Айылчыларды кӱӱнзеп уткыйдыс

Тулаан айдыҥ 23 кӱнинде болотон Кайраканныҥ Эҥирине 12 миллион эмезе оноҥ до кӧп айылчылар келер болор деп сакып јадыбыс. Олор Иегова Кудайдыҥ берген толынтызы ла келер ӧйдӧ урулатан алкыштары керегинде куучын-эрмекти угуп, сӱреен јаан кере алар (Ис 11:6—9; 35:5, 6; 65:21—23; Ин 3:16). Је бу аҥылу туштажуда кере берер кижи јаҥыс јетирӱчи эмес. Бис келген улусты ончобыс кӱӱнзеп уткыыр аргалу (Рм 15:7). Мынайып эдерге тоолу јӧптӧр.

• Туштажуга келип, јериҥе отурып алала, программаныҥ башталарын сакып отурарыныҥ ордына, айылчыларды ла јарлаар ишке турушпай барган ака-эјелерди јылу сӧстӧрлӧ кӱлӱмзиренип уткы

• Сен анчада ла бойыҥ кычырган улуска јаан ајару эдер болорыҥ, је кампания тушта кычырту алып, туштажуга келер улусты база ундыба. Кижи туштажуга баштапкы катап келген бе јок по деп сурап угарга јараар. Агару Бичиктеҥ ӱлгерлерди кожо кӧрӧргӧ лӧ кожоҥдорды кожо кожоҥдоорго, кижиге сениҥ јаныҥа отурып алзын деп айдарга јараар

• Куучын-эрмектиҥ кийнинеҥ кижиде сурактар бар ба деп сурап ук. Слердиҥ кийнердеҥ јуулыжатан јуунга залды тӱрген божодор керек болзо, кижиле тоолу ла кӱннеҥ туштажып ийерге куучындажып ал. Сенде кижиле колбожып ийетен јетирӱлер јок болзо, мынайда айдарга јараар: «Программа керегинде слер нени сананып турганарды угуп ийерге турум. Слерле канайып колбожып ийер?»