Ар-бӱткенниҥ тӱбеги тушта ака-эјелериске канайып болужадыс?

Ар-бӱткенниҥ тӱбеги боло берзе, Иегованыҥ Керечилери тӱбекке тӱшкен аймактардагы ака-эјелерине тургуза ла болуш јетиргилейт. Мынайып бис бой-бойыбыска сӱӱжисти кӧргӱзедис (Иоанн 13:34, 35; Иоанныҥ 1-кы самаразы 3:17, 18). Мындый болушка кандый иш кирет?

Акча-манатла болужадыс. Баштапкы чакта Иудей јеринде тыҥ ачана-торо башталган ӧйдӧ, Антиохияныҥ христиандары бойлорыныҥ ака-эјелерине акча-манат ийип болушкан (Апостолдордыҥ ижи 11:27—30). Анайып ла бӱгӱнги де кӱнде бистиҥ ака-эјелерис кандый-бир ороондо кӱчтерге табартып турган деп угуп ийзес, јуунга акту-јӱректеҥ берген акчала бис олорго болужадыс (2 Коринфтегилерге 8:13—15).

Бойыстыҥ колысла болужадыс. Тӱбекке тӱшкен аймактыҥ аксагалдары јуунныҥ улузыла ӱзе јакшы деп бӱдӱмјиленерге, кажы ла кижини табып аларга албадангылайт. Болуш јетирип турган комитет курсакты, ичерге јараар ару сууны, кийимди, анайда ок јадар јерди ле эмчилик болушты аайлу-башту эдип башкарат. Керектӱ темигӱлерлӱ кӧп Керечилер Каандыктыҥ Тураларын ла јадар тураларды орныктырарга, бойыныҥ акчазыла барып, кӱӱнзеп иштенгилейт. Бистиҥ организацияныҥ бирлик болгоны, анайда ок ӧмӧлӧжип иштенер ченемелис, кандый бир тӱбек боло берзе, тургуза ла болуш јетирер арга берет. Је «бӱдӱп турган улузыска» болужып тура, ӧскӧ дӧ кудай јаҥду улуска болужарга ундыбай јадыс (Галаттарга 6:10).

Улустыҥ ич-кӧгӱзин ле кӱӱн-санаазын кӧдӱрерге болужадыс. Ар-бӱткенниҥ тӱбегинеҥ улам јеткерге тӱшкен улус токунадышты тыҥ керексинет. Мындый ӧйлӧрдӧ бис «коот береечи Кудайдаҥ», Иегованаҥ, болуш аладыс (2 Коринфтегилерге 1:3, 4). Бис улусла Агару Бичикте берилген кижиниҥ санаазын токунадар сӧстӧрлӧ ӱлежерге ле ачу-корон ло кыйын-шыра экелип турган кандый ла јеткерлерди Кудайдыҥ Каандыгы удабас јоголтып салар деп, бӱдӱмјилеерге кӱӱнзейдис (Ачылта 21:4).

• Ар-бӱткенниҥ тӱбеги болгон ӧйдӧ Керечилер недеҥ улам тургуза ла болуш јетирер аргалу?

• Јеткерге тӱшкен улусла бис кандый ич-кӧгӱс токунадышла ӱлежер аргалу?