Бис сӱреен баалу эрјине таптыбыс

Уинстон ака, Кудайды канайып бедирегениҥди куучындап берериҥ бе?

Мен Австралийский Квинсленд штатта, фермада чыдагам. Бистиҥ биле Кудайга бӱтпеген. Јаткан јерис те улустаҥ туура јерде болгон, оныҥ учун мен кӧп сабада јӱк ле билемниҥ улузыла куучындажатам. 12 јашту тужымда Кудай керегинде чынды билип аларга, оны бедиреп мӱргӱп туратам. Соондо ферманаҥ јӱрӱп, Аделаида калада (Тӱштӱк Австралия штат) ишке кирип алгам. 21 јаштуда Сидней деп калага амырап јӱреле, Пэмле танышкам. Ол меге англо-израильский кудай јаҥ керегинде куучындаган. Бу јаҥныҥ улузыныҥ бӱткениле болзо, англосакстар Израильдиҥ он уктаҥ турган тӱштӱк каандыгынаҥ арткан-калган улузынаҥ келген. Бу он ук б. э. озо VIII чакта айдуга барган. Мен Аделаидага кайра јанып келеле, Иегованыҥ Керечилериле Агару Бичикти ӱренип турган кожо иштеген кижиге бу куучын керегинде куучындагам. Бис экӱниҥ куучыныс кӧп сабада Иегованыҥ Керечилери неге бӱдӱп турганы керегинде болгон. Анайып канча частыҥ туркунына куучындашканыстаҥ Кудай мениҥ јаш туштагы мӱргӱӱлдериме каруу бергенин оҥдоп ийгем. Мен Јайаачы ла оныҥ Каандыгы керегинде чынды билип алгам! Анайып, сӱреен «баалу эрјинени» таап алдым (Матф. 13:45, 46).

Пэм эје, сен бу «баалу эрјинени» база кичинек тужыҥда бедиреп баштагаҥ. Сен оны канайып таптыҥ?

Мен Кофс-Харбор (Јаҥы Тӱштӱк Уэльс штат) деп калада кудайзак биледе чыдагам. Мениҥ ада-энем, анайда ок энемниҥ ада-энези англо-израильский кудай јаҥныҥ ӱредӱлерине бӱткен. Оныҥ учун мениҥ карындажымды, јаан эјемди ле мени, анайда ок энемниҥ ака-эјелериниҥ балдарын јаштаҥ бери Кудай англосакстарды ӧскӧ улуска кӧрӧ, јакшы кӧрӧт деп ӱреткен. Је мен бого бӱтпегем, оныҥ учун менде кӧгӱс сурактар кӧп болгон. Мен 14 јаштуда јуугындагы башка-башка серкпелерге: англикандарга, баптисттерге ле јетинчи кӱнниҥ адвентисттерине барып јӱрген де болзом, Кудай керегинде сурактарымныҥ карууларын таппагам.

Кийнинде бис Сидней деген калага кӧчкӧнис. Ондо мен Уинстонло танышкам. Ӧрӧги айдылганыла, бистиҥ Кудай керегинде куучындарыстаҥ улам, Уинстон Иегованыҥ Керечилериле Агару Бичикти ӱренип баштаган. Бис экӱ бичижип турарыста, оныҥ кажы ла самаразында толтыра библиялык ӱлгерлер болгон. Чынынча айтса, мен озо бир эмеш чочып, керек дезе кыртыштанып та туратам! Је оноҥ, Уинстонныҥ бичип турганы — чындык деп, бир эмештеҥ оҥдоп баштагам.

1962 јылда Аделаидадӧӧн Уинстонго јууктада кӧчӱп алгам. Ол мени Томас ла Джанис Слоуман деп эш-нӧкӧрлӧрдиҥ айылында јадар эдип куучындажып салган. Олор алдында Папуа — Јаҥы Гвинеяда миссионерлер болуп иштеген. Ол ӧйдӧ меге јӱк 18 јаш болгон. Бу эш-нӧкӧр меге сӱрекей јалакай баштанып, Иегова керегинде кӧптӧдӧ билерге болушкан. Анайып, Агару Бичикти ӱренип баштайла, чындыкты таап алгам деп бӱдӱмјиленгем. Тойдыҥ кийнинде бис Уинстонло Иеговага ӧйисти толо берип иштеп баштаганыс. Кӱчтер јокко болбогон до болзо, јарлаар иштеҥ кӧп алкыштар алганыс, оныҥ учун «баалу эрјине» — чындык — учун быйаныс там тыҥыган.

Уинстон, Иеговага иштеп баштаган тужыгарды куучындап берзеҥ.

Пэмле алышкан кийнинеҥ Иегова биске «јаан ла једимдӱ иштер эдетен аргалардыҥ [эжиктердиҥ, ЈТ]» баштапкызын ачкан (1 Кор. 16:9). Бу «эжиктӧӧн» кирерге, бисти Джек Портер ака кӱӱнзеткен, ол бистиҥ кичинек јуунга аймак кӧрӧӧчи болуп келип туратан. (Эмди бис бу акала Австралазийский филиалдыҥ комитединде кожо иштейдис.) Джек ле оныҥ ӱйи Розлин бис экӱни пионер болуп иштеерине кӱӱнзеткен. Бис бу ишти беш јыл сӱӱнчилӱ бӱдӱргенис. Оноҥ, меге 29 јаш толо берерде, Пэм ле мени Тымык теҥистиҥ тӱштӱк јанындагы ортолыктарда аймак кӧрӧӧчиниҥ ижине кӧстӧгӧн. Ол ӧйдӧ бу јерлер Фиджидеги филиалга кирген. Биске мындый ортолыктарда иштеер керек болгон: Американский Самоа, Самоа, Вануату, Кирибати, Науру, Ниуэ, Токелау, Тонга ла Тувалу.

Ол јылдарда ыраагындагы кезик ортолыктардыҥ улузы Иегованыҥ Керечилеринеҥ чочып туратан, оныҥ учун бистерге ӧткӱн болор керек болгон (Матф. 10:16) Ондогы јуундар кичинек болгонынаҥ улам кезикте ака-эјелердиҥ кемизи де бисти айылына кондырып болбойтон. Андый болгондо бис јербойыныҥ улузынаҥ конып аларга суранзаас, олор бисти айылына јаантайын кӱӱнзеп кондыратан.

Уинстон, сен кӧчӱрер ишке болужарга кӱӱнзеп јадыҥ. Нениҥ учун?

Ол ӧйдӧ Тонга деп ортолыктардагы ака-эјелерде тонган тилге тоолу болчок буклет ле брошюра болгон. Јарлаар иште олор английский тилге бичилген «Истина, ведущая к вечной жизни» деп бичикти тузаланган. Ол ӧйдӧ Агару Бичикле ӱредӱлер бу бичикле ӧткӱрилген. Оныҥ учун тӧрт неделениҥ туркунына ӧткӧн аксагалдардыҥ сургалында английский тилди бир эмеш билген јербойыныҥ ӱч аксагалы бу бичикти тонган тилге кӧчӱрип баштаган. Пэм кӧчӱрилген текстти печатный машинкага бичип ийерде, бис оны Америкадагы филиалдӧӧн аткарып ийгенис. Анайып ондо бу бичик кепке базылып чыккан. Кӧчӱрер иш сегис неделениҥ туркунына ӧткӧн. Бу бичиктиҥ кӧчӱрилгени бийик кеминде болбогон до болзо, оныҥ болужыла кӧп тонган укту улус чындыкты билип алган. Пэм ле мен кӧчӱреечилер эмезис, је бу учурал бистиҥ кӧчӱрер ишке болужар кӱӱнисти тыҥыткан.

Пэм, ортолыктардагы јӱрӱм Австралиядагы јӱрӱмнеҥ незиле башка болгон?

Андагы јӱрӱм чек башка! Бир јанынаҥ коркышту кӧп москиттер, крысалар, айдары јок изӱ ле чык, оору-јобол, кезикте тойо ажанбай да јадыҥ. А бир јанынаҥ бистиҥ фаленеҥ теҥистиҥ јаражын кӧрӱп јакшызынатаныс. Самоан тилле болзо, фале — салам јабынтылу стене јок полинезийский тура. Айдыҥ тӱндерде кокосту пальмалардыҥ кӧлӧткӧлӧрин ле тымык теҥиске айдыҥ јалтырап кӧрӱнгенин јилбиркеп кӧрӧтӧнис. Андый ӧйлӧрдӧ мӱргӱп, шӱӱп сананганыс чын кӧрӱм-санаалу артарга болушкан.

Бис ондогы балдарды сӱӱй бергенис. Олор бистерди, ак улусты, коркышту кайкап ајыктайтан. Мынаҥ улам кезикте каткымчылу ла јилбилӱ учуралдар болгон. Бир катап Ниуэ деп ортолыкта бир уулчак Уинстонныҥ колын сыймап: «Меге сениҥ јуҥыҥ јарап јат» — деп айткан. Ол мынаҥ озо колдыҥ тӱктерин качан да кӧрбӧгӧн, оныҥ учун оны канай чын айдарын билбес болгон.

Андагы улустыҥ коркышту уйан јадын-јӱрӱмин кӧрӱп, ичис ачыйтан. Мында, райдый јараш јерде, эмчиниҥ болужын алар арга чек јок болгон, анайда ок улуска ичетен суу да јетпей туратан. Је бистиҥ ака-эјелер мындый јӱрӱмге ӱренип калган. Олор билези јанында болгонына, Иеговага бажыратан јери барына, анайда ок Кудайды мактайтан аргазы барына јаантайын сӱӱнип туратан. Олордыҥ теми биске чӱм јок јӱрӱм јӱрерге ле кижиге не эҥ керектӱзин ундыбаска болушкан.

Пэм, кезикте сеге бойыҥа сууга барарга ла ӱренишпеген айалгада курсак азарга келишкен. Сен мыны канайып ӧдӱп чыккаҥ?

Мен бойымныҥ адамга быйанымды айдып јадым. Ол мени кӧпкӧ ӱредип салган, темдектезе, от одырарына, отко курсак азарына ла јеҥил эмес айалгада не барыла тузаланарына. Бир катап бис Кирибатиге једип келеле, салам јабынтылу, бамбук стенелерлӱ ле коралловый гравий јайып салган полду турага токтогоныс. Мен от саларга полды ойо казып, отты одынла эмес, кокостыҥ кадарыла одыргам. Бир катап сууалгышка барарымда, ондо јербойыныҥ ӱй улузы очередин сакып тургулады. Олор суу аларга узуны эки метр агашка буу буулап, бууныҥ учына час айак буулап салатан. Бу кармак ошкош агашты кенейте тартып ийзе, байагы айак кӧҥкӧрилип, сууны сузып ийетен. Мениҥ санаамла, мында кӱч ле неме јок ошкош. Је суу алатан очередим једип келерде, сууны алып болбой турганым коркыш болды. Байагы час айак сууныҥ ӱстине кайкалап, сууны суспай турды! Бу ӧйдӧ кийни јанымда ӱй улус каткырышкан. Је учында бир ӱй кижи меге болужып ийген. Ондогы улус биске јаантайын јалакай баштанар болгон.

Ортолыктарда јарлаары слер экӱге тыҥ јараган. Кандый бир јилбилӱ учуралды куучындап беретенеер бе?

Уинстон: Биске кезик чӱм-јаҥдарды оҥдоорго ӧй керек болгон. Темдектезе, акалар бир кӱнге јийтен курсагыныҥ ончозын столго чыгарып салатан. Озо баштап, бу курсактыҥ кезигин айылдыҥ ээзине артыргызып салатанын билбей, бис ӱзе јип койотоныс. Кийнинде јастырагысты оҥдоп ийгенис. Је акалар бисти оҥдоп туратан. Анайда ок олордыҥ јуунына јарым јылдаҥ келзеес, олор сӱреен тыҥ сӱӱнер болгон. Бу ортолыктарда јербойыныҥ акаларынаҥ ӧскӧ, база Керечилер болбогонынаҥ улам олор јӱк ле бистерле куучындажар аргалу болгон.

Бистиҥ келгенис айылдаш јаткан улуска солун болгон. Олордыҥ кӧбизиниҥ санаазыла болзо, бу кудай јаҥды акалар бойлоры сананып тапкан, оныҥ учун ӧскӧ јерлерде Керечилер база бар деп бӱтпеген. Је олор, акаларга ыраак јерлердеҥ андый ла кудай јаҥду улус келзе, бистиҥ кудай јаҥды бастыра телекейлик организация болгонын кӧрӱп, кайкап туратан.

Пэм: Эҥ ле јилбилӱ учуралдардыҥ бирӱзи бис Кирибатиге, тоолу болчок ака-эјелерлӱ јуунга келеристе болгон. Бир катап биске јуунда сок јаҥыс аксагал болуп турган Синикай Матера корзина тудунып алган келип: «Бу слерге» — деди. Корзинада јаҥыс болчок јымыртка болгон. Бу кичинек, је акту јӱректеҥ берилген сый бистиҥ јӱрегиске тыҥ тийген. Нениҥ учун дезе ол ӧйдӧ такааныҥ јымыртказы каа-јаа ла болотон.

Пэм, сен канча да ӧйдӧҥ ичте балаҥды јылыйткаҥ. Бу уур-кӱчти ӧдӧргӧ сеге не болушкан?

1973 јылда Уинстонло Тымык талайдыҥ ортолыктарында иштеген тужыста мен табынып алгам. Оныҥ учун бис Австралияга кайра јанганыс, је ондо тӧрт айдыҥ бажында ичтеги балагысты јылыйтып салганыс. Бу биске јаан ачу-корон экелген. Соондо бир эмеш токынай бергенис. Је јӱрегистиҥ ачузы јӱк 2009 јылдыҥ кандык айыныҥ 15 кӱнниҥ «Каруулчы шибеезин» алган кийнинеҥ јоголып калган. Анда «Вопросы читателей» деген рубрикада «Если ребенок умер в утробе матери, можно ли надеяться, что он воскреснет?» деген сурак јарталган. Бу јӧрмӧл бисти ончо неме Иегованыҥ колында деп бӱдӱмјилеген, а Иегова качан да јастыра неме этпей јат. Ол бистиҥ бу калју телекейдеҥ алган ончо шыркабысты Иисус ажыра «кӧрмӧстиҥ керектерин» бускан тушта јазып салар (1 Иоанн 3:8). Бу јӧрмӧлди кычырган кийнинеҥ бис Иегованыҥ бойыныҥ албатызына сыйлаган «баалу эрјинени» оноҥ тыҥ баалап баштаганыс. Кудайдыҥ Каандыгына иженбеген болзоос, бисле не болгой не!

Бу јеткерлӱ учуралдыҥ кийнинеҥ бис ӧйисти толо берип иштеерин орныктырып, канча да ай Австралиядагы Бет-Элде иштедис, оныҥ кийнинде аймак кӧрӧӧчиниҥ ижин улалтканыс. Јаҥы Тӱштӱк Уэльс штаттагы јурттарда ла Сидней калада тӧрт јыл иштегенис. А 1981 јылда бисти Австралиядагы Бет-Элге (озо мынайып адалган) кычырган, оноҥ ло бери ондо иштейдис.

Уинстон, сен эмди Австралазиядагы филиалдыҥ комитединде иштеп јадыҥ. Тымык теҥистиҥ ортолыктарында иштегениҥнеҥ алган ченемелиҥ сеге болужат па?

Эйе, сӱреен болужып јат. Озо баштап бистиҥ филиалга Американский Самоа ла Самоа деген ортолыктар кирген. Оноҥ бисти Јаҥы Зеландияныҥ филиалыла бириктирип салган. Эмди Австралазиядагы филиалга Австралия, Американский Самоа ла Самоа, Кӱнчыгыш Тимор, Кука ортолыктар, Ниуэ, Јаҥы Зеландия, Токелау ла Тонга кирет. Бу јерлердиҥ кӧбизине, мени филиалдыҥ чыгартылу кижизи эдип кӧстӧӧрдӧ, барып јӱргем. Ортолыктарда јадып турган чындык ака-эјелерле иштегенимнеҥ ченемелим јаанаган. Мынаҥ улам, филиалга иштеп тура, олорго болужар аргалу болодым.

Адакы сӧзимде айдарга турганым: бис Пэмле экӱ Кудайды јӱк ле јаан улус эмес, је балдар да бедиреп јат деп канча катап бӱдӱмјилендис. Бисле де андый болгон. Јииттер де сӱреен «баалу эрјинени», керек дезе олордыҥ јуук улузы мыны јаратпай турган да болзо, бедиреп јат (2 Каан. 5:2, 3; 2 Лет. 34:1—3). Иегова сӱӱштӱ Кудай. Ол ончо улусты — јажы јаанагандарды да, јииттерди де — ӱргӱлјиге јӱрзин деп кӱӱнзейт.

Бежен кире јыл кайра Пэмле Кудайды бедиреп баштаганыс неге экелерин билбегенис те. Каандык керегинде чындык — сӱреен баалу эрјине. Бис оны тыҥ баалап јадыс!