Mafanaˈay Kiso Han?

Ya malaliˈacaay i fangcalay sefi a tamdaw, o “mitakaway” hananay ni Yis, matatodongay kora han?

MATILIDAY i Matay: “Nanoya, micomod ci Yis i Pitaˈongan [fangcalay sefi]. Fahfahen ningra a pasadak nai Pitaˈongan ko malaliˈacaay a tamdamdaw. Warwaren ningra ko cokowi no mafafalifalicay to payso a tamdaw ato ˈanengang no pacakayay to topi. Pasowal sa cingra i cangraan, “O pitolonan ko lomaˈ Ako saan ko sowal a matilid i Fangcalay Cudad. ˈArawhani kaladihif han namo konini a lomaˈ a palapilimekan no mitakaway,” han ningra.​—Matay 21:12, 13.

Matiliday i likisi no Yutaya, nolitengan a malaliˈacaay a tamdaw patelas sanay misaˈakawang to ˈaca no dafong a miˈafas to payci no finawlan. Patinakoen, isaka 1 hahekalan, o ˈaca no tosa a sapatoˈaya a topi, maedeng o lifon no mawmahay to 25 a raromiˈadan sanay. O sowal no Rikec ni Mosi, o manikaway tamdaw ngaˈayay o topi ko sapatoˈaya sanay, ˈarawhan hatini ko nika ˈakawang ko ˈaca no topi, cowa ko papakafilo miˈaca ko manikaway tamdaw. (Lifi 1:14; 5:7; 12:6-8) Ci Simiyong, wawa ni Kamalil ya misasingsiay no Yutaya, tada maketeray pakayni toninian, hato milowanan ko papatoˈayaen no finawlan, telocto i, tangsolay talaeno ko ˈaca no topi, kaemedayto ko ˈaca.

Maˈaraway ita itini, oya malaliˈacaay tamdaw i fangcalay sefi tada miˈafasay to payci no finawlan, tada maˈanofay, mankora o “mitakaway” han ni Yis cangra.