Иегова «аминь» деп айтканаарды баалап јат

ИЕГОВА бойыныҥ бажыраачыларын баалап јат. Ол бойыныҥ ишчилерин лаптап угат. Анайда ок олордыҥ оныҥ адын мактаарга, керек дезе кӧрӱмјилӱ эмес те немени эдип турганын баалап јат (Мал. 3:16). Темдектезе, јаантайын айдылып турган бир тегин сӧсти кӧрӱп ийектер. Бу «аминь» деген сӧс. Иегова бу тегин сӧсти баалап турган ба? Эйе, баалап јат! Иегова бу сӧсти нениҥ учун баалап турган деп оҥдоп аларга, бу сӧстиҥ учурын ла Агару Бичикте канайып тузаланылып турганын билип алактар.

«БӰДӰН АЛБАТЫ: „АМИНЬ!“ — ДЕП АЙДАР»

«Аминь» деген сӧс «чын» эмезе «андый ла болзын» дегенин темдектейт. Бу сӧс грек тилде еврей сӧстиҥ транслитерациязы болот. Еврей тилде бу сӧс «чындык (верный) болорын» ла «бӱдӱмјилӱ болорын» темдектейт. Кезикте «аминь» деген сӧс правовой сурактарда тузаланылган. Кандый бир черт берип јаткан кижи «аминь» деп айтканыла чынды айдып турганын ла чертин бӱдӱрбегени неге экелерин оҥдоп турганын кӧргӱскен (Тоол. 5:22). Улустыҥ алдына «аминь» деп айтканы, кижини сӧзин бӱдӱрерине кӱӱнзедип туратан (Неем. 5:13).

«Аминь» деп сӧстиҥ тузаланылганы Јаҥды такыганыныҥ 27-чи бажалыгында јарт кӧргӱзилген. Израильтяндар Кудайдыҥ Берер болгон јерине кирип келген кийнинеҥ, Јасакты угарга, Гевал ла Гаризим деген кырлардыҥ ортозында јуулышкан. Је олорго Јасакты јӱк ле угар керек болгон эмес, је јӧпсингенин де айдар керек болгон. Олор јӧпсингенин канайып кӧргӱскен? Јасакты бусканы неге экелерин угала, олор «аминь» деп айткан (Јаҥ. т. 27:15—26). Муҥдар тоолу эр ле ӱй улус балдарыла кожо тыҥ ӱнденип, «аминь» деп айтканын сананып ийзеер! (Иис. Н. 8:30—35). Бу учурал олордыҥ санаазына чактардыҥ-чакка арткан болор. Не дезе, олор бойыныҥ сӧзин бӱдӱрип салган. Мыны бис Агару Бичиктеҥ билип јадыс: «Израиль Иисустыҥ ӧйинде ле Иисустаҥ узак јӱрген аксагалдардыҥ да ӧйинде Иеговага иштеген. Олор Иегованыҥ Израильге эткен ончо керектерин билер болгон» (Иис. Н. 24:31).

Иисус Христос «аминь» (алтай кӧчӱрмеде «чынын айдадым») деп сӧсти база тузаланган, је ӧскӧ эдип. Ол «аминь» деп сӧсти та кемниҥ де сӧстӧриниҥ кийнинеҥ эмес, је нени-нени айдарга турганынаҥ озо айдар болгон. Анайып ол бойыныҥ сӧстӧриниҥ чынын керелеген. Кезикте ол «аминь» (алтай кӧчӱрмеде бу сӧс «чынын, чынын айдадым» деп кӧчӱрилген) деп сӧсти эки катап айдып туратан (Матф. 5:18; Иоанн 1:51). Анайып ол бойыныҥ угаачыларын оныҥ сӧстӧринде бир де тӧгӱн јок деп бӱдӱмјилеген. Иисуста мынайып бӱдӱмјилеер арга болгон, нениҥ учун дезе Кудай ого бойыныҥ ончо берген сӧзин бӱдӱретен јаҥ берген (2 Кор. 1:20; Ачыл. 3:14).

«БӰДӰН АЛБАТЫ: „АМИНЬ!“ — ДЕП АЙДЫП, ИЕГОВАНЫ МАКТАГАН»

Израильтяндар «аминь» деп сӧсти Иегованы мактаган ла ого мӱргӱген ӧйдӧ база тузаланган (Неем. 8:6; Сар. 41:13). Мӱргӱӱлди угуп, учында «аминь» деп айткан улус, айдылган сӧстӧрлӧ јӧп болгонын ла Иеговага бажырып турганын кӧргӱскен. Темдектезе, Давид каан Иерусалимдӧӧн Иегованыҥ ковчегин экелген учуралды кӧрӱп ийектер. Давид байрам ӧткӱрген. Ондо ол бойыныҥ чӱмдеген кожоҥын кожоҥдогон, ӧскӧртӧ айтса ол Иеговага акту јӱректеҥ мӱргӱген. Бу мӱргӱӱл 1 Летопись 16:8—36-да бичилген. Албатыга бу мӱргӱӱл сӱреен јараган, оноҥ улам олор бир ӱнле: «Аминь!» — деп айдып, Иегованы мактаган. Анайып бу байрам оноҥ сӱӱнчилӱ ӧткӧн.

Баштапкы чактыҥ христиандары Иегованы мактаган тушта «аминь» деген сӧсти база тузаланган. Бу сӧс Агару Бичиктиҥ самараларында кӧп туштайт (Рим. 1:25; 16:27; 1 Петр 4:11). Темдектезе Ачылта деген бичикте, керек дезе теҥеридеги ангелдер де: «Аминь! Аллилуия!» — деп айдып, Иегованы мактайт деп бичилет (Ачыл. 19:1, 4). Баштапкы христиандар туштажуларында, мӱргӱӱлдериниҥ учында «аминь» деп айдатан (1 Кор. 14:16). Олор бу сӧсти тегин јерге айтпайтан.

«АМИНЬ» ДЕП НЕНИҤ УЧУН АЙДАР КЕРЕК?

Бис Иегованыҥ ишчилериниҥ «аминь» деп сӧсти канайып тузаланганын билип алала, оны мӱрӱӱлдиҥ учында нениҥ учун айдар керек деп оҥдоп јадыс. Бу сӧсти таҥынаҥ мӱргӱген тужыста айдып турганысла, бистиҥ сӧстӧрис акту јӱректеҥ болгонын кӧргӱзедис. Је качан улусла кожо мӱргӱгенистиҥ учында «аминь» деп айтканысла (ичисте де айткан болзоос), мӱргӱӱлде айдылган сӧстӧрлӧ јӧпсингенисти кӧргӱзедис. «Аминь» деп сӧсти мӱргӱӱлдиҥ учында база нениҥ учун айдар керек?

Кудайга бажырарыла колбулу ончо немени баалап јадыс. Мӱргӱӱлдиҥ ӧйинде бистиҥ јӱк ле нени айдып турганыс эмес, је нени эдип турганыс та јаан учурлу болот. Мӱргӱӱлдиҥ учында «аминь» деп сӧсти ару уйатту айдарга турган болзоос, биске тоомјылу тудунып, лаптап угар керек.

Бирлигисти тыҥыдып јадыс. Улусла мӱргӱӱр тушта бис ончобыс мӱргӱӱл айдып јаткан кижини угадыс (Ап. ижи 1:14; 12:5). Оноҥ «аминь» деп бир ӱнле айтсаас, бирлигис там тыҥып јат. Бис бу сӧсти угуза да эмезе бойыста да айтсаас, Иегова бистиҥ сураганысты бӱдӱрерге кӱӱнзедилет.

Эје туштажуны телефон ажыра угуп, мӱргӱӱл тушта бажын бӧкӧйтип јат — «Аминь» деп айтканысла Иегованы мактайдыс

Бис Иегованы мактап јадыс. Иегова бистиҥ ого бажырарга эдип турган ончо немегисти баалап јат (Лука 21:2, 3). Ол бистиҥ јӱрегисте не барын ла бис нени-нени недеҥ улам эдип турганысты кӧрӱп јат. Керек дезе туштажуны телефон до ажыра угуп јатсаас, «аминь» деп айтканысты угуп јат. Анайып бис Иегованы мактаарында база туружып јадыс.

«Аминь» дегенин тегин ле сӧс деп сананбагар. «Понимание Писания» деген библиялык энциклопедияда Кудайдыҥ ишчилери «аминь» деп айтканыла «акту јӱрегинеҥ бӱдӱп, јӧпсинип, иженип турганын кӧргӱзет» деп айдылат. Айдарда, «аминь» деп айтканыс Иегованы јаантайын сӱӱндирип турзын (Сар. 19:14).

«АМИНЬ» ДЕП ЈААНТАЙЫН АЙДАР КЕРЕК ПЕ?

«Аминь» деп айдары јаан керектӱ эмес деп сананары јастыра. Оныҥ учун мӱргӱп турган кижи та нени де јастыра айдып турган болзо, биске «аминь» деп айтпас керек пе? Бу суракты кажы ла кижи бойы кӧрӧт. Иегова бистиҥ ончобыстыҥ кезикте та нени де јастыра айдып турганысты билер де болзо, ого јаан ајару этпей јат. Оныҥ учун бис те сӧстӧргӧ кадалбай, карын кижиниҥ нени айдарга турганына ајарып турактар. Ол тушта «аминь» деп айтканыска уйадыс ару болор.

Је Иегованыҥ ишчизи эмес кижиниҥ мӱргӱӱлиниҥ учында бис «аминь» деп угуза да, ичисте де айтпазыс. Темдектезе, телекейдиҥ кандый бир мероприятиезинде болгон тужыста, кандый бир кижини мӱргӱп ийзин деп сураган болзо, эмезе билегистиҥ Иегованыҥ Керечили эмес кижизи, ол тоодо билениҥ бажы, бӱдӱн билеле кожо мӱргӱп ийерге турган болзо, нени эдер керек?

Андый айалгаларда нени де айтпаска јараар, је тоомјылу тудунар керек. Олордыҥ мӱргӱӱлдерине бис «аминь» деп айтпазыс, мӱргӱӱлдиҥ ӧйинде колдорыстаҥ тудунбазыс, не дезе, анайып этсеес, олорло кожо мӱргӱп турганысты кӧргӱзер эдис. Је бу ӧйдӧ ичисте мӱргӱп аларга сананзаас, «аминь» деп угуза айтпай јадыс, нениҥ учун дезе бис «аминь» деп айдып ийзеес, улус бисти олорло кожо мӱргӱген деп сананардаҥ айабас. Ол эмезе улус ӱзези ӧрӧ туруп јатса, улусла кожо турараар ба, турбай отурараар ба бойыгар кӧрӧригер. Улусла кожо турганыс эмезе бажысты бӧкӧйтип алганыс, олорло кожо мӱргӱп јатканысты кӧргӱспей јат. Андый айалгаларда канайып этсе јакшы болорын кажы ла христиан бойы кӧрӧт. Оныҥ учун кемди де јаргылабас керек.