Mafanaˈay Kiso Han?

O safalod no Rikec ni Mosi, ngaˈayay sapisaysay to pakayniay i holic a lacongis no iti:yaay a Israil tamdaw han?

HAY, safalod no Rikec ni Mosi ngaˈayay sapisaysay to pakayniay i holic a lacongis. Nengnengen ko cecay tinakoan. Limoˈot 24:14, 15 sanay ko sowal: “Ano o pakosiya ko misakoliay i tisowanan, ano o finacadanto no tireng, ano eca o pacarcaray a maroˈ i cecay a niyaroˈ namo i, aka pisafanaˈ kiso i cingraan . . . o paparatohen ningra [ci Yihofa] to tatiihay a demak iso, ano hatira i, o mararaway kiso.”

O cecay matiliday a sapakokot tilid, isaka 7 hahekalan to ˈayaw ni Yis, mahelaay no tamdaw i ngata no Astot. Itiniay i pecih no koreng a tiliden, o pakayniay to cecay maomahay tamdaw, cowa ka paroceken ningra micoloˈ ko panay. Sanay kora sapakokot: “Kako, o pakokotay tamdaw, ˈayaw no pina romiˈad, maherek a palisopsop to panay i, wawa ni Sopay ci Hosayahu tayniay i takowanan, mialaan ningra ko kafafang ako . . . O cafacafay ako a mipanay a tamdaw ngaˈay a misawacay . . . Soˈlinay ko sowal ako. Cowa ka raraw kako . . . ano awaay ko ˈinorong ningra patikol to kafafang, ano sa kiso tapang, siniˈadaenho kako, papipatikolen cingra i takowanan! Awaayto ko rikoˈ no mako, pasowalenho cingra.”

O misalikisiay a tamdaw ci Simon Samah, somowalay pakayni toni sapakokot, “pasifanaˈay to tamdaw, misaˈicelay koni maomahay misaali to sapatikolaw tora kafafang ningra, oniya maomahay cipinangay to kihecod a sarikec no Fangcalay Cudad, itiniay i Lifi ato Limoˈot pakayni to sasamaanen a micada ko manikaway a tamdaw.”