«Чындыкты угарга кӱӱнзеп турган улуска» болужыгар

1. Сӱӱнчилӱ јарды улус канайып алынат? (Апостолдордыҥ ижи 13:47, 48; 16:14, 15).

БАШТАПКЫ чакта кӧп улус Кудайдыҥ Башкарузы керегинде јарды угуп ла ийеле, алынып туратан. (Апостолдордыҥ ижи 13:47, 48; 16:14, 15 кычырыгар.) Бӱгӱнги кӱнде андый улус база бар. Је кезик улус чындыкты угала, баштап керексибей јат. Андый да улус кийнинде кӧрӱмин солып, Кудай керегинде кӧптӧдӧ билерге кӱӱнзей берер болор. Айдарда, «чындыкты угарга кӱӱнзеп турган улуска» туштазаас, нени эдерге јараар деп шӱӱжип ийектер.

2. Ӱренчиктер белетеер иш огородто ишке незиле тӱҥей болот?

² Ӱренчиктер белетеер ишти огородто ишке тӱҥейлеерге јараар. Јерле уружып турган кижи јакшы билер: кезик ӧзӱмдер капшай ӧзӱп, тӱжӱмин берет, је кезик ӧзӱмдерге тӱжӱм берзин деп ӧй керек болот. Оныҥ учун кижи андый ӧзӱмдерди оноҥ ло ары сугарып, кичееп кӧрӧт. Анайып ла кижи Агару Бичиктеҥ чындыкты угуп ла ийеле алынза, бис ого Иисустыҥ ӱренчиги болуп калзын деп тӱрген ле болужадыс. Бу ла ок ӧйдӧ кезик улуска чындыкты баалап баштаарга, ӧй керек болуп турган деп ајаруга алып, олорды база артыргыспай јадыс (Иоанн 4:35, 36). Ойгор болоры биске кажы ла кижиге эбин таап ийерге болужар. Бу јӧрмӧлдӧ кижи баштапкы ла куучында јилбиркей берзе, нени эдер, анайда ок ого кӧгӱс јанынаҥ канайып болужар деп шӱӱжип ийерис.

КИЖИ ЧЫНДЫКЛА ЈИЛБИРКЕЙ БЕРЗЕ

3. Кижи чындыкла баштапкы ла куучында јилбиркей берзе, нени эдер? (1 Коринфтегилерге 9:26).

³ Кижи чындыкла јилбиркей берзе, бис ого јӱрӱмге апарып јаткан јолго капшай ла туруп алзын деп болужарга кӱӱнзеп јадыс. Оныҥ учун баштапкы ла куучында кижинеҥ Агару Бичикти ӱренер бе деп сураарга ла оны јуунныҥ туштажуларына кычырарга коркыбагар. (1 Коринфтегилерге 9:26 кычырыгар.)

4. Кижи баштапкы ла куучында Агару Бичик ӱренерге јӧпсине берген учуралды куучындап беригер.

⁴ Агару Бичикти ӱренер бе деп сурап кӧрӱгер. Кезик улус Агару Бичикти ӱренерге тӱрген јӧпсине берет. Канадада болгон учуралды кӧрӱп ийектер. Бир катап бистиҥ бичиктерлӱ стендке бир кыс јууктап келеле, «Јажын-чакка ырысту јӱригер!» деген брошюраны алган. Стендле турган эје ого акча тӧлӧбӧзинеҥ инструкторло кожо библейский курс ӧдӧргӧ јараар деп јартап берген. Ол кыс јӧпсинип, бистиҥ эјеле телефондорыныҥ номерлериле солыжып алган. Бу учурал четверг кӱнде болгон. Ол ло кӱн кыс бистиҥ эјеге сообщение аткарып, курс качан башталар деп сураарда, эје амыраар кӱндерде деп айткан. Кыс сурады: «Эртен јараар ба? Мен бош болорым». Оноҥ эртезинде ле, пятница кӱнде, олор Агару Бичикти ӱренип баштаган. А амыраар кӱндерде ол кыс јуунныҥ туштажузына келген. Кийнинде ол кыс кӧгӱс јанынаҥ тӱрген ӧскӧн.

5. Кижи Агару Бичикти ӱренерге баштап јӧпсинбезе, нени эдер? (Јуруктарды база кӧрӱгер.)

⁵ Је эмди кажы ла кижи баштапкы ла куучында Агару Бичикти ӱренерге јӧпсинер деп сакыбай јадыс. Кезикте эмеш албаданып ийер керек болуп јат. Озо баштап кижиге јилбилӱ болгодый тема талдап алар керек. Је кижи баштапкы куучында јилбиркебезе де, колоорды бош салбагар. Слер кижиле акту јӱрегердеҥ јилбиркеп турзаар, ол араайынаҥ Агару Бичикти ӱренерге кӱӱнзей берер болор. Кижиле Агару Бичикле ӱредӱ баштаарга, нени айдарга јараар? Ченемелдӱ ака-эјелердиҥ јӧптӧрин кӧрӱп ийектер.

6. Кижи јилбиркеп, база катап куучындажар кӱӱндӱ болзын деп, нени айдарга јараар?

⁶ Кӧп ака-эјелер кезик ороондордыҥ улузына «ӱредӱ», «урок» деп сӧстӧр айтсаҥ, олор кӱчсине берет деп ајаруга алган. Бу ок ӧйдӧ олор Агару Бичик керегинде «куучындажарга», «кӧптӧдӧ билип аларга» кӱӱнзеп јат. Кижи јилбиркей береле, база катап туштажарга кӱӱнзей берзин деп мынайып айдарга јараар: «А слер билереер бе, Агару Бичик эҥ учурлу сурактардыҥ карууларын берип јат?» Эмезе: «Агару Бичик јебрен бичик те болзо, анда тузалу кӧп јӧптӧр бар». Анайда ок: «Слер 10—15 ле минутка тузалу неме билип алараар» — деп айдарга јараар. Кижи слерле јаантайын туштажар керек деп сананбазын деп, «кажы ла неделеде» эмезе «јаантайын» деген сӧстӧрди баштап тарый тузаланбаза, торт болор.

7. Кезик улус чындыкты таап алган деп, недеҥ улам оҥдоп ийген? (1 Коринфтегилерге 14:23—25).

⁷ Јуунныҥ туштажуларына кычырыгар. Апостол Павелдиҥ ӧйинде кезик улус баштапкы ла катап јуунныҥ туштажуларына келеле, чындыкты табып алган деп оҥдоп ийген. (1 Коринфтегилерге 14:23—25 кычырыгар.) Бӱгӱнги кӱнде база андый болуп јат. Кижи јуунныҥ туштажуларына јӱрӱп баштаза, кӧгӱс јанынаҥ капшай ӧзӧт. Је Каандыктыҥ Туразына кижини качан кычырарга јараар? «Јажын-чакка ырысту јӱригер!» деген бичиктиҥ 10-чы бажалыгында јуунныҥ туштажулары керегинде тема шӱӱжилет. Је бу теманы сакыбай, кижини баштапкы ла куучында амыраар кӱнддерде болотон туштажуга кычырарга јараар. Анайда ок ончо улуска айдылатан куучын-эрмектиҥ адын эмезе «Каруулчы шибеениҥ» шӱӱжетен темазын айдып ийерге јараар.

8. Каандыктыҥ Туразына бистиҥ кычырарга турган кижиге нени куучындап берерге јараар? (Исайя 54:13).

⁸ Кижиге бистиҥ туштажуларыс ӧскӧ кудай-јаҥдарда ӧдӱп турган туштажулардаҥ башка деп јартап беригер. Бир ӱй кижи баштапкы катап «Каруулчы шибеени» ӱренерине келеле, кожо келген эјенеҥ сураган: «Сценада турган эр кижи кажы ла кижиниҥ адын билер бе?» Эје ӱй кижиге, јуунда улус бир биле болот, оныҥ учун бис бой-бойысты јакшы билип аларга албаданып јадыс деп јартап берген. Ӱй кижи дезе оныҥ серкпезинде андый неме јок деп айткан. Кӧп улус бистиҥ туштажулардыҥ база бир јанын ајаруга алат. (Исайя 54:13 кычырыгар.) Бис Иеговага бажырарга ла ӱренерге, анайда ок бой-бойыстыҥ кӱӱнисти кӧдӱрерге јуулыжадыс (Евр. 2:12; 10:24, 25). Оныҥ учун бисте кандый да чӱм-јаҥдар эш јок. Туштажатан јерлерде ончо неме ӱренерге эптӱ болзын деп эдилет (1 Кор. 14:40). Бого коштой анда политика керегинде куучындашпай јадыс, телекейдиҥ кӱчтериниҥ аайына чыгарга албаданбай јадыс. Јуунныҥ туштажулары канайып ӧдӱп турганы кижиге эмеш јарт болзын деп, озо «Каандыктыҥ Туразында не болуп турган?» деген видеоны кӧргӱзип ийерге јараар.

9, 10. Туштажуларга келерге алаҥзып турган кижиге нени айдарга јараар? (Јурукты база кӧрӱгер.)

⁹ Кижи бистиҥ јуундарга јӱрӱп баштаза, эмди ого Иегованыҥ Керечизи болуп калар керек деп сананар болор. Оныҥ учун Каандыктыҥ Туразына айылчы келзе, оны кӧрӧргӧ биске сӱӱнчилӱ деп айдып, ого неге де турушпаска јараар деп јартап беригер. Туштажуга ончо билеле, керек дезе кичинек балдарла келерге јараар. Ада-энелер балдарыла кожо бир ле јерде отурат. Оныҥ учун ада-энелер балдары кемле кожо, олорды неге ӱредип турган деп санааркабай јат (Јаҥ. т. 31:12). Анайда ок бис акча јуубай јадыс, нениҥ учун дезе Иисус: «Кудайдаҥ тегинге алганыгар — улуска тегинге беригер» — деп айткан (Матф. 10:8). Ол эмезе, кижи туштажуга нени кийер деп санааркаар болор. Оныҥ учун кандый да баалу-чуулу, јараш кийим керек јок деп јартап беригер. Не дезе Кудай кижиниҥ тыш бӱдӱмин эмес, је јӱрегин кӧрӧт (1 Сам. 16:7).

¹⁰ Кижи јуунныҥ туштажузына келип, бистиҥ ого сӱӱнип турганысты сезип ийзин. Оны аксагалдарла, ӧскӧ јарчыларла таныштырыгар. Кижи ончо улус ого јалакай баштанып турганын ла оныла акту јӱрегинеҥ јилбиркеп турганын кӧрӱп, база катап келерге кӱӱнзей берер болор. Туштажуныҥ ӧйинде шӱӱжип јаткан материалдаҥ Агару Бичиктиҥ ӱлгерлерин кӧргӱзип туругар. Анайып ого программаны угарга јеҥил болор.

КИЖИ АГАРУ БИЧИК ӰРЕНИП БАШТАЗА

11. Кижиниҥ ӧйиҥ баалап турганыс деп канайып кӧргӱзерис?

¹¹ Агару Бичикле ӱредӱ ӧткӱрип тура, нени ундыбас керек? Кижиниҥ ӧйин баалап туругар, ондо ӧскӧ дӧ керектер бар деп ундыбагар. Слердиҥ јерде улус оройтырында јаман неме кӧрбӧй дӧ турган болзо, ӱредӱге оройтыбагар. Анайда ок баштапкы ӱредӱни чӧйбӧгӧр. Ченемелдӱ кезик ака-эјелер кижиде сурактары артып та калган болзо, ӱредӱни ӧйинде божотсын деп јӧп бергилейт. Оноҥ бойоор кӧп куучындаардыҥ ордына, кижиниҥ санаа-шӱӱлтезин угыгар (Укаа 10:19).

12. Агару Бичикле ӱредӱ баштап, бис кандый амаду тургузадыс?

¹² Агару Бичикле ӱредӱ баштап јатсаас, бистиҥ амаду — кижини Иегова ла Иисусла јууктада таныштырып, оныҥ олорго сӱӱжи ӧссин деп болужары болот. Оныҥ учун ајаруны бойыска ла бойыстыҥ билгирлериске эмес, је Кудайдыҥ Сӧзине эдер керек (Ап. ижи 10:25, 26). Бу јанынаҥ јакшы темди апостол Павел кӧргӱскен. Улусты ӱредип тура, ол јаантайын Иисус керегинде куучындап туратан: канайып ол јерге келип, улусты Иеговала таныштырып, оны сӱӱрге болушканын (1 Кор. 2:1, 2). Анайда ок апостол Павел јаҥы ӱренчиктерге алтын-мӧҥӱндий, баалу-чуулу таштардый христиан кылык-јаҥдарды тыҥыдарга болужар керек деп ӱреткен (1 Кор. 3:11—15). Андый кылык-јаҥдарга бек бӱдӱмји, ойгор ло ӧткӱн болоры, анайда ок Иегованаҥ айап турары кирет (Сар. 19:9, 10; Укаа 3:13—15; 1 Пётр 1:7). Павелдиҥ ӱредетен эп-аргазын тузаланыгар: ӱренип турган кижиге бӱдӱмјизин тыҥыдарга ла теҥеридеги Адабыска јуук болуп каларга болужыгар (2 Кор. 1:24).

13. Ӱренип турган кижиге чыдамкайысты ла оны оҥдоп турганысты канайып кӧргӱзерис? (2 Коринфтегилерге 10:4, 5). (Јурукты база кӧрӱгер.)

¹³ Иисустаҥ тем алып, ӱренип турган кижиге чыдамкай болугар, анайда ок оны оҥдоп туругар. Оны эби јок айалгага тургускадый сурактар бербегер. Кижиге кандый бир теманы оҥдоорго кӱч болзо, оны узак шӱӱшпей, оноҥ ары ӱренигер. Оҥдобогон јерди дезе кийнинде шӱӱжип ийерге јараар. Кижи чындыкты алынзын деп албадабагар, чындык јӱрегине тазылдана берзин деп, ого ӧй керек (Иоанн 16:12; Кол. 2:6, 7). Агару Бичик тӧгӱн ӱредӱлерди шибееле тӱҥдештирет. (2 Коринфтегилерге 10:4, 5 кычырыгар; «Агару Бичиктиҥ ӱренетен чыгармазында» 2 Коринфтегилерге 10:4-кӧ берилген јартамалды кӧрӱгер, англ.) Кижиге бу шибеенеҥ чыгарга, ол эмезе, јӱрегине баалу ӱредӱлердеҥ айрыларга, јеҥил эмес болордоҥ айабас. Оныҥ учун кижиге јаҥы шибеени тударга, ӧскӧртӧ айтса, Иеговага иженерге ӱрензин деп болужар керек. Анайып Иегова ого «коруланатан јер» болуп калар (Сар. 91:9).

КИЖИ ЈУУННЫҤ ТУШТАЖУЗЫНА КЕЛЗЕ

14. Туштажуларга јӱрӱп баштаган улуска бис канайып баштанарыс?

¹⁴ Иегова бисти улустыҥ угы-тӧзин, арга-чагын кӧрбӧй, ончо улуска јалакай баштанзын деп кӱӱнзейт (Иак. 2:1—4, 9). Јуунныҥ туштажуларына келип турган улус сӱӱжисти сезип турзын деп, бис нени эдер аргалу?

15, 16. Јаҥы келген улуска јуунда јарап турзын деп, база нени эдерге јараар?

¹⁵ Та кемде јуунныҥ туштажуларына соныркап келет, а та кемди де ӧскӧ јерде јадып турган Керечи јуунга барып келзин деп айткан болор. Оныҥ учун јуунда јаҥы кижи кӧрӱп ийген болзоор, ого јууктап, таныжып алыгар. Кижини јылу уткып, бу ла ок ӧйдӧ ол эбијоксынбазын деп ого ӧйинеҥ ӧткӱре ајару этпегер. Оны кожо отурып алзын деп сурап кӧрӱгер, оноҥ туштажуныҥ ӧйинде ого Агару Бичиктеҥ ӱлгерлерди кӧргӱзип туругар. Ол эмезе, арга бар болзо, кижиде бойыныҥ бичиктери болзын деп, ого Агару Бичикти, ӱренетен материалдарды экелип берерге јараар. Кижи бойын јайым тудунзын деп, база нени эдип ийерге јараар деп сананып кӧрӧр. Мындый учурал болгон. Бир катап ака јуунныҥ туштажузында таныш эмес эр кижини кӧрӱп ийеле, оныла таныжып аларга базып келди. Кӧрӧр болзо, эр кижи айландыра улус чылап јараш кийинбеген деп, эбијоксынып турган эмтир. Бистиҥ ака оны токунадып, Иегованыҥ Керечилери тегин ле улус деп јартап берген. Кийнинде бу эр кижи сууга чӧҥӱрилген. Је ол эмдигенче аканыҥ јылу уткыганын эске алат. Бис јаҥы келген кижиге кӱндӱзек болорго албаданып јадыс, је бу ла ок ӧйдӧ, эби јок сурактар сурап ийбеске, ајарыҥкай болодыс (1 Пётр 4:15).

¹⁶ Јуунда јаҥы келген улуска јарай берзин деп, база нени эдерге јараар? Јакылталар бӱдӱрип, программаныҥ ӧйинде шӱӱжеринде туружып эмезе бой-бойоорло куучындажып јатсаар, Керечи эмес улус керегинде ле олордыҥ кӧрӱми керегинде куучыныгар тоомјылу болзын. Кижи ачына бербезин деп эмезе бойын эби јок сеспезин деп айткан сӧстӧрӧӧрдӧ ајарыҥкай болугар (Тит. 2:8; 3:2). Темдектезе, бистиҥ кӧрӱмисле јӧпсинбей турган улустыҥ кӧрӱмин шоотпогор (2 Кор. 6:3). Мыны анчада ла куучын-эрмектер айдып турган акаларга ундыбас керек. Анайда ок акалар Иегованыҥ Керечизи эмес улуска јарт эмес сӧстӧрди тузаланып, олорды јартап турза, јакшы болор. Мынайып акалар улус керегинде сананып, олорды сӱӱп турганын кӧргӱзер.

17. «Чындыкты угарга кӱӱнзеп турган улуска» бис нени эдерге кӱӱнзейдис?

¹⁷ Ӱренчиктер белетеер иш кӱннеҥ кӱнге там ла керектӱ болуп барат. Оныҥ учун бис «ӱргӱлји јӱрӱмге апаратан чындыкты угарга кӱӱнзеп турган улусты» оноҥ ло ары бедиреп јадыс (Ап. ижи 13:48). Андый улусты таап алала, баштапкы ла куучындашкан тушта Агару Бичикле ӱредӱ баштаарга ла јуунныҥ туштажуларына кычырарга эбијоксынбагар. Анайып бис кижиге ӱргӱлји јӱрӱмге апаратан јолдо баштапкы алтамдарын эдерге болужарыс (Матф. 7:14).