Ӱренип турган кижиге Иеговага иштеерге болужыгар

1, 2. а) Ӱренип турган улуска Иегованыҥ Керечизи болорго, не буудактап турган болор? б) Бу јӧрмӧлдӧ бис нени шӱӱжерис?

АГАРУ БИЧИКТИ јаҥы ла ӱренип баштаган ӧйӧӧрди сананып ийзеер. Слер ол ло ӱренип баштаган тушта Иегованыҥ Керечизи болорго кӱӱнзей бергенеер бе эмезе слерди та не де токтоткон бо? Јуук улузаар, најылараар, иште улус слерле куучындашпай барар деп коркыган болороор. Ол эмезе библиялык нормаларла јӱрерге коркышту кӱч, анайып јӱрӱп болбозоор деп сананган болороор. Андый болгон болзо, слер Агару Бичикти ӱренип турган, је эм тура Иегованыҥ Керечизи болорго алаҥзып турган улусты оҥдоп јадаар.

² Бу санааркаштардаҥ улам кижиге кӧгӱс јанынаҥ ӧзӧргӧ кӱч болуп јат деп Иисус билген (Матф. 13:20—22). Улус кандый да шылтактардаҥ улам алтамдар эдип болбой турган болзо, Иисус олорды качан да солынбас деп сананбаган. Ол олорго: 1) кӧгӱс јанынаҥ не буудактап турган деп оҥдоорго болушкан, 2) Иеговага сӱӱжин тыҥыткан, 3) Иеговага иштеерин баштапкы јерге тургузарга ӱреткен, 4) удурлажуларга белетеген. Иисус сӱреен јакшы ӱредӱчи болгон. Бис оноҥ тем аларга кӱӱнзейдис. Эмди «Јажын-чакка ырысту јӱригер!» деген бичиктиҥ болужыла Агару Бичикти ӱренип турган кижиге Иегованыҥ јанын талдаарга, канайып болужар деп шӱӱжип ийектер.

КӦГӰС ЈАНЫНАҤ НЕ БУУДАКТАП ТУРГАНЫН ОҤДООРГО БОЛУЖЫГАР

3. Никодимге Иисустыҥ ӱренчиги болорго не буудактаган болор?

³ Никодим Иудеяныҥ ӱстиги јаргыныҥ кижизи болгон. Иисустыҥ јерде иштеп баштаганы јарым ла јыл болгон, је Никодим ол Кудайдаҥ келген деп оҥдоп ийген (Иоанн 3:1, 2). Је ол тӱҥей ле «иудейлердеҥ коркып», кем де билип ийбезин деп Иисусла туштажарга сананды (Иоанн 7:13; 12:42). Никодимге Иисустыҥ ӱренчиги болорго, та не де буудактаган. Темдектезе, ол акча-јӧӧжӧзин ле јаҥын јылыйтып салар деп коркыган болорa.

4. Иисус Никодимге Кудай оноҥ нени сакып турган деп оҥдоорго канайып болушкан?

⁴ Никодим Моисейдиҥ јасагын билген, је Иегова оныҥ бойынаҥ нени сакып турганын оҥдобогон. Иисус ого канайып болушты? Ол ӧйин кысканбай, оныла тӱнде де јолыгарга белен болды. Иисус Никодимге оныҥ ӱренчиги болорго, нени эдер керек деп јартап берген: ого кинчегин алынып, сууга чӧҥӱрилер керек, анайда ок Иисуска бӱдӱп турганын керектериле кӧргӱзер керек (Иоанн 3:5, 14—21).

5. Кижиге кӧгӱс јанынаҥ ӧзӧргӧ, не буудактап турган деп оҥдоорго канайып болужар?

⁵ Ӱренип турган кижи Агару Бичикти билер де болзо, је кӧгӱс јанынаҥ ого ӧзӧргӧ, не буудактап турганын оҥдобой турган болор. Байла ол ижине кӧп ӧйин берип турган болор. Эмезе јууктары оны Керечи болбозын деп канайып ла удурлажып турган болор. Оныҥ учун ӱренип турган кижиле ӧй ӧткӱрерге белен болугар. Темдектезе, кожо чайлап ийерге јараар эмезе амырап баскындап ийерге јараар. Мындый айалгада ого бойыныҥ кӱчтерин ачык-јарык куучындаарга јеҥил болор. Оноҥ ӱренип турган кижиге неде солынар керек деп оҥдоорго болужып беригер. Ол мыны слерге болуп эмес, је Иеговага сӱӱжин кӧргӱзерге эдип турган деп айдыгар.

6. Кижиге Агару Бичиктеҥ билип алганын тузаланарга канайып болужар? (1 Коринфтегилерге 16:13).

⁶ Ӱренип турган кижи Иегова ого библиялык нормаларла јӱрерге болужар деп алаҥзыбай турза, ол билип алганын тузаланарга коркыбас. (1 Коринфтегилерге 16:13 кычырыгар.) А слер канайып болужараар? Слерди ӱредӱчиле тӱҥдештирерге јараар. Јакшы ӱредӱчи јӱк ле јартап билер эмес, је ӱренчигин ондо ӱзе келиже берер деп бӱдӱмјилейт. Анайып ла бис Агару Бичиктиҥ јакшы ӱредӱчилери болорго кӱӱнзейдис. Бис улусты јӱк ле чындыкты билип алзын деп эмес, је бис олорды Иегованыҥ болужыла библиялык нормаларла јӱрӱп ийер аргалу деп бӱдӱмјилейдис. Јакшы ӱредӱчи болорго не болужар?

ИЕГОВАГА СӰӰЖИН ТЫҤЫДАРГА БОЛУЖЫГАР

7. Иисус улуска Иегованы оноҥ тыҥ сӱӱрге канайып болушкан?

⁷ Иисус оныҥ ӱренчиктери Иегованы сӱӱп турза, Агару Бичиктеҥ билип алганын тузаланарга тыҥ кӱӱнзеер деп билген. Иисус ӱренчиктерине теҥеридеги Адазына сӱӱжин тыҥыдарга, олорго башка-башка темдер куучындайтан. Темдектезе, ол Иегованы балдарына јакшы сый эдип турган адага тӱҥейлеген (Матф. 7:9—11). Иисусты угуп турган кезик улуста олорды сӱӱп турган ада качан да болбогон болор. Оныҥ учун Иисус олорго јалакай, килемкей ада керегинде тем куучындаарда, олор нени сескенин сананып ийзеер. Иисустыҥ айтканыла, кӧп јастыралар эткен уулы кайра јанып келерде, адазы оны јылу уткыган. Мындый темдердиҥ болужыла Иисус улуска Иегова јердеги балдарына кандый тыҥ карузып турганын оҥдоорго болужатан (Лука 15:20—24).

8. Кижиге Иеговага сӱӱжин тыҥыдарга канайып болужып берер?

⁸ А слер ӱренип турган кижиге Иегованы оноҥ тыҥ сӱӱрге канайып болужып берер аргалу? Арга боло ло берзе, ого Кудайдыҥ сӱреен јараш кылык-јаҥдары керегинде куучындап туругар. Анайда ок кажы ла ӱредӱде шӱӱжип јаткан материалдаҥ Иегованыҥ сӱӱжин кӧрӧргӧ болужыгар. Темдектезе, слер толынты керегинде теманы шӱӱжип јатканаар. Ӱренип турган кижи Иегова толынтыны јӱк ле ончо улус учун эмес, је анчада ла ол учун берген деп оҥдоп турар учурлу (Рим. 5:8; 1 Иоанн 4:10). Оноҥ Иегова оны кандый тыҥ сӱӱп турганын оҥдоп ийзе, ол Иегованы сӱӱрге база кӱӱнзей берер (Гал. 2:20).

9.Майклды јӱрӱмин солып, Иегованыҥ ишчизи болуп каларга, не кӱӱнзеткен?

⁹ Индонезияда јадып турган Майклдыҥ темин кӧрӱп ийектер. Ол Иегованыҥ Керечилериниҥ билезинде чыдаган да болзо, је бойы сууга чӧҥӱрилбеген. 18 јаштуда Майкл ӧскӧ ороон дӧӧн грузовиктиҥ водители болуп иштеп јӱре берген. Кийнинде ол јанып келеле, кижи алала, ойто иштеп јӱре берди. Бу ӧйдӧ оныҥ ӱйи ле кызы Агару Бичик ӱренип баштаган. Майклдыҥ энези божоп каларда, ол адазын кӧрӧргӧ, јанып келеле, Агару Бичик ӱренип баштаган. «Јажын-чакка ырысту јӱригер!» деген бичиктиҥ 27-чи урогында «Тереҥжиде кӧрӱгер» деген бӧлӱкте бир шӱӱлте ого јӱрегине тийген. Уулыныҥ кыйын-шыразын кӧрӱп, Иеговага кандый ачу болгонын сананып ийеле, Майкл ыйлай берди. Иегова ла Иисус оны тыҥ сӱӱп турган деп оҥдоп ийген. Ол јаан быйанду болгонынаҥ улам јӱрӱмин солып, сууга чӧҥӱрилген.

ИЕГОВАГА ИШТЕЕРИН БАШТАПКЫ ЈЕРГЕ ТУРГУЗАРГА БОЛУЖЫГАР

10. Иисус ӱренчиктерине Иегованы баштапкы јерге тургузарга канайып болушкан? (Лука 5:5—11). (Јурукты база кӧрӱгер.)

¹⁰ Баштапкы чакта кезик ӱренчиктер Иисусты — ол судурлалган Мессия деп, ол ло тушта оҥдогылап ийген. Је сӱӱнчилӱ јарды эрчимдӱ јарлаар керек деп олор оҥдобогон. Темдектезе, Пётр ла Андрей Иисустыҥ ӱренчиктери болуп калган да болзо, је јарлап јӱрбеген. Кандый да ӧйдӧҥ Иисус олорды оныҥ кийнинеҥ барзын деп кычырарда, јӱк ол тушта оныҥ кийнинеҥ бардылар (Матф. 4:18, 19). Олор Иаков ло Иоаннла кожо балыктап тура, јакшы иштеп алатан болгон (Марк 1:16—20). Пётр ла Андрей «шӱӱнин артырып койоло», билелерин јеткилдеерге, ӧскӧ иш табып алган болор. Бу эр улуска баштапкы јерге акчаны эмес, је Иеговага иштеерин тургузарга не болушкан? Луканыҥ Сӱӱнчилӱ јарында Иисус олорго кайкал эдип, олордыҥ Кудайга бӱткенин тыҥыткан. Мынайып олор Иегованы баштапкы јерге тургусса, ол олорды кичеер деп оҥдоп алдылар. (Лука 5:5—11 кычырыгар.)

11. Кижиниҥ бӱткенин тыҥыдарга, нени куучындаарга јараар?

¹¹ Бис Иисус чылап кайкалдар эдип болбозыс. Је ӱренип турган кижиге Иегованы јӱрӱминде баштапкы јерге тургузып турган улусты ол канайып кичееп турган деп куучындап берер аргалу. Темдектезе, слер јаҥы ла јуундап баштараарда, Иегова слерге канайып болушкан деп куучындап беригер. Слерге иште начальнигерге туштажулар болуп турган кӱнде кӧп иштеп болбозоор деп јартаарга келишкен болор. Ӱренип турган кижиге Иеговага бажырарын баштапкы јерге тургузараарда, ол слерди канайып алкаган, анайда ок мынаҥ улам слердиҥ бӱткенеер канайып тыҥыган деп куучындап беригер.

12. а) Нениҥ учун ӱредӱге башка-башка ака-эјелерди кычырар керек? б) Ӱренип турган кижиге Иегованы баштапкы јерге тургузарга, база канайып болужар? Тем куучындап беригер.

¹² Анайда ок ӱренип турган кижиге ӧскӧ ака-эјелердиҥ учуралдары тузалу болор. Оныҥ учун ӱредӱге башка-башка ака-эјелерди кычырыгар. Олор канайып Агару Бичикти ӱренип баштаган деп, Иегованы јӱрӱминде баштапкы јерге тургузарга не болушканын куучындап берзин. Анайда ок «Јажын-чакка ырысту јӱригер!» деп бичикти ӱренип јаткан тушта, «Тереҥжиде кӧрӱгер» эмезе «Шиҥдейтен материал» деп бӧлӱктердеҥ видеолорды кӧрӧргӧ јараар. Темдектезе, 37-чи урокты ӱренип јадала, «Бистиҥ керексиништеристи Иегова јеткилдеп салар» деп видеоны кӧрӱгер. Анайып ӱренип турган кижи јӱрӱминде Иегованы баштапкы јерге тургусса, Кудай оны кичеер деп, ого оҥдоп аларга болужыгар.

УДУРЛАЖУНЫ ӦДӦРГӦ БОЛУЖЫГАР

13. Иисус ӱренчиктерин удурлажуларга канайып белетеген?

¹³ Иисус ӱренчиктерине олор удурлажуларга табартар, керек дезе јуук улузы да удурлажар деп канча катап айткан (Матф. 5:11; 10:22, 36). Ол божоор алдында кезик ӱренчиктери ӧлтӱртер деп айдып салган (Матф. 24:9; Иоанн 15:20; 16:2). Оныҥ учун Иисус олорды јарлаар иште ойгор болзын деп ӱреткен. Темдектезе, ол ӱренчиктерине чындык керегинде куучындап турала, кемле де сӧс блаашпазын деп јӧп берген. Анайда ок олор нени айдып турганында, нени эдип турганында ајарыҥкай болзын деп айткан. Бу јӧптӧр олорго оноҥ ло ары јарлайтан арга болзын деп болужар эди.

14. Кижиге удурлажуларга белетенип аларга канайып болужар? (2 Тимофейге 3:12).

¹⁴ Ӱренип турган кижиге удурлажуларга белен болорго канайып болужар? Иште улус, најылары ла тӧрӧӧндӧри оны Агару Бичик ӱренип баштаган деп угуп ийзе, нени айдыжар болор деп айдып беригер. (2 Тимофейге 3:12 кычырыгар.) Агару Бичик ӱренип баштаганынаҥ улам иште улус шоодып, каткырыжардаҥ айабас. Ӧскӧ улус дезе, ол тоодо јуук улузы оныҥ кӧрӱмин јаман кӧрӧрдӧҥ айабас. Удурлажулар керегинде суракты кижиле эртеледе шӱӱжип салзаас, удурлажулардыҥ ӧйинде бойын канайып тудунар, нени айдар деп билип турар.

15. Кижиге тӧрӧӧндӧриниҥ удурлажуларын ӧдӧргӧ не болужар?

¹⁵ Ӱренип турган кижиге оныҥ тӧрӧӧндӧри нениҥ учун ого удурлажып турган деп оҥдоп аларга болужыгар. Олор оны тӧгӱндетирип салган деп коркып турган болор эмезе Иегованыҥ Керечилери јаман улус деп сананып турган болор. Иисустыҥ да тӧрӧӧндӧри оныҥ эдип турган керектерин јаратпай турган болгон (Марк 3:21; Иоанн 7:5). Оныҥ учун ӱренип турган кижини ончо улуска, ол тоодо јуук та улузына тоомјылу болуп, чыдамкай болзын деп ӱредигер.

16. Јарлап тура, ӱренип турган кижиге тоомјылу болорго не болужар?

¹⁶ Ӱренип турган кижиниҥ тӧрӧӧндӧри оноҥ Агару Бичик керегинде сурактар сураардаҥ айабас. Је ого билип алганын бир уунда куучындабаза јакшы болор. Нениҥ учун дезе олорго ӧйинеҥ ӧткӱре кӧп куучындап салза, келер тушта оны база угарга кӱӱнзебес болор. Оныҥ учун тӧрӧӧндӧриле база катап куучындажарга арга болзын деп, бир эмештеҥ ле куучындазын деп јӧп беригер (Кол. 4:6). Темдектезе, тӧрӧӧндӧрине бистиҥ jw.org сайтты кӧргӱзип берерге јараар. Анайып олор Иегованыҥ Керечилери керегинде нени, качан, канча кире кычырарын бойлоры талдаар аргалу болор.

17. Кижиге Иегованыҥ Керечилери керегинде сурактарга белетенип аларга канайып болужар? (Јурукты база кӧрӱгер.)

¹⁷ jw.org сайтта «Иегованыҥ Керечилери керегинде јаантайын берилип турган сурактар» деген статьяларды кӧрӱгер. Олордыҥ болужыла ӱренип турган кижиге тӧрӧӧндӧриниҥ эмезе кожо иштеп турган улустыҥ сурактарына каруу берерге болужып беререер (2 Тим. 2:24, 25). Анайда ок «Јажын-чакка ырысту јӱригер!» деген бичикте кажы ла уроктыҥ учында «Кезик улус айдат» эмезе «Кезик улус сураар болор» деген рамкаларды шӱӱжигер. Кижини неге бӱдӱп турганын јартап тура, бойыныҥ сӧстӧриле айдып турзын деп кӱӱнзедер. Керек болзо, кижиге нени солып ийерге јараар деп айдып беригер. Куучындажып ӱренип алзын деп ӧй кысканбагар. Анайып болужарга албаданып тургананаардаҥ улам кижиге неге бӱдӱп турганын ла неге бӱтпей турганын јартаарга јеҥил болор.

18. Кижиге јуунла кожо јарлап баштазын деп канайып болужар? (Матфей 10:27).

¹⁸ Иисус ӱренчиктерине ончо улуска сӱӱнчилӱ јарды јарлазын деп јакарган. (Матфей 10:27 кычырыгар.) Кижи јуунла кожо канча ла кире эрте јарлап баштаза, ончо ло киреге тӱрген Иеговага иженерге ӱренип алар. Ого мындый амадуны тургузарга слер канайып болужараар? Качан јуунда кампания болор деп јар айдылза, кижини сууга чӧҥӱрилбеген јарчы болзын деп кӱӱнзедигер. Анайда ок нениҥ учун кампанияныҥ ӧйинде јарлап баштаарга јеҥил деп јартап беригер. Ӱренип турган кижиге база бир јакшы амаду — неделениҥ ортозында ӧдӱп турган туштажуларда јакылталар бӱдӱрери болот. Мыныҥ болужыла ол бойыныҥ кӧрӱмин улуска јартаарга ӱренип алар.

СЛЕР ОГО АЛАҤЗЫБАЙ ТУРГАНААРДЫ КӦРГӰЗИГЕР

19. Иисус ӱренчиктерине алаҥзыбай турган деп канайып кӧргӱскен? Бис оноҥ кандый тем алар аргалу?

¹⁹ Иисус божоор алдында, анайда ок теҥериге барардаҥ озо, ӱренчиктерине олор ойто кожо болор деп айткан. Је ӱренчиктер Иисус олорды теҥери дӧӧн кожо алаларга турганын оҥдобогон. Андый да болзо, Иисус олордыҥ алаҥзып турганына эмес, је ӱренчиктери оныҥ кийнинеҥ барарга турганына ајару эткен (Иоанн 14:1—5, 8). Ол ӱренчиктерине кезик чындыктарды, темдектезе, апостолдор теҥериде јадар деп оҥдоорго ӧй керек болор деп билген (Иоанн 16:12). Бис те ӱренип турган кижиге оныҥ Иегованы сӱӱндирерге турган кӱӱнине алаҥзыбай турганысты база кӧргӱзер аргалу.

20. Малавиде эје ӱренип турган кижизине алаҥзыбаган деп канайып кӧргӱскен?

²⁰ Бис ӱренип турган кижиниҥ чын јӱрерге турганына алаҥзыбай јадыс. Малавиде Чифу́ндо деп бистиҥ эје «Јажын-чакка ырысту јӱригер!» деген бичикле Алина́фе деп кысла ӱредӱ баштаган. Ол кыс католик болгон. 14-чи урокты божодоло, Чифундо бу кыска Кудайга бажырарында чалулар тузаланары керегинде сурак берген. Алинафеге бу сурак чек јарабады. Ол айткан: «Канайдар деп, бойым кӧрӧрим!». Чифундо эје Алинафе удабас ӱренбей, токтоп калар деп бодогон. Је ол тӱҥей ле оҥдоп ийер деп иженип, оноҥ ло ары оныла ӱренген. Канча да айдаҥ 34-чи урокты шӱӱжип јадала, Чифундо эје 6-чы пункттыҥ «Агару Бичиктеҥ алган билгирлер ле чындык Кудай керегинде билип алганаар слерге кандый туза экелди?» деп сурак берди. Чифундо эске алат: «Алинафе андый кӧп неме тоологон, ол тоодо Иегованыҥ Керечилери Агару Бичикле јӱрӱп, Кудайдыҥ эдерге јарабас дегенин эткилебей јат деп айткан». Јаан удабай ла Алинафе чалулар тузаланбай барган, оноҥ сууга чӧҥӱрилген.

21. Кижиге Иегованыҥ јанын талдап алар кӱӱнин тыҥыдарга канайып болужар?

²¹ Кижини кӧгӱс јанынаҥ Иегова ӧскӱрип те турган болзо, бис бойыстыҥ јаныстаҥ база болужар аргалу (1 Кор. 3:7). Ӱренип тура, бистиҥ амаду — Кудай кижинеҥ јӱк ле нени сакып турганын јартаары эмес, је оныҥ Кудайга сӱӱжин тыҥыдарга болужары болот. Анайда ок бис оны Иеговага иштеерин јӱрӱминде баштапкы јерде тургуссын деп кӱӱнзедедис. Бого ло коштой оны Иеговага иженерге ле удурлажулардыҥ ӧйинде Кудай ого болужар деп бӱдӱп турарга ӱредедис. Ӱренип турган кижини ого алаҥзыбай турганысла, ол Иегованыҥ јанын талдап, чын јӱрер аргалу деп бӱдӱмјилейдис.