ይሖዋን ለማገልገል ምረጡ

በእውነት ቤት ውስጥ ያደግክ ወጣት አሊያም ደግሞ የመጽሐፍ ቅዱስ ጥናት ነህ? ከሆነ የመጠመቅ ግብ አለህ? ለመሆኑ የመጠመቅ ግብ ማውጣት ያለብህ ለምንድን ነው? ራስን መወሰንና መጠመቅ ከይሖዋ ጋር ልዩ ዝምድና ለመመሥረት ያስችላል። (መዝ 91:1) እንዲሁም መዳን ያስገኛል። (1ጴጥ 3:21) ታዲያ እድገት አድርገህ እዚህ ግብ ላይ መድረስ የምትችለው እንዴት ነው?

እውነትን ማግኘትህን አረጋግጥ። ጥያቄ ሲፈጠርብህ ምርምር አድርግ። (ሮም 12:2) ማስተካከያ ማድረግ የሚያስፈልግህን አቅጣጫዎች ለይተህ እወቅ፤ እንዲሁም ይሖዋን ለማስደሰት ያለህ ፍላጎት አስፈላጊውን ማስተካከያ ለማድረግ ያነሳሳህ። (ምሳሌ 27:11፤ ኤፌ 4:23, 24) እርዳታ ለማግኘት ምንጊዜም ወደ ይሖዋ ጸልይ። ይሖዋ ኃያል በሆነው ቅዱስ መንፈሱ ተጠቅሞ እንደሚያጠነክርህና እንደሚደግፍህ እርግጠኛ ሁን። (1ጴጥ 5:10, 11) ይሖዋን ማገልገል ከሁሉ የተሻለ የሕይወት ጎዳና ነው። በመሆኑም እዚህ ግብ ላይ ለመድረስ ስትል የምታደርገው ጥረት መቼም ቢሆን አያስቆጭህም!—መዝ 16:11

ወደ ጥምቀት የሚያደርሰው መንገድ የሚለውን ቪዲዮ ተመልከት፤ ከዚያም የሚከተሉትን ጥያቄዎች ለመመለስ ሞክር፦

አንዳንዶች ለመጠመቅ ሲሉ የትኞቹን እንቅፋቶች መወጣት አስፈልጓቸዋል?
ራስህን ለይሖዋ ለመወሰን የሚያነሳሳ እምነት ለማዳበር ምን ሊረዳህ ይችላል?
አንዳንዶች ወደ ጥምቀት የሚያደርሱትን እርምጃዎች ለመውሰድ ያነሳሳቸው ምንድን ነው?
ይሖዋን ለማገልገል የሚመርጡ ሰዎች ምን በረከት ያገኛሉ?
ራስን ወስኖ መጠመቅ ምን ትርጉም አለው?

በጥምቀት ንግግሩ መደምደሚያ ላይ ተናጋሪው የጥምቀት ዕጩዎቹ ከተቀመጡበት እንዲነሱና ለሚከተሉት ሁለት ጥያቄዎች ድምፃቸውን ከፍ አድርገው መልስ እንዲሰጡ ይጠይቃቸዋል፦

ከኃጢአታችሁ ንስሐ በመግባት፣ ራሳችሁን ለይሖዋ በመወሰንና ይሖዋ በኢየሱስ ክርስቶስ በኩል ያደረገውን የመዳን ዝግጅት በመቀበል ለመጠመቅ ዝግጁ ሆናችኋል?

መጠመቃችሁ በይሖዋ ድርጅት ውስጥ ከታቀፉት የይሖዋ ምሥክሮች እንደ አንዱ እንደሚያስቆጥራችሁ ተገንዝባችኋል?

የጥምቀት ዕጩዎቹ ለእነዚህ ጥያቄዎች ‘አዎ’ የሚል መልስ መስጠታቸው በቤዛው ላይ እምነት እንዳላቸው የሚያሳይ ከመሆኑም ሌላ ራሳቸውን ሙሉ በሙሉ ለይሖዋ መወሰናቸውን ‘በይፋ የሚናገሩበት’ አጋጣሚ ይሰጣቸዋል።—ሮም 10:9, 10