ከውጥረት እፎይታ ማግኘት

የውጥረት መንስኤ ምንድን ነው?

ማዮ ክሊኒክ እንደገለጸው “አብዛኞቹ ሰዎች በከፍተኛ ውጥረት ውስጥ እንዳሉ ይናገራሉ። ሕይወት በአሁኑ ጊዜ በለውጦችና ባልተጠበቁ ሁኔታዎች የተሞላ ነው።” ውጥረት ከሚያስከትሉ ለውጦችና ያልተጠበቁ ሁኔታዎች መካከል የሚከተሉት ይገኙበታል፦

ፍቺ
የሚወዱትን ሰው በሞት ማጣት
ከባድ ሕመም
ድንገተኛ አደጋ
ወንጀል
በሩጫ የተሞላ ሕይወት
ሰው ሠራሽ ወይም የተፈጥሮ አደጋዎች
በትምህርት ቤት ወይም በሥራ ቦታ የሚያጋጥም ጫና
ከሥራና ከመተዳደሪያ ጋር የተያያዘ ጭንቀት

በልጅነት የሚያጋጥም ውጥረት

ልጆችም ውጥረት ሊያጋጥማቸው ይችላል። አንዳንዶች በትምህርት ቤት ጉልበተኞች ያስቸግሯቸዋል፤ ሌሎች ደግሞ ቤት ውስጥ ችላ ይባላሉ። አካላዊ፣ ስሜታዊ ወይም ፆታዊ ጥቃት የሚሰነዘርባቸው ልጆችም አሉ። ብዙ ልጆች የትምህርት ውጤትና የፈተና ጉዳይ ያስጨንቃቸዋል። አንዳንድ ልጆች ደግሞ ወላጆቻቸው በመፋታታቸው ምክንያት ቤተሰባቸው ይፈርሳል። ውጥረት ያለባቸው ልጆች ቅዠት ሊያስቸግራቸው፣ ትምህርት የመቀበል ችግር ሊኖርባቸው፣ የመንፈስ ጭንቀት ሊይዛቸው ወይም ከሰዎች ጋር መቀላቀል ሊከብዳቸው ይችላል። እንዲያውም አንዳንዶቹ ስሜታቸውን መቆጣጠር ይቸግራቸዋል። ውጥረት ያለበት ልጅ አፋጣኝ እርዳታ ያስፈልገዋል።