ከዓለም አካባቢ

ኢኳዶር

የኢኳዶር መንግሥት፣ 10,000 ካሬ ኪሎ ሜትር የሚጠጋ ስፋት ባለው የአማዞን ደን ክፍል ውስጥ ነዳጅ ለማውጣት ከማስቆፈር ይልቅ የደኑን ተፈጥሯዊ ይዞታ ለማስጠበቅ የሚያስችል እቅድ ማውጣቱን በ2007 ገልጾ ነበር። ይሁንና ይህን ለማድረግ የሚያስችል ከዓለም አቀፉ ማኅበረሰብ የገንዘብ ድጋፍ በመታጣቱ የኢኳዶር መንግሥት የያዘውን ዕቅድ ትቶታል። ይህ የአማዞን ደን ክፍል በዓለም ላይ ብዙ የእንስሳት እና የዕፀዋት ዝርያዎች ከሚገኙባቸው ክልሎች አንዱ ነው።

ጃፓን

ዘ ጃፓን ኒውስ እንደተናገረው አንድ የተቀዳ ደም የተበከለ መሆን አለመሆኑን በምርመራ ማረጋገጥ በጣም አስቸጋሪ ነው። ይህ ዘገባ የወጣው በ60ዎቹ ዕድሜ የሚገኙ አንድ ሰው በተሰጣቸው ደም ምክንያት የኤች አይ ቪ ቫይረስ እንደያዛቸው በ2013 የተላለፈውን ዜና ተከትሎ ነው። ከለጋሾች የሚወሰደው ደም የኤች አይ ቪ ቫይረስ ያለበት ቢሆንም እንኳ ደሙ በሚመረመርበት ጊዜ የቫይረሱ መኖር ላይታወቅ ይችላል፤ ምክንያቱም ቫይረሱ በምርመራ ሊገኝ የማይችልበት ዊንዶው ፔሬድ የሚባል ወቅት አለ።

ዚምባብዌ

በዚምባብዌና በሞዛምቢክ ድንበር ላይ ይደረግ የነበረው የደፈጣ ውጊያ ካቆመ ከ30 ዓመታት በላይ ቢያልፉም በዚህ አካባቢ የተቀበሩ ፈንጂዎች አሁንም ድረስ ሰዎችን ለአካል ጉዳተኝነትና ለሞት እየዳረጉ ነው። ዓለም አቀፍ የቀይ መስቀል ኮሚቴ እንደዘገበው “ከ1980 ወዲህ በዚህ አካባቢ ባለው የዚምባብዌ ግዛት ውስጥ በፈንጂዎች ምክንያት ከ1,500 የሚበልጡ ሰዎችና 120,000 የቀንድ ከብቶች የሞቱ ሲሆን 2,000 የሚያህሉ ሰዎች ደግሞ አካል ጉዳተኞች ሆነዋል።”

አውስትራሊያ

እንደ ውሻና ድመት ባሉ የቤት እንስሳት የባለቤትነት ጥያቄ የተነሳ ክርክር ውስጥ የሚገቡ የተፋቱ ባለትዳሮች ቁጥር እየጨመረ መምጣቱን አንድ ጥናት አመልክቷል። ፍቺ በፈጸሙ ባልና ሚስት መካከል ለክርክር መንስኤ ከሆኑት የጋራ ንብረቶች መካከል ቤት፣ ገንዘብና አንዳንድ የግል ዕቃዎች በዋነኝነት ይጠቀሳሉ፤ የቤት እንስሳት ደግሞ ቀጥሎ ያለውን ደረጃ ይይዛሉ።