Malaˈosiayto ko Patosokan ni Hulta

IRAAY ko tatoloay a fafahiyan salikaka itiniay i Intonisiya Sancieposae a potipot mikilomaˈ. Mafanaˈay ko ˈalomanay cangranan itira, samanen miceriday cangra mitosil, padama to tamdaw cipinang to Fangcalay Cudad. ˈAyaw no pina miheca ano tayra kiso toniya potipot, mamaˈaraw cangra i tafotafokan no lawac no riyar. Kawra cowa ko mitosilay cangra i tafotafokan no lawac no riyar, ao midemakay to roma tayal.

Salakat, micomoday cangra i riyar, milinah to fakeloh patayra tafotafokan no lawac no riyar. Onini fakeloh tada taˈangayay, o roma malecaday to mali ko kataˈangay. Ikor, maroˈay cangra i ˈanengan, tano satoktok a mitoktok to taˈangayay a fakeloh malecad to fitaˈol ko kataˈangay. Dotoc, paroan nangra konini a kaemingay fakeloh i paetang, ikor macokacokay i fihil, milinah toniya fakeloh patayra i kitiraan nangra. Salikor, miparoan nangra konini fakeloh i taˈangayay a lofoc, mitala to piongpang no tolako, malo sapitomadaw to lalan a cayliyaw.

Lalomaˈ nonini tatoloay fafahiyan salikaka, o cecay ci Hulta. Palalinien tora tatosaay fafahiyan salikaka, adihayay ko toki ningra midemak tonini a tayal. Mietanan ningra a payci o sakaˈorip no paro no lomaˈ. Kawra, misaˈicel cingra matayal iraay ko cecay patosokan, o sapicakayaw to cecay pingpan, mihaen ngaˈayto cingra misaka dademak to JW Library® app. Mafanaˈay ci Hulta, onini app adihayay ko ika ato lalakaw, pakayni mitosil ato mikingkiw to Fangcalay Cudad taˈangayay ko sapadama.

Sapilaˈosiaw toniya patosokan, ci Hulta itini lalomaˈ no 45 romiˈad, to romiˈamiˈad a papacem mitongalay to tosa a toki matayal. O mitoktokan ningra a fakeloh matomesay ko cecay mimingay a tolako, salikor, misopedan ningra a payci ngaˈayayto micakay to pingpan.

Sanay ci Hulta: “Soˈlin mitoktok to fakeloh pakarorayay takowanan, adadaay ko tatelecan ato kolol, kawra irato ko pingpan ikor, madoloayto kako misaday to lalakaw no saˈopo, ngaˈayay ko minaroˈan mitosil. Kahnayayto mapawan ko adada no tireng.” Sanayho cingra, satapang no kalifongan a tatokian o pingpan taˈangayay ko pipadama cingranan, samanen o polong a demak no kasakopang itiniay i tilifi a misikay itiya. Malaˈosiayto ko patosokan ni Hulta, patadoay kita cingranan mahemek.