Башкару јӧптиҥ самаразы

Кару акалар ла эјелер!

Судурчы Исаия мынайып айткан: «Иегова... бастыра немени Сениҥ ле болужыҥла эдедис» (Иса. 26:12). Иуданыҥ Каандыгы јӱк ле Иегованыҥ алкыжынаҥ улам јаан једимдерге јединген деп, ол јобош болуп бичиген. Ӧткӧн теократиялык јылда Кудайдыҥ организациязыныҥ једимдери керегинде шӱӱп сананып, Исаияныҥ сӧстӧриле јӧпсинедис. Иегова чынынча «јердиҥ ӱстинде качан да болбогон кайкамчылу керектер» эдип јат (Чыг. 34:10). Ӱзе немени арбынду берип турган Кудайыстыҥ кезик алкыштарын эске алып ийектер.

Бистиҥ окылу сайт айдары јок јаан туза экелет. Бу сайт 600-⁠теҥ ажыра тилдерге бар. Ондо бичиктер 750-⁠неҥ кӧп тилдерге чыгат; олорды кычырарга ла таштап аларга јараар. Бистиҥ сайт ачык јӱректӱ улуска сӱӱнчилӱ јарды јетирерге болужат. Мындый учурал болгон. Бир биле кудай јаҥныҥ экијӱстенип турган улузын кӧрӱп, чӧкӧй берген. Олор чындыкты бедиреп тура, бистиҥ сайтка кирген. Анайып, бистиҥ бичиктерди кычырарга ла кӧрӱлмелерди кӧрӧргӧ, јаантайын бу сайтка кирип баштаган. Олор, керек дезе, «Исследуем Писания каждый день» деген брошюраны чыгарып алала, кажы ла эртен тура бойыныҥ эки балазыла кожо кычырып, шӱӱжер болгон. Бир катап олор кажы ла кӱнниҥ ӱлгерин шӱӱп јадарда, Иегованыҥ Керечилери олордыҥ эжигин токулдаткан. Бистиҥ сайттаҥ улам бу биле кандый солынталар эткенин куучындап берген. Олор татуировкаларын, пирсингтерин јоголткон, кудай јаҥныҥ сӱрлерин таштаган, телекейдиҥ байрамдарын ӧткӱрбей барган, анайда ок јаман салтарын јетиретен кинолорды кӧрбӧй барган. Олор бу солынталарды Иегованыҥ Керечилериле таныжардаҥ озо эткен! Бу самара бичилип јадарда, бу билениҥ ӱч кижизи: адазы, энези ле балдарыныҥ бирӱзи јарчылар болуп калган, је энези ле адазы чӧҥӱрилерге белетенип турган болгон.

База бир јаан туза экелип турган арга — ол интернет-телевидение; мындый арга учун кӧп улус быйанын айдат. Эм тургуза кажы ла айдыҥ программазы 70-⁠неҥ кӧп тилге чыгып јат, келер ӧйдӧ оноҥ кӧп тилдерге чыгар. Мындый программаларды кӧп билелер бойыныҥ билелик бажырыжында кӧрӱп јадылар. Бир ака мынайып айткан: «Иегованыҥ организациязы качан да мындый јаан болбогон, је андый да болзо, тӧс башкаруга мындый јуук качан да болбогон ошкожыс!»

Курултайлар Иегованыҥ алба­тызына јаан учурлу туштажулар болот. 2015 јылдыҥ теократиялык јылында регионныҥ курултайларыныҥ программазында 42 кӧрӱлме ле јуруктар кӧргӱзилген. Программаныҥ кажы ла бӧлӱги ӧнӧтийин курултайга белетелген алты кӱӱлик заставканыҥ бир-бирӱзиле башталар болгон. Ченемели јаан бир ака программа керегинде мынайып айткан: «Курултайга јуулган улус программаныҥ бир де минудын божотпоско албаданган деп билдирген». Бир миссионер эје: «Кӧрӱлмелердеҥ улам, алдындагызына кӧрӧ, чындыкты оноҥ јакшы оҥдоп, Каандык чын ла бар деп, оноҥ тыҥ бӱдӱп баштагам» — деп айткан.

Ӧткӧн јылда Иегова биске Каандыктыҥ бир кезик јаҥы кожоҥдорын сыйлаган. Бир биле мындый сӧстӧр бичиген: «Јаҥы кожоҥдорды угуп турзас, Иегова бисти кучактап алган немедий билдирет. Кӱчтер болгон ӧйлӧрдӧ бу кожоҥдор бистиҥ кӱӱн-санаасты кӧдӱрип туратан». Курултайда бистиҥ Каруулчы Бакананыҥ оркестринде ле хорында туружып турган ака-эјелерис кандый иш эдип турганы керегинде кӧптӧдӧ билип алганыс. Олордыҥ чӱмдеген кӱӱзи бисти сӱӱндирет ле Иегова Кудайысты мактайт.

Слердиҥ јуун стендтерле јарлайды ба? Мындый арганыҥ болужыла сӱрекей бийик тураларда ла ӧскӧ улуска кирерге јарабас јерлерде јадып турган улус сӱӱнчилӱ јарды баштапкы катап уккан, анайда ок јарлабай барган Керечилер керектӱ кӧгӱс болушты алып јадылар. Оныҥ учун стендтерле јарлаганы сӱрекей кӧп туза экелет. 2015 јылда Тӱштӱк Кореяда бичиктерлӱ стендтиҥ јанына бир эр кижи базып келген. Бу кижи, калганчы ӧйлӧрдӧ, кӧгӱс сурактар керегинде тереҥ сананып баштаганын куучындаган. Анайып бу кижи Агару Бичикти ӱренип баштаган. Ол ло јылда, кочкор айда бу эр кижи баштапкы катап јуунга барган, тулаан айда таҥкызын таштаган, кандык айда Тӱштӱк Кореяныҥ филиалында болгон. Эмди ол кижи оноҥ ло ары ич-кӧгӱс једимдерге јединет. Бу учурал телекейлик тӧс башкаруга јеткен учуралдардыҥ јӱк ле бирӱзи.

Ол курултайда чыккан бичик, Иегованыҥ организациязынаҥ туура јӱре берген ишчилерин Кудайдыҥ јылу колдорына кайра јанып келерине кӱӱнзетсин деп, мӱргӱп јадыс. Бис слерди ончогорды кычырып турубыс: организацияга јанып келерге тургандарды Иегова чылап јылу уткыгар (Иез. 34:16).

Ӧткӧн теократиялык јылда Иегова Бойыныҥ албатызына алкыштарды арбындап берген. Келер ӧйдӧ бисти не сакыйт? Эмеш сакып ийектер, ол тушта кӧрӧрис. Башкару јӧптиҥ акалары слерди ончогорды тыҥ сӱӱп, слер учун мӱргӱп јат деп, бир де алаҥзыбагар.

Акту јӱрегистеҥ кӱӱнзегенисле,

Слердиҥ акаларар Иегованыҥ Керечилериниҥ Башкару јӧби