O Siniˈadaay ko Falocoˈ a Tamdaw, O Mamalemed

O SAPATOˈAYA kalimelaan no matatodongay a pidoko. Iti:yaay a Israil tamdaw patoˈayaay to pinaˈorip, o Krisciyang miceriday tano “pahemek to Kawas to todong no sapatoˈaya.” Wa ngaˈay kita patoˈaya to roma dafong, pakahemek to Kawas. (Hipray 13:15, 16) Mihaen ko demak ita, wa milifok to hemek ato lemed, dotoc nengnengen ita ko taˈarawan no roma tamdaw.

Halafinay ci Hana madimadi mihodop to Kawas, makalimay saka ciwawaaw, kawra maˈasicay cingra. Miketonay to falocoˈ a mitolon ci Yihofaan, ano mahofoc to cecay faˈinayan wawa, “pacakaten ako i Tisowanan kora wawa a tahatolas no ˈorip ningra.” (1 Samuil 1:10, 11) Ikor mapoyapoyay ci Hana, mahofoc to faˈinayan wawa, panganganan ci Samuil. Misawadto a micoco, mitooran ni Hana ko miketonan a falocoˈ, miˈorong to wawa tayra fangcalay pakopangan, paihekal ci Hana to kinafalahay harateng, palemedan ni Yihofa cingra, mahofocayho to lalima a wawa, malo pairasolay ato mitiliday to Fangcalay Cudad ci Samuil.—1 Samuil 2:21.

Anini, mitodongan no Krisciyang ci Hana aci Samuil, hakelong no ˈorip dademak saki misangaˈay a Tatapangan. Mikiˈokay ci Yis, kinafalah kita pakayni pihodop to Kawas, papafelien ni Yihofa kita to kadofahay a sapalemed.—Marko 10:28-30.

Isaka 1 hahekalan, cecay fafahiyan Krisciyang ci Torkas, misadakay to niyah dademak i tamdaw, kafanaˈan no tamdaw to “maolah paladaˈ.” Ikor, “mapatay cingra tona adada,” mararomay ko kasakopang. Matengil no itiraay Krisciyang to ingataay niyaroˈ ci Pitiro, macalohay mitahidang ci Pitiroan. Haratengen hena, tiya patikoren ni Pitiro paˈorip ci Torkas, tada lipahakay ko salikaka! Sakina cecay masowal no Fangcalay Cudad to paˈoripay ko tarokos to tamdaw. (Dmak 9:36-41) Cowa kapawan ni Yihofa ko nano demak ni Torkas. (Hipray 6:10) Maˈoning no Fangcalay Cudad ko hinapaladaˈay a demak ningra, wa ngaˈay kita minanam to taˈarawan ningra.

Itini i pipasadak to toki ato ˈicel, tarokos ci Pawlo patirengay to ngaˈayay taˈarawan. Sapatikami ningra to Korintoay Krisciyang pasowalay: “O romasato, caay ka limela kako to tireng ako a kinafalah to saki tamowanan.” (2 Korinto 12:15) Mikitini malifetay no niyah mafanaˈay ci Pawlo, pakayni saka ciepoc no tao kinafalah to epoc no niyah, cowa ko sakarenec aca no tamdaw, sakakaay i, wa milifok to sapalemed ato hahemek ni Yihofa.—Dmak 20:24, 35.

Saka dademaken ita ko toki ato ˈicel no niyah dademak i Hongti Kitakit, halo padama to salikaka, o papakahemek to falocoˈ no Kawas. Cowa konini aca, wa ngaˈayho itini i roma pakayraan a midama to mitosilay demak. Cowa ko karoray aca paihekal to olah, ngaˈayho kita pakayni mikifalocoˈay pakiyaho a paˈodingar to Kawas. Oniya kiyaho sapidama to mitosilay demak i polong no hekal, mahawpay ko pidama to milakowitay to riyar ato mikiriwiˈay misakafahay. O roma, adihayay demak misaaliay to kifalocoˈay kiyaho ngaˈ padadotoc, misangaˈ ato mihongyak to cudad, ika, midama to taha padesay a demak, patireng to faelohay Hongti Kitakit kasaˈopoan. Wa ngaˈay pakasoˈlin kita “o siniˈadaay ko falocoˈ a tamdaw, o mamalemed.” Pasadak kita to kalimelaan a hafay, o paˈodingaray ci Yihofaan.—Taneng 3:9; 22:9.

Pakayraan Pakiyaho Midama To Mitosilay Demak I Polong No Hekal

Romiˈad ni Pawlo, misadakay to payci ko Krisciyang sapakiyaho. Anini, mihaenay ko demak no ˈalomanay tamdaw, miparoan nangra ko kiyaho i “Kiyaho no Mitosilay Demak i Polong no Hekal” a hako. (1 Korinto 16:2) Cecay folad kinacecayay, palakatan no kasakopang ko kiyaho tayra i fenpo no Misawacayay Tamdaw ni Yihofa. O roma, wa ngaˈay kiso pakiyaho i kasacefang no Misawacayay Tamdaw ni Yihofa. O ngangan no misaka dademakan no Misawacayay Tamdaw a kasacefang, ngaˈayay rinnaken ko fenpo www.jw.org a wangcan, iraay ko ciwsiw no cecacecay a fenpo. Ira ko hapakayraan no pakiyaho i laenoay:

NIYAHAN HARATENG A PAKIYAHO

Tano Tikowanka, Sinyongka, pilinah i Kingko a kiyaho. Roma fenpo, ngaˈayay i jw.org a wangcan pakiyaho.
Tano payci, odoˈ anca pasangaray dafong. Tiliden o niyahan harateng a pakiyaho, cowato ko papatikolen.

O PAPATIKOLENHO A KIYAHO

Ngaˈayay patikolen a pakiyaho to payci, ano misaali ko pakiyahoay tamdaw, ngaˈayay patikolen.
Tiliden to papatikolen koniya kiyaho.

MASAKENAAY LIMASMAS A KIYAHO

Cowa ko payci aca ato dafong ko pakiyahoen, iraay ko roma pakayraan pakiyaho. Ano papakiyaho kiso, licayen ko fenpo. Samanen cowa kalecad ko sarikec a pasata, ˈayaw no pakiyaho, malalengo to mafanaˈay to rikec a tamdaw.

Pawsiyen ato Malitengto Misawad a Matayal Malayapay a Payci: Mamicada tora pawsiyen patodongen ko Misawacayay Tamdaw ni Yihofa.

Pisopedan to Payci a Tilid: Tooren ko saˈosi no kingko, saˈosien ko Misawacayay Tamdaw ni Yihofa malo patorodan, anca mapatay ko miciwkingay, o Misawacayay Tamdaw ni Yihofa ko micada to misopedan a payci.

Kopiyaw ato Sayking: Pakiyahoen ko kopiyaw ato sayking i Misawacayay Tamdaw ni Yihofa, cowa ko papatikoren a kiyaho tiliden ano mapatayto i pakiyahoen.

Tingki no Lomaˈ ato Sera: Cowa ko papatikolen a pakiyaho to Misawacayay Tamdaw ni Yihofa. Ano mikilomaˈan no pakiyahoay, ngaˈayay tilidan, tahira kapatayan mikilomaˈ ko pakiyahoay.

Paikoray ato Patorodan: Pakaynien matatodongay i rikec a paikoran, misaˈosi to Misawacayay Tamdaw ni Yihofa ko mamicada to hafay, ngaˈayay patoroden ko kasacefang tamdaw. Mihaen wa maˈesal ko sapasata.

O masakenaay a pakayraan pakiyaho, salakaten no pakiyahoay a mihalaka. Ano sapakiyahoaw kiso midama to mitosilay demak no Misawacayay Tamdaw ni Yihofa, ngaˈayay nengnengen kono Padaka ato Sipanya a cudad, Samaan Mihalaka Pakiyaho Midama to Mitosilay Demak i Polong no Hekal. Ano anini anca ikorto pakiyaho, anca ikor no mapatay, ngaˈayay saka dademaken ko masakenaay pakayraan a pakiyaho. Samanen cowa kalecad ko saˈosi no rikec a pasata, o lalakaw noni cudad cowa ka tatodong tisowanan halatek. Mahaen o fafekangay pakayraan, ngaˈayay ko tamdaw pakiyaho a midama to pasifanaˈto Fangcalay Cudad a demak ato padama to taha padesay a demak, hanaca maˈesal ko sapasata. Kitiraan iso ano iraay koniya cudad, ngaˈayay saalian ko mitatiliday no kasakopang.

O masongilaˈay a lalakaw no pakiyahoay, tayra jw.org wangcan, keniˈen ko “Pakiyaho Midama to Mitosilay Demak i Polong no Hekal” ngaˈayay rinnaken ko fenpo.