Кудай бисти ару болзын деп кӱӱнзеп јат

Кичинек уулчагын школго белетеп јаткан эне кижини сананып ийзеер де. Ол уулчагын јунунып алган ба, кийим-тудумы ару ба деп кӧрӱп јат. Мынайып ол балазыныҥ су-кадыгын кичеейт. Ӧскӧ улус та уулчакты кӧрӱп, ада-энезин мактаар. Анайып ла Иегова Адабыс бисти ару болзын деп кӱӱнзейт. Ару болгоныс бистиҥ бойыска туза экелет, анайда ок Кудайысты макка чыгарат.

1. Канайып ару-чек болор?

Иегова биске: «Агару болыгар» — деп айдат (1 Пётр 1:16). Агару болорго, биске ончо јанынаҥ ару болор керек, ол тоодо нравственный да јанынаҥ. Эт-каныс ару болзын деп, биске јаантайын јунунар керек, турабыс, кийим-тудумыс, машинабыс ару болзын деп кӧрӱп турар керек. Анайда ок бис Каандыктыҥ Туразын арутаарында болужар аргалу. Ару-чек болгонысла Кудайысты макка чыгарадыс (2 Коринфтегилерге 6:3, 4).

2. Ару болорго биске кандый кылыктардаҥ айрылар керек?

Агару Бичикте айдылат: «Эт-канды ла тынды быјарсыдып турган ончо немелердеҥ арутаналы» (2 Коринфтегилерге 7:1). Оныҥ учун бис эт-канысты ла санаабысты киртидип турган ончо немедеҥ тууралайдыс. Бистиҥ санааларыс Иегованы сӱӱндирзин деп кӱӱнзейдис, оныҥ учун јастыра санаалардаҥ айрыларга албаданадыс (Сарын 104:34). Анайда ок уйатту, јаман сӧстӧр айтпай, ару куучынданарга албаданадыс. (Колоссыдагыларга 3:8 кычырыгар.)

Бистиҥ эт-канысты ла нравственный јанысты база не киртидер аргалу? Кижиниҥ эди-канын корондоп турган не-немелер. Оныҥ учун бис таҥкы тартпай јадыс, наркотиктерди ле эт-канга каршузын јетиретен оноҥ до ӧскӧ не-немени тузаланбай јадыс. Мынайып бис су-кадыгысты кичееп јадыс ла Кудайдыҥ берген сыйын — јӱрӱмди баалап турганысты кӧргӱзедис. Анайда ок нравственный јанынаҥ ару болорго, бис мастурбация этпей јадыс ла порнография кӧрӧтӧн јаман кылыктаҥ айрылып јадыс (Сарын 119:37; Эфестегилерге 5:5). Бу јаман кылык-јаҥдардаҥ айрыларга јеҥил эмес, је Иегованыҥ болужыла бис мынаҥ айрылар аргалу. (Исайя 41:13 кычырыгар.)

ТЕРЕҤЖИДЕ КӦРӰГЕР

3. Ару-чек болоры Иегованы макка чыгарат

Ару-чек болорына Кудайдыҥ кӧрӱми кандый деп, оныҥ јебрен Израильге берген јасактарынаҥ билип аларга јараар. Чыгыш 19:10; 30:17—19 кычырып, сурактарды шӱӱжип ийигер:

• Бу ӱлгерлерле болзо, ару-чек болорына Иегованыҥ кӧрӱми кандый?

• Ару-чек јӱрерге слерге кандый јакшы кылык-јаҥдар болужар?

Ару-чек болорго ӧй лӧ ийде-кӱч керек болуп јат. Бис кайда да јадып турган болзоос, акча-манадыс ас та болзо, кажыбыс ла ару-чек болор аргалу. ВИДЕОНЫ кӧрӱп, сурактарды шӱӱжип ийигер.

ВИДЕО: «Кудай ару албатыны сӱӱп јат» (4:10)

• Нениҥ учун јарлаар иште бистиҥ кийингенис эптӱ ле тудунган не-немелерис ару болор керек? Мынаҥ улам улустыҥ Иеговага кӧрӱми кандый болор?

4. Јаман кылык-јаҥдарла канайып тартыжар

Слер таҥкы тартып, наркотиктер тузаланып турган болзоор, бу јаман кылык-јаҥдардаҥ айрыларга коркышту кӱч деп билер болороор. Слерге не болужар? Бу јаман кылык-јаҥдардаҥ айрыларга кандый јаан шылтак бар деп билип алыгар. Матфей 22:37—39 кычырып, таҥкы тартары ла наркотиктер тузаланары кандый каршузын јетирет деп јартап беригер:

• кижиниҥ Иеговала колбуларына;

• билезинде ле ӧскӧ дӧ улусла колбуларына.

Јаман кылык-јаҥдарла тартыжатан план тургузып алыгарa. ВИДЕОНЫ кӧрӱгер.

ВИДЕО: «Бойоорды тудуныгар» (2:47)

Филиппыдагыларга 4:13 кычырып, суракты шӱӱжип ийигер:

• Јаантайын Кудайга мӱргӱӱри, Агару Бичикти шиҥдеп ӱренери ле јуунныҥ туштажуларына јӱрери јаман кылык-јаҥнаҥ айрыларга канайып ийде-кӱч берип јат?

5. Јаман, кирлӱ санааларла, кылык-јаҥдарла тартыжыгар

Колоссыдагыларга 3:5 кычырып, сурактарды шӱӱжип ийигер:

• Иегова порнографияны, секстингти ле мастурбацияны јаман, кирлӱ керектер деп кӧрӱп турганын бис кайдаҥ билерис?

• Нравственный јанынаҥ ару болорына Иегованыҥ биске тургускан некелтелерин ойгор деп кӧрӧдӧӧр бӧ? Јартап беригер.

Кирлӱ, јаман санааларла канайып тартыжарын билип алыгар. ВИДЕОНЫ кӧрӱгер.

ВИДЕО: «Ару артарга бек шӱӱп алыгар» (1:51)

Ару артарга бек шӱӱп алар керек. Иисус мындый тем куучындаган. Матфей 5:29, 30 кычырып, суракты шӱӱжип ийигер:

• Иисустыҥ сӧстӧри бойыстыҥ эт-каныска каршу јетирер керек деп кӧргӱспей јат. Карын Иисус бисти ару артарга бек шӱӱп алзын деп айдарга сананган. Кирлӱ, јаман санаалар сананбаска нени эдер керек?b

Слер кирлӱ, јаман санааларла тартыжып турган болзоор, Иегова слердиҥ албаданып турганаарды баалап јат деп ундыбагар. Сарын 103:13, 14 кычырып, суракты шӱӱжип ийигер:

• Бу ӱлгерлер јаман кылыкла тартыжарга канайып болужар?

Јыгылганы јеҥдиртип ийгенин кӧргӱспей јат!

Мынайып сананарга јеҥил: «Мен тудунып болбогом. Бодоп ло не албаданар?» Је сананып ийзеер де: јӱгӱрип јаткан кижи бӱдӱрилеле, јыгылып калган болзо, ол бу маргаанда ойноттырып ийген эмезе ого ойтодоҥ јӱгӱрер керек эмес не? Анайып ла бойоорды тудунып болбогоноор, слер јаман кылыкка јеҥдиртип ийгенеерди кӧргӱспей јат. Анайда ок бойоорды тудунып болбогоноор, слердиҥ јединип алган једимдереер калас болгонын кӧргӱспей јат. Тудунып болбогон болзоор, кунукпагар. Мынайып слер јаман кылыктаҥ айрыларга тартыжып турганаарды кӧргӱзедеер. Оныҥ учун чӧкӧбӧгӧр! Иегова слерге болужар.

ТӦС ШӰӰЛТЕЗИ

Бистиҥ эт-каныс ла кылык-јаҥыс ару болзын деп албаданып турзаас, Иегованы сӱӱндиредис.

Нени билип алдыгар?

• Нениҥ учун ару болор керек?

• Слер канайып ару болор аргалу?

• Санаагар ла кылык-јаҥаар ару болзын деп, слер нени эдер аргалу?

ШИҤДЕЙТЕН МАТЕРИАЛ

Акчагар кӧп эмес те болзо, ару болорго, слерге кандый тегин эп-аргалар болужар?

«Су-кадык ла гигиена. Колды јунары» (3:01)

Таҥкыны канайып таштаары керегинде тузалу јӧптӧр.

«Таҥкы тартарынаҥ канайып айрылар?» («Ойгоныгар!», 2010 јыл, кӱӱк ай)

Порнография кӧрӧри кижиге кандый салтарын јетирип турган деп билип алыгар.

«Порнографияда јаман неме јок по эмезе ол корон бо?» («Каруулчы шибее», 2013 јыл, куран ай 1)

Бир эр кижи порнография кӧрӧринеҥ канайып айрылганы керегинде кычырыгар.

«Бойымды тудунарга ӱренип алардаҥ озо, мен кӧп катап јыгылгам» («Каруулчы шибее», № 4 2016)