Кӱч ӧйлӧрдӧ слерде Кудайдыҥ амыры болзын

1. Кудайдыҥ амыры ол не ле ол биске нениҥ учун керек? (Филиппыдагыларга 4:6, 7).

КУДАЙДЫҤ амыры — Кудайла јуук колбуларлу болгонынаҥ улам јӱрекке келип турган амыр. Андый амырды бу телекейдеги улус билбес. Бисте Кудайдыҥ амыры бар болзо, бис недеҥ де коркыбай јадыс. (Филиппыдагыларга 4:6, 7 кычырыгар.) Бисте Иегованы сӱӱп турган јуук најыларыс бар, анайда ок бойыс та «амырдыҥ Кудайыла» најылажып јадыс (1 Фес. 5:23). Бис Иеговага бӱдӱп, ого иженип, оныҥ сӧзин угуп турзаас, Кудайдыҥ амыры биске, айалга коркынчылу да боло берзе, токыналу артарга болужар.

2. Бис Кудайдыҥ амырын алар аргалу деп, нениҥ учун алаҥзыбай јадыс?

² Кӱч айалгада оору-јобол, ол эмезе ар-бӱткенниҥ тӱбеги, тӱймеен ол эмезе истежӱлер башталза, бисте Кудайдыҥ амырын алатан арга бар ба? Мындый айалгалардыҥ кажызында ла бис тыҥ коркый берердеҥ айабазыс. Карын Иисустыҥ мынайда айткан сӧстӧри бар: «Јӱректеригер тӱймебезин, чочыбазын» (Иоанн 14:27). Бистиҥ ака-эјелер Иисустыҥ бу сӧстӧрин ундыбай јадылар. Оныҥ учун олор Иегованыҥ болужыла кандый да кӱч айалгада амырын јылыйтпай јат.

ЭПИДЕМИЯ БОЛЗО КАНАЙЫП АМЫР АРТАР?

3. Эпидемиянаҥ улам амырысты канайып јылыйтып салардаҥ айабазыс?

³ Эпидемия бистиҥ јӱрӱмисти бастыра јанынаҥ солып койордоҥ айабас. COVID-19 кӧп саба улуска кандый каршузын јетирген? Шиҥдеечилер улустаҥ сурап угарда, кӧп саба улус уйкузынаҥ астыккан эмтир. Пандемияныҥ ӧйинде депрессия, аракыдаш, наркотиктер тузаланыш, билениҥ ичинде базыныштар, анайда ок бойыныҥ јӱрӱмин кыйарга сананган учуралдар кӧптӧгӧни коркыш. Слердиҥ јереерде оору-јобол башталган болзо, санааркабай, Кудайдыҥ амырын канай кичееп алараар?

4. Иисустыҥ калганчы кӱндер керегинде айткан сӧстӧри бисти канайып токунадат?

⁴ Иисус калганчы кӱндерде башка-башка јерлерде эпидемиялар болор деп судурлап салган (Лука 21:11). Мыны билип турганы́с бисти канайып токунадат? Ондо-мында оору-јобол баштала берзе, бис кайкабай јадыс. Карын јердиҥ ӱстинде болуп турган мындый айалга Иисустыҥ судурыныҥ бӱдӱп турганын кӧргӱзет деп оҥдоп јадыс. Оныҥ да учун калганчы кӱндерде јадатан улуска «чочыбагар» деп айдылган Иисустыҥ сӧстӧрин ундыбай јӱредис (Матф. 24:6).

5. а) Эпидемия башталза, не керегинде мӱргӱӱрин билерге, Филиппыдагыларга 4:8, 9 канайып болужар? б) Агару Бичиктиҥ аудиозаписьтерин укканы эјеге канайып болушкан? Бис мынаҥ кандый ӱредӱ аларыс?

⁵ Эпидемия башталза, кижи санааркап, шакпырай берердеҥ айабас. COVID-19 болордо, Дейзиb эјениҥ адазыныҥ карындажы, аказы, оныҥ врачы божоп калган. Ол мынаҥ улам, бойы оорый берзе, јажы јаанап калган энезин де оорыдып салардаҥ айабас деп коркып, санааркаган. Анайда ок оны иш јок артып калза, неле азыранар, тура учун канайып тӧлӧӧр деген сурактар санааркаткан. Мындый санааркаштардаҥ улам ол тӱнде уйуктап болбой барган. Је бир канча ӧйдӧҥ эје токунай берген. Ого не болушкан? Бу кӱч ӧйлӧрдӧ Дейзи Иеговага мӱргӱп, јӱрегине амыр келзин деп ле јакшы неме керегинде сананарга болуш сураган. (Филиппыдагыларга 4:8, 9 кычырыгар.) Ол Агару Бичиктиҥ аудиозаписьтерин угуп турарда, Иегова оныла куучындажып тургандый болгон. Дейзи айдат: «Аудиозаписьтеги кычыраачылардыҥ токуналу ӱндери јӱрегиме амыр берген ле Иегова мени тыҥ сӱӱп турган деп эске алындырган» (Сар. 94:19).

6. Слерге таҥынаҥ ӱренери ле јуунныҥ туштажулары канайып болужар?

⁶ Эпидемия бистиҥ кажы ла кӱн эдип турган керектеристиҥ аайын солып койордоҥ айабас. Је ол јуунныҥ туштажуларына јӱрерине ле таҥынаҥ ӱренерине бир де чаптыгын јетирбезин. Бу туштажуларда айдылган Агару Бичиктиҥ сӧстӧри слерге јакшы неме сананарга болужар. Слер анда ака-эјелерди де оморкодороор, бойоор до оморкоду алараар. Бистиҥ бичиктердеги учуралдардаҥ ла сайттагы видеолордоҥ бистий ле кӱчтерлӱ ака-эјелер Кудайга чындык артканын билип алараар (1 Пётр 5:9). Иегова оорып турган, јаҥысканзырап турган ла коркып турган бойыныҥ ишчилерине канайып болушканын шӱӱп сананзаар, кӱч ӧйлӧрдӧ Иегова слердиҥ де јанаарда деп бӱдӱмјиленереер (Рим. 1:11, 12).

7. Слер апостол Иоаннаҥ неге ӱренер аргалу?

⁷ Ака-эјелерле кӧп куучындажып туругар. Је эпидемиянаҥ улам олордыҥ ортозында да болзоос, олорго тыҥ јууктабас болорыс. Бу учуралда биске апостол Иоанныҥ теми болужар. Ол Гай најызын кӧрӧргӧ тыҥ кӱӱнзеген (3 Иоанн 13, 14). Је андый арга болбосто, Иоанн ого самара бичиген. Слерге де ака-эјелерле кӧрӱжерге келишпей турган болзо, олорго телефон согуп ийерге, видеосвязь ажыра куучындажып ийерге эмезе СМС бичип ийерге јараар. Бис ака-эјелерле куучындажып турзаас, јӱрегисте амыр болот ло недеҥ де коркыбай јадыс. Оныҥ учун тыҥ санааркап турзаар, аксагалдардаҥ болуш сурап туругар, анайда ок олордыҥ болужын јектебегер (Иса. 32:1, 2).

ТӰБЕКТИҤ ӦЙИНДЕ КАНАЙЫП АМЫР АРТАР?

8. Тӱбектиҥ ӧйинде бис амырысты канайып јылыйтардаҥ айабазыс?

⁸ Слер ӧрттӧҥ, суу кӧдӱрилгенинеҥ, јер-силкиништеҥ улам узак ӧйгӧ санааркаар болороор. Тӱбектеҥ улам јуук улузыгарды да, јӧӧжӧгӧрди де јылыйтып, ачынып кородороор. Ижемјигерди де јылыйтардаҥ айабазаар (Иов 1:11). Мындый сезимдер кижиде бӱдӱмји јок ло јӧӧжӧгӧ тартылып турган деп кӧргӱспей јат. Слер коркышту јаан ченелте ӧткӧнӧӧр, оныҥ учун јазап сананбаган сӧстӧр дӧ айткан болзоор, улус слерди оҥдоор. Је ар-бӱткенниҥ тӱбеги болгон до болзо, канайып амыр артар?

9. Иисус бистерди бӱгӱнги кӱчтерге канайып белетеп салган?

⁹ Иисустыҥ айткан судурларын бир де ундыбагар. Бу телекейдиҥ кезик улузы јердиҥ ӱстинде болуп турган ар-бӱткенниҥ тӱбеги олордо болбос деп санангылайт. Је бис Агару Бичиктиҥ айтканыла, тӱбек оноҥ кӧп болор ло кажы бирӱзи биске де једер деп оҥдоп јадыс. Иисус бойыныҥ ӱренчиктерине бу телекейдиҥ учы келердеҥ озо «тыҥ јерсилкиништер» ле оноҥ до ӧскӧ тӱбек болор деп айдып салган (Лука 21:11). Ол анайда јасак јогы тыҥыыр деп айткан (Матф. 24:12). Мыны бис бӱгӱн кӧрӱп јадыс: јаантайын ла каршулу керектер, базыныш, теракттар болот. Иисус мындый тӱбек јӱк ле Кудайды билбес улуста болор деп айтпаган. Тӱбекке Иегованыҥ да чындык ишчилери учурап јат (Иса. 57:1; 2 Кор. 11:25). Иегова биске тӱбектиҥ ӧйинде болужарга кайкал этпес те болзо, кӧксисте амыр болзын деп ончозын берер.

10. Тӱбекке белетенери — Кудайга бӱдӱп турганысты кӧргӱзет деп, нениҥ учун айдарга јараар? (Укаа сӧстӧр 22:3).

¹⁰ Кенетийин болотон тӱбекке белетенип алзаас, токуналу болорыс. Је тӱбекке белетенери Иеговага бӱтпей турганысты кӧргӱзет пе? Јок. Карын мынай эдип турганыстаҥ Иегова бисти тӱбектиҥ ӧйинде артыргыспас деп бӱдӱп турганы́с кӧрӱнет. Нениҥ учун мынайда айдарга јараар? Нениҥ учун дезе Кудайдыҥ Сӧзи бисти јеткерлӱ айалгага белен болзын деп јӧп берет. (Укаа сӧстӧр 22:3 кычырыгар.) Анайда ок Кудайыҥ организациязы статьялар, јуунныҥ туштажулары ла ӧйи-ӧйинде болуп турган јарлар ажыра кенетийин болотон тӱбекке озолондыра белетенип алзын деп кӱӱнзедетc. Бис Иеговага бӱдӱп турганыс па? Эйе болзо, кандый бир тӱбек болголокто оныҥ берип турган јӧбин эмди ле тузаланарыс.

11. Маргрет эјениҥ учуралынаҥ неге ӱренедеер?

¹¹ Маргрет эјениҥ учуралын кӧрӱп ийектер. Оныҥ јадып турган јеринде аралдар кӱйӱп турарда, јаҥдар эвакуация болор деп јар эткен. Мынаҥ улам бастыра улус каладаҥ чыгып јадарда, машиналардыҥ кӧбине јол туйуктала берген. Оноҥ кей кап-кара ыш боло берерде, эје бойыныҥ ла машиназына туйуктала берген. Је эје бу айалгага озолодо белетенип алтыр. Ол дезе сумказына карта сугуп алган. Бу картала база ӧскӧ кандый јолдор барын озолодоҥ барып, кӧрӱп салтыр. Мынайып эјениҥ белетенип алганы оныҥ јӱрӱмин аргадады.

12. Аксагалдардыҥ ла јаҥдардыҥ некелтелерин бис нениҥ учун бӱдӱрип турганыс?

¹² Јаҥдар дезе албатыны корулаарга ла чур-чуманак эш кӧдӱрилбезин деп, комендантский час тургузып ийер аргалу. Ол эмезе эвакуация эдердеҥ айабас эмезе база да ӧскӧ некелтелер тургузар аргалу. Кезик улус дезе мындый некелтелерди кӱӱн-кӱч јок бӱдӱрет. А кезиги дезе јӧӧжӧзине тыҥ тартылып турганынаҥ улам тӱрген кыймыктанардыҥ ордына ӧйди чӧйип јат. Христиандарга бу некелтелерге кандый кӧрӱмдӱ болор керек? Агару Бичик биске мынайып айдат: «Кижиниҥ кандый ла јаҥына Кайраканга болуп багыгар: ол эҥ бийик јаҥда отурган каан да болзын, кааннаҥ ийилген башкараачылар да болзын» (1 Пётр 2:13, 14). Кудайдыҥ организациязы бисти корулаарга, јарт башкартулар берип турган. Оныҥ учун аксагалдарга телефонныҥ номерин эжин берерге ундыбай турар керек. Слер берип салганаар ба? Ол тушта олор слерле, јеткерлӱ айалга боло берзе, колбожып ийер. Анайда ок олор биске айылыстаҥ чыкпазын деп, эмезе эвакуация этсин деп айдардаҥ айабас. Олор биске гуманитарный болушты кайдаҥ алатан ла улуска кайда ла качан болужатанын айдып берер. Бис олордыҥ сӧзин укпазабыс, бойыстыҥ да, аксагалдарыстыҥ да јӱрӱми кыйылардаҥ айабас. Ундыбагар, Кудайга чындык бу эр улус бистиҥ јӱрӱмисти кичееп турган (Евр. 13:17). Маргрет эје айдат: «Мен бир де алаҥзыбай јадым. Ол тушта аксагалдардыҥ ла организацияныҥ башкартуларын бӱдӱрбеген болзом, эмди тирӱ отурбас эдим».

13. Айылы-јуртын артыргызарга келишкен ака-эјелерге сӱӱнчизин ле амырын јылыйтпаска не болужат?

¹³ Кӧп ака-эјелер ар-бӱткенниҥ тӱбеги болордо эмезе јуу-согуш ла тӱймеен кӧдӱрилерде, айылы-јуртын артыргызып, ӧскӧ јерге качкан. Андый да болзо, олор јаҥы јерге эптежип алала, тӱрген ле Кудайдыҥ ижин бӱдӱрип баштаган. Бу ака-эјелер баштапкы чакта истежӱлер башталарда, ӧскӧ јерге качарга келишкен христиандар ла чылап, сӱӱнчилӱ јарды оноҥ ло ары јарлайдылар (Ап. ижи 8:4). Јарлаар иш олорго баштапкы јерге бойыныҥ кӱчтерин эмес, је Каандыктыҥ керектерин тургузарга болужат. Оныҥ учун олор сӱӱнчилӱ ле амыр јӱрет.

ИСТЕЖӰЛЕРДИҤ ӦЙИНДЕ КАНАЙЫП АМЫР АРТАР?

14. Бис истежӱлердеҥ улам амырысты канай јылыйтардаҥ айабазыс?

¹⁴ Истежӱлердеҥ улам биске амыр берип турган немелерди јылыйтардаҥ айабазыс. Темдектезе, бис ака-эјелерисле јайым туштажып јадыс. Јажынып-эштебей јарлайдыс. Анайда ок бисти качан бирде отургызып салар деп коркыбай, кӱнниҥ сайынгы керектерди эдип јӱредис. Мындый керектер бисти сӱӱнчилӱ эдет. Је мындый јайымысты айрып алза, амырысты јылыйтып, мынаҥ ары не болор деп санааркай бередис. Бу сезимдерде јаман ла неме јок. Је тӱҥей ле ајарыҥкай болор керек, нениҥ учун дезе Иисус мындый истежӱлердеҥ кезик улус Кудайга бӱтпей барардаҥ айабас деп айткан (Иоанн 16:1, 2). Айдарда, истежӱлердиҥ ӧйинде амырысты јылыйтпаска нени эдер керек?

15. Биске нениҥ учун истежӱлердеҥ коркыбас керек? (Иоанн 15:20; 16:33).

¹⁵ Агару Бичикте айдылган: «Кудайга беринип, Христос Иисустыҥ Бойында јӱрер кӱӱндӱ ончо улус истедер» (2 Тим. 3:12). Андрей аканыҥ јаткан јеринде Иегованыҥ Керечилериниҥ ижин токтодып саларда, ого бу сӧстӧрди алынарга јеҥил эмес болгон. Ол мынайда сананган: «Бистиҥ јеристе Керечилер сӱреен кӧп. Бисти тӱҥей ле ончобысты отургызып болбос!» Ол бойын мынайда токунадып та турарда, оныҥ санааркажы јоголбогон. Је кезик акалар ӱзе немени Иегованыҥ колына берип салала, тӱрмеге де отурарга белен болгон. Оныҥ учун олор Андрей акага кӧрӧ тыҥ санааркабаган. Бу акаларды кӧрӧлӧ, Андрей ака олордыҥ кӧрӱмин алынар керек деп шӱӱп алган. Бир канча ӧйдӧҥ, айалга солынбаган да болордо, аканыҥ јӱрегине амыр ла сӱӱнчи келген. Бу принцип бистерге де тузалу болор. Иисус бойыныҥ ӱренчиктерин истежӱлерге де табартар, Иеговага чындык та артар деп бӱдӱмјилеп салган. (Иоанн 15:20; 16:33 кычырыгар.)

16. Истежӱлердиҥ ӧйинде биске кандый јакаруларды бӱдӱрер керек?

¹⁶ Организацияны токтодып салган ол эмезе кандый бир токтодулар тургузылып калган болзо, филиал эмезе аксагалдар керектӱ јакарулар берип јат. Бу јакарулар бисти корулайт, анайда ок оноҥ ло ары кӧгӱс курсакты аларга ла канча кире арга бар оноҥ ло ары јарлаар арга берет. Слер бу јакарулардыҥ нениҥ учун берилип турганын оҥдобой до турган болзогор, олорды бӱдӱрип туругар (Иак. 3:17). Анайда ок ака-эјелер ле јуунныҥ ижи керегинде билер јаҥы јок улуска нени де куучындабагар (Эккл. 3:7).

17. Апостолдордыҥ теминеҥ бис неге ӱренедис?

¹⁷ Сатананыҥ Кудайдыҥ ишчилериле јуулажып турганыныҥ шылтактарыныҥ бирӱзи — олордыҥ Иисус Христос керегинде јарлап турганы (Ачыл. 12:17). Је слер Сатананаҥ ла оныҥ телекейинеҥ коркыбагар. Удурлажулардаҥ коркыбай јарлап, ӱренчиктер белетеп турзаар, јаан сӱӱнчи алараар ла јӱрегерде амыр болор. Баштапкы чактыҥ јаҥдары апостолдорды јарлабазын деп кезедип саларда, олор Кудайга багынарга шӱӱп алган. Мынайып иштегенинеҥ олор сӱреен јаан сӱӱнчи алган (Ап. ижи 5:27—29, 41, 42). Јарлаар ижиске токтодулар тургузылган болзо, ајарыҥкай болор керек (Матф. 10:16). Је андый да болзо, канча кире аргагар бар јарлап туругар. Ол тушта Иегова Кудайыгарды сӱӱндирип турганаардаҥ улам ла улустыҥ јӱрӱмин аргадап турган јар куучындап турганаардаҥ улам јӱрегерге сӱреен јаан амыр келер.

«АМЫРДЫҤ КУДАЙЫ СЛЕРЛЕ КОЖО БОЛОР»

18. Кандый јаан учурлу шӱӱлтени сананып алар керек?

¹⁸ Мындый јаан учурлу шӱӱлтени сананып алыгар: бис керек дезе коркышту кӱч ӧйлӧрдӧ дӧ амыр ла токуналу артар аргалу. Андый ӧйлӧрдӧ биске сӱреен керектӱ болуп турган амырды — Кудайдыҥ амырын — јӱк ле Иегова берип турган деп, бир де ундыбас керек. Оныҥ учун эпидемиялар, кандый бир тӱбек эмезе истежӱлер болуп турза, Иеговага иженигер. Оныҥ организациязынаҥ бир де ырабагар. Келер ӧйдӧ болотон сӱреен јакшы ӧйди сананып туругар. Ол тушта «амырдыҥ Кудайы слерле кожо болор» (Флп. 4:9). Келер јӧрмӧлдӧ коркышту јаан кӱчтерге табартып турган ака-эјелерис Кудайдыҥ амырын сезип турзын деп, бис нени эдер аргалу деп шӱӱжерис.