Кычыраачылардыҥ сурактары

1 Коринфтегилерге 15:29-та Павелдиҥ бичиген сӧстӧриле болзо, баштапкы чактыҥ христиандары ӧлгӧндӧргӧ болуп эмезе ӧлгӧндӧр учун сууга чӧҥӱрилген бе?

Јок, нениҥ учун дезе христиандар ӧлгӧндӧргӧ болуп сууга чӧҥӱрилген деп айдатан библиялык та, тӱӱкилик те керелер јок.

Кезик Агару Бичиктерде мынайып бичилет: «Ӧлгӧндӧргӧ болуп креске тӱжӱп турган улус нени эдип јадылар?» Оныҥ учун улус бу ӱлгерди кычырала, Павелдиҥ ӧйинде јаткан христиандар ӧлгӧндӧр учун чӧҥӱрилген деп бодоп јат.

Бу сурак аайынча эки учёный мындый сӧстӧр айдат. Баштапкызы — Грегори Локвуд. Оныҥ айтканыла болзо, «улус ӧлгӧндӧргӧ болуп чӧҥӱрилген деп, Агару Бичикте де, тӱӱкиде де керелер јок». Экинчи учёный-библеист Гордон Фи база бого тӱҥей сӧстӧр айдат: «Улус ӧлгӧндӧр учун сууга чӧҥӱрилген деп, Агару Бичикте кайда да бичилбей јат. Андый чӧҥӱрилиш баштапкы чактыҥ христиандарында да, апостолдордыҥ божогоныныҥ кийнинеҥ де тӧзӧлгӧн серкпелерде болбогон».

Матфейдиҥ Сӱӱнчилӱ Јарында Иисустыҥ ӱренчиктерине мындый сӧстӧр айдылган: «Барыгар, ончо калыктарды ӱредигер. Олорды... крестеп, слерге јакарганымды ончозын бӱдӱрерге ӱредигер» (Матф. 28:19, 20). Бу сӧстӧрлӧ болзо, сууга чӧҥӱрилерге турган кижи, Иегова ла Иисуска бӱдӱп, олор керегинде билгирлер алып, сӧсуккур болор учурлу. Је божоп калган улус бу некелтелерди бӱдӱрип болбос. Олор учун бу некелтелерди ӧскӧ дӧ кижи бӱдӱрип болбос (Эккл. 9:5, 10; Иоанн 4:1; 1 Кор. 1:14—16).

Айса Павел не керегинде айткан?

Коринфтеги кезик христиандар божогон улус тирилер деп бӱтпей турган болгон (1 Кор. 15:12). Је Павел олорды тӱзедерге: «Кӱнӱҥ сайын ӧлӱп јадым» — деп бичиген. Ол кандый да кӱчтердеҥ коркыбаган. Нениҥ учун дезе теҥериге Иисус чылап тирилерине бӱткен (1 Кор. 15:30—32, 42—44).

Павел Коринфтеги христиандарды кӧп кӱчтер кӧрӧрин ле божоп каларын оҥдоп алзын деп кӱӱнзеген. А ол христиандар Христосло кожо чӧҥӱрилген, ӧскӧртӧ айтса оныла кожо ӧлӧргӧ чӧҥӱрилген майлаткандар болгон (Рим. 6:3). Бу чӧҥӱрилиш дезе, кижи теҥериге тирилеринеҥ озо божоп каларын кӧргӱзип јат.

Иисус апостолдорына, чӧҥӱрилген кийнинеҥ эки кире јыл ӧдӧ берерде: «Тӱжӱп турган крезиме... тӱжеригер» — деп айткан (Марк 10:38, 39). Иисус мында сууга чӧҥӱрилери керегинде эмес, је ӧлӧргӧ чӧҥӱрилери керегинде айткан. Ӧскӧртӧ айтса, оныҥ јердеги јӱрӱми ӧлӱмле божоор учурлу болгон. А Иисустыҥ апостолдоры керегинде Павел мындый сӧстӧр бичиген: «Оныла кожо шыралап турган болзобыс, Оныла кожо макталарыс» (Рим. 8:16, 17; 2 Кор. 4:17). Оныҥ учун майлаткандар теҥериге барардаҥ озо, божоп калар учурлу.

Айдарда, Павелдиҥ сӧстӧрин мынайып кӧчӱрзе, чын болор: «Анайдарда, ӧлӧргӧ болуп чӧҥӱрилип турган улусла не болор? Ӧлгӧндӧр качан да тирилбейтен болзо, ӧлӱмге болуп не чӧҥӱрилетен?»