03 УРОК

Агару Бичикке бӱдерге јараар ба?

Кепке базылган чыгарма

Бӱгӱнги кӱнде Агару Бичик кезик улуска сӱреен јаан тузазын јетирет. Анайда ок анда келер ӧй керегинде айдылат. Слер бу бичик неге ӱредип турган деп билип аларга кӱӱнзеп турган болороор. Је мындый сурактар чыгат: бу јебрен бичикке бӱдерге јараар ба? андагы сӧстӧр чын ла бӱдер бе? Канча миллион улус Агару Бичикке бӱдӱп јат. А слерге Агару Бичикке бӱдерге не болужар деп кӧрӱп ийектер.

1. Агару Бичиктиҥ сӧстӧри тӧгӱн бе, чын ба?

Агару Бичикле болзо, андагы бичилгени ӱзе чын (Экклезиаст 12:10). Бу бичикте јердиҥ ӱстинде чын ла јӱрген улустыҥ јӱрӱми бичилген. (Лука 1:3; 3:1, 2 кычырыгар.) Темдектезе: кем? не? кайда? качан? деген сурактарды археология ла тӱӱки јанынаҥ кӧрзӧ, Агару Бичикте бичилгени чын деп кӧрӱнет.

2. Агару Бичик эскирбеген деп, бис кайдаҥ билерис?

Агару Бичикте Јер ле Орчылаҥ (Вселенная) керегинде айдылган сӧстӧр бар. Бу сӧстӧрди бӱгӱнги наукала кӧрзӧ, ӱзе чын болот. Је бу сӧстӧрдиҥ бичилген ӧйинде јаткан улус Јердиҥ бӱткени јанынаҥ чек ӧскӧ санаалу болгон. Нениҥ учун дезе наука бу сӧстӧрдиҥ чынын, јӱк канча јылдар ӧдӧрдӧ оҥдоп баштаган. Айдарда, Агару Бичиктиҥ сӧстӧри эскирбей јат, ого јаантайын бӱдерге јараар (Сарын 111:8).

3. Агару Бичикте келер ӧй керегинде айдылган сӧстӧргӧ бис нениҥ учун бӱдедис?

Агару Бичиктеги судурлардаa мындый сӧстӧр бар: «Бӱткелек сӧстӧрди јебрен ӧйлӧрдӧҥ бери айдадым» (Исайя 46:10). Бу судурларды тӱӱки јанынаҥ кӧрзӧ, Агару Бичикте канайып айдылган, анайып ла бӱдӱп калган. Анда бӱгӱнги де кӱн керегинде айдылган судурлар база анайып ла бӱдӱп јат. Бу урокто Агару Бичиктиҥ кезик судурларын кӧрӱп ийерис. Олордыҥ бӱткенин кӧрӱп, слер кайкаар болороор!

ТЕРЕҤЖИДЕ КӦРӰГЕР

Агару Бичикте бичилгенин бӱгӱнги наукала тӱҥдештирип ийигер. Мыныҥ кийнинде кезик судурларды кӧрӱгер.

4. Наука Агару Бичикте бичилгенин чын деп кӧргӱзет

Алдындагы ӧйдӧ улустыҥ кӧп сабазы Јер та нениҥ де ӱстинде турат деп бӱткен. ВИДЕОНЫ кӧрӱп ийигер.

ВИДЕО: «Јерди неге де илбеген» (1:13)

Агару Бичикте 3 500 кире јыл кайра бичилген сӧстӧрди кӧрӱп ийигер. Иов 26:7 кычырып, бу суракты шӱӱжип ийигер:

Иов деп бичикте Јерди «неге де илбеген» деген сӧстӧр качан бичилген?

Улус сууныҥ айланыжын (круговорот воды) бу ла јуукта, 200 кире јыл кайра, оҥдоп алган. Је Агару Бичикте бу керегинде канча муҥ јылдар озо бичилип калган. Иов 36:27, 28 кычырып, бу сурактарды шӱӱжип ийигер:

Сууныҥ айланыжын кӧрӱп, слер Агару Бичик керегинде нени айдар эдигер?
Ӧрӧги ӱлгерлерди кычырала, слер Агару Бичикке бӱдер бедигер?

Сууныҥ айланыжы. Јер ле атмосфераныҥ ортозында сууныҥ айланыжы стрелкалардыҥ болужыла кӧргӱзилген.

5. Алдындагы ӧйдӧ бӱткен судурлар

Исайя 44:27—45:2 кычырып, бу суракты шӱӱжип ийигер:

Вавилонды јуулап алар деп, 200 јыл озо айдылган судурда кандый оок-теек немелер бичилген?

ВИДЕОНЫ кӧрӱп ийигер.

ВИДЕО: «Вавилонды јуулап алар деп айдылган судур» (0:58)

Персияныҥ кааны Кир ле оныҥ черӱзи б. э. озоb 539 јылда Вавилон деп каланы јуулап алган. Тӱӱки јанынаҥ кӧрзӧ, бу чын ла болгон учурал. Кир Вавилонды айландыра сууны ӧскӧ јердӧӧн агызып ийген. Бу ӧйдӧ каланыҥ эжиктери ачык болордо, Кир оны јуу-согуш јогынаҥ јуулап алган. Оноҥ бери 2 500-теҥ кӧп ӧй ӧдӱп калды, је Вавилон эмдигенче јемирилик турат. А эмди, Агару Бичик бу керегинде кандый судур айтканын кӧрӱп ийигер.

Исайя 13:19, 20 кычырып, бу суракты шӱӱжип ийигер:

Бу судурдыҥ бӱдӱп калганы недеҥ кӧрӱнет?

Вавилонныҥ јемириктери (бистиҥ ӧй, Ирак)

Јуруктар: «Калганчы кӱндерди» кӧргӱзип турган јуруктар: 1. Туралар кӱйӱп јат. 2. Автоматту солдат. 3. Улус полицияга удурлажат. 4. Эки кижи магазинди тоноп јат. 5. Военный танк каланыҥ ичиле маҥтадып барат. 6. Маска кийип алган аштап турган улус, курсак аларга тургулайт. 7. Кургак јер канча киллометрге јарылып калган. 8. Јерсилкиништеҥ јемирилген тура.

6. Эмдиги ӧйдӧ бӱдӱп турган судурлар

Агару Бичикте бистиҥ ӧй «калганчы кӱндер» деп адалат (2 Тимофейге 3:1). Калганчы кӱндер керегинде Агару Бичикте кандый судурлар айдылганын кӧрӱп ийзеер.

Матфей 24:6, 7 кычырып, бу суракты шӱӱжип ийигер: