Salicay no Miˈosiay Tamdaw

Sanay ko 2 Tisalonika 3:14 haratengen ko roma a tamdaw sa i, o mitoroˈan i, o dademak no malohemay malitengay, anca ono tekedan no salikaka a dademaken konini han?

Na patikami ko tarokos ci Pawlo to Tisalonika a kasakopang sanay: ‘Ano cowa ka pidofdof ko tamdaw toniya tikami i, haratengen namo cingra.’ (2 Tisalonika 3:14) Isaˈayaw, o harateng niyam i, onini o sapafeli to malohemay malitengay a sakayat. Mihaenay, ano ira i kasakopang kinapinapina marikec ko tamdaw, cowa ka pikihar to safalod no Fangcalay Cudad, alatek wa mikimad ko malohemay malitengay i kasakopang, oha patalipaˈelal to salikaka. Ikor, cowato ka ngaˈay cawmaˈen no salikaka kora tamdaw.

Kawra, o sasalofen koniya noka pinengneng. ‘Haratengen’ ko roma tamdaw sanay ci Pawlo, o mitoroˈan ningra i, ono tekedan a midemakan no salikaka sanay. Mihaenay i, cowa ko mamikiriwiˈ mikimad ko malohemay malitengay i kasakopang. Hano mihaen a misalof hani? Nengnengen itini i masamaanay a demak ci Pawlo mihadak toniya sakayat.

Mahapinangay ni Pawlo ko ‘cowa ka pidofdof to sarikec’ a tamdaw itini Tisalonika kasakopang, cowa ka pitengil cangra to sowal no Kawas. Isaˈayaw milisoˈ ci Pawlo toniya kasakopang i, sanay: ‘Cima ano cowa ka kahi matayal, cowa ka ngaˈay komaen.’ Kawra, maliyangay cangra, soˈlin ngaˈayay cangra matayal, kawra matokaayho. O roma i, micapay cangra to demak no tao. Pakayni i mahaenay a tamdaw, palimoˈot ci Pawlo to salikaka samaan ko pinengneng cangranan hani?—2 Tisalonika 3:6, 10-12.

‘Haratengen’ ko mahaenay a tamdaw, sanay ci Pawlo, o tatodong no Krisiya a sowal i, wa mikiriwiˈ a misinanot, ho eca ka mafiyor. Oniya sakayat ni Pawlo cowa aca ka pasayni i malohemay malitengy a mihadak, mahawpay ko polong a kasakopang. (2 Tisalonika 1:1; 3:6) Mihaenay i, ano o cecay tamdaw caka pidofdof to sakayat no Fangcalay Cudad i, wa ngaˈayto misaˈosi ko niyah to caka ‘picawmaˈ cingranan.’

O mahaenay a tamdaw, mahecaday to mipadengan ko ngangan nai kasakopang ko pinengneng ita han? Cowa ka mahaen, saan ci Pawlo: ‘Kamayan o salikaka han ko pinengneng, padadotocen a mirikec cingra.’ Mihaenay, kalacafayho cangranan a misaˈopo ato mitosil, kawra o saˈosi no salikaka i, cowa ko mamalacafay mihalama micawmaˈ cingranan alatek. O manan ko araaw hani? Saanho ci Pawlo: ‘Ho cinangodoen cingra.’ Mihaen ko salikaka to demak i, oya cowa ka pidofdof to sarikec a tamdaw, wa pakayni i waywayan no niyah a cinangodoen, ho misalof to waywayan.—2 Tisalonika 3:14, 15.

Anini, sasamanen ita midofdof to sakayat ni Pawlo hani? Ano saka ‘haratengen’ ko roma tamdaw i, sinanoten, soˈlinay ‘cowa ka pidofdof to sarikec’ cingra han? Ano midokaˈay ko tamdaw to falocoˈ no mita, cowa ka hecad ko kaolahan a demak no mita, anca pakayni i pisaˈosi no makapahay falocoˈ cowa ka hecad to mipiliˈan ita, cowa ka pitaypiyaw to o cowa ka pidofdof to sarikec a tamdaw cingra. Soˈlinay i, oya padetengay cowa ka pidofdof to ihkalay a sakayat no Kawas a tamdaw, o ‘cowa ka pidofdof to sarikec’ a tamdaw ko mitoroˈan ni Pawlo.

Ano mahapinangay ita ko roma Krisciyang paihkalay to cowa ka pidofdof to safalod no Kawas a waywayan i,a saˈosien no niyah, malacafay cingranan mihalama ato macacawmaˈ hokira. Ono tekedan a pisaˈosi koni, edengan o paro no lomaˈ ko mafanaˈay, cowa ko malalengo to tao. Kawra, kamayan kita kalacafay cingranan masaˈopo ato mitosil. Ano misalof cingra i, wa ngaˈayto kita macacawmaˈ cingranan.