Кӱскӱле чын тузаланыгар

Иаков Агару Бичикти кӱскӱле тӱҥдештирген, нениҥ учун дезе ол биске ич-бойысты кӧрӱп ийерге болужат (Иак. 1:22—25). Бу кӱскӱле чын эдип канайып тузаланар?

Меҥдебей кычырыгар. Кӱскӱдеҥ јазап кӧрӱнбезеес, тыш бӱдӱжисте нени јазап ийетенин кӧрбӧй калардаҥ айабазыс. Анайып ла Агару Бичикти меҥдей-шиҥдей кычырзаас, бойыста нени солыырын кӧрбӧй каларыс. Оныҥ учун неде тӱзединетенин кӧрӱп ийерге, Кудайдыҥ Сӧзин меҥдебей кычырар керек.

Улусты эмес, бойоорды кӧрӱгер. Кӱскӱге тууразынаҥ кӧрзӧӧс, бис бойысты эмес, је ӧскӧ улусты кӧрӱп ийерис. Анайып ла Агару Бичикти кычырып јатсаас, улустыҥ једикпестерин кӧрӱп баштаардаҥ айабазыс. Је мынайып бис бойыстыҥ једикпестеристи тӱзедип болбозыс.

Бойыгардаҥ ӧткӱре кӧпти сакыбагар. Кӱскӱдеҥ бойыстыҥ једикпестеристи кӧрӱп ийеле, олорды ӧткӱре кӧп санана берзеес, кунуга берердеҥ айабазыс. Оныҥ учун Кудайдыҥ Сӧзин кычырып тура, бойыстаҥ ӧйинеҥ ӧткӱре кӧпти сакыбас керек, нениҥ учун дезе Иегова бис тӱрген тӱзединип болбозыс деп оҥдоп јат (Иак. 3:17).