Аксагалдардаҥ болуш сурагар

1. Иегова койлорын баалап турганын канайып кӧргӱскен?

ИЕГОВА ишчилерин тыҥ сӱӱп, кӱдӱчи койлорын канайып кичееп, кӧрӱп турганы чылап, анайып ла кичееп јат. Иегова олор учун Уулын берип, аксагалдарды олорды кичеезин деп тургускан (Ап. ижи 20:28). Кудай аксагалдарды оныҥ койлорына јалакай, јымжак баштанзын деп кӱӱнзейт. Олор Иисус Христостыҥ башкартуларыла јӱрӱп, ака-эјелердиҥ кӱӱн-санаазын кӧдӱрип, олорды кӧгӱс јанынаҥ корулап јат (Иса. 32:1, 2).

2. Иегова анчада ла кемге болужарга кӱӱнзейт? (Иезекииль 34:15, 16)

² Иегова ончо койлорын кичеейт, је анчада ла уур кӱчтерге табартып, шыралап тургандарын. Олордыҥ кезиктери бойыныҥ ла јастыраларынаҥ улам шыралап јат, је Иегова олорго болужарга база белен болот. (Иезекииль 34:15, 16 кычырыгар.) Болуш керек болзо, Иегова бисти болушты суразын деп кӱӱнзедет. Биске јӱк ле Кудайга мӱргӱӱр керек эмес, је јуундагы «кӱдӱчилерге ле ӱредӱчилерге» баштанар керек (Эф. 4:11, 12).

3. Аксагалдардыҥ ижи керегинде шӱӱп сананганыс биске кандый туза экелер?

³ Бу јӧрмӧлдӧ Иегова кӧгӱзи уйадап калган ака-эјелерге аксагалдар ажыра канайып болужып турганын шӱӱжерис. Бис мындый сурактардыҥ карууларын билип аларыс: Биске болушты аксагалдардаҥ качан сураар керек? Нениҥ учун болуш сураар керек? Олор биске канайып болужат? Эм тура биске кӧгӱс болуш керек јок то болзо, бу сурактыҥ каруулары биске Иегованыҥ сӱӱжин ле аксагалдардыҥ ижин оноҥ тыҥ баалаарга болужар. Оноҥ, качан-бирде болуш керек боло берзе, нени эдерин билер болорыс.

АКСАГАЛДАРДАҤ КАЧАН БОЛУШ СУРААР КЕРЕК?

4. Иаков 5:14—16, 19, 20-де кӧгӱс оору керегинде айдылган деп кайдаҥ билерис? (Јуруктарды база кӧрӱгер.)

⁴ Иаков Иегова аксагалдарды биске болужарга канайып тузаланып турганы керегинде мынайып бичиген: «Кемигер де оору ба? Јуунныҥ аксагалдарын кычырзын». (Иаков 5:14—16, 19, 20 кычырыгар.) Контекстти кӧрзӧ, Иаков мында кӧгӱс јанынаҥ ооруп турган кижи керегинде айдат. Темдектезе, мында ооруп калган кижиге врачка эмес, је аксагалга баштанзын деп јӧп берилет, а кижиниҥ јазылары кинчегиниҥ ташталганынаҥ камаанду болот деп айдылган. Је кӧгӱс јанынаҥ уйадап калган кижиге болужары су-кадыгы уйадап калган кижиге болужарына тӱҥей болот. Су-кадыгыс уйадап калза, бис врачка барып јадыс, ого канайып ооруп турганысты куучындап јадыс, оноҥ врачтыҥ берген јӧптӧрин тузаланадыс. Анайып ла кӧгӱс јанынаҥ уйадап калзаас, бис аксагалдарга барып, олорго айалгабысты куучындап, олордыҥ Агару Бичикке тайанып берген јӧптӧрин тузаланадыс.

5. Иеговала колбуларыс уйадап барып јатканын канайып билип аларыс?

⁵ Бис аксагалдарга кӧгӱс су-кадыгыс јанынаҥ кандый ла сурактарла баштанар аргалу. Је олордыҥ болужын Иеговала колбуларыс ӱрелердеҥ озо алар керек. Агару Бичикле болзо, бис бойысты јеҥил тӧгӱндеп ийер аргалу, оныҥ учун бойысты тӧгӱндебес керек (Иак. 1:22). Мындый ла јастыраны Сардыныҥ кезик христиандары эткен. Бу христиандар олордыҥ кӧгӱс су-кадыгы јакшы деп сананган. Је Иисустыҥ айтканыла, айалга коомой болгон (Ачыл. 3:1, 2). А бистиҥ кӧгӱс су-кадыгыс јакшы ба, јок по деп, канайып билип алар? Темдектезе, сууга чӧҥӱрилген тушта Иеговага кандый сезимдер болгонын эмдиги сезимдерисле тӱҥдештирип кӧрӧӧр (Ачыл. 2:4, 5). Бойыска мындый сурактар берерге јараар: «Агару Бичикти кычырары ла шӱӱп сананары меге алдындагы ла чылап сӱӱнчи экелип турган ба? Мен јуундарды божодып, туштажуларга јазап белетенбей баргам ба? Јӱрӱмимде јарлаар иш анайып ла баштапкы јерде турат па эмезе ӧскӧ та не де турган ба? Мен акча керегинде ле ого нени садып алар деп кӧп сананадым ба?» Слер бу сурактарга карууны береле, Иеговала колбулараар уйадап барып јатканын кӧрӱп ийген болороор. Мыны керекке албазаар, айалгагар оноҥ јаман болуп калар. Слер мыныҥ аайына бойоор чыгып болбозоор деп оҥдоп турган болзоор эмезе Кудайдыҥ нормаларын бузып ийген болзоор, бу аксагалдардаҥ болуш сурайтан ӧй болот.

6. Уур кинчек эткен кижиге нени эдер керек?

⁶ Кезик кинчектер учун кижини јууннаҥ туураладып салардаҥ айабас (1 Кор. 5:11—13). Кинчек эткен болзоос, аксагалдардыҥ бир-бирӱзиле куучындажар керек. Не дезе олордыҥ болужы јогынаҥ Иеговала колбуларысты орныктырар арга јок. Бис кинчектеристи акту јӱрегистеҥ алынганысты керектерисле кӧргӱзип турзаас, јӱк ле ол тушта Кудай бистиҥ јаманысты таштап јат (Ап. ижи 26:20). Андый керектердиҥ бирӱзи — эткен кинчегисти аксагалдарга айдып салары болот.

7. Аксагалдарла база не јанынаҥ куучындажарга јараар?

⁷ Аксагалдар јӱк ле уур кинчек эткен кижиге эмес, је кинчектӱ кӱӱн-санаазыла тартыжып турган кижиге болужып јат (Ап. ижи 20:35). Слерде јастыра кӱӱн-санаа андый тыҥ болгон болор, керек дезе бойоорды оныла тартыжып болбой, качан-бирде кинчек эдип ийереер деп коркып турган болороор. Бу анчада ла слерге јаан ченелте болордоҥ айабас, качан алдында слерде наркотиктер эмезе порнография јанынаҥ кӱчтер болгон болзо, ол эмезе слер Кудайдыҥ секс јанынаҥ нормаларыла келишпей турган јӱрӱм јӱрген болзоор. Је эмди слер јаҥыскан эмезеер, оныҥ учун болуш сураарга уйалбагар. Аксагалдардыҥ кемизиле слерге куучындажарга јеҥил болор деп сананып ийеле, ого баштанып, айалгагарды ачыгынча куучындап беригер. Ол слерди јазап угуп, оноҥ ары нени эдетенин оҥдоорго, јӧптӧр берер. Анайда ок ол Иегова слердиҥ јастыра кӱӱнеерле тартыжып турганаарды кӧрӱп, слерле оморкоп турган деп бӱдӱмјилеер (Эккл. 4:12). Је кинчектӱ кӱӱн-санаа улам ла сайын болуп турганынаҥ улам слер бойоорды уйан кижи деп сананып, бойоордоҥ чӧкӧп баштаар болороор. Ол тушта аксагалдар бойоорго ӧскӧ јанынаҥ кӧрӧргӧ болужар, не дезе, олорго баштанганаардаҥ слердиҥ јобош болгоноор кӧрӱнет. А кинчегерле оноҥ ло ары тартыжып турганаардаҥ слер Иеговала колбулараарды баалап турганаар кӧрӱнет (1 Кор. 10:12).

8. Кажы ла јастырган тушта аксагалдарга баштанар керек пе?

⁸ Је эмди кажы ла јастырган тушта аксагалдарга баштанар керек пе? Јок. Темдектезе, слер акага эмезе эјеге та нени де ачынчылу айдып, тыҥ ачыныжып салган болороор. Мындый учуралда аксагалдарга эмес, је ачындырып салган кижиге барып, јаманыгарды таштазын деп сураар керек. Анайып бис Иисустыҥ Матфей 5:23, 24-тӧги айдылган јӧбин бӱдӱрип, јаражып аларыс. Анайда ок бистиҥ бичиктердеҥ јобош, чыдамкай болоры ла бойын тудунары керегинде темаларды шиҥдеерге јараар. Мынайып кийнинде бу кылык-јаҥдарды оноҥ јакшы кӧргӱзер аргалу болороор. Је бис канайып ла албаданган да болзоос, је айалга оҥдолбогон болзо, канайдар? Ол тушта аксагалдарга баштанарга јараар. Темдектезе, качан Эводия ла Синтихия тартыжала, јаражып болбой турарда, Павел бир аканы олорго болушсын деп сураган. Анайып ла бӱгӱнги кӱнде аксагалдар биске де болужар аргалу (Флп. 4:2, 3).

НЕНИҤ УЧУН АКСАГАЛДАРДАҤ БОЛУШ СУРААР КЕРЕК?

9. Биске уйатту да болзо, нениҥ учун аксагалдарга баштанар керек? (Укаа сӧстӧр 28:13).

⁹ Кезикте биске болуш сураарга јалтанбас болоры ла бӱдӱмји керек болот. Темдектезе, бис уур кинчек эдип ийген болзоос эмезе биске јастыра кӱӱнисле тартыжарга кӱч болуп турган болзо, бу керегинде аксагалдарга куучындаарга уйатту болордоҥ айабас. Је тӱҥей ле айдар керек. Нениҥ учун? Нениҥ учун дезе, Иегова аксагалдарга бистиҥ кӧгӱс су-кадыгысты кичеезин деп јакарган. Аксагалдардаҥ болуш сурап турганысла, бис Кудайга бӱдӱп турганысты ла сӧсуккур болгонысты кӧргӱзедис. Иегова биске јастыра кӱӱнисле тартыжарга болужар деп бӱдӱп јадыс (Сар. 94:18). Бис уур кинчек эделе, бу керегинде аксагалдарга куучындап, база анайып этпей турзаас, Иегова бистиҥ јаманысты таштап салар деп алаҥзыбаска јараар. (Укаа сӧстӧр 28:13 кычырыгар.)

10. Кинчегисти айтпай, јажырып јӱрзеес, не болордоҥ айабас?

¹⁰ Бис кинчекти эделе, бу керегинде айтпай, јажырып јӱрзеес, не болор? Бис бойыс бойыска ла каршу јетирерис. Давид каанды эске алып ийектер. Ол кинчек эделе, канча да ӧйдиҥ туркунына оны јажырып јӱрген. Је Давид Иеговала колбуларын ӱреп салган деп оҥдоп, бойын јинип, амырын јылыйткан, оноҥ су-кадыгы да уйадаган (Сар. 32:3—5). Сананып ийектер: бис ооруп калала эмезе шырка алала, нени де этпей турзаас, мынаҥ улам ӧлӱп те калардаҥ айабазыс. Бого тӱҥей айалга кӧгӱс јанынаҥ ооруп калзаас болот. Канча ла кире узак аксагалдарла куучындашпай јӱрзеес, бойыска ончо ло кире јаан каршу јетиредис. Је Иегова бисле колбуларысты јылыйтпаска јат, оныҥ учун бисти аксагалдарга баштанзын деп кӱӱнзедет. Јӱк анайып бис Иеговала јаражып аларыс (Иса. 1:5, 6, 18).

11. Аксагалдарга уур кинчек керегинде айтпай јӱрзеес, база не болор?

¹¹ Бис уур кинчек эделе, айтпай, јажырып јӱрзеес, бу ӧскӧ улуска база каршузын јетирет. Ол тушта Иегова јуунга агару тынын андый кӧп бербей барардаҥ айабас. Мынайып ака-эјелердиҥ амыры јылыйар (Эф. 4:30). А бис јуунда кем-кем уур кинчек эткенин билип, ол керегинде айтпай турзаас, Иегованыҥ кӧзинде база бурулу болодыс (Лев. 5:1). Оныҥ учун биске кинчек эткен кижини аксагалдарла куучындашсын деп кӱӱнзедер керек. Ол кандый да ӧйдиҥ туркунына аксагалдарга куучындабаза, биске бойыска аксагалдарга баштанар керек болор. Анайып бис Иеговага сӱӱжисти ле чындыгысты кӧргӱзерис, анайда ок ака-эјелерди корулаарыс, оноҥ кинчек эткен кижиге Иеговала ойто јаражып аларга болужарыс.

АКСАГАЛДАР БИСКЕ КАНАЙЫП БОЛУЖАТ?

12. Кӧгӱс јанынаҥ уйадап калгандарга аксагалдар канайып болужат?

¹² Агару Бичикле болзо, аксагалдар кӧгӱс јанынаҥ уйадап калган улуска болужар учурлу (1 Фес. 5:14). Слер кинчек эдип ийген болзоор, аксагалдар слерди јакшы оҥдоп аларга, бир канча сурактар берер болор (Укаа 20:5). Оныҥ учун санаалараарды, сезимдереерди ачыгынча айдыгар. Бу слерге кылык-јаҥыгардаҥ, культурагардаҥ улам, чыдап ӧскӧн билегердеҥ улам эмезе слерге уйатту болгонынаҥ улам кӱч болордоҥ айабас. Је тӱҥей ле айдыгар. Јастыра неме айдып ийереер деп коркыбагар (Иов 6:3). Аксагалдар слерди капшай ла бурулаар деп, јастыра тӱп-шӱӱлтеге келер деп сананбагар. Карын олор слерди јазап угуп, айалганы јетире оҥдоп алала, јӱк ол тушта слерге јӧп берер (Укаа 18:13). Анайда ок кинчек эткен акага эмезе эјеге ӧй керек деп, аксагалдар оҥдоп јат. А сурак кӱч болзо, олор бир ле тушташкан кийнинеҥ айалга солына берер деп сакыбай јат.

13. Аксагалдардыҥ мӱргӱӱли ле Агару Бичикке тайанган ӱлгерлер биске канайып болужат? (Јуруктарды база кӧрӱгер.)

¹³ Аксагалдар слерди олорло куучындашкан кийнинеҥ бойоорды оноҥ тыҥ бурулу деп, сеспезин деп јат. Олор слерле кожо слер учун мӱргӱӱр. Аксагалдардыҥ мӱргӱӱли кандый «јаан ийде-кӱчтӱ» болгоны слерди кайкадар болор. Иаков аксагалдар кижиге болужып тура, «оны Иегованыҥ адына болуп майлап» салар деп бичийт (Иак. 5:14—16). Мында «май» деген сӧс Кудайдыҥ Сӧзиндеги чындыктарын темдектейт. Айдарда, аксагалдар слерле токунал беретен ле Иеговала јаражып алатан библиялык ӱлгерлерди шӱӱжип ийер (Иса. 57:18). Агару Бичикке тайанып берген јӧптӧр слерге чын алтамдар эдерге болужар. Ол тушта слер Иегованыҥ: «Бу јол, оныла барыгар» — деген сӧстӧрин уккандый болороор (Иса. 30:21).

14. Галаттарга 6:1-ле болзо, «јастыра алтам» эткен кижиге аксагалдар канайып болужат? (Јуруктарды база кӧрӱгер.)

¹⁴ Галаттарга 6:1 кычырыгар. «Јастыра алтам» эдип турган христиан кижи Кудайдыҥ бийик нормаларыла јӱрбей барган. Јастыра алтамга сананбай јадып чыгарган јӧп лӧ уур кинчек кирет. Аксагалдар јастырган кижини чын јолго экелерге албаданат, не дезе, олор оны сӱӱп јат. Бу ок ӧйдӧ олор бойын «јобош ло јалакай» болуп тудунат. «Чын јолго кайра экелер» деп кӧчӱрилген грек сӧс врачтыҥ кижиниҥ чыгып калган сӧӧгин јерине тургусканына тӱҥей. Ол мыны кижиниҥ су-кадыгына оноҥ јаан каршу болбозын деп эдет. Канайып јакшы врач бу процедураны эдип тура, кижиге оору болбозын деп албаданат, анайып ла аксагалдар кӧгӱзи уйадап калган кижиге болужат. Галаттарга 6:1-ле болзо, аксагалдарга ајарыҥкай болор керек. Олор кижини чын јолго экелерге болужып тура, толо кемдӱ эмес болгонынаҥ улам олор до јастырар аргалу деп ундыбай јат. Оныҥ учун аксагалдар бойлорын та неде де кижинеҥ артык деп сананбай јат, оны јаргылабай, јабыс кӧрбӧй јат. Оныҥ ордына јобош болуп, кижини килеп јадылар (1 Пётр 3:8).

15. Аксагалдар слерге болужар аргалу болзын деп, нени эдер керек?

¹⁵ Иегова аксагалдарды биске болушты чын эдип јетирзин деп ӱредип јат, оныҥ учун олорго бӱдерге јараар. Олор јажытту јетирӱни ачпай јат, јӧп берип тура, бойыныҥ кӧрӱм-санаазын эмес, је Агару Бичикке тайанып, Кудайдыҥ кӧрӱм-санаазын айдат. Анайда ок олор бисти кӱчтерде артыргыспай, канча кире керек, бистиҥ јаныста болуп, болужып јат (Укаа 11:13; Гал. 6:2). Олордыҥ кылык-јаҥы, ченемели башка да болзо, бис олордыҥ кажызына ла баштанар аргалу. Је бу ла ок ӧйдӧ бойыска јарагадый јӧп угарга болуп, бир аксагалдаҥ база бир аксагалга барары јастыра болор. Не дезе, мынайып бис Агару Бичиктеги Кудайдыҥ «ойгор ӱредӱлерин» эмес, је бойыстыйын бедиреп турган болорыс (2 Тим. 4:3). Оныҥ учун болуш сурап, аксагалга баштанзаас, ол аксагалдардыҥ кемизиле куучындашканысты ла кандый јӧп алганысты бистеҥ сураар болор. Оноҥ биске кандый бир јӧп берердеҥ озо, ӧскӧ аксагалла куучындажып ийер болор. Мынайып ол јобош болгонын кӧргӱзер (Укаа 13:10).

БИСТИҤ МОЛЈУБЫС

16. Кудайдыҥ алдында бисте кандый молју бар?

¹⁶ Аксагалдар биске јӧп берип, кӱчтердиҥ аайына чыгарга болужып та турган болзо, олор бис учун качан да јӧп чыгарбай јат. Бис Кудайга јӱрӱмисти учурлап салганыс, оныҥ учун оныҥ јасактарын бӱдӱрери — бистиҥ молјубыс болот. Бис сӧстӧрис ле керектерис учун Кудайдыҥ алдына каруузына турарыс (Рим. 14:12). А Иегова дезе биске ого чындык артарга болужарга белен болот. Мыны ундыбай тура, аксагалдар бойыныҥ кӧрӱм-санаазына эмес, је Кудай бистеҥ нени сакып турганына ајару эдет. Аксагалдардыҥ јӧбин тузаланып турзаас, бис Иегова чылап сананарга ла ойгор јӧптӧр чыгарарга ӱренип јадыс (Евр. 5:14).

17. Иегованаҥ болуш аларга турган болзоос, биске нени эдер керек?

¹⁷ Иегова бойыныҥ койлорын сӱӱп, кичееп турганына бис сӱреен быйанду болодыс! Ол бисти ӱргӱлјиге јӱрзин деп, бис учун јӱрӱмин берген «јакшы кӱдӱчини», Иисус Христосты, ийген (Иоанн 10:11). Иегова айткан: «Мен кӱӱн-табымды бӱдӱретен кӱдӱчилер берерим. Олор слерге билгир берер, ойгор болорго ӱредер» (Иер. 3:15). Кудай бу сӧзин бӱдӱрип, биске аксагалдар сыйлаган. Бис кӧгӱс јанынаҥ уйадап турганысты сезип турган болзоос эмезе Иеговала ойто јаражып аларга турган болзоос, аксагалдардаҥ болуш сураарга уйалбактар. Ол тушта Иегова олор ажыра биске канайып болужарын кӧрӱп ийерис.