Бистерге «Кудайга јууктаарга јарап јат»!

1, 2. а) Улус канайып јуук најылар болуп калат? б) Бу јӧрмӧлдӧ нени шӱӱжерис?

СЕН јуук најыҥ керегинде сананып ийзеҥ де. Слер канайып најылар болуп калганаар? Байла, слер кӧп кожо ӧй ӧткӱргенеер, куучындашканаар, оноҥ сен оныҥ кӱчтерин билип алгаҥ, ого не јарап турган, не јарабай турганын билип алгаҥ, та кандый да кылык-јаҥдары сени тыҥ кайкаткан болор. Бойыҥ да андый кылык-јаҥду болорго кӱӱнзеген болорыҥ. Анайып сен најыҥды сӱӱй бергеҥ.

² Улус бир ле уунда најылар болуп калбай јат. Најылажарга кӧп ӧй лӧ ийде-кӱч керек. Иеговала најылажары база андый. Оны сӱӱрге турган болзоос, биске оныла кӧп ӧй ӧткӱрер керек ле оны јуук билип алар керек. Бу јӧрмӧлдӧҥ Кудайга јуук најы болорго, нени эдер керек деп билип аларыс. Анайда ок оныла најылашканыстаҥ јӱрӱмис канайып јаранарын билип аларыс.

3. Иеговала најылажары кандый туза экелип турганын нениҥ учун шӱӱп сананып турар керек? Тем куучындап беригер.

³ Иеговала најылажары кандый туза экелип турганын шӱӱп сананар керек (Сар. 63:6—8). Темдектезе, јакшы ажанып турар керек, спортло тазыктырынар керек, јетире уйуктаар керек, анайда ок суу ичеер керек деп, бастыра улус билер. Је кӧп сабада улус ол немелерди јаан ла керекке албай јат. Оныҥ учун олор оныҥ тузазын шӱӱп сананып турза, олорго бойын анайып тудунарга јеҥил болор. Мынайып ла ок, Кудайла најылажар керек деп јӱк ле билери — ол ас болор. Оныла најылажарыныҥ тузазын јаантайын шӱӱп сананар керек. Ол тушта биске теҥеридеги Најыбыска јууктаарга јеҥил болор (Сар. 119:27—30).

4. Сарын 73:28-те сарнаачыныҥ кандый сезимдери бичилген?

⁴ Сарын 73:28 кычырыгар. 73-чи Сарынды бичиген левит Иегованыҥ ӧргӧӧзинде кӱӱчи болгон. Ол, байла, кӧп јылдарыҥ туркунына Иеговага чындык иштеген болор. Андый да болзо, ого бойына да, улуска да Кудайга јууктаары — сӱреен керектӱ ле сӱреен јакшы деп оҥдоп турган болгон. Айдарда, нениҥ учун јакшы болуп турганын билип алактар.

КУДАЙЛА НАЈЫЛАШКАНЫ БИСТЕРДИ ЫРЫСТУ ЭДЕТ

5. а) Нениҥ учун бис Иеговага канча ла кире јуук болзоос, ончо ло кире ырысту болорыс? б) Укаа сӧстӧр 2:6—16-дагы ойгор јӧптӧр слерди канайып корулап турганын куучындап беригер.

⁵ Бис канча ла кире Иеговага јуук болзоос, ончо ло кире ырысту болорыс (Сар. 65:4). Нениҥ учун? Нениҥ учун дезе Агару Бичик ажыра ол биске ойгор болорго болужат. Канча ла кире бис оныҥ јӧптӧрин сӧсуккур болуп тузаланзаас, ончо ло кире ойгор болорыс. Ол дезе бисти јеткердеҥ ле јаан јастыралардаҥ корулап јат. (Укаа сӧстӧр 2:6—16 кычырыгар.) Агару Бичикте мынайып тегиндӱ айдылбаган: «Ойгор болорына ла ӧткӱн болорына ӱренип алган кижи ырысту» (Укаа 3:13).

6. Сарнаачы недеҥ улам сӱӱнчизин јылыйткан?

⁶ Је кезикте Иегованыҥ најылары кунуга берет. Темдектезе, 73-чи Сарынды бичиген кижи јаман санааларга бастыртып, сӱӱнчизин јылыйткан. Ол јаман улусты кӧрӱп, кӱйӱнип баштаган. Олор Кудай јогынаҥ ла јакшы јӱрӱп турган деп, ого билдирген. Калју-казыр бийиркек улус бай јадып турган, шыралабай турган деп кӧрӱнген (Сар. 73:3—7, 12). Мындый санаалардаҥ улам кунугып, мен бодоп ло Иеговага айса не иштеп тургам деп санаалар келген. Оныҥ учун ол: «Тегин јерге јӱрегимди ле колымды кинчектеҥ ару тударга албадангам» — деп айткан (Сар. 73:13).

7. Тыҥ санааркап турзаас, нени эдер керек? (Јурукты база кӧрӱгер.)

⁷ Сарнаачыга коркышту кунукчылду болуп турарда, ол санааркаштарынаҥ айрыларга, «Кудайдыҥ агару ӧргӧӧзине кир[ген]». Анда Иегова ого бойыныҥ айалгазын кӧрӧргӧ болушкан (Сар. 73:17—19). Биске де кунукчылду, санааркамчылу болуп турза, бистиҥ эҥ јакшы Најыбыс, Иегова, оны ӱзе билип јат. Оныҥ учун нени этсе јакшы болорын билип аларга, биске Иеговага мӱргӱӱр керек. Агару Бичиктеги шӱӱлтелер, анайда ок ака-эјелердиҥ айткан јылу сӧстӧри Иеговага оноҥ ло ары иштеер кӱӱнисти тыҥыдып салар. Керек дезе санааркаштар тыҥып та турза, Иегова бисти токунадып салар (Сар. 94:19)a.

КУДАЙЛА НАЈЫЛАЖАРЫ ЈӰРӰМНИҤ УЧУРЫН ОҤДООРГО ЛО ИЖЕМЈИЛӰ БОЛОРГО БОЛУЖАТ

8. Бистерге Кудайга јууктаганыс база нениҥ учун јакшы болот?

⁸ Бистердиҥ Кудайга јууктаганыс база нениҥ учун јакшы болот? Баштапкызында, Иеговала најылашканыстаҥ улам јӱрӱмистиҥ учурын оҥдоп јадыс. Экинчизинде, Кудайла најылашканыс бистерге келер ӧйгӧ бек ижемји берет (Иер. 29:11). Бу керегинде кӧптӧдӧ куучындажып ийектер.

9. Иеговала најылашканы јӱрӱмниҥ учурын оҥдоорго болужат деп, нениҥ учун айдарга јараар?

⁹ Иеговала најылашсаас, јӱрӱмниҥ учурын оҥдоп аларыс. Је кӧп улус Кудай бар деп бӱтпей јат. Оныҥ учун олор кижи нениҥ учун јайалганын билбей јадылар. Анайда ок удабас јердиҥ ӱстинеҥ улус кырылып калар деп бодогылайт. Је бис Агару Бичикти ӱренип тура, Кудай бар деп бӱдӱп, оны чыннаҥ бедиреп јӱрген улуска кайрал болор деп бӱдӱмјиленип алганыс (Евр. 11:6). Анайда ок Иегова бисти ого бажырып турар эдип јайаган. Оныҥ учун теҥеридеги Адабыска бажырып турзаас, бис чыннаҥ ла ырысту болодыс (Јаҥ. т. 10:12, 13).

10. Сарын 37:29-ла болзо, Иеговага иженип тургандарды келер ӧйдӧ не сакып јат?

¹⁰ Кӧп улуста келер ӧйгӧ чын ижемји јок. Олор ишке баргылайт, балдар чыдаткылайт, анайда ок пенсияга чыкса тудунатан акча јуугылайт. Амадулар тургусса, Кудай керегинде бир де санангылабай јат. Је бистер дезе, бастыра амадуларысты ижемјибисле колбойдыс (Сар. 25:3—5; 1 Тим. 6:17). Нениҥ учун дезе бис Кудайыска ла Најыбыска иженедис. Ол бистерге нени эдер болгонын ӱзе эдип салар деп, бис биледис. Келер ӧйдӧ Кудайыс бистерге кӧп сыйлар берер. Је бистиҥ эҥ ле тыҥ энчикпей сакып турганыс, ол дезе райда Иегова Кудайыска јажын-чакка иштеери болот (Сарын 37:29, кычырыгар.)

11. Иеговала најылашканыстаҥ кандый туза аладыс, бис ого јууктап турзаас, ол нени сезет?

¹¹ Биске база да ӧскӧ шылтактардаҥ улам Кудайыска јууктаарга јарап јат. Темдектезе, бис кинчектеристи алынып турзаас, Иегова јаманысты таштап јат (Иса. 1:18). Оныҥ учун алдындагы эткен кинчектерис учун бойысты бурулап, санааркап јӱрбей јадыс (Сар. 32:1—5). Иегова Кудайыска јууктазаас, оныҥ јӱрегин сӱӱндиредис, бойыс та ырысту болодыс (Укаа 23:15). Је бисте мынаҥ да ӧскӧ шылтактар бар. Оныҥ учун слерге Кудайла јуук најылашканаардаҥ улам алган ӧскӧ дӧ алкыштар санаагарга кирер болор. Је Кудайга оноҥ јуук болорго, слер база нени эдер аргалу?

КУДАЙЫСЛА НАЈЫЛЫГЫСТЫ ТЫҤЫДАРГА НЕ БОЛУЖАР

12. Слер Кудайга јууктаарга нени эткенеер?

¹² Слер чӧҥӱрилердеҥ де озо, Кудайдыҥ најызы болорго кӧп алтамдар эткенеер. Иегова ла Иисус керегинде билип алганаар, алдындагы эткен кинчектереерди алынганаар, Кудайга бӱдӱмјигер тыҥып, оныҥ кӱӱн-табы аайынча јӱрӱп баштаганаар. Је Иеговага оноҥ јуук болорго, оноҥ ло ары анайып јӱрер керек (Кол. 2:6).

13. Иеговала најылыгысты тыҥыдарга кандый ӱч јӧп болужар?

¹³ Иеговала најылыгысты тыҥыдарга не болужар? 1) Јаантайын Агару Бичикти кычырып шиҥдеер керек. Бу ла ок ӧйдӧ бистиҥ амаду — јӱк ле Кудай керегинде кӧптӧдӧ билип алары эмес. Бис Иегованыҥ кӱӱн-табын билип аларга ла оныҥ библиялык принциптериле јӱрерге кӱӱнзейдис (Эф. 5:15—17). 2) Иегова биске сӱӱжин канайып кӧргӱскенин шӱӱп сананып, бӱткенисти тыҥыдар керек. 3) Биске оноҥ ло ары Иеговага јарабай турган керектердеҥ кыйыжар керек, анайда ок јаман керектер эдип турган улусла најылашпас керек (Сар. 1:1; 101:3).

14. Бис Иегованы сӱӱндирерге кажы ла кӱн нени эдер аргалу? (1 Коринфтегилерге 10:31). (Јурукты база кӧрӱгер.)

¹⁴ 1 Коринфтегилерге 10:31 кычырыгар. Кажы ла кӱн Иегованы сӱӱндиретен аргалар бедиреп турар керек. Јарлап турганысла, јуунныҥ туштажуларына јӱргенисле Иегованы сӱӱндирип турганыс эмей. Је бис ӧскӧ дӧ керектерле Иегованы кажы ла кӱн сӱӱндирер аргалу. Темдектезе, качан да тӧгӱндебей турзаас ла бар немегисле улусла ӱлежип турзаас (2 Кор. 8:21; 9:7). Анайда ок Иегова бисти јӱрӱмди баалазын деп кӱӱнзеп јат. Оныҥ учун канча кире ажанганысла, канча кире ичкенисле, анайда ок ӧскӧ дӧ аргаларла су-кадыгысты кичеегенисле, Иегова адабысты сӱӱндиредис. Нени де этсеес, Иегованы сӱӱндирерге албаданып турзаас, ол бисти оноҥ тыҥ сӱӱп јат (Лука 16:10).

15. Иегова бисти улуска канайып баштанзын деп кӱӱнзейт?

¹⁵ Иегова бастыра улуска, ого иштеп те турган, иштебей де турган улуска јакшыны эдет (Матф. 5:45). Ол бисти де анайып этсин деп кӱӱнзейт. Темдектезе ол бисти «кемди де јамандагылабазын, керишпей јӱргилезин, ончо улуска јымжак ла быйанду болгылазын» деп кӱӱнзейт (Титке 3:2). Оныҥ учун бис Иеговага бӱтпей де турган улусты јабыс кӧрӱп, бийиркенбей јадыс (2 Тим. 2:23—25). Бис улуска јаантайын јалакай баштанып турзаас, Иеговага оноҥ тыҥ јууктап јадыс.

ЈАСТЫРАЛАРДАҤ УЛАМ ИЕГОВАНАҤ ЫРААП КАЛДААР

16. 73-чи Сарынды бичиген кижиде кандый сезимдер болгон?

¹⁶ Кезикте биске Иегова бистеҥ ыраап калган деп билдирердеҥ айабас. Бого тӱҥей сезимдер 73-чи Сарынды бичиген кижиде болгон. Ол: «Мен чындыктаҥ арай ла туура јӱре бербедим, мен арай ла тайкылып јыгылбадым» — деп айткан (Сар. 73:2). Анайда ок «јӱрегим ачу-коронго бастыртып», Иегованыҥ алдында «кедер тындудый болуп калдым» деп айдынган (Сар. 73:21, 22). Ол мындый айалганаҥ улам Иегова оны сӱӱбей турган деп сананды ба?

17. а) Сарнаачы коркышту кӱч ӧйлӧринде нени эткен? б) Оныҥ теминеҥ бис неге ӱренедис? (Јурукты база кӧрӱгер.)

¹⁷ Сарнаачыга Иегова оны таштап ийген деп санаа келген де болзо, је ол оны узаак сананып јӱрбеген. Керек дезе ого коркышту јаман да болордо, ого Иеговага јуук болор керек деп оҥдоп турган болгон. Оныҥ мындый кӧрӱми: «Је мен јаантайын сениле кожо, Сен мени оҥ колымнаҥ тудуп алгаҥ. Бойыҥныҥ јӧбиҥле мени ууландырарыҥ. Учы-учында мени макка чыгарарыҥ» — деп айткан сӧстӧринеҥ кӧрӱнет (Сар. 73:23, 24). Кезикте бистиҥ де бӱдӱмјибис уйадап, јастыраларыстаҥ улам чӧкӧп турзаас, Иегова — бистиҥ бек кайабыс деп, ундыбай турар керек (Сар. 73:26; 94:18). Керек дезе бис чындыктыҥ јолынаҥ тайкыла да берзеес, Иеговага кайра келер аргабыс бар. Нениҥ учун дезе ол «јаманды таштаарга белен» деп бир де алаҥзыбай јадыс (Сар. 86:5). Оныҥ учун биске де коркышту јаман болуп турза, Иегованаҥ ыраабас керек (Сар. 103:13, 14).

ИЕГОВАЛА НАЈЫЛАШКАНЫС ЈАЖЫН-ЧАККА УЛАЛАР АРГАЛУ

18. Бис Иеговага нениҥ учун јажын-чакка јууктаар аргалу?

¹⁸ Бис Иеговага јажын-чакка јууктаарыс. Нениҥ учун дезе ол керегинде јаантайын јаҥы немелер билип турарыс. Агару Бичикле болзо, Иегованыҥ ойгорыныҥ ла билгирлериниҥ учы-кыйузы јок (Рим. 11:33).

19. Сарындагы сӧстӧр бисти неде бӱдӱмјилейт?

¹⁹ Сарын 79:13-те: «Бис сениҥ албатыҥ ла кабырудагы койлорыҥ, сеге јажын-чакка быйанду болуп, ӱйедеҥ-ӱйеге јажына мактаарыс» — деп бичилген. Слер де Иеговага јууктап турзаар, ол слерди алкыжы јок артыргыспас. Бого бир де алаҥзыбагар. Анайда ок Сарнаачыныҥ: «Кудай мениҥ јӱрегиме кайа ла чактаҥ-чакка мениҥ ӱлӱӱм болор» — деп айткан сӧстӧрин слер де айдараар (Сар. 73:26).