6 БАЖАЛЫК
Божоп калган кижиле не болуп јат?
1—3. Ӧлӱм керегинде улус кандый сурактар берет ле кудай јаҥдар бу сурактарга кандый каруу бергилейт?
АГАРУ БИЧИК келер ӧйдӧ: «Ӧлӱм... база болбос» — деп айдат (Ачылта 21:4). Бис 5-чи бажалыктаҥ толынты эдилгенинеҥ улам, ӱргӱлјиге јӱретен арга ачылган деп билип алганыс. Је эм тура улус божоп јат (Јарлыкчы 9:5). Айдарда, божоп калган кижиле не болуп јат деген сурак чыгат.
2 Бу сурак анчада ла јуук улузын јылыйткан улусты санааркадат. Олор мынайып сананар аргалу: «Ол эмди кайда јӱрӱ не? Ол мени кӧрӱп турган ба? Оныҥ меге болужар аргазы бар ба? Мен оны ойто кӧрӧрим бе?»
3 Мындый суракка кудай јаҥдар, јӱзӱн-башка каруу берет. Кезиги, јакшы кижи божогон кийнинде теҥериге барар, јаман кижи — отко кыйналар деп ӱредет. Кезиги, јада калган кижиниҥ сӱнези божогон ада-ӧбӧкӧлӧриле кайда да анаҥ ары јӱрет деп ӱредет. А ӧскӧлӧри, кижи божоп калза, ол озо баштап јаргыладып јат, оноҥ ӧскӧ кижи эмезе тынду болуп чыгат деп бодогылайт.
4. Кудай јаҥдардыҥ кӧп сабазы ӧлӱм керегинде неге ӱредет?
4 Кудай јаҥдар ӧлӱм керегинде башка-башка немеге ӱредип турган да болзо, је олордыҥ кӧп сабазы, божогон кижиниҥ сӱнези анаҥ ары јӱрет деп ӱредет. Је бу чын андый ба?
БОЖОГОН КИЖИЛЕ НЕ БОЛУП ЈАТ?
5, 6. Божогон кижиле не болуп јат?
5 Иегова божогон кижиле не болуп турганын билер. Ол, кижи божоп калза, оныҥ јӱрӱми токтоп калат деп айткан. Божогон кижиниҥ сезимдери, санаалары ла эске алынар аргазы јоголып калатa. Божогон кижи кӧрбӧй дӧ јат, укпай да јат, сананбай да јат.
6 Соломон каан: «Божогон улус нени де билбес» — деп бичиген. Божоп калгандар сӱӱбей де јат, јаман кӧрбӧй дӧ јат. Олордо «иш те, амадулар да, билгир де, ойгор до јок». (Јарлыкчы 9:5, 6, 10 кычырыгар.) Сарын 146:4-тӧ божогон кижиниҥ сананар аргазы да јоголып калат деп айдылган.
ИИСУС ХРИСТОС ӦЛӰМ КЕРЕГИНДЕ НЕНИ АЙТКАН
Иегова улусты јерге ӱргӱлјиге јӱрзин деп јайаган
7. Иисус Христос ӧлӱм керегинде нени айткан?
7 Иисустыҥ јуук најызы, Лазарь, божоп каларда, Иисус ӱренчиктерине: «Лазарь најыбыс уйуктай берди» — деп айткан. Је ол Лазарьды амырап јаткан деп айтпаган, не дезе оноҥ: «Лазарь јада калды» — деп, чике айткан (Иоанн 11:11—14). Айдарда, Иисус ӧлӱмди уйкула тӱҥдештирген. Иисус, Лазарьды теҥеридӧӧн барган эмезе божоп калган тӧрӧӧндӧрине барган деп айтпаган. Анайда ок Лазарьды отту таамыда (огненный ад) кыйналып јат эмезе ӧскӧ кижи эмезе тынду болуп кубулган да деп айтпаган. Иисус Лазарьдыҥ божой бергенин тереҥ уйкула тӱҥдештирген. Ӧлӱмди уйкула тӱҥдештирген учуралдар Агару Бичиктиҥ ӧскӧ дӧ ӱлгерлеринде бар. Темдектезе, Иисус Иаирдиҥ кызын тиргискен ӧйдӧ, ӧлӱмди уйкула тӱҥдештирип: «Ол божобогон, уйуктап јат» — деп айткан» (Лука 8:52, 53).
8. Улус божоор эдип јайалбаганын бис кайдаҥ билерис?
8 Кудай Адам ла Еваны качан бирде божоор эдип јайаган ба? Јок! Иегова олорды ӱргӱлјиге јӱрзин ле бир де оорубазын деп јайаган. Иегова кажы ла кижиге ӱргӱлјиге јӱрер кӱӱн берген (Јарлыкчы 3:11). Сананзаар да, ада-энелер балдарыныҥ карып, божоп турганын кӧрӧргӧ кӱӱнзейт пе? Јок эмей. Бистиҥ Јайаачыбыс бисти божоп турзын деп база кӱӱнзебей јат. Андый болзо, улус нениҥ учун божоп јат?
УЛУС НЕНИҤ УЧУН БОЖОП ЈАТ?
9. Иегова нениҥ учун Адам ла Евага јакару берген, бу јакаруны бӱдӱрерге кӱч болгон бо?
9 Иегова Адам ла Еваны Эдем садта јатыргызып, Адамга јакыган: «Садта бар агаштардыҥ јиилегин ји, је... јакшыны ла јаманды билип алар агаштыйын јибе. Јизеҥ, ол ло кӱн ӧлӱп каларыҥ» (Башталганы 2:9, 16, 17). Иегова бу јакаруны берип, јакшыныҥ ла јаманныҥ нормаларын тургузатан арга јӱк Ондо бар деп кӧргӱскен. Бу јакаруны бӱдӱрерге кӱч болбогон. Улус Кудайдыҥ айтканын уккан болзо, Иегованыҥ јаҥын тооп турганын ла Кудайдыҥ ончо эткенин баалап турганын кӧргӱзер эди.
10, 11. а) Сатана Адам ла Еваны не деп тӧгӱндеген? б) Адам ла Еваныҥ эткен кылыгын нениҥ учун актап болбозыҥ?
10 Је Адам ла Ева Иегованыҥ јакарузын укпаган. Сатана Еванаҥ: «Садтагы агаштардыҥ бирӱзиниҥ де јиилегин Кудай слерге јидиртпей турганы чын эмеш пе?» — деп сураарда, ол айткан: «Биске агаштардыҥ јиилегин јиирге јараар, је Кудай айткан: „Садтыҥ ортозындагы агаштыҥ јиилектерин јаҥыс јибегер, олорго тийбегер де, оноҥ башка ӧлӱп каларыгар“» (Башталганы 3:1—3).
11 Сатана: «Ӧлбӧзигер... Кудай билер: слер олорды јизегер, кӧстӧригер ачылып, јакшыны ла јаманды билер кудайлардый [Кудайдый, ЈТ] боло береригер» — деп айткан (Башталганы 3:4—6). Сатана Еваны јакшыныҥ ла јаманныҥ нормаларын бойы тургузар аргалу (јакшыны ла јаманды бойы талдаар аргалу) деп бӱдӱмјилеерге умзанып, Кудайдыҥ сӧзин укпаза ӧлбӧс деп, тӧгӱндеп ийген. Ева јиилекти ӱзӱп, јип ийеле ӧбӧӧнине берерде, ол база јип ийген. Адам ла Ева бу агаштыҥ јиилегин јиирге јарабас деп билген де болзо, тӱҥей ле јип ийген. Анайып олор сӱӱштӱ Адазын тообой турганын кӧргӱскен! Олор Кудайдыҥ јарт ла уур эмес јакарузын биле тура укпагандар. Олордыҥ эткен кылыгын актаар арга јок!
12. Адам ла Еваныҥ сӧс укпаганынаҥ улам, Иеговада кандый сезимдер болгон?
12 Бистиҥ ада-ӧбӧкӧлӧристиҥ Кудайды бир де тообогоны коркышту ачынчылу болот. Темдектезе слердиҥ кичееп, чыдадып алган балдараар слердиҥ сӧзигерди укпай, биле тура некелтелереерди бӱдӱрбезе, слерде кандый сезимдер болор эди? Слерге ачу болор эмес беди?
Тоозыннаҥ эдилген Адам, божоп каларда ойто тоозын болуп калган
13. Иегованыҥ Адамды тоозын болуп калар деген сӧстӧри нени темдектейт?
13 Адам ла Ева сӧс укпаганынаҥ улам, ӱргӱлјиге јӱретен аргазын јылыйтып салган. Иегова Адамга айткан: «Тоозыннаҥ бӱткен бойыҥ ойто тоозын болуп каларыҥ». (Башталганы 3:19 кычырыгар.) Бу дезе, Адам јайалардаҥ озо канайып тоозын болгон, анайып ла тоозын болуп јоголып каларын темдектейт (Башталганы 2:7). Айдарда, Адам кинчек эдип, божоп каларда, јок болуп калган.
14. Улус нениҥ учун божоп јат?
14 Адам ла Ева Кудайды уккан болзо, эмдиге јетире тирӱ јӱрер эди. Је олор сӧс укпай, кинчек эдип учы-тӱбинде божоп калган. Кинчекти, ада-ӧбӧкӧлӧристеҥ укталып келген каршулу оорула тӱҥдештирерге јараар. Оныҥ учун Адам ла Еваныҥ бала-барказы кинчектӱ болуп чыгат ла качан бирде божоп калат (Римдегилерге 5:12). Је Кудайдыҥ амадузы мындый болбогон. Кудай улусты божоп турзын деп качан да кӱӱнзебеген. Оныҥ да учун Агару Бичик ӧлӱмди ӧштӱ деп айдып турганы кайкамчылу эмес (1 Коринфтегилерге 15:26).
ӦЛӰМ КЕРЕГИНДЕ ЧЫНДЫ НЕНИҤ УЧУН БИЛЕР КЕРЕК
15. Ӧлӱм керегинде чынды нениҥ учун билер керек?
15 Бис ӧлӱм керегинде чынды билер болзоос, божогон улус керегинде јастыра ӱредӱлердиҥ тӧгӱнине кирбей јадыс. Агару Бичик божогон улус оорубай да јат, санааркабай да јат деп ӱредет. Бис олорло куучындажып болбозыс, а олор бисле куучындажып болбос. Бистиҥ олорго болужар аргабыс јок, олордыҥ биске болужар аргазы јок. Анайда ок олордоҥ коркыбас керек, нениҥ учун дезе олор биске каршузын јетирип болбос. Је кӧп кудай јаҥдар, кижи божоп калза, јӱрӱм токтобой јат ла божоп калган улуска болужарга, абыска акча тӧлӧӧр керек деп ӱредет. Је бис ӧлӱм керегинде чынды билер болзоос, тӧгӱндетпезис.
16. Кӧп кудай јаҥдар божоп калган улус керегинде нени айдат?
16 Сатана улусты, божогон кижи анаҥ ары јӱрӱм јӱрет деп бӱдӱмјилеерге, тӧгӱн кудай јаҥдар тузаланат. Темдектезе, кезик кудай јаҥдарда божоп калган кижиниҥ сӱнези кайда да анаҥ ары јӱрет деп айдыжат. Слердиҥ кудай јаҥыгар божоп калган улус керегинде нени айдат: Агару Бичикте бичилгенин бе, эмезе ӧскӧ та нени де бе? Сатана улусты Иегованаҥ туура апарарга, јаантайын тӧгӱнле тузаланып турганын ундыбагар.
17. Улус отту таамыда кӱйӱп јат деген ӱредӱ, нениҥ учун Иегованы јамандайт?
17 Кӧп кудай јаҥдардыҥ ӱредӱлери, темдектезе, јаман улус божогон кийнинде, јажын-чакка отту таамыда кӱйӱп јат деген ӱредӱзи, улусты коркыдып јат. Бу тӧгӱн ӱредӱ Иегованы јамандайт. Ол качан да улусты мынайып кыйнабай јат! (1 Иоанн 4:8 кычырыгар.) Сӧс укпаган балазыныҥ колдорын отко тудуп турган кижи керегинде, слер нени сананар эдеер? «Кандый казыр кижи! Бу кижи керегинде нени де угар кӱӱним јок» — деп сананар болорыгар. Сатана улусты Кудай керегинде шак ла мынайып сананзын ла оныла најылашпазын деп албаданат.
18. Божоп калган улустаҥ нениҥ учун коркыбас керек?
18 Кезик кудай јаҥдар божогон кижиниҥ артып калган сӱнези коручы эмезе ӧштӱ болуп калат деп бӱдет. Оныҥ учун олорды тооп, ачындырбаска албаданар керек дежет. Бу тӧгӱнге кӧп улус бӱдӱп јат. Керек дезе олор, бу тындарга Кудайга чылап бажырып та јадылар. Је божоп калган улуста кандый да сезимдер јок деп билип алдыс. Айдарда, олор ачына берер деп коркыбас керек. Иегова — ончо немени јайаган чындык Кудай, оныҥ учун бис јӱк Ого бажырар учурлу (Ачылта 4:11).
19. Ӧлӱм керегинде чынды нениҥ учун билер керек?
19 Бис ӧлӱм керегинде чынды билер болзоос, тӧгӱн кудай јаҥдардыҥ ӱредӱлерине бӱтпезис. Анайда ок келер ӧй керегинде Иегованыҥ берген сӧзин бис оноҥ тыҥ баалаарыс.
20. Келер бажалыктаҥ бис нени билип аларыс?
20 Кӧп јӱс јылдар кайра Кудайдыҥ Иов деген ишчизи: «Божогон кижи ойто јӱрер бе?» — деп сураган (Иов 14:14). Чындап та, божоп калган улус ойто јӱрер бе? Агару Бичикте бу керегинде айдып салганы слерди сӱреен кайкадар болор. Слер бу сурактыҥ каруузын келер бажалыктаҥ билип алараар.
a Кезик улустыҥ санаазыла болзо, кижи божоп калза, сӱнези анаҥ ары јӱрет. Бу керегинде 17 Кожултада чокум јарталып јат.