Јарлаар иштиҥ темигӱлерин тыҥыдадыс. Улус иштеп турган јерлерде канайып јарлаар

Бу нениҥ учун керектӱ. Кӧп улустыҥ ижи кере тӱжине болот, оныҥ учун Каандык керегинде јетирӱни јӱк ле олордыҥ ижине барып куучындаар арга бар. Улус иштеп турган јерлерде јарлаганы кӧп сӱӱнчи ле јакшы једимдер экелет. Нениҥ учун дезе мынайып јарлаза, айылдар сайын јарлаганына кӧрӧ, иште јаантайын улус бар, анайда ок олор биске клиенттерге чилеп јалакай баштанат. Јакшы једимдер болзын деп ӧткӱн болуп, јарчылардыҥ тыш бӱдӱми јарамыкту болоры јаан учурлу (2 Кор. 6:3). Јарлаарыныҥ кӧрӧӧчизи улус иштеп турган јерлер канча кире ӧйдиҥ бажына јарлалып турган ла јарлаар иштиҥ мындый аргазына кем туружып турган деп, кӧрӱп турар учурлу.

Мыны канайып эдер:

Кыскарта куучын баштаарын белете. Бис кижиниҥ иштеер ӧйин узакка тутадып ийзес, келер туштажуда ол бисле куучындашпас болор.
Улус иштеҥ бир эмеш јайым тужында бар. Темдектезе, иш јаҥы ла башталган ӧйдӧ.
Озо баштап директорло эмезе администраторло куучындаш. Кӱндӱзек бол. «Улусты айылдарында тудуп аларга кӱч болуп турганынаҥ улам, бис олорло иште кыскарта куучындажып ийерге албаданадыс» — деп, айдарга јараар. Куучынды кыскарта баштап ийеле буклет, брошюра эмезе ӧскӧ дӧ бичикти берерге јараар. Бистиҥ ижис кандый акчала јеткилделип турган деп сурак болбозо, акту кӱӱнинеҥ берилетен акча керегинде куучындабаза јакшы болор, оноҥ башка олор бисти садучылар деп бодоордоҥ айабас.
Директор кӱндӱзек болзо, оныҥ ишчилериле кыскарта куучындажып ийерге јараар ба деп сура. Кезик иштеер јерлерде амыраар кыпта бичиктер артыргызып саларга јараар ба деп сураганы јакшы болор.
Ӧткӱн ле эпчил бол. Темдектезе, кижи божобой јаткан болзо, сакып ал.

Айдыҥ туркунына берилген јӧп:

Билелик бажырышта улус иштеп турган јерлерде јарлап куучындажар арганы белетеп ал. Сени мындый јерлерге јарлазын деп сураза, белетенип алганыҥды тузаланарга јараар.