05 УРОК
Агару Бичик — Кудайдыҥ улуска берген сӧзи
Иегова биске сӱреен јакшы сый берген. Бу сый 66 бичиктеҥ турган Агару Бичик болот. Агару Бичик кайдаҥ келген ле оныҥ чӱмдеечизи кем деп билип аларга, слерге јилбилӱ болор болбой. Сурактардыҥ каруузын бу уроктоҥ билип аларыгар.
1. Агару Бичикти улус бичиген болордо, оныҥ чӱмдеечизи канайып Кудай болотон?
Агару Бичикти 1 600 јылдыҥ туркунына 40 кире кижи бичиген (б. э. озо 1513 јылдаҥ ала б. э. 98 јылына јетире). Агару Бичикти башка-башка улус бичиген де болзо, оныҥ бичиктеринде јаҥыс ла тема барып јат. Нениҥ учун бир тема болуп калган? Нениҥ учун дезе Агару Бичиктиҥ чӱмдеечизи — Кудай. (1 Фессалоникадагыларга 2:13 кычырыгар.) Улус бойыныҥ санаазын эмес, је Кудайдыҥ санаазын бичиген. Олор «Агару Тынга баштадып, сӧсти Кудайдаҥ айткандар»a (2 Пётр 1:21). Айдарда, олор Агару Бичикти Кудайдыҥ агару тыныныҥ болужыла бичиген (2 Тимофейге 3:16).
2. Агару Бичикти кажы ла кижи кычырар аргалу ба?
Бу Бичик «кандый ла укка, ӱйеге, тилге ле калыкка» бичилген. (Ачылта 14:6 кычырыгар.) Оныҥ учун кажы ла кижи бу бичиктеҥ сӱӱнчилӱ јарды билип алар аргалу. Бу бичикти Кудай сӱреен кӧп тилдерге бичидип салган. Мындый кӧп тилдерге бичилген ӧскӧ бичик јок. Мынаҥ улам јердиҥ ӱстинде кажы ла кижи кайда да јадып турган болзо, кандый да тилге куучындап турган болзо, бу бичикти кычырар аргалу.
3. Иегова Агару Бичикти бистиҥ ӧйгӧ јетире јоголбозын деп, нени эткен?
Озо баштап Агару Бичик тӱрген ӱрелип калгадый материалдарга бичилген, темдектезе папируска эмезе тереге. Је Агару Бичикти баалап турган улус оныҥ копияларын бичиген. Кийнинде бу да копиялардыҥ копияларын бичиирге келишкен. Је јаҥда отурган улус бу бичикти јоголторго сананган. Андый да болзо, бу бичикти кичееп аларга, кезик улус јӱрӱмин де берерге белен болгон. Иегова бисле кожо куучындажып турарга кемге де, неге де буудак эдетен јай бербеген. Нениҥ учун дезе Агару Бичикте «Кудайыстыҥ сӧзи чактарга јоголбос» деп айдылган (Исайя 40:8).
ТЕРЕҤЖИДЕ КӦРӰГЕР
Агару Бичик канайып бичилген? Кудай бу бичикти јоголбозын ла оны кажы ла кижи кычырар аргалу болзын деп нени эткенин билип алыгар.
4. Агару Бичик оныҥ чӱмдеечизи кем деп бойы айдат
ВИДЕОНЫ кӧрӱп ийигер. Оноҥ 2 Тимофейге 3:16 кычырып, бу сурактарды шӱӱжип ийигер:
Агару Бичикти улус бичиген болзо, ол канай Кудайдыҥ Сӧзи болот?
Улус Кудайдыҥ санаазын бичиген деп, нениҥ учун бӱдерге јараар?
Самараны секретарь бичип јаткан да болзо, оныҥ чӱмдеечизи директоры болот. Анайып ла Агару Бичикти улус бичиген де болзо, олор Кудайдыҥ санаа-шӱӱлтезин бичиген
5. Агару Бичик ончо удурлажуларды ӧдӱп чыккан
Агару Бичик — ол Кудайдыҥ Сӧзи болордо, Кудай бойыныҥ Сӧзин корулаар дезеер? Улустыҥ тӱӱкизин кӧрзӧ, јаҥда отурган улус Агару Бичикти јоголторго албаданган. Серкпениҥ башчылары Агару Бичикти кем де оҥдобозын деп, албатынаҥ јажырарга нени ле эткен. Је удурлажулар болгон до болзо, кезик улус Агару Бичикти корулаарга, бойыныҥ јӱрӱмин де берерге белен болгон. Андый улустыҥ бирӱзи керегинде ВИДЕОНЫ кӧрӱп, бу суракты шӱӱжип ийигер:
Кӧп улус Агару Бичикти корулаарга тыҥ удурлажулар ӧткӧн. Мыны билип алала, Агару Бичикти кычырар кӱӱнеер тыҥый берди бе? Јартап беригер.
Сарын 119:97 кычырып, бу суракты шӱӱжип ийигер:
Кӧп улус Агару Бичикти кӧчӱрерге ле таркадарга болуп, бойыныҥ јӱрӱмин де берерге нениҥ учун коркыбаган?
6. Бастыра улуска бичилген бичик
Агару Бичик — эҥ ле тыҥ таркадылган бичик. Ӧскӧ кандый да бичик андый кӧп тилдерге кӧчӱрилбеген. Апостолдордыҥ ижи 10:34, 35 кычырып, бу сурактарды шӱӱжип ийигер:
Кудай бойыныҥ Сӧзин нениҥ учун андый кӧп тилдерге кӧчӱрилзин деп кӱӱнзейт?
Агару Бичиктиҥ таркадылганы керегинде слерди эҥ ле тыҥ не кайкадат?
Јердиҥ ӱстиндеги улустыҥ
100%
кирези
Агару Бичикти тӧрӧл тилине эмезе оҥдоп турган ӧскӧ тилге кычырар аргалу
3 000-наҥ
кӧп тилге кӧчӱрилген
(бӱдӱнге эмезе бӧлӱктей)
Агару Бичиктиҥ
5 000 000 000
кире экземпляры кепке базылган.
Јердиҥ ӱстинде бого тӱҥей бичик јок
КЕЗИК УЛУС АЙДАТ: «Агару Бичик — ол улус бичиген эски бичик».
Слер канайып сананадаар?
Агару Бичик — Кудайдыҥ Сӧзи деп, кандый керелер бар?
ТӦС ШӰӰЛТЕЗИ
Агару Бичик — ол Кудайдыҥ Сӧзи. Кудай бу бичикти кажы ла кижи кычырар аргалу болзын деп кичееп салган.
Нени билип алдыгар?
Агару Бичикти улус бичиген де болзо, оны Кудайдыҥ Сӧзи деп нениҥ учун айдарга јараар?
Агару Бичиктиҥ тӱӱкизин, канча тилге кӧчӱрилгенин ле канча экземплярга чыкканын алза, слерди нези кайкадат?
Кудай слерле куучындажарга, Агару Бичикти канча чактарга кичеегенинеҥ слер нени сезедеер?
ШИҤДЕЙТЕН МАТЕРИАЛ
Агару Бичиктиҥ тӱӱкизи: јебрен тӱрбектердеҥ ала бистиҥ ӧйдӧ чыгып турган кӧчӱрмелерге јетире.
«Агару Бичик бистиҥ ӧйгӧ јетире канайып јеткен?» («Ойгоныгар!», 2007 јыл, кӱчӱрген ай)
Агару Бичик канча чактардыҥ туркунына, коркышту кӧп удурлажуларды ӧдӱп, канайып кичеелип калганын билип алыгар.
«Агару Бичик бистиҥ ӧйгӧ јетире канайып кичеелип калган?» («Каруулчы шибее», № 4 2016)
Кезик улус Агару Бичикти кӧчӱрерге, јӱрӱмин де берерге белен болгон деп кӧрӱп алыгар.
Агару Бичиктиҥ сӱреен кӧп копиялары эдилген, анайда ок ол кӧп тилдерге кӧчӱрилген. Андый да болзо, эмдиги бар кӧчӱрмелер оригиналдаҥ башка эмес деп, нениҥ учун бӱдерге јараар?
«Агару Бичиктиҥ кезик сӧстӧрин солып салган болор бо?» (веб-статья)