Salicay no Miˈosiay

Mikitini i sapicawmaˈ to widang a wangcan mikilim to hararamod a tamdaw, o Misawacayay Tamdaw ni Yihofa sasamaan minengneng toniya demak?

Tokel ni Yihofa ira ko lipahak no mararamoday, hakelong no kaˈorip malacafay, caka lalicinowas. (Matay 19:4-6) Ano makalimay kiso ciraramod, samaan ko demak ngaˈ mahela ko matatodongay a cafay hani? O misangaˈan ni Yihofa kita, mafanaˈay Cingra samaan ko demak ita ngaˈ ira ko lipahakay a raramod. Mihaenay, ano tooren iso ko sapafeli Ningra kitaanan a safalod midemak, wa ngaˈay ko minaroˈan. Dotoc nengnengen ita ko pina safalod.

Salakat, mafanaˈ kita ‘ikaka no kalo maamaan ko pisamangah no falocoˈ no tamdaw, haratengay sanay midemak.’ (Yirimiya 17:9) O cecay tamdaw ano sapikilimaw to hararamod, kalikiay mihadak to adihayay a olah i cecay tamdaw alatek, awaay ko pakayraan citaneng ko misaˈosian. Ano pakayni ka caloh no tamdaw a misaˈosi ciraramod, tatiihay ko teloc. (Taneng 28:26) Mihaenay o citanengay a pakayraan i, satapang aca tatosa aka tangsol somowal to maolahay a sowal, aka itini ˈayaw no cipinang tora tamdaw mikiˈokto maolahay cingranan.

Taneng 22:3 sanay ko sowal: ‘O citanengay tamdaw maˈaraw ko katalawan tangsol miliyas, o maapaay a tamdaw tayra a miraod toya pades.’ Mikitini sapicawmaˈ to widang a wangcan mikilim to hararamod a tamdaw iraay ko manan a katalawan hani? O roma tamdaw itini wangcan makakaolah to kafahalan a tamdaw, telocto malipalaway ko olah. Roma i, o misamangahay a tamdaw tano makaniway a pisopedan to payci a tilid mitakaw to payci. Latekay oniya misamangahay a tamdaw o Misawacayay Tamdaw ni Yihofa ko niyah sanay ko sowal.

Haratengen ko roma katalawan. O roma sapicawmaˈ to widang a wangcan patadoay mifolfol to hakowaay ko katatodong no tatosaay tamdaw. Kawra, awaay ko wacay paihkalay to soˈlinay a ngaˈay koniya pakayraan. Roma i, itini mararamoday kalimlaan a demak mitadiˈec to mitilidan no tamdaw a pakayraan, soˈlinay o citanengay han? O hatiniay pisaˈosi wa samaan pakalini to safalod no Fangcalay Cudad hani?—Taneng 1:7; 3:5-7.

Itini Taneng 14:15 mihadakay to roma a safalod, sanay ko sinael: “O maapaay a tamdaw i, pasoˈlin to maamaan a demak a maemin, o citangalay a tamdaw i, minaˈon to rarakaten ningra a lalan.” Ihkal ko kacipinang ita to cecay tamdaw, ngaˈ mafanaˈ to matatodongay a hararamod hokira. Kawra, itini wangcan sapicalepaw a mafanaˈ to cecay tamdaw cowa ko madoloay. Soˈlin mafanaˈay kamo to lalakaw nora tamdaw, adihay ko mipalakan a toki itini wangcan macacawmaˈ, kawra soˈlinay kiso a cipinang to samanay tamdaw cingra han? Harateng no roma tamdaw mahelaayto no niyah ko soˈlinay a olah sanay, kawra soˈlinto malalitemoh taˈangayay ko katoled.

Sowal no mitiliday to ˈOlic sanay: ‘Caay picawmaˈ kako to misamangahay tamdaw, caay pikapot to misakaniway tamdaw.’ (ˈOlic 26:4) ˈAlomanay tamdaw sapisakapahaw to niyah, misakaniway i sakaciramod a lalakaw, matatodongay mihaen sanay cangra. Padetengay cangra mihimed to dangoc no niyah, mihaenay itini aca i wangcan masasowal cato ka hapinang ko soˈlinay a waywayan nangra. Sowal no roma tamdaw o Misawacayay Tamdaw ni Yihofa ko niyah sanay, kawra maharekayto cangra micada to paputisem han? O matenesay a Krisciyang cangra han? Itini kasakopang o kangodoan no tamdaw han? Anca tatiihay ko pifiyor nangra to kasakopang a tamdaw, anca ‘o tatiihay cawmaˈen a widang’ hokira? (1 Korinto 15:33; 2 Timoti 2:20, 21) Tooren ko palinian no Fangcalay Cudad, iraay ko pasalat nangra ciraramod han? Kalimlaan koniya salicay, kawra ano awa ko sadama no mafanaˈay cangranan a salikaka, wa pasangar kiso mafanaˈ to soˈlinay a demak. (Taneng 15:22) Roma i, o madimadiay ci Yihofaan a tamdaw ‘cowa ka tatodong malacafay to caay pihakelong a tamdaw,’ mihaenay cowa ko caciharateng malacafay cangranan ‘micaˈdong to taloˈodan.’—2 Korinto 6:14; 1 Korinto 7:39.

Itini sapicawmaˈ to widang a wangcan mikilim to hararamod adihayay ko katalawan. Sapikilimaw to matatodongay a ramod, iraay ko ngaˈayay pakayraan. Wa icowa a kitiraan kiso mafanaˈ to hatodong, makilim ko sapicowataw to olah a tamdaw hani? Ano cowa ka keceng ko picawmaˈan a saˈopo, o Misawacayay Tamdaw ni Yihofa wa ngaˈay itini saˈopo, taykay ato roma kasaˈopoan a masasoˈaraw to roma tamdaw, mafanaˈ to faelohay a widang.

Ano cowa ka ngaˈay misikay to saˈopo, wa itini kita i wangcan mirienang to saˈopo no kasakopang, tinakoen itini 2019 miheca kalifongan a tatokian mihaenay ko demak. Toniya kitiraan, iraay ko toki iso mafanaˈ to cowaho ka ciramod a salikaka, minengneng to waywayan nangra i saˈopo, mitengil to sapacaˈof nangra. (1 Timoti 6:11, 12) Roma i, wa ngaˈay kiso maharek ko saˈopo malalengo ko kasakapot padadotoc a masasowal. Ano masasowal ko salikaka i wangcan i, ngaˈayay hapinangen iso ko kaolahan a tamdaw samanay macacawmaˈ to roma tamdaw, mikitini mihapinang to soˈlinay a waywayan ato capeling ningra. (1 Pitiro 3:4) Ano malingadto ko kafanaˈ tatosa, wa ngaˈayto kiso mihapinang to patosokan ato pinengneng namo tatosa to demak malecaday hokira, ato soˈlinay ngaˈay malacafay hokira.

Caho ka ciramod a tamdaw tano matatodongay a safalod no Fangcalay Cudad a pakayraan mikilim to haramod, wa mahela ko matatodongay a haramod a tamdaw, ira ko lipahakay a raramod. Wa matinako nangra ko sowal no Taneng o matatodongay: ‘Mahelaay ko citanengay a fafahi (ngaˈayay faˈinay) han? O mahelaayto ningra ko sapalemed, malifokto ko sidaˈit ni Yihofa.’—Taneng 18:22.