Четверг, куран ай 28
Иегова оны акту јӱрегинеҥ кычырып, болуш сурап турган улустыҥ ончозына јуук (Сар. 145:18).
Иегова, «сӱӱштиҥ... Кудайы», бисле кожо! (2 Кор. 13:11). Иегова бистиҥ кажыбыска ла ајару эдет. Ончобысты эбире оныҥ чындык сӱӱжи (Сар. 32:10). Иегованыҥ бисти канайып тыҥ сӱӱп турганын сананып турзаас, ол биске ончо ло кире јуук деп билдирер. Кудайыска мӱргӱген тужыста, бис оныҥ сӱӱжи биске сӱреен керектӱ деп айдар аргалу. Анайда ок бис ого санааркаштарысты куучындаар аргалу. Ол бисти оҥдоор ло болужар (Сар. 145:19). Канайып соок кӱнде оттыҥ јанына отурала, јылынарга јакшызынып јадыс, анайып ла бисти сӱӱжиле јылыдып турган Иеговага јууктаарга биске сӱреен јарап турган. Иегова бисти сӱреен тыҥ сӱӱп јат. Јайаачы Иегованыҥ бисти бойы сӱӱп турганы не аайлу јакшы дезеер! Оныҥ да учун сарнаачы чылап: «Мен Иегованы тыҥ сӱӱп јадым!» — деп айдып ийектер (Сар. 116:1). w24.01 31, абз. 19, 20
Пятница, куран ай 29
Мен олорго адыҥды ачтым (Иоанн 17:26).
Иисустыҥ ӱреткен ӱренчиктери, еврейлер, Кудайдыҥ ады — Иегова деп билетен болгон. Оныҥ учун Иисус, јаҥыс ла, Кудайдыҥ ады — Иегова деп куучындаган эмес, је улуска Кудай керегинде билгирин кӧптӧдӧргӧ болушкан (Иоанн 1:17, 18). Темдектезе, Еврей Бичимелдерде Иегова јалакай ла килеҥкей Кудай деп кӧргӱзилет (Чыг. 34:5—7). Мыны јартаарга, Иисус тенибер уул ла оныҥ адазы керегинде укаа сӧс куучындаган. Анда адазы јастыразын алынган уулын кӧрӧлӧ, удура јӱгӱрип, оны кучактап, акту јӱрегинеҥ јаманын таштаганы айдылат. Бу учуралды кычырган улус Кудайдыҥ килеҥкейин ле јалакайын кӧрӱп јат (Лука 15:11—32). Анайып, Иисус Иегованыҥ чыннаҥ ла кандый болгонын кӧргӱскен. w24.02 10, абз. 8, 9
Суббот, куран ай 30
Улусты Ол бисти токунадып турган токуналла токунадар аргабыс бар (2 Кор. 1:4, ЈТ).
Иегова Кудай шыралап јӱрген улусты сергидип, токунадып јат. Бис Кудайга канайып тӱҥейлежер аргалу? Улусты килеп, токунадып турар керек. Оныҥ учун килеерге ле токунадарга болужатан кылык-јаҥдарга ӱренер керек. Бой-бойысты кажы ла кӱӱн токунадып турарга, биске јалакай ла килемкей болор керек (Кол. 3:12; 1 Фес. 4:18; 1 Пётр 3:8). Улуска канча ла кире јалакай ла килемкей болзоос, кӱч айалгада болгон улусты токунадар кӱӱнис, ончо ло кире тыҥ болор. Иисус мынайда айткан: «Кижиниҥ јӱреги неле толо, оозынаҥ чыгары ол ине. Јакшы кижи бойында јакшыны чеберлейт, оноҥ јакшы чыгат» (ЈТ) (Матф. 12:34, 35). Тӱбекке тӱшкен ака-эјелеристи токунадып турзаас, олор бистиҥ сӱӱжисти сезер. w23.11 10, абз. 10, 11