧ берерде, Иегова олорго эт берер деген. Моисей Иеговага бӱткен де болзо, је ол канча миллион албатыны чӧл јерде этле канайып азыраар деп оҥдобой турган болгон. Оныҥ учун Кудай оноҥ: «Иегованыҥ колы кыска эмеш пе?» — деп сураган. (Тоолор 11:21—23 кычырыгар.) Мында «Иегованыҥ колы» дегени — ол Кудайдыҥ агару тыны эмезе оныҥ ийде-кӱчи болот. Иегова Моисейдеҥ мынайда сураган деп айдарга јараар: «Мен берген сӧзимди бӱдӱрип болбозым деп сананып тургаҥ ба?»

3. Нениҥ учун Моисей ле израильтяндарла болгон учуралды шӱӱп сананар керек?

³ Иегова слерди ле слердиҥ билегерди кичееп болор бо деп, качан-бирде санааркаганаар ба? Кандый да болзо, слерге Моисей ле израильтяндарла болгон учуралды шӱӱп сананза јакшы болор. Иегованыҥ олорды азырап ийер аргалу болгонына олор нениҥ учун алаҥзып баштаган деп кӧрӱп ийерис. Анайда ок Иегованыҥ колы кыска эмес деп, алаҥзыбаска болужатан Агару Бичиктиҥ принциптерин шӱӱжип ийерис.

МОИСЕЙ ЛЕ ИЗРАИЛЬ АЛБАТЫЛА НЕ БОЛГОН

4. Иегова Израиль албатызын кичеер аргалу деп, олор нениҥ учун алаҥзып баштаган?

⁴ Израильтяндар ла «башка-башка укту улус» чӧл јерле Кудайдыҥ берер болгон јерине барып јаткан болгон (Чыг. 12:38; Јаҥ. т. 8:15). Бир канча ӧйдиҥ бажынаҥ олор манна олордыҥ кӱӱнине тийип калган деп комыдап, ӧскӧ курсак сурап баштаган. Анайда ок олор Египетте јиген јӱзӱн-јӱӱр курсакка санап калган деп айдышкан (Тоол. 11:4—6). Моисей олордыҥ комыдалын угала, эмди ол албатыны этле азыраар учурлу деп сананган. Је этти кайдаҥ алатанын ол билбеген (Тоол. 11:13, 14).

5, 6. Ӧскӧ укту улус Израиль албатыныҥ кӧрӱм-санаазын канайып ӱреген? Бис мынаҥ неге ӱренедис?

⁵ Ӧскӧ укту улус Иегова олорго нени эткенин баалабаган, мынаҥ улам Израиль албаты да мындый ла кӧрӱм-санаалу болуп калган. Бис база андый кӧрӱм-санаалу болуп калардаҥ айабазыс. Бисти айландыра быйаны јок улус болзо, бис база Иегованыҥ берип турганын баалабай барарыс. Анайда ок алдында Иеговага болуп артыргыскан немеге кунугып эмезе улуста бар немеге кӱйӱнип баштаардаҥ айабазыс. Је бар немени баалап јӱрзеес, бис ырысту болорыс.

⁶ Израильтяндарга Иегованыҥ айтканын ундыбас керек болгон. Олордыҥ једетен јеринде ӱзе неме артыгынча болор деп Иегова айткан. Јаҥыс бу ӱзе неме чӧл јерде эмес, је Кудайдыҥ берер болгон јеринде бӱдер болгон. Анайып ла бистерге де эмдиги ӧйдӧ та нени де албаганыс, та нени де артыргызарга келишкен деп санааркабас керек. Оныҥ ордына удабас ла Иегованыҥ берер болгон алкыштарын шӱӱп-сананза, јакшы болор. Анайда ок Иеговага бӱдӱмјибисти тыҥыдарга болужатан ӱлгерлерди шӱӱп сананарга јараар.

7. Иегованыҥ колы кыска эмес деп, бис нениҥ учун алаҥзыбайдыс?

⁷ «Иегованыҥ колы кыска эмеш пе?» Нениҥ учун Кудай Моисейге мындый сурак берген? Кудай Моисейди оныҥ ийде-кӱчи јӱк ле јаан эмес, је ол ийде-кӱчин кайда ла тузаланар аргалу болгонын сананзын деп кӱӱнзеткен. Ол бойыныҥ ишчилерине, олор кайда да болзо, болужар аргалу. Темдектезе, ол израильтяндарды олор учы-кыйузы јок чӧлдӧ дӧ болордо, этле тойо азырап салган. Анайып Кудай «јаан ийде-кӱчтӱ колын чӧйип», олорго болужар аргалу деп кӧргӱскен (Сар. 136:11, 12). Айдарда, кандый да кӱч айалгада болуп калзаас, Иегова бисти кичеер аргалу деп ундыбактар. Нениҥ учун дезе Иегова бистиҥ кажыбыстыҥ ла јаныста (Сар. 138:6, 7).

8. Израиль албатыла чӧл јерде не болгонынаҥ бис неге ӱренедис? (Јурукты база кӧрӱгер.)

⁸ Јаан удабай Иегова берген сӧзин бӱдӱрип салган, ол албатызына коркышту кӧп бӧднӧ деп куштар берген. Је Израиль албаты Кудайга быйанын да айтпай, ачыркап, бӱдӱн јарым кӱн токтобостоҥ, камык куштар ӧлтӱрип јууган. Иегова бу јаҥыс ла бойын сананып турган, «чӱмеркек улуска» коркышту тыҥ чугулданып, олорды кату каруузына тургускан (Тоол. 11:31—34). Бу биске јаан ӱредӱ болот. Биске ачыркак болуп калбаска ајарыҥкай болор керек. Айдарда, јерде акча-јӧӧжӧ јуубай, Иеговала, Иисусла најылыгысты тыҥыдып, «Кудайга јарап турган керектерле бай» болуп турактар (Матф. 6:19, 20, ЈТ; Лука 16:9). Ол тушта бистиҥ керексиништеристи Иегова бойы јеткилдеер.

9. Бис неде алаҥзыбас аргалу?

⁹ Иегова бӱгӱнги де кӱнде бойыныҥ ишчилерине кӱчтӱ колыла болужып јат. Андый болордо, эмди бисте курсак-тамак ла акча-манат јанынаҥ ӱзе јеткил болор деп темдектейт пе? Јок, андый эмесb. Је Иегова бистиҥ јаныста јаантайын болор. Ол биске кандый ла кӱчтердиҥ ӧйинде болужын јетирер. А бис Иеговага бӱдӱп турганысты канайып кӧргӱзерис: 1) акча-манат јанынаҥ кӱчтер болуп турза, 2) карып калзаас, бойысты канайып јеткилдеерис деп сананып турзаас.

АКЧА ЈАНЫНАҤ КӰЧТЕР БОЛЗО

10. Экономикалык айалга там ла коомойтыганынаҥ улам бисте кандый кӱчтер болордоҥ айабас?

¹⁰ Бу телекейдиҥ учы јууктаганы сайын экономикалык айалга там ла коомойтыр болор. Башкарулар солынып турганынаҥ улам, јуу-чактаҥ, ар-бӱткенниҥ тӱбектери ле јаҥы пандемиялардаҥ улам бис ижисти, акча-јӧжӧӧсти ле айылысты јылыйтардаҥ айабазыс. Анайда ок билегисти азыраарга, ӧскӧ иш бедиреерге эмезе ӧскӧ јерге кӧчӧргӧ келижер болор. Бис кандый бир јӧп чыгарар тушта, Иеговага иженип турганысты канайып кӧргӱзерис?

11. Акча јанынаҥ кӱчтер болзо, не болужар? (Лука 12:29—31, ЈТ).

¹¹ Озо ло баштап Иеговага санааркаштараарды куучындап беригер (Укаа 16:3). Чын јӧп чыгарарга, Иегованаҥ ойгор сурагар, оноҥ тыҥ санааркабаска, јӱрегерге амыр берзин деп сурагар. (Лука 12:29—31, ЈТ кычырыгар.) Анайда ок Иегова слерге не барыла болорзынып јӱрерге болушсын деп јаантайын мӱргӱгер (1 Тим. 6:7, 8). jw.org сайтта акча јанынаҥ кӱчтердиҥ аайына чыгарга болужатан кӧп видеолор ло статьялар бар. Анда кӧп улуска болушкан сӱреен јакшы јӧптӧр табып алараар.

12. Христиан кижиге иш талдаар тушта, билезиниҥ керексиништерин ајаруга аларга, кандый сурактар болужар?

¹² Кезик улус айылынаҥ ыраак иштеер деп јӧпсинеле, кийнинде олор јастыра јӧп чыгарган деп оҥдоп ийген. Оныҥ учун јаҥы ишке кирердеҥ озо, јазап шӱӱп сананар керек. Слерге акчазы кӧп тӧлӧлӧтӧн иш табылган да болзо, озо ло баштап бойоордыҥ ла билегердиҥ кӧгӱс јанын сананыгар (Лука 14:28). Анайда ок бойоордоҥ мындый сурактар сурагар: «Мен эш-нӧкӧримнеҥ ыраак болуп калзам, билемле не болуп калар? Мен јуунныҥ ончо туштажуларына јӱрӱп болорым ба? Јарлаар ишке туружып болорым ба? Ака-эјелерле кожо болотон ӧй менде болор бо?» А слерде балдар бар болзо, мындый сурак берерге јараар: «Мен балдарымныҥ јанында јок болзом, „Иегова канайып јакыган, анайып олорды таскадып“ болорым ба?» (Эф. 6:4, ЈТ). Јӧп чыгарып јаткан тушта, Агару Бичикти керексибей турган најылардыҥ ла тӧрӧӧндӧрдиҥ јӧптӧрин эмес, је Иегова нени айдып турганын угугарc. Азияда јадып турган То́ни деп аканы ижинде ӧскӧ ороондо кӧп акчалу ишке иштезин деп сураган. Је Тони Кудайга мӱргӱп, ӱйиле кожо јӧптӧжӧлӧ, кайдӧӧн дӧ барбай, оныҥ ордына јӱрӱмин јеҥилтер деп шӱӱп алды. Ол јӱрӱмин эске алып, мынайда айдат: «Карын мен артып калгам. Мен бир канча улуска чындыкка келерге болушкам, а мениҥ уулым ла кызычагым Иегованы сӱреен тыҥ сӱӱп јат. Бистиҥ биле Матфей 6:33-теги сӧстӧр чын деп оҥдоп алган. Бис Иисустыҥ ӱреткени аайынча јӱрзеес, Иегова бисти кыйалта јогынаҥ кичеер».

КАРЫП КАЛЗААС, БОЙЫСТЫ КАНАЙЫП КИЧЕЕР

13. Карып калзаас, бисте керектӱ неме болзын деп, бис эмди ле нени эдер аргалу?

¹³ Бис карып калзаас, бойысты канайып јеткилдеерис деп санааркаар болорыс. Бу суракта бис Иеговага иженип турганыс деп канайып кӧргӱзерис? Кудайдыҥ Сӧзи, Агару Бичик, озодоҥ сананзын деп ле иштеҥкей болзын деп кӱӱнзедет (Укаа 6:6—11). Оныҥ учун арга бар болзо, бир эмештеҥ јууза јакшы болор эди. Акча эмеш те болзо, биске кору берет (Эккл. 7:12). Је јаҥыс акча иштеери бистиҥ јӱрӱмисте баштапкы јерде болуп калбазын деп кӧрӱп турар керек.

14. Еврейлерге 13:5-теги сӧстӧр биске келер ӧйгӧ ӧйинеҥ ӧткӱре санааркабаска канайып болужат?

¹⁴ Иисус укаа сӧзиниҥ бирӱзинде кижи акча јууп, је «Кудайдыҥ кӧзинде бай болорго албаданбай» турган болзо, андый кижи ойгор эмес деп айткан (Лука 12:16—21, ЈТ). Бир де кижи эртенги кӱнде не болорын билбей јат (Укаа 23:4, 5; Иак. 4:13—15). Анайда ок Иисус оныҥ ӱренчиктери болорго турган улуска акча-јӧӧжӧзин артыргызарга белен болор керек деп айдып салган (Лука 14:33). Баштапкы чакта Иудеядагы христиандардыҥ акча-јӧӧжӧзин айрып аларда, олор сӱӱнчизин јылыйтпаган болгон (Евр. 10:34). Бистиҥ ӧйдӧги акалар политикага турушпаганынаҥ улам иштерин јылыйтып салган (Ачыл. 13:16, 17). Олорго не болушкан? Иегованыҥ «сени артырбазым, сени таштабазым» деп айткан сӧстӧрин бӱдӱрер деп, олор бир де алаҥзыбагандар. (Еврейлерге 13:5 кычырыгар.) Айдарда, бойысты канайып јеткилдеерис деп сананып тура, нени эдер аргалу болгонысты эдип, арткан немени Иегованыҥ колына берип ийерис. Нениҥ учун дезе айалга канайып та солынза, Иегова бисти кичеер деп бӱдӱп јадыс.

15. Христиан ада-энелерге балдарынаҥ нени сакыыр, нени сакыбас керек? (Јурукты база кӧрӱгер.)

¹⁵ Кезик культурада ада-энелер карып калза, олорды балдары јеткилдеер учурлу деп сакыйт. Је Агару Бичикте карын ада-энелер балдарын јеткилдеер учурлу деп айдылат (2 Кор. 12:14). Ада-энелери карып, олорго кандый бир болуш керек болзо, балдары болужарга белен болот (1 Тим. 5:4). Је христиан ада-энелер олор карып калза, балдары ӱзе јанынаҥ олорды јеткилдеер деп сакыбай јат. Карын олор балдарына Иегованыҥ ишчилери болзын деп болужарга албаданат. Бу эҥ јаан сӱӱнчи болор (3 Иоанн 4).

16. Ада-энелер балдарын јӱрӱмге канайып белетеп салар аргалу? (Эфестегилерге 4:28).

¹⁶ Ада-энелер, слер балдараарды јӱрӱмге канайып белетеп салар аргалу? Темдектезе, слер бойоордыҥ темеерле Иеговага ончо јанынаҥ иженип турганаар деп кӧргӱзигер. Олорды кичинектеҥ ле ала ишке ӱредип салыгар (Укаа 29:21; Эфестегилерге 4:28, ЈТ кычырыгар). Анайда ок школдо јакшы ӱрензин деп кӱӱнзедигер. Слер Агару Бичикти шиҥдеп, оныҥ принциптерин тузаланып турзаар, балдараарга кандый ӱредӱге киретенин талдап аларга болужып береригер. Слердиҥ амаду балдараарды јӱк ле бойын јеткилдеерине ӱредип салары эмес, је олор јарлаар ишти сӱӱп, керек дезе пионер болуп калзын деп болужары болот.

17. Не керегинде ундыбас керек?

¹⁷ Иегованыҥ чындык ишчилери Кудайда олорды јеткилдеерге кӱӱни де бар, ийде-кӱчи де бар деп бир де алаҥзыбас аргалу. Иегова бойыныҥ чындык ишчилерине керектӱ немени ӱзе берер аргалу деп, анайда ок ол олорды кичеерге кӱӱнзеп турган деп, олор бир де алаҥзыбай јат. Бу телекейдиҥ учы там ла јууктап јат, оныҥ учун биске оноҥ тыҥ Иеговага иженер керек. Не де болотон болзо, Иегова бисти кичеер аргалу деп качан да ундыбактар. Не дезе оныҥ колы кыска эмес!