Кудайдаҥ коркыыры слерди корулазын!

1, 2. Бӱгӱнги ака-эјелердиҥ айалгазы Лоттыҥ айалгазына незиле тӱҥей?

БӰГӰНГИ ӧйдӧ улустыҥ кылык-јаҥы коркышту тыҥ ӱрелип бараткан. Мыны кӧрӱп, Лоттыҥ сезимдерин аайлап јадыс. Лот «јарамастулардыҥ јаман кылыгынаҥ арып-чылаган», нениҥ учун дезе теҥеридеги Адазы мындый керектерди кӧрӧр кӱни јок деп билетен (2 Пётр 2:7, 8). Ол Кудайды сӱӱп, оноҥ айап, ӧскӧртӧ айтса, јалтанып туратан. Бу ого айландыра јаткан улустыҥ кӧрӱм-санаазын алынбаска болушкан. Бӱгӱнги кӱнде айалга база андый ла. Је бис Иегованыҥ бийик нормаларыла јӱрӱп, ару артар аргалу. Ару артарга, Иегова Кудайысты сӱӱп, оноҥ айап турарга ӱренер керек (Укаа 14:2).

² Иегова биске болужарга, Укаа сӧстӧр деген бичикти берген. Бу бичик бисти чын јӱрерге кӱӱнзедет. Анайда ок бистиҥ ончобыска — эр де, ӱй де улуска, јажы јаан да, јиит те улуска — тузалу болор. Оныҥ учун бу ойгор сӧстӧрди шӱӱжип ийектер.

КУДАЙДАҤ КОРКЫЫРЫ БИСТИ КОРУЛАЙТ

3. Укаа сӧстӧр 17:3-ле болзо, нениҥ учун јӱрегисти корулаар керек? (Јурукты база кӧрӱгер.)

³ Биске сӱрлеп айдылган јӱрегисти корулаар керек. Нениҥ учун дезе Иегова бистиҥ јӱрегисте не барын, не јогын ӱзе шиҥдеп, кӧрӱп јат. Ол ӧскӧ улустыҥ кӧзине илинбей де турган немени ајарып ийет. Бис оныҥ алаканында немедий. (Укаа сӧстӧр 17:3 кычырыгар.) Качан бис јӱрӱм берип турган Кудайдыҥ ойгорын бажыска салып турзаас, ол сӱӱнип јат (Иоанн 4:14). Оныҥ учун бу телекейдиҥ, Сатананаҥ чыгып турган коронду тӧгӱн ӱредӱлерин ле јабыс нормаларын, бойыстыҥ јӱрегиске јууктадар кӱӱнис јок (1 Иоанн 5:18, 19). Бис теҥеридеги Адабыска јууктазаас, ого тоомјыбыс ла сӱӱжис ӧзӱп јат. Оны ачындырар кӱӱнис јок, оныҥ учун кинчек эдетен санаа биске јескинчилӱ де. Качан јаман неме эдер кӱӱнис келзе, бойыстаҥ мынай сураар керек: «Иегова мени анай тыҥ сӱӱп турган болордо, оны биле тура канайып ачындыратам?» (1 Иоанн 4:9, 10).

4. Иегованаҥ айап турары бир сыйынга кинчекке јайыла бербеске канайып болушкан?

⁴ Хорватияда јадып турган Мартаb деп сыйында балыр кинчек эдип ийетен ченелте болгон. Ол мынайда бичиген: «Ол ӧйдӧ кинчек мени олјолоп алган деп билдирген. Бажым да иштебей барган. Кинчекле тартыжатан ийде-кӱч те јок болгон. Је мени Иегованаҥ јалтанып турганым токтодып ийген». Бу сыйынга Иегованаҥ айап турары канай болушкан? Мартаныҥ айтканыла болзо: «Кинчекке јайыла берген болзом, коркышту јаман болор эди деп санангам». Бу биске јакшы тем болот. Кинчектиҥ эҥ јаман каршузы — христиан кижиниҥ Иеговала колбулары ӱрелип, ӱргӱлјиге јӱретен арганы јылыйтып салары (Баш. 6:5, 6).

5. Леоноҥ кандый ӱредӱ аладыс?

⁵ Бис Иегованаҥ јалтанып турган болзоос, јаман керектер эдип турган улуска бирикпей јадыс. Мыны Конгодо јадып турган Лео јакшы оҥдоп алган. Ол чӧҥӱрилген кийнинеҥ тӧрт јыл ӧдӧ берерде, телекейдиҥ улузыла најылажып баштаган. Лео баштап тарый Иегованыҥ кӧзине кинчек эткедий јаман неме этпей тургам деп сананган. Соҥында ол андый улусла најылажып турала, аракыдап ла балыр јӱрӱм јӱрӱп баштаган. Је канча да ӧйдӧҥ христиан эне-адазы неге ӱреткени ле бойы Иеговага иштеерде кандый ырысту болгоны санаазына кирген. Мынаҥ улам санаа алынып, аксагалдардыҥ болужыла Кудайга јанып келген. Бӱгӱнги кӱнде ол аксагал ла специальный пионер болот.

6. Сӱрлеп айдылган кандый эки ӱй кижи керегинде шӱӱп кӧрӧрис?

⁶ Је эмди Укаа сӧстӧрдиҥ 9-чы бажалыгын шиҥдеп ийектер. Анда сӱрлеп айдылган тенек ле ойгор эки ӱй кижи керегинде бичилген. (Римдегилерге 5:14 тӱҥдештиригер; Галаттарга 4:24.) Олордыҥ кажызы ла ченемел јок ло тенек улусты: «Айылыма киригер, ажаныгар!» — деп кычырат (Укаа 9:1, 5, 6, 13, 16, 17). Олордыҥ кычыру сӧстӧри тӱҥей де болзо, је учы-тӱби чек башка. Бу калганчы ӧйдӧ Сатананыҥ телекейи улусты порнографияла, сексле чек јӱӱлтип јат (Эф. 4:19).Оныҥ учун јаманнаҥ тууралап, Кудайдаҥ јалтанып јӱрер керек (Укаа 16:6). Айдарда, эр де улуска, ӱй де улуска Укаа сӧстӧрдиҥ 9-чы бажалыгын шиҥдеп кӧргӧни јаан тузазын јетирер.

«ТЕНЕК ӰЙ КИЖИНИҤ» АЙЫЛЫНА КИРБЕГЕР

7. Укаа сӧстӧр 9:13—18-ле болзо, «тенек ӱй кижиниҥ» айылына киргенди не сакыйт? (Јурукты база кӧрӱгер.)

⁷ «Тенек» ӱй кижиниҥ айдып турган сӧстӧрине ајару эдип ийектер. (Укаа сӧстӧр 9:13—18 кычырыгар.) Бу ӱй кижи оныҥ айылына ажанарга кирип келген тенек улусты ӧлӱм сакып турганын билер де болзо, олорды уйалбай ла кычырып јат. Анайда ок слердиҥ санаагарга Укаа сӧстӧрдиҥ ӧскӧ дӧ бажалыктарында сӱрлеп айдылган ӱй улустыҥ сӧстӧри кирер болор. Ондо Агару Бичик бисти «балыр ӱй кижиниҥ» сӧстӧринеҥ корулап, мынайда айдат: «Оныҥ айылына барганды ӧлӱм сакыйт» (Укаа 2:11—19). Анайда ок Укаа сӧстӧр 5:3—10-до база бир «балыр ӱй кижи» керегинде: «Оныҥ буды ӧлӱмге апарат» — деп айдылат.

8. Биске нени талдаарга келижердеҥ айабас?

⁸ «Тенек ӱй кижиниҥ» кычыртузын уккан улуска оныҥ айылына киретен бе, јок по деп сананар керек. Мындый талдашты биске де эдерге келижердеҥ айабас. Темдектезе, балыр керектер эдетен ченелте болзо, бис нени эдерис? Ол эмезе телевизордо, эмезе смартфондо порнографиялу јуруктар кӧрӱнип келзе, бис канайдарыс?

9, 10. Нениҥ учун балыр јӱрӱмнеҥ кыйар керек?

⁹ Бисте балыр јӱрӱмнеҥ кыйып јӱретен јаан шылтактар бар. «Тенек ӱй кижи» мынайып айткан: «Уурдап ичкен суу тату». «Уурдап ичкен» дегенин канайып оҥдоор? Агару Бичикте эш-нӧкӧрлӧрдиҥ кожо конып турганы — изӱ кӱнде кижиниҥ суузын кандырып турган суула тӱҥдештирилет (Укаа 5:15—18). Эр ле ӱй кижи јасак аайынча алышкан болзо, сексуальный колбуларыла јакшызынар аргалу. Је олордыҥ андый колбулары ару болор учурлу. А Кудайдыҥ нормаларын бузуп, кожо конгонын — «уурдап ичкен суу» деп айдарга јараар. Кезик улус мындый керекти олорды кем де укпазын, кӧрбӧзин деп, уурчы чылап јажытту эдет. Андый улус олорды кем де кату каруузына тургуспас деп сананат. Анчада ла бу улус «уурдап ичкен суу тату» деп сананардаҥ айабас. Кандый јастыра санаа! Иегова Кудайыстыҥ кӧзинеҥ не де туура калбай јат. Андый тенек кижи оныҥ јарадузын јылыйтып јат. Бу кижиниҥ јӱрӱмин «тату» деп айдып болбозыҥ. Карын, ол ачу-коронго тӱжет (1 Кор. 6:9, 10). Анайда ок оныҥ јӱрӱминде ӧскӧ дӧ кӱчтер башталат.

¹⁰ Эш-нӧкӧри эмес кижиле конгон кижи бойын јинип, тообой барат, ӱй улус дезе барланып калат, ол эмезе билелер чачылат. Оныҥ да учун «тенек ӱй кижиниҥ» айылына јууктабаза да, оныҥ курсагынаҥ амзабаза да торт болор. Бу ӱй кижиниҥ курсагынаҥ амзаганы кӧгӱс ӧлӱмге экелет, ол эмезе андый кижи эрте божоп калатан јӱзӱн-јӱкпӱр ооруларла ооруп калат (Укаа 7:23, 26). 9-чы бажалыктыҥ 18-чи ӱлгеринде айдылганыла, «оныҥ айылчылары сӧӧк салар јерде». Андый болордо, нениҥ учун кӧп улус «тенек ӱй кижиниҥ» тузагына тӱжӱп калат? (Укаа 9:13—18).

11. Нениҥ учун порнографияны кӧрбӧс керек?

¹¹ Бӱгӱнги кӱнде порнография деп неме коркышту таркап калган. Кезик улус бу јаан тузак деп аайлабай јат. Олордыҥ санаазыла болзо, порнография кӧрӧринде јаман ла неме јок. Је чынынча болзо, оныҥ каршузы сӱреен јаан. Андый јескинчилӱ неме кӧрӱп турган улус бойын да, улусты да тообой барат, ол јогынаҥ јӱрӱп те болбой јат. Порнографияныҥ ийде-кӱчи коркышту јаан. Оны кӧргӧн кижиниҥ меезине ол тереҥ шиҥип калат. Оныҥ учун оны баштаҥ јоголторго јеҥил эмес. Порнография кижиниҥ јастыра кӱӱнин кӱйбӱредип јат (Кол. 3:5; Иак. 1:14, 15). Оныҥ учун бир канча ӧйдӧҥ кижи кӧргӧн немезин бойы эдип баштайт.

12. Бис сексуальный кӱӱнисти кӱйбӱретпеске турганысты канайып кӧргӱзерис?

¹² Бистиҥ электронный эдимисте порнографиялу јуруктар кӧрӱнип келзе, бис канайдарыс? Оны тӱрген ле кӧзистеҥ туура эдерис. Анайып эдерге не болужар? Андый ӧйдӧ Иеговала колбуларысты ӱребеске турганы́с болужар. Је кезикте кӧрӱнип келген јуруктар порнография эмес те болзо, олор кижиниҥ сексуальный кӱӱнин кӱйбӱредердеҥ айабас. Андый немелерди нениҥ учун кӧрбӧс керек? Нениҥ учун дезе бис эш-нӧкӧриске чындык артатан нормаларды бузарга бир де кӱӱнзебей јадыс (Матф. 5:28, 29). Таиландта јадып турган Дэвид деп аксагал куучындайт: «„Кӧрӱп турганым порнография эмес те болзо, Иегова ого канайып кӧрӧт?“ — деп бойымнаҥ сурайдым. Анайып сананганым јастыра неме этпеске болужат».

13. Биске ойгор болорго не болужар?

¹³ Иегованаҥ айап турарга биске ойгор болоры болужар. Нениҥ учун дезе Агару Бичикте айдылганыла, «ойгор болоры» Иегованаҥ айап турарынаҥ башталат (Укаа 9:10). Бу дезе Укаа сӧстӧрдиҥ 9-чы бажалыгыныҥ баштапкы сӧстӧринеҥ јарт кӧрӱнет. Ондо сӱрлеп айдылган экинчи ӱй кижи керегинде бичилген. Оныҥ ады «чын ойгор».

«ОЙГОР ӰЙ КИЖИНИҤ» АЙЫЛЫНА КИРИГЕР

14. Укаа сӧстӧр 9:1—6-да кандый кычырту керегинде айдылат?

¹⁴ Укаа сӧстӧр 9:1—6 кычырыгар. Бу алты ӱлгердеҥ чын ойгор берип турган Иегова Јайаачыбыстыҥ кычыртузын кӧрӧдис (Укаа 2:6; Рим. 16:27). Мында јети столмолу јаан тура керегинде айдылат. Бу дегежин бистиҥ кысканбас Кудайыс оныҥ ойгорын тузаланарга турган улустыҥ ончозын сӱӱнип, кӱндӱлеп турганын кӧргӱзет.

15. Кудай бисти неге кӱӱнзедет?

¹⁵ Иегова ӱзе немени арбындап берет. Ол кысканбас ла биске јаантайын болужарга белен. Бу кылык-јаҥдар «чын ойгорго» кирет. Чын ойгор Укаа сӧстӧрдиҥ 9-чы бажалыгында сӱрлеп айдылган ӱй кижини темдектейт. Бу ӱй кижи столго эт, курсак-тамак салып, аракы тургузып јат (Укаа 9:2). Оноҥ арыгы 4 лӧ 5 ӱлгерлерде: «Тенектерге ол айдат: „Келип, мениҥ калажымды јигер“». Биске нениҥ учун «чын ойгордыҥ» айылына кирип, оныҥ курсагын јиир керек? Нениҥ учун дезе Иегова Кудай бойыныҥ балдарын ойгор јӱрзин ле олорло јаман неме болбозын деп кӱӱнзейт. Анайда ок бисти бойыстыҥ јастыраларыстаҥ ӱренип, кийнинде санааркап, ачурканып јӱрзин деп кӱӱнзебей јат. Оныҥ да учун Иегова «ойгорды акту улуска кичеейт» (Укаа 2:7). Иегованаҥ айап јӱргени́с бисти оны сӱӱндирип јӱрерге кӱӱнзедер. Анайда ок оныҥ ойгор јакылталарын јӱрӱмисте тузаланып јӱрерге болужар (Иак. 1:25).

16. Аланга Кудайдаҥ айап јӱргени ойгор тӱп-шӱӱлте эдерге канайып болушкан ла бу кандый једимдерге экелген?

¹⁶ А́лан деп аксагал школдо качы болуп иштейт. Ого Кудайдаҥ айап јӱргени ойгор тӱп-шӱӱлте эдерге канайып болушканын кӧрӱп ийектер. Оны кожо иштеп турган улузы половой јӱрӱм ол не деп билерге, порнографиялу кинолор кӧрзин деп кӱӱнзеткен. Алан олорло бир де јӧпсинбеген. Ол: «Мен Кудайдаҥ айап јадым. Оныҥ учун мындый јаман кинолор кӧрбӧзим деп бек шӱӱп алгам». Алан кожо иштеп турган улуска нениҥ учун андый кинолор кӧрбӧй турганын јаантайын јартап туратан. Ол: «Ойгор болорыныҥ јолыла барыгар» — деп јӧплӧ јӱрген (Укаа 9:6). Анайып оныҥ турумкайын кезик качылар кӧрӱп, сӱреен кайкашкан. Кийнинде олор Агару Бичикти ӱренип, јуундарга јӱрӱп баштаган.

17, 18. «Чын ойгордыҥ» кычыртузын алынган улустыҥ јӱрӱми эмди кандый, келер ӧйдӧ кандый болор? (Јурукты база кӧрӱгер.)

¹⁷ Иегова сӱрлеп айдылган эки ӱй кижиниҥ болужыла бистерге ырысту, јакшы јӱрӱм јӱрерге нени эдер керек деп кӧргӱзип јат. Тал-табышту «тенек ӱй кижиниҥ» айылына кирген улус «тату», јажытту јӱрӱм јӱргилейт. Олор бӱгӱнги ле кӱнле јӱрӱп, келер ӧйдӧ не болорын сананбай да јадылар. Олорды ӧлӱм сакыйт (Укаа 9:13, 17, 18).

¹⁸ «Чын ойгордыҥ» кычыртузын алынган улустыҥ јӱрӱми чек башка. Олор эмди ле сӱреен бай кӧгӱс столдоҥ ажанып јадылар. Олордыҥ јип турган курсагы јараш та, тузалу да (Иса. 65:13). Иегова Исайя судурчызы ажыра мындый сӧстӧр айткан: «Мени лаптап угугар, ол тушта слер јӱзӱн-јӱӱр эҥ артык курсак јип, сӱӱнчи алараар» (Иса. 55:1, 2). Бис Иеговага јарабай турган неменеҥ тууралап јӱрерге ӱренип јадыс (Сар. 97:10). Анайда ок биске улусты «чын ойгордыҥ» айылына кычырарга сӱреен јарап јат. Анайып, каланыҥ бийик јерине чыгала: «Кем ченемел јок бери келзин» — деп айдып тургандый болодыс. Бир де кижи бойын: «Бу кычыртуны не алындым не?» — деп, качан да бурулабас. Карын андый улуста ойгордыҥ јолыла јажын-чакка јӱретен арга бар! (Укаа 9:3, 4, 6).

19. Экклезиаст 12:13, 14-тӧги сӧстӧр бисти неге кӱӱнзедет? («Кудайдаҥ коркыыры кандый туза берет?» деген рамканы база кӧрӱгер.)

¹⁹ Экклезиаст 12:13, 14 кычырыгар. Айдарда, Кудайдаҥ айап јӱрери бистиҥ јӱрегисти корулазын ла ӱрелип калган калганчы ӧйдӧ кӧгӱс јанынаҥ ару артарга болушсын. Кудайдаҥ айап јӱрери бисти бастыра улусты «чын ойгорго» ӱредерине кӱӱнзедет.