Mafanaˈay Kiso Han?

Nolitengan Mitoˈtoˈan a Fakeloh Samanay Misawacay to Matatodongay ko Fangcalay Cudad?

IRAAY ko cecay matoˈtoˈay a fakeloh mitelian i Yirusalim a pala no Fangcalay Cudad a Pookawan, o mihecaan madeng itiniay ˈayaw no Kongyin 700-600 miheca. Oniya matoˈtoˈay fakeloh itiniay ngata no Israil Hipolon a patademan mahela, matiliday i fafekang: “Nanay o wawa ni Haciyapo ci Haciyafo micada to saˈekak ni Yawi Sapaawte.” Oniya fakeloh hano ngaˈay misawacay to matatodongay ko Fangcalay Cudad hani? I fafekang no fakeloh matiliday ko mitaypiyaway to “Yihofa” anca “Yawi” no Hipray a tilid (No Padaka tilid YHWH), mitadtaday koni o ngangan no Kawas itini lintad no Fangcalay Cudad o kafanaˈan no tamdaw, hanaca marariday saka dademaken no tamdaw i kaˈorip. Soˈlinay i, itini patademan iraayho ko roma matoˈtoˈay a fakeloh. Paihkalay koniya fakeloh, iraay ko tamdaw milimekay i patademan, marariday cangra mitoˈtoˈ to ngangan no Kawas ato mahawpay ko ngangan no Kawas a ngangan no tamdaw, mitoˈtoˈ itini cafeng no patademan.

Pakayni toniya mitoˈtoˈan fakeloh, o singsi no Coceya Picodadan ci Lowiciw Napoesi sanay: “O YHWH a ngangan marariday masadak, kalimlaan ko tatodong nonini . . . oniya sinael ato mitoˈtoˈan a fakeloh paihkalay, itini kaˈorip no Israil ato Yutiya tamdaw, oniya YHWH tada kalimlaan.” Itini Fangcalay Cudad, oniya YHWH a Hipray tilid kina pinaay caˈol a masadak, malacecayay to nanaman no itiyaay a tamdaw konini. Hanaca, o pitilid no kalo tamdaw to ngangan marariday mahawp ko ngangan no Kawas. O ngangan no tamdaw itiya mahawpay ko ngangan no Kawas.

Fafekang no fakeloh o tatodong no “Yawi Sapateaw” i, “kakeridan no sofitay i kakarayan ci Yihofa.” Itini lintad no Fangcalay Cudad cowa ko kararid aca masowal no tamdaw ko ngangan no Kawas, misaka dademakayho to “kakeridan no sofitay i kakarayan ci Yihofa” sanay a sowal. Mihaenay, marariday masadak i Fangcalay Cudad ko “kakeridan no sofitay i kakarayan ci Yihofa,” sanay a sowal, malacecayay to nanaman no tamdaw itiya. Itini Hipray a cudad, o hatiniay a sowal mataˈlifay ko 250 a masadak, itiniay i Isaya, Yirimiya ato Cikariya a cudad.