መንግሥቱን መደገፍ—የአምልኮ ቦታዎችን መገንባትና እርዳታ ማቅረብ

ወደ መንግሥት አዳራሻችሁ ስትገባ ሁሉ ነገር ተለዋውጧል። የመንግሥት አዳራሹን ስታየው ሁልጊዜ ኩራት ይሰማሃል። ከተወሰኑ ዓመታት በፊት አዳራሹ ሲገነባ በሥራው ስለተካፈልህ አስደሳች ትዝታዎች አሉህ። አሁን ደግሞ የመንግሥት አዳራሹ ጊዜያዊ የእርዳታ ማዕከል ሆኖ ማገልገል መቻሉን ስታይ ይበልጥ ኩራት ይሰማሃል። በአካባቢያችሁ የተከሰተው የጎርፍ መጥለቅለቅ ከፍተኛ ውድመት በማስከተሉ ቅርንጫፍ ኮሚቴው በአደጋው የተጎዱት ሰዎች ምግብ፣ ልብስ፣ ንጹሕ ውኃና ሌሎች አስፈላጊ ነገሮችን እንዲያገኙ ወዲያውኑ ዝግጅት አደረገ። በመንግሥት አዳራሹ ውስጥ የእርዳታ ቁሳቁሶች በሥርዓት ተደርድረዋል። ወንድሞችና እህቶች ወደ አዳራሹ እየመጡ የሚያስፈልጓቸውን ነገሮች እየወሰዱ ነው፤ የብዙዎቹ ዓይን የደስታ እንባ አቅርሯል።

ኢየሱስ፣ ተከታዮቹን ለይቶ የሚያሳውቃቸው ጉልህ ምልክት አንዳቸው ለሌላው ያላቸው ፍቅር እንደሆነ ተናግሯል። (ዮሐ. 13:34, 35) በዚህ ክፍል ውስጥ፣ የይሖዋ ምሥክሮች የአምልኮ ቦታዎች በመገንባትና አደጋ ለደረሰባቸው እርዳታ በመስጠት ክርስቲያናዊ ፍቅር ያሳዩት እንዴት እንደሆነ እንመረምራለን። እንዲህ ያለው ፍቅር በኢየሱስ መንግሥት አገዛዝ ሥር እንደምንኖር የሚያሳይ ጠንካራ ማስረጃ ነው።