Salicay no Miˈosiay Tamdaw

Toya misowalan no Isaya 60:1 a ‘fafahiyan’ cima kora hani? Samaanay cingra ‘lomowad a malikat’?

Sanay ko sowal no Isaya 60:1: ‘Fafahiyanaw, ka lomowad a malikat! Samanen iraayto ko tedi no miso, o ˈodingar ni Yihofa matediay i tireng iso.’ Ano nengnengen ko fafekangay ato ilaenoay nora sinael i, onini a ‘fafahiyan’ mitoroˈay to Cion, oyanan sakakaay niyaroˈ no Yuta a Yirusalim.a (Isaya 60:14; 62:1, 2) Onini a niyaroˈ mitaypiyaway to polong a kitakit no Israil. Ora sowal ni Isaya mikidatay to tosa a salicay. Saka 1, ihacowaay ato samaanay a ‘lomowad a malikat’ ko Yirusalim? Saka 2, ora sapairasol ni Isaya wa iraho ko taˈangayay noka laˈosi han?

Ihacowaay ato samaanay a ‘lomowad a malikat’ ko Yirusalim? Ta malaholiw ko Israil tamdaw tayra i Papilon a 70 mihecaan i, itiya o Yirusalim ato sefi nira padadotocay a mahorac. Kawra toya malowid tono Mitiya ato Pirsiya ko Papilon ikor i, itiniay i lalomaˈ no Papilon a Israil tamdaw ngaˈayayto cangra patikol i nalacolan, patireng to matatodongay noka pidoko. (Icra 1:1-4) ˈAyaw no Kongyen saka 537 miheca i, 12 a kasangasaw no Israil tamdaw ilalomaˈ nangra o romaroma madimadiay tamdaw mihaenay ko demak. (Isaya 60:4) Misatapangayto cangra patoˈaya ci Yihofaan, maacang to lisin ni Yihofa, hanaca miliyaway a patireng to fangcalay sefi ni Yihofa. (Icra 3:1-4, 7-11; 6:16-22) Telocto i, o ˈodingar ni Yihofa miliyaway a malikat i Yirusalim, itini i finawlan no Kawas, itini no sapatinako malo likatayto no kalo a kitakit ko finawlan no Kawas, patedi toya cowa ka fanaˈ ci Yihofaan a tamdaw.

Kawra, ora sapairasol ni Isaya to patikolay a pipatireng cowa ka masahci a malaˈosi itini nolitengan. Hano saan ko sowal hani? O ˈalomanay a Israil tamdaw cowa ka padadotoc midofdof to Kawas. (Nihimiya 13:27; Malaki 1:6-8; 2:13, 14; Matay 15:7-9) Ikor, minaˈayay cangra ci Misiyaan Yis Kristo. (Matay 27:1, 2) Salikor itini Kongyen 70 miheca, o Yirusalim ato ilalomaˈay a fangcalay sefi miliyawayto a mapalaˈafo.

Soˈlinay haw i, paliˈayawayto ci Yihofa pasowal tonini kaadayayan a demak. (Taniil 9:24-27) Mahapinangay itini, cowa ka ciharateng ci Yihofa to sapasahciaw a palaˈosi tonini a sapairasol ni Isaya 60 fedengan i nolitengan a niyaroˈ no Yirusalim.

Ora sapairasol ni Isaya wa iraho ko taˈangayay noka laˈosi han? Hayi, iraay. Tonini sapairasol wa itini i roma a sapatinako a fafahiyan a malaˈosi, o ‘ikakarayanay a Yirusalim.’ Sowal no tarokos ci Pawlo: ‘O wina no mita cingra’ sanay. (Kalatiya 4:26) Tora ‘ikakarayanay a Yirusalim’ mitoroˈay to likakawa no Kawas i kakarayan, o madimadiay a coyoh ko palaˈosiay. O wawa nira i, mahawpay ci Yis atoya mapanilnilay no fangcalay saocor a 144,000 a Krisciyang. Onini a Krisciyang aira ko hatokel tayra i kakarayan midaˈoc a maˈorip, cangra i, palaˈosiay to ‘makoracay a kitakit,’ o ‘Israil no Kawas.’—1 Pitiro 2:9; Kalatiya 6:16.

Ora ikakarayanay a Yirusalim samaanay a ‘lomowad a malikat’ hani? Pakaynian to ifafekangay no sera a wawa a malikat, o mapanilnilay no fangcalay saocor a Krisciyang o kamayanayho itini tonini hekal cangra. Dotoc i, palalinien ita ko nalifetan nangra ato sapairasol no Isaya saka 60 fedengan.

O mapanilnilay no fangcalay saocor a Krisciyang hano ‘lalomowad’ hani? Itini Kongyen saka 2 hahekalan, sano samadoay a mitowakangay to kimad no Kaws a tamdaw malecad to pairasolan no Fangcalay Cudad malenakayto. Telocto i, o mapanilnilay no fangcalay saocor a Krisciyang marefongayto i toˈemanay, malaholiwayto no Taˈangayay Papilon o mararaway a pihakelongan. (Matay 13:37-43) O mahaenay a pakayraan padadotocayto tahini i ‘salikoray a ˈawaled.’ (Matay 13:39, 40) Itiniay i 1914 miheca a misatapang ko ‘salikoray a ˈawaled.’ Ikor caka halafin, 1919 miheca onini a Krisciyang milifokayto to pasalat, tangsolay midemak to mitosilay tayal, misatapangto a matedi.b Ikor nora i, kasakitakit kasafinacadan iraay ko pasayraay tonini a tedi a romakat, mahawpay konini a maˈosaway a Israil no Kawas, cangra i, oya misowalan no Isaya 60:3 a ‘hongti.’—Paˈarawan 5:9, 10.

Ano ikor, oya mapanilnilay no fangcalay saocor a Krisciyang o tatano ˈodingaray a pakayraan paˈdil to likat no Kawas. Tayrato cangra i kakarayan ikor, o papalaˈosi cangra malo ‘Faelohay a Yirusalim.’ O ‘Faelohay a Yirusalim’ i, o faelohay a fafahi ni Kristo, oya 144,000 ko palaˈosiay a Krisciyang, mamalacafay cangra mala hongti aci Yis ato mala saysi.—Paˈarawan 14:1; 21:1, 2, 24; 22:3-5.

To sapilahciaw to sapairasol itini Isaya 60:1 i, oyanan Faelohay Yirusalim mitamorongay to kalimlaan a ˈinorong. (Nengnengen ko Isaya 60:1, 3, 5, 11, 19, 20 ato Paˈarawan 21:2, 9-11, 22-26.) Itinito i faelohay hekal i, oya Faelohay a Yirusalim mamalacafay ci Kristoan palaˈosi to mirikecay sifo mikowan. Malecad o nolitengan a Yirusalim o satenokan no mirikecay no Israil, Faelohay Yirusalim mamalo satenokan no sifo mikowan to faelohay hekal. Oya Faelohay Yirusalim ‘mamikitini i Kawas matefad nai kakarayan’ sa i, o manan ko tatodong hani? O tatodong nonini i, oha mamisaˈicel cangra misalof to fafekangay no sera a demak sanay. ‘O likat nonini a niyaroˈ papatedi to rarakaten no kalo a kitakit a lalan,’ o papadama to midokoay to Kawas a tamdaw misahci mihepol to raraw ato patay. (Paˈarawan 21:3, 4, 24) Salikorto i, oha mamasahci a miliyaw patikol ko kihcod. Maraod ko toki, o paliˈayawan ni Isaya ato romaroma pairasolay, ‘itiyato i, miliyaw patikol ko kihcod’ o mamasongilaˈto a malahci. (Dmak 3:21) Onini tadamaanay a lintad misatapangay itini i pikowan ni Kristo, mahererekto ko Coˈmaol a noka Pikowan i, iraayto ko malefotay a minaroˈan!