የይሖዋ ምሥክሮች ልጆቻቸው የእነሱን ሃይማኖት እንዲከተሉ ያስገድዳሉ?

አያስገድዱም፤ ምክንያቱም አምልኮ የግል ውሳኔ ነው። (ሮም 14:12) የይሖዋ ምሥክሮች ለልጆቻቸው የመጽሐፍ ቅዱስን መመሪያዎች ያስተምሯቸዋል፤ ሆኖም ልጆቹ ሲያድጉ የይሖዋ ምሥክር ለመሆን ወይም ላለመሆን መምረጥ ይኖርባቸዋል።—ሮም 12:2፤ ገላትያ 6:5

እንደ ማንኛውም ወላጅ ሁሉ የይሖዋ ምሥክሮችም ልጆቻቸው ጥሩ ሕይወት እንዲመሩ ይፈልጋሉ። በመሆኑም ለልጆቻቸው ይጠቅማል ብለው የሚያስቡትን ነገር በሙሉ ያስተምሯቸዋል፤ ከእነዚህም መካከል ጠቃሚ ክህሎቶች፣ የሥነ ምግባር እሴቶችና ሃይማኖታዊ ትምህርቶች ይገኙበታል። የይሖዋ ምሥክሮች መጽሐፍ ቅዱስ ከሁሉ የተሻለውን ሕይወት እንድንመራ እንደሚረዳን ያምናሉ፤ ስለዚህ ለልጆቻቸው መጽሐፍ ቅዱስን በማስተማር እንዲሁም አብረው ክርስቲያናዊ ስብሰባዎች ላይ በመገኘት የመጽሐፍ ቅዱስን ምክሮች በልጆቻቸው ልብ ውስጥ ለመቅረጽ ጥረት ያደርጋሉ። (ዘዳግም 6:6, 7) ከዚያም እያንዳንዱ ልጅ እያደገ ሲሄድ የወላጆቹን እምነት ለመከተል ወይም ላለመከተል የራሱን ውሳኔ ማድረግ ይችላል።

የይሖዋ ምሥክሮች ጨቅላ ሕፃናትን ያጠምቃሉ?

በፍጹም። መጽሐፍ ቅዱስ የጨቅላ ሕፃናትን ጥምቀት አይደግፍም። ለምሳሌ በመጀመሪያው መቶ ዘመን የነበሩ ክርስቲያኖች የተጠመቁት የአምላክን ቃል ሰምተው ‘በደስታ ከተቀበሉና’ ንስሐ ከገቡ በኋላ እንደሆነ ይናገራል። (የሐዋርያት ሥራ 2:14, 22, 38, 41) ከዚህ መረዳት እንደሚቻለው አንድ ሰው ከመጠመቁ በፊት የመጽሐፍ ቅዱስን ትምህርት መረዳት፣ ማመንና በመጽሐፍ ቅዱስ ትምህርቶች መሠረት ሕይወቱን ለመምራት መወሰን ይኖርበታል። ጨቅላ ሕፃናት ደግሞ እንዲህ ማድረግ እንደማይችሉ ግልጽ ነው።

ልጆች ካደጉ በኋላ ለመጠመቅ ሊወስኑ ይችላሉ። ሆኖም ይህን ለማድረግ ስለ ውሳኔያቸው ክብደት አስቀድመው ሊያስቡበት ይገባል።

የይሖዋ ምሥክሮች ልጆቻቸው ላለመጠመቅ ከወሰኑ ያገልሏቸዋል?

አያገልሏቸውም። የይሖዋ ምሥክር ወላጆች ልጆቻቸው እምነታቸውን ላለመቀበል ሲወስኑ ያዝናሉ፤ ሆኖም ልጆቻቸውን ይወዷቸዋል እንዲሁም የይሖዋ ምሥክር ላለመሆን ስለወሰኑ ብቻ ከልጆቻቸው ጋር ያላቸውን ግንኙነት አያቋርጡም።

አንድ ልጅ ውኃ ውስጥ ሲጠመቅ። — በየትኛውም ዕድሜ ላይ የሚገኝ ሰው ከጥምቀት ጋር በተያያዘ የራሱን ውሳኔ የማድረግ ኃላፊነት አለበት

የይሖዋ ምሥክሮች ሲሰብኩ ልጆቻቸውን ይዘው የሚሄዱት ለምንድን ነው?

ከልጆቻችን ጋር አብረን ለመስበክ የሚያነሳሱን የተለያዩ ምክንያቶች አሉ።a

ወላጆች ለልጆቻቸው መንፈሳዊ ትምህርት መስጠትና አምላክን እንዲያመልኩ ማሠልጠን እንዳለባቸው መጽሐፍ ቅዱስ ይናገራል። (ኤፌሶን 6:4) አምልኮ እምነትን በይፋ መናገርን ስለሚጨምር ለልጆች የሚሰጠው መንፈሳዊ ሥልጠና ስብከትንም ያካትታል።—ሮም 10:9, 10፤ ዕብራውያን 13:15
መጽሐፍ ቅዱስ ልጆች የአምላክን ‘ስም እንዲያወድሱ’ ያበረታታል። (መዝሙር 148:12, 13) አምላክን ማወደስ የሚቻልበት ዋነኛ መንገድ ደግሞ ስለ እሱ ለሌሎች መናገር ነው።b
ልጆች ከወላጆቻቸው ጋር መስበካቸው ሌሎች ጥቅሞችም ያስገኝላቸዋል። ለምሳሌ ከተለያዩ ሰዎች ጋር የመግባባት ችሎታን እንዲሁም እንደ ርኅራኄ፣ ደግነት፣ አክብሮት እና የሌሎችን ጥቅም ማስቀደም ያሉ መልካም ባሕርያትን ለማዳበር ይረዳቸዋል። በተጨማሪም ለእምነታቸው መሠረት የሆኑትን መጽሐፍ ቅዱሳዊ ማስረጃዎች በደንብ ለማወቅ ያስችላቸዋል።

የይሖዋ ምሥክሮች በዓላትን ያከብራሉ?

የይሖዋ ምሥክሮች በሃይማኖታዊ በዓላት እንዲሁም አምላክን በሚያሳዝኑ ሌሎች ዝግጅቶች አይካፈሉም።c (2 ቆሮንቶስ 6:14-17፤ ኤፌሶን 5:10) ለምሳሌ እንደ ልደትና ገና ያሉትን በዓላት አናከብርም፤ ምክንያቱም የእነዚህ በዓላት ምንጭ ክርስቲያናዊ አይደለም።

ያም ቢሆን ከቤተሰቦቻችን ጋር ጊዜ ማሳለፍና ለልጆቻችን ስጦታ መስጠት ያስደስተናል። ከቤተሰብ ጋር ለመገናኘትና ስጦታ ለመለዋወጥ የበዓል ቀን ከመጠበቅ ይልቅ በዓመት ውስጥ በተለያዩ ወቅቶች ከወዳጆቻችን ጋር ጊዜ እናሳልፋለን እንዲሁም ስጦታ እንለዋወጣለን።

አባትና እናት ለልጆቻቸው ስጦታ ሲሰጡ። — ክርስቲያን ወላጆች ለልጆቻቸው ስጦታ መስጠት ያስደስታቸዋል

በይሖዋ ምሥክር ቤተሰብ ውስጥ ያደጉ ልጆች ምን ይላሉ?

“ለሌሎች መስበኬ የተለየ እምነት ያላቸውንና እኔን የማያከብሩኝን ሰዎች ጨምሮ ለሁሉም ሰዎች አክብሮት ማሳየት እንዳለብኝ አስተምሮኛል። በተጨማሪም ስንሰብክ ሰዎች ስለ ችግሮቻቸውና ስለሚያሳስቧቸው ነገሮች ይነግሩናል። ይህ ደግሞ በራሴ ላይ ብቻ ከማተኮር ይልቅ ስለ ሌሎች ስሜት እንዳስብና ለሚያስፈልጋቸው ነገር ትኩረት እንድሰጥ አስተምሮኛል።”—ታራd
“ወላጆቼ የይሖዋ ምሥክር እንድሆን አላስገደዱኝም። ምርጫው የራሴ እንደሆነ ሁልጊዜ ይነግሩኝ ነበር። እናቴን የይሖዋ ምሥክሮች ስለሚያስተምሩት ትምህርት ስጠይቃት ሁሌም ‘ምርምር አድርገሽበታል?’ ትለኝ ነበር። ስለዚህ ብዙ ጊዜ ምርምር አደርግ ነበር፤ ከጊዜ በኋላ እኔም ይህን እምነት እንደ ወላጆቼ እምነት ብቻ ሳይሆን እንደ ራሴ እምነት ልቀበለው እንደሚገባ ወሰንኩ።”—ኤሊ
“በዓል ባለማክበሬ የቀረብኝ ነገር እንዳለ ተሰምቶኝ አያውቅም። ሁልጊዜ ቅዳሜና እሁድ ከሌሎች የይሖዋ ምሥክሮች ጋር ጊዜ አሳልፍ ነበር። አብረን እንበላ፣ እንጨፍር እንዲሁም እንጫወት ነበር። አብረውኝ የሚማሩት ልጆች ከእነሱ ይልቅ የእኔ ማኅበራዊ ሕይወት እንደሚሰፋ ብዙ ጊዜ ይነግሩኝ ነበር።”—ሜሊሳ
“የገና በዓል የማናከብርበትን ምክንያት በደንብ ባውቅም አንዳንድ ጊዜ የቀረብኝ ነገር እንዳለ ይሰማኝ ነበር። ይህን ስሜት ለመቋቋም የረዳኝ ወላጆቼ ብዙ ጊዜ ጓደኞቼን እንዲሁም ዘመዶቻችንን ቤት ይጋብዙ የነበረ መሆኑ ነው። ስጦታም ይሰጡኝ ነበር።”—ሚጌል

a በጥቅሉ ሲታይ ትናንሽ ልጆች ለስብከት የሚሄዱት ከወላጆቻቸው ወይም ከሌላ ትልቅ ሰው ጋር ብቻ ነው።

b መጽሐፍ ቅዱስ ስለ እምነታቸው ለሰዎች በመናገር አምላክን ያስደሰቱ ልጆችን ታሪክ ይዟል።—2 ነገሥት 5:1-3፤ ማቴዎስ 21:15, 16፤ ሉቃስ 2:42, 46, 47

c “የይሖዋ ምሥክሮች በዓላትን የማያከብሩት ለምንድን ነው?” የሚለውን ርዕስ ተመልከት።

d አንዳንዶቹ ስሞች ተቀይረዋል።