Mafanaˈay Kiso Han?
Itini kitiraan nolitengan no Papilon, mahelaay ko lingka ato sapisangaˈ to lingka a pakayraan, samaanay midama to maˈoningay no Fangcalay Cudad hani?
ITINI kitiraan nolitengan no Papilon, makorkoray no mikingkiway to nolitengan ko adihayay sapatireng to lowil no niyaroˈ a lingka. Mikingkiway to nolitengan ci Lopote Keetewi sanay: “O sapitodohan tonini a lingka a parod itiniay papotal no niyaroˈ, ngaˈayay ko ditaˈ itira, adihayay ko sapitodoh a kasoy.”
O maˈoningay nolitengan patalahkalay, o tapang no Papilon misaka dademakayho to parod midemak to cecay katalawan a demak. O singsi no Toronto Picudadan ci Pawlo Alan Pili sanay: “O matiliday a lalakaw no Papilon patalahkalay, palimoˈotay ko hongti mitodoh a mipatay to mitowakangay ato pakaditay ko raraw a tamdaw.” O cecay matiliday itiniay lintad no pikowan ni Nipukatnicar sanay ko sowal: “Fahkolen cangra i parod no misacongpaway, . . . ˈokemen mitodoh, todohen mipatay, songilaˈen palaˈafo . . . pacokacoken ko ˈacefel, itini marengrengay a namal palaˈafoen cangra.”
O miasipay to Fangcalay Cudad a tamdaw maharatengayho ko maˈoningay a demak i Taniil saka 3 fedengan alatek. Somowalay ko sinael, Hongti ci Nipukatnicar itini papotal no Papilon dafdaf no Tura patirengay to taˈangayay no ekim a faco. Maˈaraway ni Nipukatnicar ko tatoloay Hipray a kapah ci Satrak, ci Misak aci Apitniko manaˈayay mitaˈong to no ekim a faco, tada maketeray. Oranto ‘palimoˈotay to tamdaw mirengreng to namal i parod, ikaka to pito a tingloh ko faedet to cerid,’ ikor oya tatoloay kapah ‘mifahkolan i marengrengay ko namal a parod.’ Kawra iraay ko cecay taˈangayay ko ˈicel a coyoh milidongay toniya tatoloay kapah.—Taniil 3:1-6, 19-28.
© The Trustees of the British Museum. Licensed under CC BY-NC-SA 4.0. Source
O cecay mitodohan a lingka, itini fafekang iraay ko ngangan ni Nipukatnicar
Itini kitiraan nolitengan no Papilon mahelaay a lingka midamaay to maˈoningay no Fangcalay Cudad. Itini fafekang no adihayay lingka iraay ko sapakahemek to hongti a sowal. O cecay matoˈtoˈay a sowal: “Hongti no Papilon ci Nipukatnicar . . . Onini a lomaˈ no Hongti o kako Kasapaan a hongti ko patirengay . . . Nanay o teloteloc ako itini a mikowan.” Onini a matoˈtoˈay mahecaday to sowal no Taniil 4:30, toniya sinael malikoay ci Nipukatnicar a somowal: ‘Onini Taˈangayay Papilon mitiˈeray to taˈangayay ˈicel ako a mapatireng, tada kasapaan! Tada ciˈdilay!’