Кудайга бӱдӱп тургандарысла куучындашканы кандый туза экелет?

Туштажуларга барарга ыраак та болзо, тышкары кӱн-аай јаман да болзо, бис туштажуларыста јаантайын болодыс. Јӱрӱмниҥ кӱчтерине ле иштеҥ арып-чылап калганына ајарбай, Кудайга кожо бӱдӱп турган ака-эјелерле туштажарга мынайып албаданарына Иегованыҥ Керечилерин не кӱӱнзедет?

Бис кӱчтерди ӧдӧргӧ болуш аладыс. Христиан туштажуларга јӱрӱп тургандар керегинде айдып: «бой-бойыбыска ајарыҥкай бололы» — деп, Павел бичиген (Еврейлерге 10:24). Бу сӧстӧр биске бой-бойыбысты јакшы билип алар керек дегенин кӧргӱзет. Элчи Павелдиҥ сӧстӧри бисти бойыстыҥ ака-эјелеристи кичеерине кӱӱнзедет. Јуунныҥ улузыла јууктада таныжып алзас, олордыҥ кезиги бисте ле ошкош кӱчтерди једимдӱ ӧдӱп чыкканын билип аларыс. Бу христиандардыҥ јӧби биске бойыстыҥ айалгабыстыҥ аайына чыгарга болужар.

Бис чындык најыларды табадыс. Христиан туштажуларга келип тургандар — јӱк ле таныш улус эмес. Олор — бистиҥ јуук најыларыс. Јууннаҥ башка ӧйдӧ бис бой-бойысла јолыгыжып амырап јадыс. Бу биске кандый туза экелет? Бис бой-бойыбысты оноҥ тыҥ бааларга ӱренип, ортобыстагы сӱӱштиҥ курчузын тыҥыдадыс. Кудайга кожо бӱдӱп турган ака-эјелерис кӱчтерге туштап турза, бис олорго болужарга јаантайын белен, нениҥ учун дезе бисти бек најылык колбулар курчап јат (Укаа сӧстӧр 17:17). Јуунныҥ ончо улузыла куучындажып турзас, бой-бойыбысты кичееп турганысты кӧргӱзедис (1 Коринфтегилерге 12:25, 26).

Најыларды Кудайдыҥ табын бӱдӱрип турган улустыҥ ортозынаҥ бедирегер деп, слерди кӱӱнзедип јадыбыс. Слер андый најыларды Иегованыҥ Керечилериниҥ ортозынаҥ таап аларар. Бисле куучындажарга слерди не де токтодып болбозын!

• Христиан туштажуларда куучындажып турганыс незиле тузалу?

• Слер бистиҥ јуунла таныжып аларга качан амадап туругар?