Иегованыҥ Керечилери — олор кемдер?

Слер Иегованыҥ Керечилеринеҥ бир-бирӱзин билерер бе? Олор слердиҥ айылдаштарар, кожо иштеп турган улус, эмезе ӱренип турган балдар болордоҥ айабас. Эмезе слерле Агару Бичикти ӱренип турган улус. Иегованыҥ Керечилери кемдер болот не? Олор ӧскӧ улуска бойыныҥ Кудайга бӱткени керегинде нениҥ учун куучындап јат?

Бис тегин ле улус. Бистер башка-башка укту, культуралу ла арга-чагыс башка улус. Бистердиҥ кезигис алдында ӧскӧ кудай јаҥдарда болгон, кем де Кудайга чек бӱтпеген де болгон. Је бис ончобыс Керечилер болордоҥ озо Агару Бичиктиҥ ӱредӱлерин лаптап шиҥдегенис (Апостолдордыҥ ижи 17:11). Мынайып шиҥдегенис бистиҥ бӱдӱмјисти тыҥыткан. Оноҥ улам бойыстыҥ кӱӱнисле јӱрӱмисти Иегова Кудайга учурлаганыс.

Бис Агару Бичиктеҥ берилген билгирлерди баалап јадыбыс. Бистерде, кажы ла кижиде чилеп, кӱчтер ле једикпестер бар. Је библиялык принциптерди (јасактыҥ тӧзӧлгӧзи) тузаланарга албаданып турганыстаҥ улам, бистиҥ јӱрӱмис канча катапка оҥдолып, ырысту болуп калган (Сарын 128:1, 2). Бу, Агару Бичиктеҥ билип алганысты нениҥ учун улуска куучындап турганыстыҥ бир шылтагы.

Бис Кудайдыҥ нормаларыла јӱредис. Бу нормалар Агару Бичикте бичилген. Олор бисти амыр-энчӱ јадарына, улусты тооп јӱрерине, јалакай болуп, улусты тӧгӱндебей јӱрерине ӱредет. Олор улус ортодо тоомјылу јӱрерине болужат, билелик курчуны ла ак-чегисти тыҥыдат. «Кудай улустыҥ чырай-бӱдӱжине кӧрбӧй турган», оныҥ учун бис политикалык ла расалык оҥдошпостордоҥ јайым. Иегованыҥ Керечилери ончозы ич-кӧгӱсти баалап турган чын ла бастыра телекейлик карындаштык албаты. Бис тегин улус та болзос, је башка албаты (Апостолдордыҥ ижи 4:13; 10:34, 35).

• Иегованыҥ Керечилерин нениҥ учун тегин улус деп, айдарга јараар?

• Агару Бичиктеги билгирлердеҥ улам Керечилердиҥ јӱрӱми канайып солынган?