O Mapatayay Tamdaw Iraay ko Manan Hatokel?

1. O mapatayay tamdaw wa ngaˈay patikol maˈorip han?

O widang ni Yis ci Lacarus ato fafahiyan salikaka ningra ci Marta aci Mariya, itiniay i ngata no Yirusalim, i Pitani ko aroˈ nangra. Mapatay ci Lacarus, ikor no sepat romiˈad tahiraay ci Yis. Hakelongan ningra ci Marta aci Mariya tayra i tadem ni Lacarus. Tayraay a mitoor ko ˈalomanay tamdaw. Haratengen hena, maˈaraw ko nika palowad ni Yis ci Lacarusan i, hakowa ko kalipahak ni Marta aci Mariya hakiya!​—ˈOsien ko Yohani 11:21-24, 38-44.

Ci Marta na matengilayto ko patikolay maˈorip a ngaˈayay lihaf. Mafanaˈay to papatikolen ni Yihofa ko ˈorip no mapatayay, miliyaw maˈorip itini i fafekang no sera.​—ˈOsien ko Yopu 14:14, 15.

2. Ano mapatay ko tamdaw samaanayto hani?

Tano seraan misangaˈ ko tamdaw. (Satapangan 2:7; 3:19) Ilalomaˈ no tireng no tamdaw awaay ko saloˈafang, mansa mapatayto ko tamdaw i, awaay ko saloˈafang to miliyasay to tireng padadotoc a maˈorip. Mapatay ko tamdaw i, cowato ka dademak ko tireng, cowato ka fanaˈ miharateng ko ponoˈ. Mankora, tiya patikol a maˈorip ci Lacarus i, cowa pasowal to manan ko malifaay ningra itini kapatayan, samanen awaayto ko maamaan kafanaˈan no mapatayay tamdaw.​—ˈOsien ko ˈOlic 146:4; Patnakay 9:5, 6, 10.

Pasemseman ni Yihofa ko mapatayay tamdaw i cikok han? Cowa, samanen awaayto ko maanan kafanaˈan no mapatayay, mankora, iraay ko cikok mitodoh to tamdaw, sanay a mararaway sapasifanaˈ, tada mitonganganay to Kawas. Tano namalen a pasemsem ko tamdaw sanay a harateng, tada kaˈintehan no Kawas.​—ˈOsien ko Yirimiya 7:31.

Nengnengen ko ika Ano Mapatay ko Tamdaw Samaanayto Hani?

3. Mapatayay tamdaw ngaˈayay caciyaw i kitanan han?

Mapatayay tamdaw caayto ka pasowal, caayto ka pakatengil. (ˈOlic 115:17) Kawrira, iraay ko mariˈangay coyoh mitodong toya mapatayay, caciyaw to maˈoripay tamdaw. (2 Pitiro 2:4) Mikecengay ci Yihofa to miangangay a milicay to mapatayay tamdaw.​—ˈOsien ko Limoˈot 18:10, 11.

4. Cima ko papatikol a maˈorip hani?

Pinaay walwalan a mapatayay tamdaw, o papatikol a maˈorip itini i sera. Ano oyato ˈayaw no patay caayho ka fanaˈ to Kawas, mangalefay midemakay to tatiihay a tamdaw, o papatikol a maˈorip.​—ˈOsien ko Luka 23:43; Dmak 24:15.

O patikolay maˈorip a tamdaw, ngangaˈay minanam to kimad no Kawas, ngaˈayayho patalahkal to nika pakasoˈlin ci Yisan, makahi a mihakelong cingranan. (Paˈarawan 20:11-13) Ano midemak cangra to ngaˈayay a demak i, wa mahemek cangra a maˈorip i fafekang no sera tahadaˈoc.​—ˈOsien ko Yohani 5:28, 29.

5. Pakayni ci Yihofaan, patikolay maˈorip a tokel pasowalay kitanan to maanan?

O mapatayay tamdaw saka ira ko hatokel a patikol a maˈorip, samanen ocoran ni Yihofa ko Wawa Ningra mapatay saki kitanan, mikitini tonini patikolay maˈorip a tokel mahapinangay ita ko sidaˈit ni Yihofa, soˈlinay maolah kitanan. Ano patikolto maˈorip ko mapatayay tamdaw i, cima ko saˈayaway a lalitemohen iso hani?​—ˈOsien ko Yohani 3:16; Loma 6:23.