Иегованыҥ Керечилеринде бойыныҥ Агару Бичиги бар ба?
Иегованыҥ Керечилери Агару Бичикти ӱренерге, башка-башка кӧчӱрмелер тузаланат. Је анчада ла «Агару Бичик — Јаҥы телекейдиҥ кӧчӱрмези» (олордыҥ тилине бар болзо), деп адалып турганын тузаланып јадылар. Нениҥ учун дезе бу кӧчӱрмеде Кудайдыҥ ады бар, оны оҥдоорго јеҥил ле кӧчӱрилгени ӱзе чын.
Кудайдыҥ ады бар. Агару Бичикти чыгарып турган кезик улус оныҥ Чӱмдеечизин — Кудайды — мактабай јат. Качан макты ла кӱндӱни јӱк ле Иегова Кудай алар учурлу. Темдектезе, бир Агару Бичикте оны чыгарарга турушкан 70-неҥ кӧп улустыҥ ады-јолы бичилип калган. Је оныҥ Чӱмдеечизиниҥ — Иегова Кудайдыҥ — ады чек јок!
Је «Јаҥы телекейдиҥ кӧчӱрмезин» алза, анда, Кудайдыҥ ады оригиналда ла чылап, муҥдар катап туштайт, а кӧчӱрген улустыҥ ады-јолы бичилбеген.
Јастыра шӱӱлте јок. Агару Бичиктиҥ кезик кӧчӱрмелериндеги шӱӱлтелер оригиналда айдылган шӱӱлтеге келишпей јат. Темдектезе, бир кӧчӱрмеде Матфей 7:13 мынайда кӧчӱрилген: «Тапчы эжиктеҥ киригер, нениҥ учун дезе таамыга кийдирер эжик кеҥ, јолы элбек; кӧп улус ол јолло барат». Је оригиналда «таамы» деп сӧстиҥ ордына, «ӧлӱм» деп сӧс турат. Кӧчӱреечилер «таамы» деп сӧсти, јаман улус отту таамыда јажын-чакка кыйналар деп бӱдӱп турганы учун тузаланган болор. Је Агару Бичик мындый немеге ӱретпей јат. «Јаҥы телекейдиҥ кӧчӱрмезинде» бу ӱлгер чып-чын кӧчӱрилген: «Тапчы эжиктеҥ киригер, нениҥ учун дезе кеҥ эжик ле элбек јол ӧлӱмге апарып јат, кӧп улус бу эжиктеҥ киргилейт» (ЈТ).
Оҥдоорго јеҥил. Јакшы кӧчӱрмеде јаҥыс ла јастыра шӱӱлте јок болор учурлу эмес, је оны оҥдоорго јарт ла јеҥил болор керек. Темдектезе, Римдегилерге 12:11-де апостол Павелдиҥ тузаланган сӧстӧри сӧстӧҥ сӧскӧ «тынла кайнаар» деп кӧчӱрилет. Је бу сӧстӧрди эмдиги ӧйдиҥ кычыраачызы аайлабас эди, оныҥ учун «Јаҥы телекейдиҥ кӧчӱрмезинде» бу сӧстӧр јарт этире кӧчӱрилип калган: «Эрчимдӱ иштенигер».
«Јаҥы телекейдиҥ кӧчӱрмезинде» Кудайдыҥ ады бар, ондо јастыра шӱӱлте јок, оны оҥдоорго јеҥил. База бир башказы: бу кӧчӱрмени акча тӧлӧбӧзинеҥ аларга јараар. Мынаҥ улам миллиондор тоолу улус Агару Бичикти тӧрӧл тилине, ол тоодо акча јок то улус, кычырар аргалу.