Јалтанбас јиит уул

Бойыныҥ таайыныҥ, элчи Павелдиҥ, јӱрӱмин аргадаган јиит уул керегинде билип алак. Бис бу јиит уулдыҥ ады-јолын билбезис, је ол сӱреен јалтанбас болуп, бир јаан керек эткенин билерис. Ол нени эткенин билер кӱӱниҥ бар ба?~

Павел Иерусалимдеги тӱрмеде отурган болгон. Ол Иисус керегинде јарлап турганынаҥ улам ого кирген. Јаман улус Павелди кӧрӧр кӱӱни јок болуп, јеткерлӱ кара санаа шӱӱп алгандар. Олор мынайда шӱӱген: «Черӱниҥ башчызына бойыныҥ јуучылдарына јакару берип, Павелди јаргыга экелзин деп, айдар керек. Бис јолдыҥ јанында јажынып аларыс. Качан Павел јаныстаҥ ӧдӱп јатса, бис ого табару эдип ӧлтӱрип саларыс!»

Бу керегинде элчи Павелдиҥ јеени угуп ийген. Ол нени этти? Ол тӱрмеге бойыныҥ таайына барып, укканын тӧкпӧй-чачпай ӱзе куучындап берди. Павел бу ла ӧйдӧ олордыҥ јеткерлӱ шӱӱлтезин черӱниҥ башчызына јетирзин деп, јеенине јакарды. Павелдиҥ јеенине черӱниҥ башчызыла куучындажарга јеҥил болды ба, сен канайып сананадыҥ?~ Јок эмей. Не дезе, черӱниҥ башчызы јамылу кижи болгон. Је бу јиит уул јалтанбас болгонынаҥ улам ол ончо немени куучындап берди.

Черӱниҥ башчызы нени эдерин јакшы билер болгон. Ол Павелди корулазын деп, 500 кире јуучылды јууп, ол ло кӱн тӱнде, Павелди Кеса́рия деген калага апарзын деп јакарган. Павел аргаданды ба?~ Эйе. Јаман сагышту улус ого табарарга коркый бердилер. Олордыҥ јеткерлӱ кара санаазы бӱтпеди.

Бу куучыннаҥ сен неге ӱренер аргалу?~ Сен, элчи Павелдиҥ јеени чылап, ондый ла јалтанбас болор аргалу. Улуска Иегова керегинде куучындап турзас, јалтанбас болоры сӱреен керектӱ. Иегова керегинде сен јалтанбай куучындаарыҥ ба?~ Эйе болзо, сен кемниҥ де јӱрӱмин аргадаар болорыҥ.