በእርግጥ ሰይጣን አለ?

አንተስ በዚህ ሐሳብ ትስማማለህ? ቀጥሎ ከተዘረዘሩት ሐሳቦች መካከል ትክክል እንደሆነ የሚሰማህ የቱ ነው?

• ሰይጣን በእውን ያለ ነገር አይደለም፤ ከዚህ ይልቅ የክፋት ባሕርይ ነው።

• ሰይጣን አለ፤ ይሁንና በሰዎች ጉዳይ ጣልቃ የመግባት ፍላጎት የለውም።

• ሰይጣን በሰው ልጆች ላይ ከፍተኛ ተጽእኖ የሚያሳድር ኃያል መንፈሳዊ ፍጡር ነው።

እነዚህ አመለካከቶች እያንዳንዳቸው በጣም ብዙ ምናልባትም በሚሊዮን የሚቆጠሩ ደጋፊዎች አሏቸው። ይሁን እንጂ ስለዚህ ጉዳይ ያለህ አመለካከት የትኛውስ ቢሆን ለውጥ ያመጣል? አዎ፣ ለምሳሌ ሰይጣን የሚባል አካል ከሌለ እሱ እንዳለ የሚያምኑ ሰዎች ተታልለዋል ማለት ነው። በሌላ በኩል ደግሞ ሰይጣን ቢኖርም በሰዎች ጉዳይ ጣልቃ የመግባት ፍላጎት ከሌለው ብዙ ሰዎች ከእሱ የሚጠነቀቁት አልፎ ተርፎም እሱን የሚፈሩት በከንቱ ነው ማለት ነው። ይሁን እንጂ ሰይጣን ሰዎችን የሚያታልል መሠሪ ፍጡር ከሆነ አብዛኞቹ ሰዎች ከሚያስቡት በላይ አደገኛ ነው።

እስቲ መጽሐፍ ቅዱስ ለሚከተሉት ጥያቄዎች የሚሰጠውን መልስ እንመርምር፦ ሰይጣን የክፋት ባሕርይ ነው? ወይስ መንፈሳዊ አካል ያለው ፍጡር? ሰይጣን መንፈሳዊ አካል ከሆነ ደግሞ ጉዳት ሊያደርስብህ ይችላል? ከሆነ ራስህን ከእሱ መጠበቅ የምትችለው እንዴት ነው?