Mafanaˈay Kiso Han?

Misamaanay hano rikecen ni Yis ko miketonay to sowal a demak no Yutaya tamdaw?

SARIKEC ni Mosi, itini kalo a pakayraan miketon to sowal ko tamdaw o matatodongay. Kawra, itini lintad ni Yis, marariday maˈaraw ko miketonay to sowal a demak, o roma tamdaw sahetoay o miketonay ko sowal. O hatiniay awaay ko kapo a demak, hongaˈay pakasoˈlinen ko sowal no niyah, sanay. Kina tosaay ci Yis a mirikec to hatiniay a demak. Pasifanaˈ cingra to tamdaw: “Ano hai i, ‘Hai’ han. Ano caay i, ‘Caay’ han ko sowal namo.”​—Matay 5:33-37; 23:16-22.

O Citing no Yutaya maˈoningay i Tamote ngaˈayay mahapinang, “maceriday ko Yutaya tamdaw miketon to sowal a misawacay to sowal noniyah”. O Tamote mitoroˈ to o manan ko ciepocay a miketonan a sowal, o manan ko awaay ko epoc.

Cowa ko ci Yis aca, o roma tamdaw mirikecay to patelasay miketon to sowal. Tinakoen, micekiway to likisi no Yutaya ci Yosifos, sanay ko sowal: “Cowa piketon to sowal cangra, harateng nangra miketon to sowal mikikakaay ko tatiih to makaniway a pisawacay. Sapakasoˈlinaw no tamdaw miketon to sowal i Kawas ano saan, mahecaday o cirarawayto koniya tamdaw.” O roma, Citanengay cudad no Yutaya (23:11) sanay, soˈlin micerid ko tamdaw miketon to sowal, cowa ko makoracay cingra. Mihaenay, mirikecay ci Yis to patelasay miketon to sowal. Ano soˈliˈlin ko sowal ita, hamaan miketon to sowal a misawacay to soˈlinay ko sowal no niyah.