መዝሙር

12 ይሖዋ ሆይ፣ አንድም ታማኝ ሰው ስለሌለ አድነኝ፤

ከሰው ልጆች መካከል ታማኞች ጠፍተዋል።

 2 እርስ በርሳቸው ውሸት ይነጋገራሉ፤

በከንፈራቸው ይሸነግላሉ፤* አታላይ በሆነ ልብም* ይናገራሉ።+

 3 ይሖዋ የሚሸነግልን ከንፈር ሁሉ፣

ጉራ የሚነዛውንም ምላስ ይቆርጣል፤+

 4 እነሱ “በምላሳችን እንረታለን።

አንደበታችንን እንዳሻን እንጠቀምበታለን፤

በእኛ ላይ ጌታ ሊሆን የሚችል ማን ነው?” ይላሉ።+

 5 “የተጎሳቆሉት ሰዎች በመጨቆናቸው፣

ድሆችም በመቃተታቸው፣+

እርምጃ ለመውሰድ እነሳለሁ” ይላል ይሖዋ።

 6 የይሖዋ ቃል የጠራ ነው፤+

ከሸክላ በተሠራ ምድጃ* እንደተጣራ ብር ሰባት ጊዜ የነጠረ ነው።

 7 ይሖዋ ሆይ፣ አንተ ትጋርዳቸዋለህ፤+

እያንዳንዳቸውን ከዚህ ትውልድ ለዘላለም ትጠብቃቸዋለህ።

 8 የሰው ልጆች ብልሹ ምግባርን ስለሚያስፋፉ፣

ክፉዎች እንዳሻቸው ይፈነጫሉ።+